Say Biblia​—Kasin Salita na Dios Odino Too?

Kapitulo 14

Say Biblia tan Sikayo

Ibabaga na saray modernon kritiko a say Biblia so aliwan sientipiko tan mansusumlangan, a sakey lambengat itan a koleksyon na saray mito. Diad biek a dapag, inkuan nen Jesus: “Say salitam [Dios] sikato so katuaan.” (Juan 17:17) Say ebidensia so manusuporta ed si Jesus imbes a saray kritiko. Ipanengneng na katuaan a say Biblia so susto unong ed awaran. Niarum ni, say makatantandan impantunosan to, saray tuan propesiya to, say aralem a kakabatan to, tan say pakayari ton mamasimbalo ed saray kabibilay na totoo so amin et mangidemostra a say Biblia so insulat a Salita na Dios. Unong ya insulat nen apostol Pablo: “Amin a Kasulatan so impuyan na Dios tan makagungguna.”​—2 Timoteo 3:16, NW.

1. (Ilaktip so introduksion.) (a) Anto so papaneknekan na saray katuaan nipaakar ed Biblia? (b) Antoray pamatnagan ed katuaan a say Biblia et impuyan a Salita na Dios?

Say katuaan a say Biblia so salitay Dios, aliwan too, so walaan na aralem iran pamatnagan. Kabaliksan ton say Dios so peteg ya akitalosan ed totoo. Ebatan to so dakel iran tepet tayo tan ipapanengneng to so solusyon ed dakel iran problema tayo. Kabaliksan to met a saray ilalo ed arapen ya adeskribe ed Biblia so peteg. Say Panarian na Dios so peteg a manuuley tan magano lan onkiwas a mangekal ed amin ya ag-inkahustisya, panaglames, tan kairapan ed sayan dalin.

2. Say pikakabat a say Biblia et Salitay Dios so mamakiwas ed sikayon manggawa na anto?

² Natan, say tepet so: Anto so gawaen yo ed sayan impormasyon? Komon, say pikakabat a say Biblia so Salitay Dios so nepeg a mamaseseg ed sikayon mangusisa ed satan. Insipan na salmista a magmaliw a maliket iramay manggawa na ontan sanen insulat to: “Mapalar so toon agmanakar ed panangibangat na saray agmatunong . . . noag say gayaga to wala ed ganggan nen Jehova, tan diad ganggan to mandalepdep ed agew tan labi.”​—Salmo 1:1, 2.

Awaten so Tulong

3, 4. (a) Unong ya ipapanengneng na Biblia a mismo, anto so nepeg tayon gawaen sano makaromog tayoray bengatlan agtayo natalosan? (b) Sioparay lawas mabulos ya ontulong ed totoo pian lalon natalosan da so Biblia?

³ Nayarin, diad pambabasa yo na Biblia et naromog yoray bengatlan agyo natalosan. (2 Pedro 3:16) Ipanengneng na sakey ya agawa a nikurit ed libro na Biblian Saray Gawa a saya so nailaloan. Ag-abayag kayari impatey nen Jesus, sakey ya Etiope so manbabasa ed saray propesiya ed libro na Biblian Isaias. Say laki so inabet na Kristianon manag-ebanghelyo a si Filipe tan intepet to: “Natalosan mo so babasaen mo?” Agnatalosan na Etiope, kanian inimbitaan to si Felipe ya ontulong ed sikaton mantalos.​—Gawa 8:30, 31.

⁴ Sakey a bii ed Estados Unidos so wala met ed parehon kipapasen. Sikato so maparanay a managbasa na Biblia, balet ta walaray dakel iran importantin bangat na Biblia ya agto natalosan ed dilin pambabasa to. Dia lambengat ed impakapitongtong to ed Tastasi nen Jehova a naaralan toray manunan katuaan na Biblia, a pati say kaimportantian na Panarian na Dios tan say dakel iran bendision ya itarok na Panarian ed katooan. No imbitaan yora, saray Tastasi nen Jehova so maliket ya ontulong met ed sikayo pian lalon natalosan yo so babasaen yo ed Biblia.

Iyaplika so Konseho na Biblia

5. Unong ed Biblia, anton kurso so mangitarok na liket?

⁵ Sikatayo so apaseseg ya aglambengat manbasa na Biblia noagta onkiwas met unong ed babasaen tayo. (Salmo 119:2) Niarum ni, ipapaseseg na Biblia: “Tawayan yo et nanengneng a si Jehova so maong; mapalar so too a manmatalek ed sikato.” (Salmo 34:8) Kanian, sikatayo so iimbitaan ton salien so Dios. Panggunaetay pambilay unong ed saray prinsipyo na Dios, ya ipanengneng a panmamatalekan yo so Dios a makaamta na sankaabigan parad sikayo. Diad sayan paraan lambengat a nanengneng yon satan a peteg so suston dalan. Saramay walaan na ontan a talek ed Dios so peteg a maliket.

6. Kasin praktikal natan so panggunaet a manbilay unong ed saray estandarte na Biblia? Ipaliwawa.

⁶ Ikuan na arum ya anggapoy makapambilay unong ed saray prinsipyo na Biblia diad sayan agmatua, imoral, marawal a mundo. Anggaman ontan, diad tua et dakel la so akapanggawa na onia. Siopa? Sakey a tobonbalon laki ed Aprika so akaromog na sakey a grupo na saratan. Insulat to: “Diad apalabas iran taon et iimatonan ko diad Zimbabwe a sikayon totoo, Tastasi nen Jehova, so peteg a manggugunaet a manumbok ed dilin ehemplo nen Kristo . . . Anggad natan, sikayo labat so grupon akakombinse ed siak ed panangaro na Dios tan ed pakayari na ebanghelyo To, diad panamegley na panagbilay yo ya aliwa lambengat ed panamegley na saray paliwawa tan sulsulat. Sikayo so manbibilay tan mangipupulong na ebanghelyo bangta say dakerakel a totoo so mangipupulong ed ebanghelyo ingen ta agmanbibilay unong ed satan.”

Awaten so Autoridad To

7. Antoran kaslakan ya ag-agamil natan so agmitunosan ed ibabaga na Biblia?

⁷ Inkuan nen apostol Pablo a say Biblia so “maabig a pakaaralan, pakasumalan, pakasimbawaan.” (2 Timoteo 3:16) Anggaman ontan, no maminsan say ibabaga na Biblia so aliwan popular. Alimbawa, kokondenaen na Biblia so homoseksual iran gawa, ingen say homoseksualidad so malaknab a minoria bilang naawat ya estilo na panagbilay. (Roma 1:24-27; 1 Corinto 6:9-11; 1 Timoteo 1:9-11) Ibabaga met na Biblia a say bilay na agni-nianak ya ugaw so mabli tan agnepeg a gagalaen a pateyen, balet ngalngalin 50 milyon ya aborsyon so nagagawa ed tinaon ed sankamundoan. (Exodo 21:22, 23; Salmo 36:9; 139:14-16; Jeremias 1:5) Anto no sikatayon mismo so nanairapan a mangawat ed ibabaga na Biblia ed saratan a pamaakaran?

8, 9. No diad gapo et nanairapan itayon mangawat ed sakey a punto ed Biblia, anto so nepeg tayon nonoten, tan siopa iran estandarte so nepeg a lawas tayon awaten?

⁸ Bueno, naaralan na saray Kristiano a lawas makabat so itumbok ed Salitay Dios. Akin? Lapud diad manbayag, say panumbok ed ibabaga na Biblia so lawas onkanan sankaabigan parad balang sakey. (Uliran 2:1-11) Diad katuaan to, ageteran a tuloy so kakabatan na too. Matalag dan natebek so kaunoran iran pansumpalan na saray kiwas da. Impatua nen propeta Jeremias: “O Jehova, amtak a say dalan na too anggapo ed sikato lamlamang. Aliwa a walad too a manakar a mangitonton ed saray kurang to.”​—Jeremias 10:23.

⁹ Nakaukolan tayo lambengat so inengneng ed kaliberliber tayo pian napaneknekan so inkasusto na saya. Kaslakan ed saray probleman mamapairap ed mundo so direktan resulta na ag-intulok na totoo ed konseho na Salitay Dios. Say andukey, magonigon ya awaran na katooan so angipanengneng ya agnayarian na totoon desidien a maaligwas so moral iran pamaakaran parad inkasikara. Say Dios so andi-geter a mas makabat nen say sikatayo. Akin ya ag-awaten so ibabaga to, imbes ya onsaral ed dilin kakabatan tayo?​—Uliran 28:26; Jeremias 17:9.

Anggapoy Siopaman ya Ayadyari

10, 11. (a) Antoran katuaan nipaakar ed inkagawa tayo tan ed mundon pambibilayan tayo so mamalesa na saray problema sano panggunaetan tayo so manbilay unong ed saray estandarte na Biblia? (b) Anton nengneng na pililimog so ipapaseseg na Biblian anapen tayo, tan iner so pakaromogan tayo na ontan a pililimog?

¹⁰ Papasakbayan itayo na Biblia ed sananey a pamaakaran a nakaukolan tayo so tulong. Amin tayo so walaan na atawir a makasalanan a kilingan. “Say panag-isisip na puso na too mauges a nanlapu ed inkaugaw to.” (Genesis 8:21; Roma 7:21) Sayan problema so napapabiskeg lapud manbibilay itayo ed sakey a mundon agmanutumbok ed saray prinsipyo na Biblia. Kanian, kaukolan tayo so tulong aliwa lambengat pian natalosan so Biblia noagta pian agamilen met iray bengatlan aaralen tayo. Satan no akin a papasesegen itayo na Biblian milimog ed saray arum a mankaliktan a manbilay unong ed maridios iran estandarte. Insulat na salmista: “Siak ginulak so muyong na saray managgawa na mauges, tan agkon balot miyurong ed saray bagel. . . . Dia ed saray muyong igalang ko si Jehova.” Tan ikuan na sananey a salmo: “Alay kaabigan tan alay ligliwa so panayam na sanaagi ed inkasaksakey!”​—Salmo 26:5, 12; 133:1.

¹¹ Say pilimog a mankakasakey so sakey a makanan kabiangan na panagdayew parad saray Tastasi nen Jehova. Walaan ira na pigaran pantitipon ed kada simba, ontan met ed panapanaon iran kombension, a ditan et aaralen dan mankakasakey so Biblia tan sisingbaten da no panon ya iyaplika iray prinsipyo to ed saray bilay da. Tugyopen da so sankamundoan ya “impanaagi” a ditan et balang sakey so napaseseg tan natulongan a mamasiansia ed sarayan atagey iran estandarte na Biblia. (1 Pedro 2:17) Akin ya ag-atendian so sakey ed saray pantitipon da tan nengnengen no panon a say ontan a pantitipon so makatulong met ed sikayo?​—Hebreos 10:24, 25.

Manbilay Unong ed Salitay Dios

12. Antoran bendision so onsabi diad pangamtan say Biblia so Salitay Dios?

¹² Kanian, say pikabat ed Biblia bilang Salitay Dios so mangitarok na saray bendision tan responsabilidad. Nabebendisionan itayo lapud nagagamoran tayo so panangiwanwan ed inagew-agew a kondukta tayo ya agnagamoran ed inerman. Niarum ni, naaralan tayo so panangaro na Dios diad impangitarya na dilin Anak to a manondon ed sikatayo pian nawalaan itayo na ilalon andi-anggaan a bilay. (Juan 3:16) Amoria tayon si Jesus so manuuley la natan a bilang Ari tan magano lan onkiwas a mangekal na karelmengan diad dalin. Tan sitatalek itayon manaalagar ed matunong a ‘balon katawenan tan sakey a balon dalin’ ya insipan a mismo na Dios.​—2 Pedro 3:13.

13. Antoran responsabilidad so onsabi ed sikatayo sano awaten tayo so Biblia a bilang Salitay Dios?

¹³ Anggaman ontan, tandaan a walaan itayo na responsabilidad a manaral na Biblia tan mangipapuso ed ibabaga to. Ipapaseseg a mismo na Dios: “Anako, agmo lingwanan so tunong ko; say pusom ingen unoren to komon so saray ganggan ko.” (Uliran 3:1) Anggaman moriaen na kaslakan a totoo a say Biblia et salita lambengat na too, nepeg a makpel itayon ‘mangiyabuloy a naromog komon so Dios a matua, anggaman balang too so matila.’ (Roma 3:4) Abuloyan so kakabatan na Dios a mangiwanwan ed bilay yo. “Manmatale’ka ed si Jehova ed simoon a pusom . . . Dia ed saray amin a dalan mo sikato so bidbiren mo.” (Uliran 3:5, 6) Say sikakabat ya itulok ed Salitay Dios ed onian dalan so ontulong a mamaabig na bilay yo namparan natan tan diad andi-anggaan.

(Sampot)