Anto so Gagala na Bilay?—Panon Mon Naromog Itan?
Kapitulo 7
Magano Lan Nasumpal so Gagala na Dios
1, 2. Akin a makaseguro itayon say Dios et onkiwas pian panganggaen to so karelmengan tan kairapan?
Anggaman inyabuloy na Dios so ag-inkayadyari tan kairapan ed andukey lan panaon manlapud punto de bista na too, agto iyabuloy a mantultuloy lawas iray mauges a kipapasen. Ibabaga ed sikatayo na Biblia a say Dios et walaay espisipikon panaon pian niyabuloy so kagawa na sarayan bengatla.
2 “Nipaakar ed amin a bengatla wala so sakey a panaon.” (Eclesiastes 3:1) Sano onsabi lay kasampotan na inggeter a panaon na Dios ed pangiyaabuloy toy karelmengan tan kairapan, diad satan sikato lay mibali ed saray pakurang na totoo. Panganggaen to so karelmengan tan kairapan tan sumpalen to so orihinal a gagala to a napano so dalin na ayadyari, maliket a pamilya na too a panggayagaay sigpot a kareenan tan kaligenan ed ekonomya diad Paraison kipapasen.
Saray Panangukom na Dios
3, 4. Panon a dedeskribien na libroy Uliran iray resulta na impibali na Dios?
3 Imanoen pay pigara ed dakel a propesiya na Biblia a manasalambit no antoy kabaliksan na pibabali na Dios, salanti, saray resulta na saray panangukom to ed pamilya na too:
4 “Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.”—Uliran 2:21, 22.
5, 6. Panon ya ipapanengneng na Salmo 37 so nagawa sano mibali lay Dios?
5 “Saray managgawa na mauges napater ira, balet saray manalagar ed Jehova tawiren da so dalin. Ta wala ni so daiset, et say bagel onandi . . . Ingen ta saray mauyamo tawiren da naani dalin; tan manliket ira a dili ed inkadaakan na kareenan.”—Salmo 37:9-11.
6 “Manalagar ka ed Jehova, tan tonton mo so dalan to, et itandoro to ka a manawir na dalin. Sano napater so saray bagel, nanengneng mo. Tandaan mo so nagnap a too, tan nengneng mo so maptek; ta wala so maligan kasumpalan ed too na kareenan. Bangbalet saray managgawa na mauges nabagbag ira a mansasapon, say kasumpalan na bagel napater.”—Salmo 37:34, 37, 38.
7. Anton maabig a simbawa so iiter na Salitay Dios ed sikatayo?
7 Sirin, lapu ed makapakelkelaw ya arapen ya onsabi ed saraman so mamibidbir ed say kanepegan na makapanyarin-amin a Manamalsa a manguley ed sikatayo, papasesegen itayo: “Say pusom unoren to komon so saray ganggan ko, ta say karukey na saray agew, tan saray taon na bilay, tan kareenan, niarum ira ed sika.” Diad tua, niarum so magnayon a bilay ed saraman so malabay a manggaway linawa na Dios! Kanian, sisimbawaen itayo na Salitay Dios: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo, sikato so bidbiren mo, et sikato itonton to so saray basbas mo.”—Uliran 3:1, 2, 5, 6.
Pananguley na Dios Manlapud Tawen
8, 9. Diad anton paraan a linisan na Dios iyan dalin?
8 Sumpalen na Dios iyan panaglinis ed dalin diad panamegley na sankaabigan a gobierno a niwala’d katooan ed kapiganman. Satan so gobiernon mangisisindag na mangatatawen a kakabatan lapud manguley itan manlapud tawen diad silong na panangiwanwan na Dios. Tan satan a mangatatawen a Panarian so mangekal ed amin a pormay pananguley na too ed dalin. Aglan balot naikdan lamet na pankanawnawa so totoo a manalin manguley a biig ed Dios.
9 Nipaakar ed saya oniay imbaga na propesiya ed Daniel 2:44: “Dia ed saray agew naani na saratan ya arari [kaplesan iran gobierno], say Dios na tawen mamaalagey naani na sakey a panarian [dia ed tawen] ya anggan kapigan agnaani naderal tan say panag-uley to agnaani niiter ed sananey a baley [aglan balot naabuloyan so totoon manuley a biig ed Dios]. Balet buybuyaken to naani tan upoten to naani so saraya ya amin a panarian [a wala natan], et sikato so mansiansia lawas.”—Nengnengen met so Apocalipsis 19:11-21; 20:4-6.
10. Akin a makaseguro itayo a diad silong na mangatatawen a Panarian na Dios et anggapo lan balot so inkauges ed pananguley?
10 Kanian, aglan balot nawalaan lamet so katooan na mauges iran porma na pananguley, ta kayarin panganggaen na Dios iyan sistema, aglan balot niwala so pananguley na too a biig ed sikato. Tan say manguley a Panarian a manlapud tawen so agla magmaliw a mauges, lapud say Dios so Manangigapo tan Manangipreserba ed satan. Imbes, onkurang itan diad panmaongan a tuloy na uuleyan ton totoo. Say linawa na Dios so nagawa la ed intiron dalin ontan met ed tawen. Satan no akin ya imbangat nen Jesus iray babangatan ton manpikasi ed Dios: “Onsabi pa komon so panarian mo. Nagawa komon so linawam, unong ed tawen, ontan met ed dalin.”—Mateo 6:10.
Kaunongay Kinaasinger Tayo?
11. Iner so pakaromogan tayo ed Biblia na saray propesiya ya ontulong ed sikatayon manetermina no kaunongan itayo lan kaasingger ed anggaan na sayan sistema?
11 Kaunongay kinaasingger tayo ed anggaan na sayan agmakapenek a sistema na bengabengatla tan say igapoy balon mundo na Dios? Say propesiya na Biblia so malinew a mangiter ed sikatayo na ebat. Singa bilang, impasakbay a mismo nen Jesus no antoy imanoen ta pian naseguro tayoy talindeg tayo a mitunosan ed, singa impangibaga na Biblia, “[say] anggaan na mundo.” Saya so nirekord ed kapitulo 24 tan 25 na Mateo, Marcos 13, tan Lucas 21. Ontan met, unong a nirekord ed 2 Timoteo kapitulo 3, impasakbay nen apostol Pablo a wala naani so panat na panaon a tinawag a “saray kaunoran ya agew” sano saray nanduruman ebento so nagkalalon mamekder no iner lay kawalaan tayo ed agus na panaon.
12, 13. Anto so imbaga di Jesus tan Pablo nipaakar ed panaon na anggaan?
12 Inkuan nen Jesus a sayan panat na panaon so onggapo ed sarayan ebento: “Ontalindeg naani nasyon sumpa ed nasyon, tan panarian sumpa ed panarian; tan wala ra naani eraeras tan yegyeg ed nambabangil a pasen.” (Mateo 24:7) Ipapanengneng na Lucas 21:11 a binitla to met a “dia ed nambabangil a pasen . . . salot.” Tan impasakbay to met, ya “ondakel naani kaugsan.”—Mateo 24:12.
13 Impasakbay nen apostol Pablo: “Ingen kabaten mo so saya, a dia ed saray kaunoran ya agew onsabi so saray panaon a maatap. Ta saray totoo sikara naani so mangaro ed saray lamalaman da, maaro ra na pilak, managpasirayew, atagey a linawa, maayew, matulay ed saray kaatengan da malamang, aliwa ran masimpit, anggapo so aro ra a nianakan, anggapo so panangasi’ra, managpauges, aliwa ran maadia, maruksa ra, maingongot ed saray maabig, managliput, mayu-uges, mapasang, maaro ed saray likeliket, a lalo nen say dia ed Dios; a wala so nengneng da ya inkasanto, et ingen itapat da so pakayari na sayan inkasanto . . . Saray totoo a mauges tan saray managsaol onuges laran onuges, a managsaol ira, tan nasaol ira met a dili.”—2 Timoteo 3:1-5, 13.
14, 15. Panon a pekderan na saray ebento ed sayan koma-20 siglo a talagan wala iti la ed saray kaunoran ya agew?
14 Nagagawa la kasi iratan a bengatla ya impasakbay di Jesus tan Pablo ed panaon tayo? On, seguradon ontan. Say Guerra Mundial I et sankapalaloan a bakal angga ed saman a panaon. Satan so inmunan sankamundoan a bakal tan baleg so angumanan to’d modernon awaran. Kabansag na satan a bakal iray kakisiran na tagano, epidemya na sakit, tan arum nin kalamidad. Saraman ya ebento nanlapulad 1914 a manpatuloy so, “gapo na kairapan,” unong ya inkuan nen Jesus. (Mateo 24:8) Inggapo na saratan so nipasakbay a panat na panaon ya atawag a “saray kaunoran ya agew,” say gapoan na unor a kailalakan sano iyabuloy na Dios so karelmengan tan kairapan.
15 Nayarin kabisadom iray ebento ed koma-20 siglo. Antam iray linmesan kaguloan. Ngalngalin 100 milyon a totoo so angurat ed saray bakal. Nilasus milyon ni so inatey lapud eras tan sakisakit. Agnabilang iran bilay so tinigway na saray yegyeg. Say agpangikabkabilangan ed bilay tan kayarian so onloloor. Say takot ed krimen so nagmaliw lan kabiangan na agew-agew a bilay. Saray estandarte ed moral so ibabaliwala la. Say idarakel na populasyon so mangiyaarap na saray problema ya agnasolbar. Dederalen na polusyon so kalidad na bilay tan iiyan to ni ingen itan ed kapeligroan. Peteg, wala ti la ed saray kaunoran ya agew nanlapulad 1914 tan manasingger ed kapantokan na saray propesiya na Biblia nipaakar ed panaon tayo.
16. Kaunongan karukey so panaon a laknaban na saray kaunoran ya agew?
16 Kaunongan nin kabayag iyan panat na panaon na sarayan kaunoran ya agew? Inkuan nen Jesus nipaakar ed panaon a makasagmak na “gapo na kairapan” nanlapulad 1914 a manpatuloy: “Sayan kapolian [“kailalakan,” NW] agnaani napaso angga ed kagawa na sarayan bengatla.” (Mateo 24:8, 34-36) Kanian, amin a kabiangan na saray kaunoran ya agew so nepeg a nagawa ed loob na sakey a kailalakan, say kailalakan na 1914. Kanian arum a totoon manbibilay nen 1914 so mabilay ni sano mangangga iyan sistema. Satan a kailalakan na totoo natan so matakken lan tuloy, pakapatnagan a daiset lay nakekeraan a panaon sakbay a panganggaen na Dios iyan peles a sistema na bengabengatla.
17, 18. Anton propesiya so mangipapanengneng ya asingsingger tayo la ed sayan anggaan na mundo?
17 Sakey nin propesiya a mangipapanengneng ya asingsingger lay anggaan na sayan sistema et inter nen apostol Pablo, ya angipasakbay: “Say agew na Katawan onsabin singa matakew ed labi. Sano ibabaga ray: ‘Kareenan tan andi paga! insan biglan kaderal so onsabi ed sikara . . . tan ag-ira makaliktar.”—1 Tesalonica 5:2, 3; nengnengen met so Lucas 21:34, 35.
18 Natan et anampot lay Cold War, tan nayarin agla masyadon pakasesgaan so internasyonal a bakal. Kanian nayarin ipasen na nasyones ya asingsingger la ra ed sakey a balon mundon uksoyan. Balet sano ipasen dan ontatalona iray sagpot da, kabaliksan na satan so kabaliktaran na iisipen da, ta satan so pinal a sinyal ya asingger lay paneral na Dios ed sayan sistema. Nonoten, saray mapolitikan negosasyon tan paknaan so agmakakagaway antokaman a peteg a pananguman ed totoo. Agda gagawaen a manaaroan so totoo. Tan agnapatunda na saray lider ed mundo so krimen, nisay papagiten da so sakit tan ipapatey. Kanian agkayo manmamatalek ed antokaman a kagagawa na kareenan tan kaligenan na too tan isipen a sayan mundo so mamaarap la ed panolbar ed saray problema to. (Salmo 146:3) Say peteg a kabaliksan na satan a kelyaw et sayan mundo so asingsingger la’d kadederal to.
Panangipulong na Maong a Balita
19, 20. Anton propesiya nipaakar ed panagpulong ed saray kaunoran ya agew so nanenengneng tayon nasusumpal?
19 Sakey nin propesiya a mangipapanengneng a wala ti la’d saray kaunoran ya agew nanlapulad 1914 et samay inter nen Jesus: “Saya ya ebanghelyo kaukolan a nipulong ya unona ed saray amin a nasyones.” (Marcos 13:10) Odino singa ed impangibaga na Mateo 24:14: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi anggaan.”
20 Natan ya agnin balot agawa ed awaran, say maong a balita na anggaan na sayan mundo tan say onsasabin Paraison balon mundo ed silong na Panariay Dios so nipupulong la ed intiron dalin. Sioparay manpupulong? Saray minilyon a Tastasi nen Jehova. Sikaray manpupulong ed kada bansa ed dalin.
21, 22. Anto, nagkalalo la, so mangibiig ed Tastasi nen Jehova bilang tuan Kristianos?
21 Niarum ni ed panagpulong da nipaakar ed Panarian na Dios, saray Tastasi nen Jehova so manuugali diad paraan a mangibiig ed sikara bilang tuan papatumbok nen Jesus, ta inyabawag to: “Lapu ed saya amin a too nabirbiran da ya sikayoray babangatan ko, no wala so aro yo ed sakey tan sakey.” Kanian, nankakasakey iray Tastasi nen Jehova diad sankagloboan ya impanaagi ed panamegley na agnabagbag a bedber na aro.—Juan 13:35; nengnengen met so Isaias 2:2-4; Colosas 3:14; Juan 15:12-14; 1 Juan 3:10-12; 4:20, 21; Apocalipsis 7:9, 10.
22 Panisiaan na Tastasi nen Jehova so ibabaga na Biblia: “Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35) Momoriaen day kapara ran Tastasi ed amin a bansa bilang espiritual ya agagi, antokamay rasa odino kolor da. (Mateo 23:8) Tan say bengatlan satan a sankagloboan ya impanaagi so wala ed mundo natan so mangaarum na ebidensia a say gagala na Dios so magano lan nagawa.