Kasin “Labay” Mon Tulongan so Arum?

¹ Peteg ya inyansakit nen Jesus so totoo. Sanen kinerew na akating a tulongan, inyunat nen Jesus so lima to, diniwit to so laki, tan inkuan to: “Labay ko; nalinisan ka komon.” (Mar. 1:40-42) Diad antoran paraan a naalig tayo so awawey nen Jesus diad panulong ed arum?

² Interesadon Totoo: Kada membro na kongregasyon so walaan na betang diad panulong ed saray interesadon totoo pian magmaliw a managdayew nen Jehova. Sano onatendi ed saray miting iray balo ni, ibano ira tan mikabat ed sikara. Manggaway polaing pian napaseseg ira. Komendaan ira ed saray komento ra. Apresyaen iray sagpot da ed pangiyaaplika ed saray prinsipyo na Biblia diad kabibilay da. Tulongan iran makatebek ed saray posibilidad a nawalaan na saray tuan kakaaro diad loob na kongregasyon.

³ Saray Kapananisiaan: “Saray kaamong na pananisia” tayo so nagkalalo lan makanepegan na tulong tayo diad nanduruman dalan. (Gal. 6:10) Dakel so mipupuligesgesan ed saray problema ed bunigas. Diad panamegley na makapaseseg ya idalaw, niiter yo so nakaukolan dan pitutuyaw tan nayarin makatulong met diad praktikal iran paraan. Arum so nayarin nipapaarap ed arum niran kairapan ed bilay da. Ipanengneng so panagpaga yo ed sikara diad pangigana na panaon pian dengelen tan pabiskegen ira. (1 Tes. 5:14) Kaukolan met na saray mamatatken so pikokoopera tayo legan dan susumpalen iray responsabilidad da. (Heb. 13:17) Diad pangipatnag tayo na mabulos tan matulong ya awawey, sikatayoy “magmaliw a manamabiskeg a tulong” ed saray kapananisiaan tayo.​—Col. 4:11, NW.

⁴ Saray Membro na Pamilya: Nepeg a pampelengan tayo met ya aligen so panagpaga nen Jesus ed totoo diad mismon pamilya tayo. Say aralem a panagpaga so mamakiwas ed atateng a ‘bangatan so ananak da ed kadudusa tan panamilin na Katawan.’ (Efe. 6:4) Nagawaan na ananak so betang da diad aliston pamparaan sano oras la na panagaral na pamilya, saray miting ed kongregasyon, odino panagpulong. Saray angkabaleg lan ananak so makapangipatnag ed panangabagey nen Jesus diad matamoy a panulong ed atateng da a talonaan iray kairapan lapud itatakken. Diad saraya tan arum niran paraan, amin tayo so ‘makapangagamil na maridios a debosyon ed dili [tayon] sankaabungan.’​—1 Tim. 5:4, NW.

⁵ Sano aaligen tayo si Jesus diad panulong ed arum, nayarin nainawaan tayo ed saray problema tan pian napaapit so pamilya tayo tan say kongregasyon. Nagkalalo la ed amin, makapangitarok itayo na galang ed si Jehova, “say Ama na saray panangasi.”​—2 Cor. 1:3.