Kasin Natural a Sengegan so Impatey nen Maria?

UNONG ed peryodiko diad Vatican a L’Osservatore Romano, oniay insalaysay na doktrina na Katoliko ya Intokotok (Assumption): “Say Birhen Imaculada, a nansiansian bulos manlapud amin a dumsis na orihinal a kasalanan, so silalaman tan sikakamarerwan naawit diad mangatatawen a gloria, sanen asumpal lay mangaraldalin a bilay to.” Inkuan ni na peryodiko a sayan bangat so angitonton ed arum a Katolikon teologo a mangikuan a si Maria et “ag-inatey tan tampol ya inmoli manlapud mangaraldalin a bilay ed mangatatawen a gloria.”a

Agano ni, walay dumaruman impaliwawa nen Pope John Paul II ed sayan pamaakaran. Oniay inkuanto ed General Audience diad Vatican nen Hunyo 25, 1997: “Anggapoy impormasyon ya itatarya na Balon Sipan ed saray sirkumstansia na impatey nen Maria. Lapud sayan kaandiay ebat et nipasen na sakey a natural itan ya ipapatey, ya andiay detalyen nagkalautlan makanan salambiten. . . . Ompatnag ya anggapoy basiyan na saray opinyon a mangibabagan sikatoy ag-inatey ed natural a sengegan.”

Say balikas nen Pope John Paul so angiwalwal ya aliwan talagay bangat na say Concepcion Imaculada. No say ina nen Jesus et “nansiansian bulos manlapud amin a dumsis na orihinal a kasalanan,” panon a say impatey nen Maria et “natural iran sengegan,” a resultay kasalanan ya impasa nen makasalanan ya Adan? (Roma 5:12) Sayan teolohikon problema so makasengeg ed apikewet a panmoria na Iglesia Katolika ed ina nen Jesus. Agpankelawan a linmesa ed limog na Iglesia Katolika so inkaapag-apag tan inkawetwet nipaakar ed sayan bengatla.

Anggaman say Biblia so mangililitrato’d si Maria bilang mapaabeba, matoor, tan madebosyon, agto itutukoy irayan kualidad ed sakey a “concepcion imaculada.” (Lucas 1:38; Gawa 1:13, 14) Malinew so ibabaga na Biblia: “Amin nankasalanan, tan makulang ira ed gloria na Dios.” (Roma 3:23) On, atawir nen Maria so kasalanan tan ag-inkayadyari a singa met ed arum ni ed sankatooan, tan anggapoy ebidensian mamaneknek a sikatoy inatey ed arum ni nilikud ed natural a sengegan.​—Ikompara so 1 Juan 1:8-10.

[Paimano ed leksab]