Pansiansiaen so Inkaganatan!
1 Amta nen Jesus a limitado so panaon to diad dalin pian sumpalen so kimey na Ama to. (Juan 9:4) Kanian, sinumpal to so ministeryo to tekep na inkaganatan, tan impasal to iray babangatan to ya ontan met so gawaen da. (Luc. 4:42-44; 8:1; 10:2-4) Saray materyal a pakainawaan et segundaryo labat ed sikato. (Mat. 8:20) Diad ontan et asumpal to so kimey a pagagawa ed sikato nen Jehova.—Juan 17:4.
2 Limitado a Panaon: Say panaon pian ipulong so maong a balita ed “sankamundoan” so limitado met. (Mat. 24:14) Ipaparungtal na propesiya ed Biblia a wala itayo la ed kapantokan a panaon na anggaan. Agmanbayag et “saray agmikabat ed Dios, tan dia ed saray ag-ontulok ed ebanghelyo na Katawan tayon Jesus . . . so mantepel na dusa a salanti andi-anggaan a kabalang.” (2 Tes. 1:6-9) Satan a panangukom so bigbiglan onsabi. (Luc. 21:34, 35; 1 Tes. 5:2, 3) Nakaukolan a naamtaan na totoo so mapeligron kipapasen da. Responsabilidad tayo a tulongan iran anapen so panangabobon nen Jehova legan a wala ni panaon.—Sof. 2:2, 3.
3 Gawaen so Anggaay Nayarian Tayo: Lapud amta na saray lingkor na Dios a “say panaon [so] apatikeyan la,” iyuuna ra so panagpulong a kimey. (1 Cor. 7:29-31; Mat. 6:33) Arum so ag-angawat ed saray oportunidad ed trabaho odino personal iran gegemtan pian dakel so panaon dan mibiang ed ministeryo. (Mar. 10:29, 30) Saray arum so mantutultuloy a manggawa na ‘daakan a kimey ed Katawan’ anggaman walaray subsubok. (1 Cor. 15:58) Dakel so tuloytuloy a mangiyaabawag ed maong a balita diad loob na pigara lan dekada. (Heb. 10:23) Papablien a maong nen Jehova iratan a panagsakripisyo bilang panuporta ed intereses na Panarian.—Heb. 6:10.
4 Say pangisentro na bilay tayo ed panagdayew ed si Jehova, a laktipen toy panagpulong a kimey, so ontulong ed sikatayo pian lawas sankanonot so agew nen Jehova. Salimbengan itayo na satan pian agnisuawi na mundo nen Satanas tan napabiskeg so determinasyon tayon pansiansiaen so masanto a kondukta. (2 Ped. 3:11-14) On, say panumpal ed ministeryo tayo tekep na inkaganatan so makapangisalba ed bilay tayo tan ed saramay ondengel ed sikatayo.—1 Tim. 4:16.