No Akin a Sasalatan na Arum so Relihyon Da

Parad karaklan, say relihyon et ngaran labat. Nayarin satan so mangipanengneng no iner so sagpaminsan ya atendian na sakey a too no Simba, no iner so pankasalan to, tan no iner so pangiponponan ed sikato. Balet ag-ibabaga na satan so nengneng na inkatoo to odino no antoy kabat tan papanisiaan to. Alimbawa, imparungtal na sakey a surbi a 50 porsiento na mankuan iran Kristiano so agmakaamta no siopay angipaliwawa ed Sermon diad Palandey. Agayla, anggan say bantog a lider na India a si Mohandas Gandhi, sakey a Hindu, et kabisado to itan!

PANKELAWAN ta ni so kiyaagos na totoo manlapud relihyon anta dakerakel ed sikara et samsamet so amta ra nipaakar ed pananisia ra? Andin balot. Balet, napaliisan itan. Mabetbet a pankelawan na saramay papaiyaralan ed Biblia so kagugunggunaan dan tuloy ed satan. Ibabagan mismo na Biblia: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.”​—Isaias 48:17.

Anto so nepeg a gawaen na saramay agnapepenek ed espiritual? Nepeg ya ag-ira ontundan manlingkor ed Dios! Imbes, nepeg dan usisaen so Biblia tan amtaen no anto so mismon itatarya na Dios ed sikara.

Saray Ebat ed Mairap a Tepetepet

Nen pitoy taon to, anengneng nen Bernd so impatey nen nanay to.a Leleg na kaugawan to, nanumamengan to, ‘Iner so kawalaan nen nanay ko? Akin a kaukolan koy naulila ed ina?’ Bilang sakey a tin-edyer, si Bernd so aktibon membro na relihyon. Mapaga ed paniirap na katooan, pinirawat toy magmaliw a foreign-aid worker. Siansia, sikatoy gogonigonen na saray tepet ya agnaebatan a tuloy na relihyon to.

Insan akapitongtong si Bernd ed kaeskuela ton sakey manaya ed Tastasi nen Jehova. Impanengneng na sayan tobonbalo ed si Bernd manlapud Biblia a say nanay to et anggapoy pakalikna, naugip ed patey. Naaralan nen Bernd so dakel a bersikulo na Biblia a mangipapaliwawa’d saya, a singa say Eclesiastes 9:5: “Saray inaatey agda amta so bengatla.” Kanian anggapoy panpagaan nen Bernd no kasin say nanay to et maniirap ed purgatoryo​—odino alodloor ni. Anggaman nibabangat ed maslak a relihyon so doktrina na ag-ompatey a kamarerwa, atalosan nen Bernd unong ed Biblia a say kamarerway too et say mismon too. Sano ompatey so too, ompatey so kamarerwa. “Say kamarerwa a mankasalanan ompatey naani.”​—Ezequiel 18:4.

Naaralan met nen Bernd so makapakelaw ya ilalo parad inaatey. Abasa ton mismo ed libro na Biblia a Saray Gawa: “Wala naani kioli ed bilay na saray matunong tan agmatunong.” (Gawa 24:15) Agaylay sayaksak ton naamtaan a sayan kioli so nagawa dia ed dalin, ya ipawil na Dios ed sakey a paraiso!​—Salmo 37:29; Apocalipsis 21:3, 4.

Agnambayag et napepenek laray espiritual a pankaukolan nen Bernd diad panamegley na puron pikakabat ed Biblia. Ag-intalirak nen Bernd so relihyon. Imbes, tinaynan toy relihyon ya agmakapepenek ed sikato tan inawat toy nengneng na panagdayew a putel a nibase’d Biblia. Inkuanto: “Satan et 14 taon lay apalabas, tan agkon balot pagbabawian so intaynan ko’d datin relihyon ko. Natan et amtak lan say Manamalsa so agpanlalapuay irap. Si Satanas so dios na sayan sistema, tan sikatoy natetel ed saray kipapasen ed kaliberliber tayo. Balet ta magano lan ipetek na Dios so amin a panidisgo na mundo nen Satanas. Onoli met si nanay ko. Agaylan gayaga itan!”

Nibanbana, adampot la nen Bernd so kalat to a mantrabaho ed biek-taew pian ontulong ed arum. Sikatoy mankikimey ed arum a bansa ya ontutulong ed arum a makaaral nipaakar ed Panarian na Dios, say tuan solusyon ed paniirap da. Singa si Bernd, minilyon so makakaamtan say Dios et magano to lan panganggaen so paniirap na too. Nasasayaksakan ira a makaamtan walay relihyon a mamenek ed espiritual a pankaukolan da.​—Mateo 5:3.

Anto so Gagala na Bilay?

Legan a say Mamabukig a mundo so onkakasipa la’d relihyon, dakel so mantetepet, ‘Anto so gagala na bilay?’ Say ebat et naromog ed Biblia, a singa adiskobre nen Michael. Diad kapegleyay dekada na 1970, labay nen Michael so mimembro’d grupon terorista. Saksakey so getma to ed bilay​—pian puntiryaen iramay totoon minoria ton responsabli ed saray nagagawan ag-inkahustisya na sistemay kapitalista. “Di-paltog ak a lanang no ompaway ak ed abung,” so inkuanto. “Say planok et dakel so napatey kon prominenti iran politiko tan kapitalista anggad posibli. Iter koy bilay ko makasengeg ed saya.”

Si Michael so mapamisa, balet ta anggapo ed relihyon to so makapangipaliwawa no anto so peteg a gagalay bilay. Kanian sanen dinmalaw iray Tastasi nen Jehova ed ayaman to tan impanengneng da’d sikato iray ebat na Biblia ed saray tepet to, si Michael so tinmalineng a maong. Ginapoan toy onatendi ed saray miting parad panagdayew diad Kingdom Hall na Tastasi nen Jehova ed lugar da.

Mausisa iray kakaaro nen Michael nipaakar ed balon impaninteres to’d Biblia. “Mila kayo ed miting ed sayan Simba,” so impaseseg nen Michael ed sikara. “Mansiansian magano. No agyo labay so narerengel yo, di onsempet ki la.” Ontan so talagan agawa, kayari na 45-minuton nibase’d Biblian paliwawa, maslak ed kakaaro to so tinmaynan ed hall. Balet say sakey​—si Susan​—so nansiansia. Sayan marikit so asagyat ed nadngelan to. Si Michael tan Susan so nankasal ed saginonor tan abautismoan bilang Tastasi nen Jehova. “Natan et amtak la no akin a wadia itayo ed dalin,” kuan nen Michael. “Pinalsa itayo nen Jehova. Say peteg a gagala tayo ed bilay et say pakapikabat ed sikato tan gawaey linawa to. Satan so mangitarok na tuan inkapnek!”

Miabobon so minilyon ed kombiksyon nen Michael. Impapuso ra iray salita ed Biblia: “Saya sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to. Ta saya sikato so katiponan na kanepegan na too.”​—Eclesiastes 12:13.

Pananalona ed Saray Problema ed Bilay

Naeeksperiensia tayon amin so kasumpalay propesiya a naromog ed 2 Timoteo 3:1: “Dia ed saray kaunoran ya agew onsabi so saray panaon a maatap [“a mairap a pidenengan,” NW].” Anggapoy makaliktar ed saray problema na sarayan “panaon a maatap.” Balet ta ontulong ed sikatayo so Biblia pian natalonaan iratan.

Konsideraen pay Steven tan Olive, sakey a sanasawa. Sanen ginmapo iran paiyaralay Biblia ed Tastasi nen Jehova, sikara, singa say arum nin dakerakel, so walaay problema ed panamaley. “Nasiasian kami la,” so salaysay nen Steven. “Nandumaan iray kalat tan paninteresan mi.” Anto so akatulong ed sikaran mansiansian saniba? “Impanengneng na Tastasi nen Jehova ed sikami no panon min iyaplika iray prinsipyo na Biblia ed bilay mi,” so intuloy nen Steven. “Diad unonan pankanawnawa, naaralan mi so kabaliksan na pagmaliw a mabunlok tan maasikaso. Say pangiyaaplika ed saray prinsipyo na Biblia so amaelet ed sikamin dua. Natan et panggagayagaan mi so sakey a maliket, mabiskeg a panamaley.”

Maapit a Relasyon ed Dios

Unong ed sakey ya agano nin surbi na Gallup, 96 porsiento ed saray Amerikano so manisia ed Dios, tan maslak ed saraya so manpipikasi ed sikato. Ingen, impanengneng na sananey a surbi a say onaatendi ed simbaan tan sinagoga so wala la natan ed sankaabebaan to diad loob na kapalduay siglo. Manga 58 porsiento na saray Amerikano so mangibabagan mimimisa ira a maminsan ed sakey bulan odino andi ni ingen. Mabitar, say relihyon so agmangiyaapit a maong ed sikara ed Dios. Tan sayan problema so aliwa labat a dia ed Estados Unidos.

Si Linda so binmaleg ed Bavaria. Sikato so sakey a Katoliko tan marasal. Balet ta, sikato so antakot ed arapen. Anggapoy amta to ed gagala na Dios parad too. Sanen 14 taon to ni labat, akatongtong nen Linda iray Tastasi nen Jehova, tan inkuanton: “Makapainteres so imbaga ra, kanian inawat ko so duaran katulongan ed panagaral na Biblia tan binasak iratan a tampol.” Duay taon ed saginonor, ginmapon paiyaralan na Biblia si Linda ed Tastasi nen Jehova. “Amin a bengatlan naaralan ko nipaakar ed Dios manlapud Biblia et malinew,” so inkuanto. Inmekal si Linda ed relihyon to tan abautismoan bilang Tasi nen Jehova ed edad a 18.

Anto so amakiwas ed si Linda pian salatay relihyon to? Impaliwawa to: “Atulongan ak na relihyon ko a naamtaan a walay Dios, tan naaralan koy manisia ed sikato. Balet sikatoy aliwan sakey a persona tan agmangiyaansakit. Say impanaral koy Biblia so aglambengat amekder ed pananisiak ed Dios noagta tinmulong met ed siak pian sikatoy nakabatan tan naarok. Walaan ak natan na mablin personal a relasyon ed Dios, bengatlan mas mabli nen say antokaman.”

Say Tuan Relihyon so Makanakana!

Kasin say relihyon mo et igigiya to ka ed espiritual tan ipapanengneng to ed sika no panon a makatulong ed sika so Biblia pian natalonaan iray problema ed bilay? Kasin ibabangat to so ilalo ed arapen a walad Biblia? Kasin itatarok to ka ed maapit, personal a relasyon ed Manamalsa, a nibase’d suston pikakabat ed Biblia? No andi, ag-onsusuko. Imbes ya ikaindan so relihyon, anapen so nengneng na panagdayew a malet a nibase’d Biblia. Diad ontan et magmaliw kan singa saramay impropesiya ed libro na Biblia ya Isaias: “Onia so kuan nen Katawan a Jehova: ‘Nia! Saray aripen ko mangan ira naani . . . Saray aripen ko oninum ira naani . . . Saray aripen ko mankanta ra naani a nisengeg ed liket na puso.’”​—Isaias 65:13, 14.

[Paimano ed leksab]

[Saray litrato ed pahina 4, 5]

Ontulong ed sikatayo so Biblia pian napikabatan tan naaro so Dios