Anto so Gagala na Bilay?—Panon Mon Naromog Itan?
Kapitulo 8
Manbilay a Maando Diad Paraison Dalin
1, 2. Anto kasin klase na bilay so wala ed silong na uley na Panarian na Dios?
1 Anto kasi klase na bilay sano ekalen lay Dios so karelmengan tan kairapan ed dalin insan to itarok so balon mundo to diad silong na maaron panangontrol na mangatatawen a Panarian to? Insipan na Dios ya ‘ibuskag to so lima to tan peneken to so pilalek na amin a mabilay a bengatla.’—Salmo 145:16.
2 Antoray makatunongan a pilalek mo? Agta say maliket a bilay, makapenek a trabaho, daakan a materyal, marakep a kaliberliber, deen ed amin a totoo, tan bulos manlapud ag-inkahustisya, sakit, kairapan, tan ipapatey? Tan komusta met so magayagan espiritual a panmoria? Amin na saratan a bengatla so magano lan nagawa diad silong na pananguley na Panarian na Dios. Imanoen so ibabaga na saray propesiya na Biblia nipaakar ed makapakelaw iran bendision ya onsabi ed satan a balon mundo.
Say Katooan so Walad Nagnap a Kareenan
3-6. Antoy mangipaseguro ed sikatayon saray totoo et nawalaan na deen diad balon mundo?
3 “[Say Dios] patundaen to so bakabakal angga ed sampot na dalin; sikato balbalen to so bekang, tan puteren to a mankadua so gayang; sikato ipool to so karusa [a parad bakal] ed apuy.”—Salmo 46:9.
4 “Pitpiten da naani so saray kampilan da a pagmaliwen da a dingding na lukoy, tan saray gayang da a komkompay; say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.”—Isaias 2:4.
5 “Saray mauyamo tawiren da naani dalin; tan manliket ira a dili ed inkadaakan na kareenan.”—Salmo 37:11.
6 “Say amin a dalin wala ed painawa, tan sikato so mareen; ombutay iran mankankanta.”—Isaias 14:7.
Nagaway Deen ed Too tan Ayayep
7, 8. Antoy niwalan deen ed baetan na totoo tan ayayep?
7 “Say lobo miayam naani ed kordero, tan say leopardo miakdol naani ed kanding; et say kilaw na baka tan kilaw na leon tan say pinataba mantitipon ira; et sakey a melag ya ugaw so mangitonton ed sikara. Et say baka tan say oso mankabkab ira naani; saray kilaw da ondukol ira a mantitipon; et say leon mangan naani na dayami a singa say baka. Et say mansoso ya ugaw manggalaw naani ed abot na uleg ya aspid, tan say pinakso ya ugaw ikaot to naani lima to ed balaong na tadyuko. Ag-ira mamaunong odino mamagbag.”—Isaias 11:6-9.
8 “Manggawa ak naani na sipan a nipaakar ed sikara a pati saray ayep ed uma, tan pati saray manok ed saray tawen, tan saray korongkorong a bengabengatla ed dalin . . . padukolen kora naani a maligeligen.”—Oseas 2:18.
Ayadyarin Bunigas, Andi-Anggaan a Bilay
9-14. Deskribien iray kipapasen na bunigas diad balon mundo.
9 “Satan la nilukas so saray mata na bulag, tan say layag na saray telek nibuang naani. Satan la manlukso so piley a singa sakey ya ulsa, tan say dila na emel mankanta naani.”—Isaias 35:5, 6.
10 “[Say Dios] punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot.—Apocalipsis 21:4.
11 “Say manayam agto naani ikuan: ‘Mabeblay ak.’”—Isaias 33:24.
12 “Say laman to sikato naani tadtariwa nen say laman na ugaw; sikato ompawil ed saray agew na kaugawan to.”—Job 33:25.
13 “Say langkap ya andi bayar na Dios say bilay ya andi-angga ed Kristo Jesus a Katawan tayo.”—Roma 6:23.
14 “Siopaman a manisia ed sikato . . . [ni]wala so bilay ton andi-anggaan.”—Juan 3:16.
Nabilay Iray Inaatey
15-17. Antoy ilalo parad saramay inaatey la?
15 “Wala naani kioli ed bilay na saray matunong tan agmatunong.”—Gawa 24:15.
16 “Onsabi oras, ya amin so saray wala ed saray lubok [pakanodnotan na Dios] narengel day bosis to. Et ompaway ira.”—Juan 5:28, 29.
17 “Say dayat initer to so inaatey a wala ed sikato; tan say patey tan say Hades [say lubok] initer da so inaatey a wala ed sikara.”—Apocalipsis 20:13.
Say Dalin, Sakey a Mabunan Paraiso
18-22. Anto lay pagmaliwan na intiron dalin?
18 “Wala naani mayamaya na bendision. Et say kiew ed uma mamapaway naani na bunga to, tan say dalin mangiter naani na munat to, et mataletalek ira naani ed dalin da.”—Ezequiel 34:26, 27.
19 “Insan ed satan inter na dalin so bunga to; et say Dios, a say Dios tayo a dili, bendisionan to itayo naani.”—Salmo 67:6.
20 “Say kalawakan tan say amagan dalin magayaga ra naani; et say kabueran a lawak manliket naani, tan manbolaklak a singa bolaklak.”—Isaias 35:1.
21 “Saray palandey tan saray pukdol onarakak ira naani ed arapan yo a mankankanta ra; tan amin a kakiewan ed saray uma pantipaken da naani so saray lima ra. Dia ed pasen na sabitan ontubo naani so abeto; et dia ed pasen na tala ontubo naani so arrayan.”—Isaias 55:12, 13.
22 “Wala ka ed siak dia ed Paraiso.”—Lucas 23:43.
Marakep a Panabungan Parad Amin
23, 24. Antoy mangipaseguro ed sikatayo a niwalay magenap a marakep a panabungan parad amin?
23 “Ipaalagey da naani so saray abung, tan manayam ira naani . . . Ag-ira naani mangipaalagey, et sananey so manayam; ag-ira mantanem et sananey naani mangan. . . . Saray pinilik manliket ira naani a maando ed saray gawa na saray lima ra. Sikara ag-ira mankimey na maapa, ag-ira naani mananak a nipaakar ed kaderya.”—Isaias 65:21-23.
24 “Onyurong ira naani balang sakey ed silong na kiew to ya ubas tan ed silong na kiew to ya igos; et anggapo naani manaktakot ed sikara.”—Miqueas 4:4.
Makapambilay Kan Maando Diad Paraiso
25. Anton makapakelaw ya ilalo so niwala ed sikatayo ed arapen?
25 Agaylan makapakelaw ya ilalo ed arapen! Agaylan inkapeteg a gagala ed bilay so niwala natan sano niletneg ed putel ya ilalo a diad balon mundo na Dios et amin a problema natan so maando lan onlabas! “Saray inmuna a bengatla ag-ira la nanonotan, ag-ira la onla ed nonot [“puso,” NW].” (Isaias 65:17) Tan agaylan makaligliwa so pakaamta a say bilay la’d satan et magnayon: “Inakmon [na Dios] so patey ed ando lan ando.”—Isaias 25:8.
26. Anto so tombok ed pambilay a maando ed balon mundo na Dios?
26 Kasin gabay moy manbilay a maando ed asingsingger lan Paraison balon mundo? ‘Anto ni kaukolan kon gawaen pian nagamoran koy pabor na Dios ed anggaan na sayan mundo tan manbilay a mamaarap ed balon mundo to?’ so nitepet mo. Kaukolan mon gawaen so sinaglawi nen Jesus ed pikakasi to’d Dios: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesus-Kristo.”—Juan 17:3.
27. Antoy nepeg mon gawaen pian makapibiang ed gagala na Dios?
27 Sirin, mangala na Biblia, tan paneknekan mo no antoy abasam ed sayan brosyur. Anapen so arum a manaaral tan mangibabangat ed sarayan katuaan ed Biblia. Ontaynan ed mansimpisimpitan iran relihyon a mangibabangat tan manggagawa ed saray bengatlan sumlang ed Biblia. Aralen no panon a sika, kaiba so minilyon ya arum a manggagawa la na linawa na Dios, so makapibiang ed gagala na Dios a say totoo so manbilay a maando diad paraison dalin. Tan ipapuso no antoy iyaabawag na apuyanan a Salitay Dios nipaakar ed asingger lan arapen: “Say mundo mangangga, tan saray penel to; sabalet so mangunor ed linawa na Dios onsiansia lawas.”—1 Juan 2:17.