Anto so Gagala na Bilay?—Panon Mon Naromog Itan?
Kapitulo 6
Akin a Mapalalo lay Kairapan tan Ag-inkahustisya?
1, 2. Lapu ed asagmakan na too, antoran tepet so nayarin itepet?
Balet, no ginagala na Supremon Persona a manbilay so ayadyarin totoo ed dalin a maando diad paraison kipapasen tan no gagala to ni itan, akin ya anggapoy paraiso natan? Imbes, akin a sasagmaken na katooan ed dakel lan siglo so kairapan tan ag-inkahustisya?
2 Andiay suppiat, say awaran na too so napno na sinagem lapu ed bakal, imperyalistikon panangonkesta, panag-anamot, ag-inkahustisya, inkaduka, desyang, sakit, tan ipapatey. Akin a dakerakel so mauges a bengatlan nagagawa ed dakerakel ya inosentin biktima? No sankamakapanyarian so Dios, akin ya inabuloyan to iyan malaklaknab a kairapan ed loob na nilibon taon? Lapud dugdugay impanesinyo tan impanguksoy na Dios ed uniberso, akin ya aabuloyan toy kaguloan tan kadederal na dalin?
Sakey ya Alimbawa
3-5. (a) Anton ilustrasyon so makatulong ed sikatayon natalosan no akin ya iyaabuloy na Dios na uksoy so kaguloan diad dalin? (b) Dinan ed pigaran panpilian so ontukoy ed situasyon ed dalin?
3 Mangusar ti pa na sakey ya alimbawan mangiyilustra no akin ya iyabuloy na Dios na uksoy so kaguloan ed dalin. Isipen pa, ipangasim, a manaakar ka ed takel insan asabim so sakey ya abung. Leleg mon iinspeksionen so abung, anengneng mon agulogulo. Aderal iray bintana, pirmin inkagaygay na atep, say tablan balkon so maabo-abot, saksakey lan bisagra so akapeketan na kapot, tan barado laray tobo.
4 Anggaman ed sarayan depekto, kasin ibagam lan anggapoy intelihentin desinyador ya angidesinyo ed satan ya abung? Kasin say inkagulo so mangombinse ed sikan nibanbana labat a linmesa so abung? Odino no nibagam a wala so angidesinyo tan angipaalagey ed satan, liknaen mo kasi a sayan too et aliwan larino tan mapaulyan?
5 Sano imanoen mon maong so paalagey, nanengneng mon datin marakep so inkagawa na satan a mangiter na ebidensia ed pirmin impangasikaso. Balet natan et apaulyan la ya angga ed kagagaygay to. Antoy ipapanengneng na saray depekto tan problema? Ipapaimano ra ya (1) inatey lay akankayarian; (2) sikatoy maong a managpaalagey balet agla interesado ed abung; odino (3) temporaryo ton impaabang so abung to ed andiay panamablin mangaabang. Say unor ya abitla so mipadpara ed kipapasen ed sayan dalin.
(Ituloy ed ontumbok a paway.)