Say Biblia—Kasin Salita na Dios Odino Too?
Kapitulo 13
“Say Salita na Dios so Mabilay”
Diad apalabas a kapitulo, anengneng tayo a say konseho na Biblia so ontulong ed sikatayon manresolbi ed saray problema tan ompaliis ed saray pakalingoan. Say ag-onkupas a kakabatan na konseho na Biblia so mabiskeg ya ebidensia na inkapuyanan. Inkuan na Biblia a mismo: “Amin a Sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.” (2 Timoteo 3:16) Ingen mas ni so gawaen na Biblia nen say pangiter lambengat ed sikatayo na makabat a simbawa. Bilang Salita na Dios, peteg ya umanen toray totoo.
1-3. (a) Panon so pangidadanet na Biblia ed pankaukolan na saray pananguman ed personalidad? (b) Anton eksperiensia so mangipanengneng ed pakayari na Biblian manguman ed saray personalidad?
Peteg kasin nauman na Biblia iray totoo? On, salatan to ni ingen so personalidad da. Konsideraen iyan konseho a nikurit ed Biblia: “Ipulisay yo komon so nipaakar ed abangonan a panagbilay yo, say toon daan, a sikato so manderal unong ed saray panamalingo na kagletan na laman; tan napasimbalo kayo komon ed espiritu na kalakal yo, tan ikawes yo so too a balo, a sikato so pinalsay Dios ed loob na kaptekan tan matuan kasantosan.”—Efeso 4:22-24.
2 Peteg kasin posibli so pangisulong na sakey a balon personalidad? On, talagan posibli! Diad tua, say pagmaliw a Kristiano so no maminsan et lalanoren to so dramatikon tuloy iran pananguman ed personalidad. (1 Corinto 6:9-11) Alimbawa, sakey a tobonbalon laki ed Abalaten ya Amerika so naulila nen siam taon to. Binmaleg ya andian na panangigiya na ateng, abayuboan to so alablabas iran problema ed personalidad. Isasalaysay to: “Sanen mantaon ak na 18, siak so sigpot lan naadik ed saray druga tan abayag a nipisok lapud panagtakew pian suportaan so bisyo.” Anggaman ontan, say panginaen to so sakey ed Tastasi nen Jehova, tan diad kaunoran et akatulong ed sikato.
3 Isasalaysay to: “Inggapo nen panginaen kon iyaral ed siak so Biblia, tan kayari pitoy bulan et nakal ko so bisyon panagdruga.” Sikato met so sinmian ed dati iran kalimog to tan akikaaro ed limog na Tastasi nen Jehova. Intuloy to: “Sarayan balon kalimog, tekep na maparanay a panagaral ko na Biblia, so amaaligwas ed siak a diad kaunoran et indedikak so bilay kon manlingkor ed Dios.” On, sayan datin naadik ed druga tan matakew so nagmaliw ya aktibon Kristiano, tan sayan sigpot a pananguman so agawa ed panamegley na pakayari na Biblia. On, unong ya ikuan nen apostol Pablo, “Say salita na Dios so mabilay tan mabiskeg.”—Hebreos 4:12.
Nauman ed Panamegley na Pikakabat
4, 5. Unong ed Colosas 3:8-10, anto so nakaukolan pian nabayuboan so balon personalidad?
4 Panon ya umanen na Biblia so totoo? Say ebat so nanengneng ed sayan bersikulo na Biblia: “Iyarawi yo met so saratan ya amin; pasnok, ingongot, mauges a nonot, inkalabir a makapabaing a salita ya ompaway ed sangi yo, agkayo mantitilaan; bangta nilakseb yo so toon daan a pati saray gawa to. Tan wala so insulong yo a balon too, a sikato so pinasimbalo nipaakar ed kakabatan a nipara ed talintao na Amalsa ed sikato.”—Colosas 3:8-10.
5 Imanoen so makanan betang a gagawaen na suston pikakabat ed Biblia. Ipapaliwawa na Biblia no dinan iran kualidad so kaukolan tayon ipulisay tan dinan so nepeg tayon bayuboan. Say ontan a pikakabat so walaan na mabiskeg ya epekto, unong ya aromog na sakey a tobonbalon laki ed mamaabalaten a Europa. Sikato so walaan na peteg a problema: maipapaweg. Legan ya ombabaleg, sikato so mabetbet a makapiponitian, tan bilang pangipanggetan to na sanok to, nagmaliw a boksingero; ingen ta siansian agto nakontrol so inkapaweg to. Sanen nansundalo, sikato so niiyan ed gulo diad impamugbog ed kapara ton sundalo. Kayari intaynan to ed army, sikato so angasawa ingen ta kakabilen to so asawa to. Diad sakey a sangsangan ed pamilya, kinabil to ni ingen so dilin ama to, ya abaktar ed dalin. Talagan maisasanok, paweg a tobonbalon laki!
6, 7. Panon a say suston pikakabat ed Biblia so tinmulong ed sakey a balolaki ed mamaabalaten a Europa pian umanen so personalidad to?
6 Anggaman ontan, diad kaunoran sikato so impaiyaralan na Biblia ed Tastasi nen Jehova tan akadngel na saray konsehon singa say onggendan: “Aleg ya itumang yo ed anggan siopa so mauges ed mauges. . . . No nayari, dia ed anganggaan na nayarian yo, manayam kayo ed kareenan ed ganaganay totoo. Aleg a sikayo a dili so ombales, inararo, noag ingen itdan na pasen so sanok.” (Roma 12:17-19) Saya so akatulong ed sikaton manmoria ya agaylan uges a kaleteyan so inkapaweg to. Tinaynan to so boksing, ta amoria ton agmitunosan itan ed mareen a Kristianon personalidad. Ingen ta sikaton siansia so walaan na peteg a pipupuligesgesan ed inkapaweg to.
7 Anggaman ontan, say idaraak na pikakabat to ed saray prinsipyo na Biblia so akatulong ed sikato. Saya so nanlinis na konsiensia to, a bilang resulta et analona ed inkapaweg to. Aminsan, sanen onaaligwas la ed panagaral na Biblia, sakey ya estranghero so asanokan tan anginsulto ed sikato. Alikna na tobonbalon laki ya ondalang lamet so sanok to. Ingen, alikna to so sananey a puersa: say kababaingan; tan saya so angamper ed sikaton onsanok. Imbes ya ‘ibales so mauges ed mauges,’ pinokpokan to so espiritu to. Natan, sikato la so apasimbalon too, a walaan na balon personalidad, a makasengeg ed suston pikakabat ed Biblia.
Say Pikabat ed Dios
8. (a) Diad siopan indengan so akagawaan na balon personalidad? (b) Say suston pikakabat a manmoldi ed balon personalidad et nepeg ya isakup to so pikakabat ed siopa?
8 Tua, amta na dakel a totoo so dugan bengatlan gawaen, ingen ta onsuko ra ed saray kaleteyan na laman. Malinew, say pakawalaan lambengat na suston pikakabat ed duga tan aliwa so agmagenap. Walay sananey nin bengatlan tinmulong ed duaran indibidual ya adeskribe ed tagey. Anto itan? Inkuan na bersikulon atukoy ed inmuna: “Wala so insulong yo a balo a too [“balon personalidad,” NW] a sikato so pinasimbalo ed nipaakar ed kakabatan a nipara ed talintao na Amalsa ed sikato.” (Colosas 3:10) Imanoen ya, unong a si Adan so gendat ya agawa ed indengan na Dios, say balon personalidad so agawa met ed indengan na Dios. (Genesis 1:26) Kanian, say suston pikakabat a tinmulong ed sarayan duaran balolaki et isakup to so pikakabat ed Dios. Saya so mangipanonot ed sikatayo ed saray balikas nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”—Juan 17:3.
9. Panon a say pikakabat ed Dios so ontulong ed sikatayon manguman ed personalidad tayo?
9 Panon a say pikakabat ed Dios so ontulong ed sikatayon mamasimbalo ed personalidad tayo? Iikdan to itayo na motibon manggawa na ontan. Sanen akabatan tayo so Dios diad impanaral na Biblia, naaralan tayoray madibinon kualidades to tan naimano so panangaron impanengneng to ed sikatayo. Saya so mangitonton ed sikatayon mangaro met ed sikato. (1 Juan 4:19) Insan, naunor tayo so inkuan nen Jesus a manuna tan sankabalgan a ganggan: “Nepeg mon aroen si Jehova a Dios mo ed intiron pusom tan ed intiron kamarerwam tan ed intiron kanonotan mo.” (Mateo 22:37, NW) Say pangaro ed Dios so manggawa ed sikatayon malabay a mangisulong ed balon personalidad a mamaliket ed sikato. Gawaen to itayon mankaliktan a magmaliw a singa sikato, anggaman mairap so pipupuligesgesan ed panggawa na ontan.
Nilamot a Tuloy Iran Kaleteyan
10, 11. Panon a say suston pikakabat so tinmulong ed sakey a tobonbalon bii ed Amianen ya Amerika a gapoan ya umanen so personalidad to?
10 Diad arum iran kipapasen, peteg a pipupuligesgesan itan. Sakey a tobonbalon bii ed Amianen ya Amerika so akipuligesgesan a tuloy pian manguman. Sikato so biktima na seksual a panangabuso nen ugaw ni, binmaleg ed magulon pamilya tan diad kaunoran et binmaling ed saray druga. Balet lapud saray druga so mabli, kanian sikato so nanbalangkantis pian nalegpet to so bisyo. Sinabat tan tinakewan to met iramay turista kanian diad kaunoran et mas dakel a panaon so impanayam to ed saray prisoan tan bilyaran nen say diad abung.
11 Sanen sikatoy nabet na Tastasi nen Jehova, sikato so—kayari pigaran impanpaekal—nagmaliw ya ina na bastardon ugaw. Anggaman ontan, agustoan to so nadngel to ed Biblia tan ginapoan ton aralen itan. Ag-abayag et nanggunaetan ton ipaalagey so siglaotan ed Dios tan nanggawa na saray pananguman ed bilay to.
12, 13. Deskribien no panon a say suston pikakabat, bektaman a nitanem, so onkiwas bilang sakey a puersa ed pananguman.
12 Ingen, sikato so niiyan ed impasyan pipupuligesgesan, lapud nilamot a tuloy so daan a personalidad. Aminsan, sinenti to so masimoon a konseho, tinmundan manaral na Biblia, tan pinmawil lamet ed marutak iran dalan to. Balet ta agto nalingwanan so katuaan ed Biblia a nitanem ed sikato, tan aksobien to: “Naulit-ulit a siak so agpandeenen na konsiensiak, tan saray balikas ed 2 Pedro 2:22 so onlesa ed kanonotan ko: ‘Say aso pinawil to so uta to lamet, tan say kaong a naurasan nantiblak lamet.’”
13 Diad kaunoran, sayan pikakabat so amayubo ed sikaton manggawa na sananey nin impasyan sagpot. Ikuanto: “Ginapoan kon lukasan so puerta ed si Jehova tan mabetbet a manpikasi parad tulong.” Natan, say balon personalidad so lalon nitanem a malet, anggaman sikato so siansian mipuligesgesan a tuloy. Aminsan, lapud kaleteyan, sikato so nikarunyas lamet ed panagbuanges tan imoralidad. Ingen, natan impanengneng na kiwas to a sikato so peteg ya anguman. Dinimla to so inkasikato tan kuanto: “Talagan nampikasi tan nanaral ak na malaem.” Diad kaunoran, say salita na Dios so tinmalona ed bilay to a sikato so nagmaliw a sakey ya aktibon Kristiano, a mangikukurang na malinis, nagalgalang a panagbilay. Diad pigaran taon la natan, sikato so sigpot a duma ed datin inabuso, naadik ed druga, agnarendaan ya indibidual.
Totoon Pinasimbalo na Salitay Dios
14, 15. (a) Anton puersan nanlapud Dios so onkikiwas diad panamegley na Biblia? (b)Antoray arum a pakabidbiran ed saray tuan Kristiano natan?
14 Say pakayarin intarok na Biblia ed bilay na saray mauyamon indibidual so mangipanengneng ya aliwa lambengat itan a gawa na too. Bilang impuyan a Salita na Dios, sakey iyan paralanan a kukurangan na espiritu na Dios. Say parehon espiritu a nanggawan posibli ed saray milagro nen Jesus so ontulong ed sikatayo natan a manalona ed mauges iran kualidad tan mamayubo ed Kristianon personalidad. On, saray manunan kualidad a nepeg a bayuboan na saray Kristianos—aro, liket, deen, kasungdoan, kaabigan, kamaongan, pananisia, tayadno, tan dangka—so atawag ed Biblia a “say bunga na espiritu.”—Galacia 5:22, 23.
15 Natan, sayan espiritu so onkikiwas aliwa lambengat ed pigaran indibidual noagta ed nilaksan ‘imbangat nen Jehova’ tan manggagayaga ed ‘daakan a kareenan’ manlapud Sikato. (Isaias 54:13) Siopa iraya? Inter nen Jesus so sakey a paraan a pakabidbiran ed sikara, inkuanto: “Lapu ed saya amin a too nabirbiran da’ya sikayoray babangatan ko, no wala so aro yo ed sakey tan sakey.” (Juan 13:35) Say Kristianon aro so sakey a bunga na espiritu tan makanan kabiangan na Kristianon balon personalidad. Kasin wala so siopaman a grupo na totoon mangipapanengneng na aro ed paraan ya inkuan nen Jesus?
16, 17. Mangaon na arum iran komento ed peryodiko a mangipabidbir ed saramay ‘imbangat nen Jehova’ tan manggagayaga ed ‘daakan a kareenan.’
16 Bueno, talinengen pa iyan inaon ed sakey ya insulat ed New Haven Register, sakey a peryodiko ed Amianen ya Amerika: “Balanglan sikayo so inmingongot odino sinmyodot [asanokan], a singa siak, lapud pangokomberti ra, nepeg yo met a dayewen so inkadedikado ra, say kaabigan da, say matalonggaring ya ehemplo ra ed walna tan mabunigas a panagbilay.” Sayan grupo met so tutukoyen na peryodikon Aleman a Münchner Merkur sanen inkuanto: “Sikara so sankamatuaan tan sankasakbayan a managbayar na buis ed Republika Pederal na [Aleman]. Say katutulok da ed saray ganggan so nanengneng ed paraan na panagmaneho ra tan ontan met ed saray estadistika ed krimen.”
17 Siopa so tutukoyen na sayan duaran peryodiko? Say parehon grupo ya asingbat ed Herald na Buenos Aires, Argentina. Inkuan na sayan peryodiko: “Saray Tastasi nen Jehova so apaneknekan ed intiron panaon a makukuli, maulimek, magimper tan matakot ed Dios a nengneng na mibabaley a mabitar a kakaukolanen na nasyon.” Sakey a sosyolohikon impanaral ed Zambia a nipalapag ed American Ethnologist so anukoy ed parehon grupo. Inkuanto: “Saray Tastasi nen Jehova so makakaeksperiensia na babaleg ya aligwas diad panamasiansia na maligen a panamaley nen say saray membro na arum iran denominasyon.”
18, 19. Panon so inkadeskribe na saray Tastasi nen Jehova ed Italya tan ed Abalaten ya Aprika?
18 Tutukoyen met na peryodikon La Stampa ed Italya iray Tastasi nen Jehova sanen inkuanto: “Sikara so sankatooran a mibabaley a kaliktanen na siopaman: agda papaliisan iray buis odino onsumlang ed agkombiniente iran ganggan parad dilin nabang da. Saray moral a prinsipyo diad panangaro ed kaparan too, agpangawat ed pakayari, andi-karawalan tan personal ya inkamatua (a diad kaslakan a Kristianos et saraya so ‘para Simban totontonen’ a maabig lambengat a dengelen diad saray pulpito) so kabiangan na ‘inagew-agew’ a panagbilay da.”
19 Sakey a propesor na unibersidad ed Abalaten ya Aprika ya akasagmak na panangibiig ed silong na saray ganggan ed rasa na satan a bansa so anukoy ed Tastasi nen Jehova a “totoon abangatan ed atagey iran estandarte na Biblia pian magmaliw a peteg a ‘color-blind’ (andian na panangiduma ed kolor).” Diad impangipaliwawa ed saya, inyarum to: “Nia’ra so totoon say nenengnengen da ed arum et say akindalem, aliwa lambengat a say kolor na baog da. Tugyopen natan na Tastasi nen Jehova so alenleneg a tuan impanaagi ed katooan.”
20. Akin a nikadkaduma iray Tastasi nen Jehova?
20 Ipapanengneng na sarayan komento a wala so ulopan na totoon angilukas ed kapusoan da parad say Biblia tan diad limog da et onkikiwas so espiritu na Dios. Agaylan makanan imanoen a sarayan parehon totoo a tinukoy tayon akauna so manguunor ed ganggan nen Jesus ya ipulong so maong a balita na Panarian ed intiron mundo. (Mateo 24:14) Akin a nikadkaduma iray Tastasi nen Jehova ed sarayan pamaakaran? Diad dakel iran paraan sikara so agmiduma ed arum a totoo. Sikara so walaan met na silalaman iran kaleteyan, saray namparan ekonomikon problema, tan namparan manuna iran pankaukolan. Ingen bilang sakey a grupo, inaro ra so Dios, inawat dan sisisimoon so Biblia, tan inabuloyan dan onepekto ed kabibilay da.
21. Anto so paneknekan na katuaan a say totoon singa saray Tastasi nen Jehova so niwala ed sayan napnoy gula a mundo natan?
21 Minilyon a Tastasi nen Jehova so naromog ed masulok a 200 daldalin. Isakup da so totoo ed amin a rasa, pansasalita, tan ed onkukurang a kipapasen ed sosyedad. Ingen sikaray nankakasakey, mareen, internasyonal a sanaagi. Sikaray maong a mibabaley ed anggan inerman a panaayaman da, balet manuna tan sankaimportantian, sikara so uuleyan na Panarian na Dios, tan amin da so aktibon tuloy diad pangibabaga ed arum na maong a balita na satan a Panarian. Peteg a makatantanda a diad sayan naapag, napnoy gula a mundo et niwala ni so sakey a grupo salanti saray Tastasi nen Jehova. Say inkiwala ra so mabiskeg ya ebidensia a say espiritu na Dios so siansian aktibo ed limog na katooan. Tan paneknek itan a say Biblia so peteg a “mabilay tan mabiskeg.”