Anto so Gagala na Bilay?—Panon Mon Naromog Itan?
Kapitulo 6
No Anto so Pinmalalo
6, 7. Antoy agawa ed sikara di Adan tan Eva sanen sinumlang day ganggan na Dios?
6 Manlapud akaunan rekord na Biblia, naamtaan tayo ya aggagala na Dios a manirap odino ompatey so totoo. Say inmunan atateng tayo, di Adan tan Eva, so inatey lambengat lapud tinmunganga ira ed Dios. (Genesis, kapitulo 2 tan 3) Sanen tinmunganga ira, agda la gagawaen so linawa na Dios. Inmarawi ra’d panangasikaso na Dios. Lapud satan, insian day inkasikara manlapud Dios, “[say] subol na bilay.”—Salmo 36:9.
7 Singa sakey a makina ya ontayam tan ontunda sano agla akakonekta ed koryenti, saray laman tan kanonotan da so kinmapuy. Bilang resulta, di Adan tan Eva so kinmapuy, tinmakken, tan diad kaunoran et inatey. Anto lay agawa ey? Pinmawil ira ed nanlapuan da: “Lapud sika et dabok ka, dia ed dabok ompawil ka.” Pinasakbayan ira na Dios a mansumpal ed ipapatey so itunganga ed saray ganggan to: “Ompatey ka.”—Genesis 2:17; 3:19.
8. Panon ya akaapekto so kasalanan na inmunan atateng tayo ed pamilya na too?
8 Aliwa labat a say inmunan atateng tayo so inatey noagta amin a kapolian da, say intiron rasa na too, so manasagmak met na ipapatey. Akin? Lapud unong ed saray ley na genetics, natawir na ananak iray walna na atateng da. Tan say atawir na amin ya ananak na inmunan atateng tayo et say ag-inkayadyari tan ipapatey. Ibabaga ed sikatayo na Roma 5:12: “Unong a say kasalanan linmoob ed mundo lapu ed sakey a too [si Adan, inmunan ateng na katooan], tan say patey lapu ed kasalanan; et say patey ed satan linma ed amin a too, ta amin nankasalanan [diad impakatawir na ag-inkayadyari, salanti, makasalanan iran kiling].” Tan lapud say kasalanan, ag-inkayadyari, tan ipapatey so amta labat na totoon bengabengatla, momoriaen na arum iratan bilang natural tan agnapaliisan. Ingen, say orihinal a totoo so pinalsa a walaay kapasidad tan pilalek a manbilay a maando. Satan no akin a pirmin nadidismaya so maslak a totoo no naamtaan dan say bilay da et panganggaen na ipapatey.
Akin ya Ontanlan Kabayag?
9. Akin ya inyabuloy na Dios so kairapan ed ontanlan kabayag?
9 Akin ya inyabuloy na Dios a gawaen na totoo so labalabay da ed ontanlan kabayag? Akin ya inyabuloy toy kairapan a niwala ed amin na sarayan siglo? Say sakey a makanan rason et linmesay importantin tuloy ya isyu: Siopa so makanepegan a manguley? Kasin say Dios so nepeg a Manuley ed totoo, odino nayarian da kasin uleyan a matalona so inkasikara a biig ed sikato?
10. Anton abilidad so niiter ed totoo, tekep na anton responsabilidad?
10 Apalsa so totoo a walaan na bulos linawa, salanti, walaay abilidad a manpili. Ag-ira agawan singa robots odino singa ayayep, a manunan niwawanwan lapud nisipor a kakabatan. Kanian makapanpili so totoo ed labay dan panlingkoran. (Deuteronomio 30:19; 2 Corinto 3:17) Diad ontan, isisimbawa na Salitay Dios: “Unong ed bulos kayo, ya aliwa a say aagamilen yo ya inkablos sikato so sakbong na kaugsan, noag ingen lapu ed aripen kayoy Dios.” (1 Pedro 2:16) Balet, anggaman walaay totoo na makapakelkelaw a langkap na bulos a panpili, nepeg dan awaten iray pansumpalan na pinili ran kiwas.
11. Antoy alenleneg a paraan pian naamtaan no kasin say kurang a biig ed Dios so matalona?
11 Aliway pinili na inmunan atateng tayo. Pinili ray ombiig ed Dios. Tua, nayarian na Dios a pateyen a tampol so rebelyoson inmunan sankaparis kayari dan lingon inusar so bulos linawa ra. Balet ag-itan mangareglo ed suppiat nipaakar ed kanepegan na Dios a manguley ed totoo. Lapud labay na inmunan sankaparis ya ombiig ed Dios, say tepet a nepeg a naebatan et: Kasin satan a kurang so manresulta ed maliket, matalonan bilay? Say alenleneg a paraan pian naamtaan itan et abuloyan so inmunan atateng tayo tan saray ilalak da a mankurang a bukor, lapud ta satan so pinili ra. Ipanengneng na panaon no kasin saray totoo so apalsa a magmaliw a maaligwas no uleyan day inkasikara a biig ed Manamalsa ra.
12. Panon so impanetermina nen Jeremias ed uley na too, tan akin ya ontan?
12 Amta na managsulat na Biblia, a si Jeremias, so pansumpalan. Diad impangiwanwan na makapanyarin masanton espiritu na Dios, odino aktibon puersa, matua ton insulat: “O Jehova, amtak a say dalan na too anggapo ed sikato lanlamang, aliwa a wala ed too a manakar a mangitonton ed saray kurang to. O Jehova dusaen moak.” (Jeremias 10:23, 24) Amta ton saray totoo so nepeg a paigiya ed mangatatawen a kakabatan na Dios. Akin? Lapud agpinalsa na Dios so totoo a magmaliw a matalona no biig manlapud panangigiya to.
13. Antoy andi-duaruwan impanengneng na saray resulta na nilibon taon ya uley na too?
13 Andi duaruwan ipapanengneng na saray resulta na nilibon taon ya uley na too ya aliwan parad totoo ya iwanwan so dilin kurang da a biig ed Manamalsa ra. Diad impanali ed satan, anggapoy natetel da noagta sikaran dili ed makadesyang iran nansumpalan. Nilinew iya na Biblia: “Say Dampay [Dios], ayadyari so gawa to; ta kaptekan so saray amin a dalan to. Sakey a Dios a napanmatalkan tan anggapo so kaugsan, sikato so matunong tan maptek. Mauges so ginawa ra ed sikato, sikara agto’ra anak, sikato so akabalawan da.”—Deuteronomio 32:4, 5.
Magano lan Onsalet so Dios
14. Akin ya agla bayagen na Dios so isalet to ed saray pakurang na too?
14 Diad impangiyabuloy na magenap a pakapatnagay insaew na uley na too ed inlabas na saray siglo, nayari la natan ya onsalet so Dios ed saray pakurang na too tan panganggaen so kairapan, ermen, sakit, tan ipapatey. Diad impangiyabuloy ed totoon makarateng ed pantok na saray agawaan da ed siensia, industriya, medisina, tan arum niran lawak, agla kaukolan ya iyabuloy na Dios so dakel nin siglo ya onlabas parad totoon biig ed Manamalsa ra pian ipanengneng no kasin nayarian dan itarok so mareen, singa paraison mundo. Agda agawaan tan agda nayarian. Say imbiig ed Dios so nanresulta ed aliwliwa, kabkabusol, makapatey a mundo.
15. Anton simbawa na Biblia so talinengen tayon maong?
15 Anggaman walaray masimoon a manuley a nanpilalek ya ontulong ed katooan, agtinmalona iray sagpot da. Inerman natan et wadtan so ebidensia na kakukusboy pananguley na too. Satan no akin ya insimbawa na Biblia: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong.”—Salmo 146:3.