Anto so Gagala na Bilay?—Panon Mon Naromog Itan?
Kapitulo 5
Say Bilay so Walaan na Engranden Gagala
1, 2. Panon tayon nibagan iyaansakit itayo na Dios, tan iner so tuplegan tayo ed saray ebat ed tepetepet nipaakar ed bilay?
Say inkagawa na dalin tan saray mabilay a bengatla so mangipapanengneng a say Manamalsa ra so Dios na aro a talagan mangiyaansakit. Tan say Salita to, say Biblia, so mangipapanengneng a sikato so mangiyaansakit; iikdan to itayo na sankaabigan iran ebat nipaakar ed tepetepet ya: Akin a wadia itayo ed dalin? tan, Iner so laen tayo?
2 Kaukolan tayon sukimaten so Biblia parad saratan ya ebat. Ibabaga na Salitay Dios: “No sikato so anapen yo, sikato so naromog yo, balet no sikato so ikaindan yo, sikayo so ikaindan to.” (2 Awaran 15:2) Kanian sirin, anto so ipaparungtal na pansukimat ed Salitay Dios nipaakar ed gagala to parad sikatayo?
No Akin a Pinalsa na Dios so Totoo
3. Akin a pinalsa na Dios so dalin?
3 Ipapanengneng na Biblia ya imparaan na Dios so dalin a nagkalalo lan sankanonot so totoo. Ibabaga na Isaias 45:18 so nipaakar ed dalin a “pinalsa na [Dios] ya aliwa a kibalatar [noagta] tinibukel to ta pian sikato so panayaman.” Tan intarya to so dalin tekep na amin a bengatlan nakaukolan na too, aliwa labat a niwala, noagta pian sigpot a panggayagaay bilay.—Genesis, kapitulo 1 tan 2.
4. Akin a pinalsa na Dios so inmunan totoo?
4 Diad Salita to, imbaga na Dios a pinalsa to so inmunan totoo, di Adan tan Eva, tan imparungtal to so walad kanonotan to parad pamilya na too. Inkuanto: “Manggawa itayo na too a kaulibay na inalageyan tayo, a singa say impanuulibay tayo; tan iter ed sikara so pakauley ed saray dayat, tan pakauley ed saray manok ya atap na dagem, tan pakauley ed ayayep ya amo, tan pakauley ed amin a dalin, tan pakauley ed amin a bengatla a korongkorong ed dalin.” (Genesis 1:26) Saray totoo so mangasikaso ed “amin a dalin” tan saray pinalsan ayayep.
5. Iner so angipasenan ed inmunan totoo?
5 Nanggawa so Dios na baleg, singa paraison harden diad lugar a tinawag ya Eden, a walad Pegley Bukig. Insan “impasen to [so too] ed loob na tanamanan na Eden pian apigden to tan imatonan to.” Satan so sakey a paraiso a lugan toy amin a nakaukolan a kanen na inmunan totoo. Tan laktipen toy “amin a kiew a makaroyo ed mata tan maong ira a kanen,” ontan met ed arum a tanamanan tan dakel iran makapalikliket a nengneng na bilay na ayayep.—Genesis 2:7-9, 15.
6. Apalsa so totoo a walaan na antoran mental tan pisikal a kualidad?
6 Say laman na inmunan totoo so pinalsan ayadyari, kanian ag-ira mansakit, ontatken, odino ompatey. Pinagamoran met ira na arum a kualidad, singa say bulos linawa. Say paraan ya inkagawa ra et nipaliwawa ed Genesis 1:27: “Say Dios pinalsa to so too ed indengan ton dili, dia ed indengan na Dios sikato so pinalsa to; say laki tan say bii pinalsa tora.” Lapud pinalsa itayo unong ed indengan na Dios, naikdan itayo na aliwa labat a pisikal tan mental iran atributos noagta ontan met ed moral tan espiritual iran aspekto, tan saraya so nepeg a napenek ta pian sikatayoy peteg a maliket. Itarya na Dios so nakaukolan pian panoan iratan a pankaukolan ontan met ed pankaukolay tagano, danum, tan dagem. A singa inkuan nen Jesus, “aliwa a tinapay labat so napambilay na too noag say amin a salitan ombesngaw ed sangi’ Dios.”—Mateo 4:4.
7. Anton ganggan so inter ed inmunan sankaparis?
7 Sakey ni, inter na Dios so makapakelkelaw a ganggan ed inmunan sankaparis leleg a wadman ira ed Eden: “Manbunga kayo, tan ondarakel kayo, tan makmakan yo so dalin.” (Genesis 1:28) Kanian nayarian day manparakel tan makapangiyanak na ayadyarin ananak. Tan leleg ya ondakel so populasyon na too, nawalaan iray makapaliket a kimey ed pamaawang na saray ketegan na orihinal a singa parki, paraison lugar na Eden. Diad kaunoran, say intiron dalin so magmaliw a paraiso, a panayaman na ayadyari, maliket a totoo a makapambilay a maando. Ibabaga ed sikatayo na Biblia a kayari na impanggawa ed sayan amin, “say Dios anengneng to so amin a bengatla a ginawa to, et nia! maong iran tuloy.”—Genesis 1:31; nengnengen met so Salmo 118:17.
8. Panoy pangasikaso na totoo ed dalin?
8 Mapatnag ya usaren na totoo so apatulok a dalin parad kagunggunaan da. Balet saya so gawaen ed responsablin paraan. Saray totoo so kaukolan a magmaliw a marespeton inkargado ed dalin, aliwan managderal ed satan. Say inkaderal na dalin a sankanengneng tayo natan et sumpad linawa na Dios, tan saraman so mibibiang ed satan so onkokontra ed gagala na bilay ed dalin. Nadusa ira ed satan, ta ibabaga na Biblia a “bagbagen na [Dios] so saray mamagbag ed dalin.”—Apocalipsis 11:18.
Siansia Nin Gagala na Dios
9. Akin a matalek itayo a nasumpal so gagala na Dios?
9 Diad ontan, nanlapulad gapo et gagala la na Dios parad ayadyarin pamilyay too a manayam ed dalin a maando ed sakey a paraiso. Ta satan so siansia nin gagala to! Ag-onsaew, satan a gagala so nasumpal. Ibabaga na Biblia: “Si Jehova na saray ehersito insamba to, a kuanto: ‘Petepeteg, singa ninonot ko, ontan so nagawa; et singa pinegdat ko, ontan so mansiansia naani.’” “On, sinalitak, gawaen ko naani ya onlabas met; ninonot ko, sikato naani met so gawaen ko.”—Isaias 14:24; 46:11.
10, 11. Panon so impanaglawi di Jesus, Pedro, tan say salmistan David nipaakar ed Paraiso?
10 Sinaglawi nen Jesu-Kristo so nipaakar ed gagala na Dios ya ipawil so paraiso diad dalin sanen inkuanto ed sakey a lakin manpirawat parad arapen: “Wala ka ed siak dia ed Paraiso.” (Lucas 23:43) Sinaglawi met nen apostol Pedro so onsabin balon mundo sanen impasakbay to: “Unong ed sipan [na Dios] alagden tayo so saray tawen a balo [sakey a balon uksoyan na gobierno a manuuley manlapud tawen] tan dalin a balo [sakey a balon mangaraldalin a sosyedad], a sikara so panaayaman na katunongan.”—2 Pedro 3:13.
11 Insulat met nen salmistan David so nipaakar ed onsasabin balon mundo tan kaunongan kabayag a mansiansia. Impasakbay to: “Say matunong tawiren to so dalin tan manayam diman lawas.” (Salmo 37:29) Satan no akin ya insipan nen Jesus: “Mapalar iray mauyamo; ta tawiren day dalin.”—Mateo 5:5.
12, 13. Sumaryoen so engranden gagala na Dios parad katooan.
12 Agaylan engranden iilaloan itan, pambilay a maando diad paraison dalin a bulos manlapud amin a karelmengan, krimen, sakit, ermen, tan ot-ot! Diad unor a libro na Biblia, susumaryoen na mapropetikon Salitay Dios iyan engranden gagala diad impangiyabawag: “Punasen [na Dios] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot. Ta saray una a bengatla sikara so linmabas la.” Intuloy to: “Tan say manyurong ed trono kuanto: ‘Nia! Siak gawaen ko a balo so saray amin a bengatla.’ Tan kuan to ed siak: ‘Isulat mo; ta saraya a salita sikara so matoor tan matua.’”—Apocalipsis 21:4, 5.
13 On, sankanonot na Dios so engranden gagala. Satan so sakey a balon mundo na inkatunong, sakey a magnayon a paraiso, ya impasakbay na Samay makayari tan manggawa ed saray sipan to lapud ‘saray salita [to] so matoor tan matua.’