Ginawa Ra so Linawa nen Jehova

Pananap na Asawaen nen Isaac

SAY masiken a manyodyorong ed abay na bobon so naknaksawan. Sikato tan saray katambayan to pati ed samploran kamelyo ra so nanbaroy manlapud kabangibang na Beer-sheba anggad mamaamianen a Mesopotamia​—sakey a distansyan masulok a 800 a kilometro.a Natan ta akasabi la ra’d destinasyon da, sayan abanalan a managbaroy so tinmunda pian manumameng ed mairap a misyon to. Siopa iyan laki, tan akin a ginawa to iyan makapakesaw a baroy?

Say laki et aripen nen Abraham, “say kamasikenan ed abung to.” (Genesis 24:2) Anggaman ag-angaranan ed salaysay, mapatnag a saya si Eliezer, ya aminsan a tinukoy nen Abraham a ‘sakey a nianak ed abung to’ tan sinalita to bilang akadasig pian magmaliw a ‘mananawir to.’ (Genesis 15:2, 3) Siempre, satan et sanen anggapo ni anak di Abraham tan Sarah. Natan say anak dan laki, si Isaac, so 40-anõs la, tan anggaman si Eliezer et aliwa lan manunan tomatawir nen Abraham, sikato nin siansia so aripen to. Kanian, tinulok to si Abraham ed makapaangat a kerew to. Anto itan?

Sakey a Makapaangat a Misyon

Diad panaon nen Abraham aglambengat apektaen na panamaley so pamilya noag ontan met ed intiron tribu, odino patriarkan komunidad. Kanian kaslakan parad atateng ya ipilian na kapareha iray anak da. Balet, diad pananap na asawaen na ilalak ton Isaac, si Abraham so nipaarap ed sakey a dilema. Saray agmaridios a dalan na saray taga diman a Canaanita so nanggawan agmakatunongan parad sakey a mangasawa ed sikara. (Deuteronomio 18:9-12) Tan anggaman kaslakan parad sakey so pangasawa to’d katribu to, say panaayaman na kakanayon nen Abraham so nilasus kilometroy kaarawi to dima’d mamaamianen a Mesopotamia. Agto basta niyalis si Isaac diman, ta insipan la nen Jehova ed si Abraham: “Iter ko naani ed kapolian mo so sayan dalin,” say dalin na Canaan. (Genesis 24:7) Kanian, inkuan nen Abraham ed si Eliezer: “Onla ka ed dalin ko tan diad saray kakanayon ko, ta mangala ka na sakey a paasawam ed anako ya Isaac.”​—Genesis 24:4.

Diad impakasumpal ed andukey a baroy, nanpainawa si Eliezer ed abay na bobon legan a momorekdeken to so misyon to. Amoria ton agmanbayag et onsabi diman so bibii pian onasol ed bobon ya usaren da no labi. Kanian sikatoy akikasi ed si Jehova: “Gawam komon a say marikit a pangibagaan ko naani onia, ‘Yepas mo so boyog mo, pikasik ed sika, ta pian makapiinum ak,’ et ibaga to pa naani, ‘Inum ka tan painumen ko so saray kamelyos mo met,’ sikato’tan pa so bii a tinorom a nipaakar ed aripen mo ya Isaac, tan ditan ko napatnagan so pangipanengneng mo na abig na linawa ed katawan ko.”​—Genesis 24:14.

Bangta manpipikasi, sakey a magangganan marikit a manngaran na Rebeca so inmasingger. “Pikasik ed sika, ta painum moak na daiset a danum ed boyog mo,” inkuan nen Eliezer ed sikato. Ginawa nen Rebeca so ontan, insan inkuanto: “Onasol ak met ni inumen na saray kamelyos mo, ya angga ed kasumpal da ya oninum.” Saya so sakey a mabunbunlok ya opresi, lapud say nainum na sakey a kamelyo et anggad 95 a litro na danum ed loob lambengat na samploran minuto! Balanglan ontan kapgaan iray kamelyo nen Eliezer odino andi, talagan amta nen Rebeca a say serbisyon inyopresi to et matrabaho. On, sikato so “nanganat, tan inkalbo to so danum na boyog to ed atotong, insan binmatik lamet ed bobon ya onasol, et inyasolan to so amin a kamelyos.”​—Genesis 24:15-20.

Diad impakalikas ed panangidirihe nen Jehova, inikdan nen Eliezer si Rebeca na sakey a tagikaw a balitok tan duaran balitok a purselas, a mankantidad natan na ngalngalin $1,400 (E.U.). Sanen imbaga nen Rebeca a sikato so apo nen Nahor, agin laki nen Abraham, si Eliezer so nampikasi na pisasalamat ed Dios. ‘Inbasbas to ak nen Jehova ed akar ko ya angga ed abung na agagi nen katawan ko,’ inkuanto. (Genesis 24:22-27) Nitarok si Eliezer ed pamilya nen Rebeca. Kabekta, si Rebeca so nagmaliw ya asawa nen Isaac, tan sikato so apribilihyoan ed impagmaliw a sakey ed inmuunan atateng na Mesias, si Jesus.

Saray Leksion a Parad Sikatayo

Benindisyonan nen Jehova so sipipikasin sagpot nen Eliezer diad impananap na matakot ed Dios a kapareha parad si Isaac. Nonoten, balet, a say impangasawa nen Isaac so direktan misiglaotan ed gagala na Dios a mamawala na sakey a bini ed panamegley nen Abraham. Kanian sayan salaysay so agnepeg a mangitonton ed sikatayo ed pangikuan a siopaman a mangipikasi parad kapareha et mamilagron naikdan. Anggaman ontan, no tuloken tayoray prinsipyo nen Jehova, iter to ed sikatayo so biskeg pian nasungdoan iray angat ed anggan dinan a sirkumstansya ed bilay​—panangasawa odino walad kasuloan.​—1 Corinto 7:8, 9, 28; ikompara so Filipos 4:11-13.

Kaukolan a mansagpot a maong si Eliezer pian nagawa to iray bengatla ed paraan nen Jehova. Anggan sikatayo met et makaromog a say pitunosan ed saray estandarte nen Jehova so aliwan naynay a mainomay. Alimbawa, nayarin mairap so pakaromog na anapan ya agmamuger ed teokratikon aktibidad, sakey a kaparehan matakot ed Dios, kakaulop a makapaalagey, panligliwaan ya aliwan mabanday. (Mateo 6:33; 1 Corinto 7:39; 15:33; Efeso 4:17-19) Ingen, sarag ya antabayen nen Jehova iraman so agmangikompromiso ed saray prinsipyo na Biblia. Isisipan na Biblia: “Manmatalek ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.”​—Uliran 3:5, 6.

[Paimano ed leksab]