Akin a Tataynanan Day Relihyon?
NEN kapegleyay koma-19 siglo, anggapo lawari kabat a residenti na Prussia (natan et mamaamianen ya Alemanya) a mangibagan sikatoy agkabiangan na sakey a relihyon. Diad tua, say kakomberti lambengat manlapud manunan relihyon ed sakey a sinmuawin iglesia et kidungetan to la ed panagsubaybay na polis! Agaylay impanguman na saray kipapasen!
Natan, baleg a bilang na saray Aleman so oneekal ed saray iglesia. Unong ed report, 1 ed 4 so mangibabagan agkabiangay anggan anton relihyon. Ontan met so nagagawa ed Austria tan Switzerland. No say pimemembro so bilay na sakey a relihyon, sirin, singa ed impangibalikas na Aleman a managsulat a si Reimer Gronemeyer, “saray iglesia ed Europa so manpapanabos la.”
No Akin ya Ipupulisay Day Relihyon
Akin ya ipupulisay na dakel so organisadon relihyon? Mabetbet et makasengeg ed pinansyal, nagkalalo la ed daldalin a saray membro et kinaukolan a manbayar na buis ed simbaan. Itetepet na dakel, ‘Akin a kaukolan ya onla’d simbaan so kuartan nanlingetan ko?’ Paningongotan na arum so balbaleg a kayamanan tan pakayari na simbaan. Maseguron onabobon ira ed si Cardinal Joachim Meisner na Cologne, Alemanya, ya angikuan a mangiimpluensia so kayamanan na simbaan ya ikday importansia so materyal iran bengatla tan “agtanton pansimoonan so pananisia ed Kristo.”
Ontataynan so arum a totoo ed relihyon da lapud aromog da itan a makaalipanes, agmakapainteres, agmakapenek ed kaeerasan da’d espiritual. Sasagmaken da so eras ya impasakbay nen propeta Amos, ‘sakey ya eras, aliwa ya eras ed tinapay, odino pega ed danum, noag ingen pandengel ed saray salita nen Jehova.’ (Amos 8:11) Lapud samet so naaawat dan pananustini na relihyon da, itatalirak da itan.
Anggaman saray probleman nabet et tudtua, kasin suston kiwas so pangitalirak ed amin a relihyon? Isipen pay sakey a narasan a too ya akanengneng na singano tinapay. Balet, sanen isubo to la itan, nalmoan to a satan et gawa’d kusot manaya. Kasin sikatoy onsuko la’d panlabay ton mangan tan penekey eras to? Andi, anapen toy tuan tagano. Mipadpara, no agnapenek na sakey a relihyon so kaeerasan na saray membro to ed espiritual, kasin kaukolan dan italirak so relihyon? Odino mas makabat komon no anapen day paraan pian napenek so kaeerasan da’d espiritual? Ontan so ginawa la na dakel, a singa ipapanengneng na onggendan ya artikulo.