Pakaaral Manlapud Apalabas Iran Lingo

SARAY moral a ganggan na Manamalsa tayo so magnayon tan agnauman. Nisesengeg ed saya a say prinsipyon naromog ed Galacia 6:7 so onaaplika natan: “Antokaman ya itanem na too satan met so anien to.” Tua, nayarin iburi na sakey so pikuekuentaan to ed Dios, balet say madibinon totontonen so mansiasiansia. Diad kaunoran, anggapoy toon bulos manlapud saray pansumpalan na kiwakiwas to.

Komusta balet so toon manbibilay ya andiay prinsipyo insan manguman, a magmamaliw ya aripen na Dios? Siansian sagmaken to niray pansumpalan na akadkaunan estiloy-bilay to. Balet, agto labay ya ibagan sikatoy agpinerdonay Dios. Say impikalugoran nen Arin David ed si Bat-seba so angitarok na dakel a desyang ed bilay to. Agto apaliisan iya. Balet sikatoy talagan nagbabawi, tan akaawat na panamerdonay Dios.​—2 Samuel 12:13-19; 13:1-31.

Kasin nadidismaya ka sano sasagmaken moray epekto na lingolingon agawaan mo? No moriaen ed suston paraan, say pagbabawi so onkanan panonot ed sikatayon ‘manlikas ya ag-imatleken so inkauges.’ (Job 36:21) On, say pagbabawi so ontulong ed sikatayo pian napaliisay pakaulit na lingo. Mas maabig ni, inusar nen David so naeksperiensia to’d impakapankasalanan to pian nagunggunaan aliwa lambengat a sikato noagta ontan met ed arum. Inkuanto: “Ibangat ko so saray dalan mo ed saray mananumpa; et saray makasalanan napapawil ed sika.”​—Salmo 51:13.

[Saray litrato ed pahina 7]

Akaaral si David ed impankasalanan to a kaibay Bat-seba