Busolen Tayo so Mauges

SI JEHOVA so sakey a masanto a Dios. Diad kadaanan a panaon sikato so “Santo na Israel,” tan bilang ontan kinaukolan to ed Israel a magmaliw a malinis, andi tilol. (Salmo 89:18) Inkuanto ed apilin totoo to: “Masantos kayo sirin, ta siak santo ak.” (Levitico 11:45) Siopaman a malabay ya “ontatdang ed pokdol nen Jehova” so nepeg a magmaliw a ‘walaan na malinis a limalima, tan maralus a puso.’ (Salmo 24:3, 4) Kabaliksan toy mas ni nen say basta ipaliis ed makasalanan iran gawa. Mankabaliksan iya na “panggula ed mauges.”​—Uliran 8:13.

Simamaaro, indatak nen Jehova iray detalyadon ganggan ta pian nibiig tan napaliisan na say nasyon na Israel so gawan-mauges. (Roma 7:7, 12) Lalaktipen na sarayan ganggan so mapeget iran totontonen ed moralidad. Say pikakalugoran, homoseksual iran gawa, inseston pirerelasyonan, tan piaakdol ed ayep so abidbiran bilang agmasanto iran espiritual a managdutak. (Levitico 18:23; 20:10-17) Saraman so nankasalanan ed ontan iran mabanday a gawa so apegpeg manlapud nasyon na Israel.

Sanen nagmaliw ya “Israel na Dios” so kongregasyon na alanaan iran Kristiano, mipadpara iran moral ya estandarte so nidatak ed sikara. (Galacia 6:16) Kaukolan met a “busolen so mauges” na saray Kristiano. (Roma 12:9) Saray salita nen Jehova ed Israel so onaaplika met ed sikara: “Masantos kayo komon ta masantos ak.” (1 Pedro 1:15, 16) Saray ontan ya agmasanton agamil a singa say pilalawanan, pikakaluguran, homoseksual iran gawa, piaakdol ed ayep, tan insesto so nepeg ya agmanutak ed Kristianon kongregasyon. Saramay agmalabay a mangitunda ed panangagamil ed ontan iran bengatla so nipuera ed Panarian na Dios. (Roma 1:26, 27; 2:22; 1 Corinto 6:9, 10; Hebreos 13:4) Diad sarayan “kaunoran ya agew,” pareho met iran estandarte so onaaplika ed “arum a karnero.” (2 Timoteo 3:1; Juan 10:16) Bilang resulta, saray alanaan a Kristiano tan arum a karnero so manitibokel na sakey a malinis tan mabunigas a totoo, a makayarin mangakbibit ed ngaran na Dios da bilang Tastasi nen Jehova.​—Isaias 43:10.

Panamasiansian Malinis ed Kongregasyon

Diad pisuniyan, aabuloyan na mundo so amin a nengneng na imoralidad. Anggaman duma iray tuan Kristiano, nepeg ya agda lilingwanan a dakel a manseserbi ed si Jehova natan so datin kabiangan na mundo. Dakel a, sakbay dan akabatan so masanto a Dios tayo, ag-akatalos no akin ya agda nepeg a peneken iray pilalek tan pantasya na makabos a laman, ya ontitiblak ed sakey ya “alablabas a kamoanan.” (1 Pedro 4:4) Onia so inkuan nen apostol Pablo, kayari panideskribi ed makapadimla iran agamil na mabanday a totoo na nasyones: “Ontan so saray arum ed sikayo nensaman.” Anggaman ontan, intuloy ton ikuan: “Balet naurasan kayo la, balet apasantos kayo la, balet nibilang kayo la a matunong ed ngaran na Katawan a Jesu-Kristo tan dia ed espiritu na Dios tayo.”​—1 Corinto 6:11.

Agaylan makaligliwan balikas itan! Antokaman so agawaan na sakey a too ed apalabas a kabibilay to, sikato so manguman sano say maglorian maong a balita nipaakar ed Kristo so walaan na epekto ed puso to. Sikato so mangagamil na pananisia tan idedika to so inkasikato ed si Jehova a Dios. Manlapulad satan et sikato lay manbilay a malinis ed moral, ya alinisan la ed imaton na Dios. (Hebreos 9:14) Saray kasalanan ya agawaan to nensaman so aperdona la, tan ‘nadampot to la iray bengatla a wala ed unaan.’a​—Filipos 3:13, 14; Roma 4:7, 8.

Pinerdona nen Jehova so magbabawin David lapud impamatey tan impikalugoran, tan pinerdona To met so magbabawin Manases lapud imoral a panagtalintao tan pirmin panamaagos na dala. (2 Samuel 12:9, 13; 2 Awaran 33:2-6, 10-13) Makapisalamat itayon tuloy a sikato so akaparaan met a mamerdona ed sikatayo no magbabawi tan onasingger itayo ed sikato tekep na inkasimoon tan inkamapaabeba. Siansia, anggaman ed panamerdona nen Jehova ed si David tan Manases, sarayan duaran lalaki​—tan kaiba so Israel​—so kaukolan a manbilay tekep na saray pansumpalan na makasalanan a gawa ra. (2 Samuel 12:11, 12; Jeremias 15:3-5) Diad mipadparan dalan, anggaman perdonaen nen Jehova iray managbabawin managkasalanan, nayarin walaray pansumpalan na saray kiwas da ya agnaarawian.

Agnapaliisan Iran Pansumpalan

Alimbawa, say sakey a toon manbibilay ed imoral ya inkaalablabas tan naalisan na AIDS so nayarin mangawat na katuaan tan pasimbaloen to so kabibilay to anggad punto na dedikasyon tan bautismo. Natan et sikato lay sakey a malinis ed espiritual a Kristiano a walaan na siglaotan ed Dios tan makapakelkelaw ya ilalo ed arapen; balet siansian sikatoy walaan na AIDS. Kabekta et sikato so ompatey lapud satan a sakit, makapaermen balet talagan agnaliktaran a pansumpalan na datin kondukta to. Parad arum a Kristiano saray epekto na datin graben imoralidad so mansiansia ed arum niran dalan. Diad loob na pigaran taon kayari na inkabautismoan da, anganko diad natitilak nin taon na panbilay da ed sayan sistema na saray bengatla, nayarin kaukolan dan pibakalan iray kagletan na laman da a pawiley abenegan ya imoral ya istiloy kabibilay da. Diad tulong na espiritu nen Jehova, dakel so ontatalona ed panririsisti. Balet kaukolan iran mantultuloy a mibakal.​—Galacia 5:16, 17.

Saratan so agmankasalanan daput no kontrolen daray kagletan da. Balet no lalaki ra, sikakabat a disidien dan ag ‘manpirawat’ na responsibilidad ed kongregasyon legan a kaukolan da nin pipuligesgesan so mabiskeg a silalaman iran kiling. (1 Timoteo 3:1) Akin? Lapud kabat da so panagmatalek na kongregasyon ed mamatatken. (Isaias 32:1, 2; Hebreos 13:17) Namomoria ra a saray mamatatken so pangipapanonan ed dakel a pribadan pamaakaran tan kaukolan dan asikasoen iray delikadon situasyon. Agmagmaliw a maaro, makabat, nisay makatunongan parad sakey a lawas mibabakal ed agmalinis a silalaman a pilpilalek a mandampot na ontan a responsablin posisyon.​—Uliran 14:16; Juan 15:12, 13; Roma 12:1.

Diad sakey a lakin dati a managgalgalaw na ugaw sakbay ya abautismoan, nayarin wala ra so arum nin pansumpalan. Sanen naaralan to so katuaan, sikato so nagbabawi tan nampasimbalo, ya ag-itatarok itan a maruksan kasalanan ed kongregasyon. Sikato ed saginonor so nayarin onaligwas, a nagnap ton natalonaan iray mauges a kiling to, tan ‘manpirawat’ ni ingen parad sakey a responsablin posisyon diad kongregasyon. Balet, anto no siansia nin agnalingwanan so inkabantog to ed komunidad bilang sakey a datin managgalgalaw na ugaw? Kasin sikato so ‘andian na pakabalawan, . . . walaan na maabig a balita ed saray tagapaway, . . . [magmaliw] a bulos ed panangidalem”? (1 Timoteo 3:1-7, 10; Tito 1:7) Andi, agnayari. Sirin, agto onkualipika parad saray pribilihyo ed kongregasyon.

Sano Mankasalanan so Sakey a Dedikadon Kristiano

Natalosan nen Jehova a sikatayo so makabos tan anggan kayari na bautismo et nayarin makapankasalanan itayo ni. Insulat nen apostol Juan ed saray Kristiano ed agew to: “Sarayan bengatla isulat ko ed sikayo pian agkayo mankasalanan. Tan no wala so toon mankasalanan, wala so apireng tayo ya onarap ed Ama, si Jesu-Kristo a matunong. Tan sikato so manamaandi kasalanan tayo, tan aliwa lambengat ed saray kasalanan tayo, noag met kasalanan na lapag a mundo.” (1 Juan 2:1, 2) On, diad basiyan na bagat nen Jesus, a perdonaen nen Jehova iray bautismadon Kristiano a makapankasalanan​—no peteg a magbabawi ira tan taynan da so mauges a kurang da.

Sakey ya alimbawa na saya so naimano ed inmunan-siglon kongregasyon ed Corinto. Nadngel nen apostol Pablo so sakey a kaso na inseston pilalawanan ed satan a balon kongregasyon, tan sikato so angiter na saray intruksion a say asaglawin laki so nepeg a nadispelosip. Diad saginonor, say managkasalanan so nagbabawi, tan binagaan nen Pablo so kongregasyon ya ipawil da. (1 Corinto 5:1, 13; 2 Corinto 2:5-9) Sirin, diad panamegley na makatambal a pakayari na maaron panangasi nen Jehova tan say baleg a balor na dondon bagat nen Jesus, say laki so alinisan ed kasalanan to. Saray mipadparan bengatla so nayarin nagawa met natan. Balet, lamet, anggano magbabawi so sakey a bautismadon toon seryoson nankasalanan tan naperdona ed imaton nen Jehova, wala niray nasasagmak a resultay impankasalanan to.​—Uliran 10:16, 17; Galacia 6:7.

Alimbawa, no say sakey a dedikadon bii so akapilawanan, nayarin maermen a panbabawian toy ginawa to tan diad kaunoran et nipawil ed espiritual a bunigas diad tulong na kongregasyon. Balet anto no sikato so malukon lapu ed impan-imoralidad to? Diad ontan say intiron bilay to so agnapaliisan ya umanen na ginawa to. Say sakey a laki ya akapikaluguran so nayarin magbabawi tan agnadispelosip. Balet walaan na Makasulatan a basiyan so andi-kasalanan a kapareha to a mangidiborsyo, tan nayarin ontan so disidien to. (Mateo 19:9) No bilang ta ontan, say laki, anggaman pinerdona nen Jehova, legay bilay ton sagmaken iyan seryoson pansumpalan na impankasalanan to.​—1 Juan 1:9.

Anto no agsimamaaron idiborsyo na sakey a laki so akulaw to ta pian mangasawa na sananey a bii? Nayarin diad saginonor et sikato so magbabawi tan nipawil ed kongregasyon. Diad ilabas na saray taon et sikato so nayarin onaligwas tan ‘ontundas ed inkatatken.’ (Hebreos 6:1) Balet legan a manbibilay nin agni akiasawa so inmunan akulaw to, sikato so ag-onkualipika a manserbi ed sakey a responsablin posisyon diad kongregasyon. Sikato so aliwan “asawa na saksakey a bii” lapud anggapo so Makasulatan a kanepegan ton idiborsyo so inmunan akulaw to.​—1 Timoteo 3:2, 12.

Agta saraya so mabiskeg a rason no akin a nepeg a bayuboan na sakey a Kristiano so ibubusol ed mauges?

Komusta so Nipaakar ed Managgalgalaw na Ugaw?

Anto no sakey a bautismadon wala-la’d-edad a Kristiano so seksual a nanggalgalaw ed sakey ya ugaw? Kasin say managkasalanan et ontanlan kauges ya aglan balot perdonaen nen Jehova? Agmet tanton ontan. Inkuan nen Jesus a say ‘mangayew sumpa ed masanton espiritu’ so agnaperdona. Tan inkuan nen Pablo ya anggapo la so bagat parad saray kasalanan na sakey a sigagalan mangaagamil na kasalanan anggaman amta to lay katuaan. (Lucas 12:10; Hebreos 10:26, 27) Balet, anggapoy naromog ed Biblia a mangibabagan say sakey a wala-la’d-edad a Kristiano a seksual a mangaabuso ed sakey a ugaw​—balanglan diad inseston paraan odino arum ni​—so agbalot naperdona. On, saray kasalanan to so naurasan no sikato so sisisimoon a magbabawi a manlapud puso tan manguman ed kondukta to. Balet, nayarin sikato so siansia nin mipuligesgesan ed mauges a silalaman iran kiling ya abayuboan to. (Efeso 1:7) Tan wala ra so nayarin pansumpalan ya agto napaliisan.

Dependi ed ley na dalin a panaayaman to, say managgalgalaw so maseguron napriso odino onarap ed arum a dusa na Estado. Say kongregasyon so agmanalimbeng ed sikato manlapud saya. Niarum ni, say laki so angiparungtal na seryoson kaleteyan tan sirin et nepeg a konsideraen. No sikato so ompatnag a magbabawi, sikato so pasesegen ya onaligwas ed espiritual, mibiang ed lawak a serbisyo, nawalaan ni ingen na saray betang ed Teokratikon Eskuelaan Parad Panagministro tan agmangibabangat iran betang ed Service Meeting. Balet, agkabaliksan na saya a sikato so onkualipika a manserbi ed posisyon na responsabilidad ed kongregasyon. Antoray Makasulatan a rason ed saya?

Say sakey et, say matatken so nepeg a “madangka.” (Tito 1:8) Tua, anggapo ed sikatayo so walaan na naspot a dangka. (Roma 7:21-25) Balet say dedikadon wala-la’d-edad a Kristiano a mankakasalanan ed seksual a panag-abuso ed ugaw so pakakapatnagay aliwan natural a silalaman a kaleteyan. Ipapanengneng na eksperiensia a say ontan a wala-la’d-edad so maseguron manggalgalaw ed arum ya ugugaw. Tua, aliwan amin a managgalgalaw na ugaw so manguulit ed kasalanan, balet dakel so manguulit. Tan agnausisa na kongregasyon iray puso pian naamtaan no siopa so nayari odino agnayarin manggalgalaw lamet ed ugugaw. (Jeremias 17:9) Sirin, say konseho nen Pablo ed si Timoteo so onaaplika tekep na nikabiig a danet diad kaso na saray bautismadon wala-la’d-edad a nanggalgalaw ed ugugaw: “Agmo itapew so saray limalimam a magano ed anggan siopa; tan agka met minonong ed saray kasalanan na saray arum.” (1 Timoteo 5:22) Parad salimbeng na ananak tayo, say sakey a lakin kabkabat a manag-abuso na ugaw so ag-onkualipika parad sakey a responsablin posisyon diad kongregasyon. Kaaruman ni, agto nayarin manpayunir odino manlingkor ed antokaman niran nikadkaduman sigpot-panaon a serbisyo.​—Ikompara so prinsipyo ed Exodo 21:28, 29.

Nayarin itepet na arum, ‘Agta say arum so akapankasalanan na arum a nengneng tan mapatnag a nagbabawi, balet ta diad saginonor et naulit da lamet itan?’ On, agawa la itan, balet walaray arum a sengegan a nepeg a konsideraen. Alimbawa, no sakey ya indibidual so makagawa na imoral iran getma ed arum a wala-la’d-edad, say wala-la’d-edad so nepeg a makayarin manrisisti ed say getma to. Saray ugugaw so mas mainomay a palikdoen, wetweten, odino taktakoten. Sasalitaen na Biblia so kakulangan na kakabatan na ugaw. (Uliran 22:15; 1 Corinto 13:11) Si Jesus so angusar ed ugugaw bilang sakey ya alimbawa na mapaabeban inkainosinti. (Mateo 18:4; Lucas 18:16, 17) Say inkainosinti na sakey ya ugaw so manasaglawi ed sakey a nagnap a kakulangan na eksperiensia. Maslak ya ugugaw so mabulos, magunaet a mamaliket, tan sirin et maininomay ya abusoen na masilib a wala-la’d-edad a kabkabat tan panmamatalekan da. Kanian, say kongregasyon so walaan na responsabilidad ed imaton nen Jehova pian salimbengan iray ugugaw to.

Say nipasal-a-maong ya ugugaw so makakaaral a mangunor tan mangigalang ed atateng da, ed mamatatken, tan arum niran wala-la’d-edad. (Efeso 6:1, 2; 1 Timoteo 5:1, 2; Hebreos 13:7) Makapadimlan tuloy iyan aliwan natural ed sekso no sakey ed sarayan dederlengen so manganamot ed inosintin panagmatalek na ugaw pian sikatoy amoyoten odino piliten ya onsuko ed seksual iran gawa. Saraman so seksual a ginalgalaw ed onian paraan so mabetbet a mipupuligesgesan ed dakel a taon pian talonaan so nanresultaan ya emosyonal a panpapasakit. Sirin, say managgalgalaw na ugaw so makanepegan na ambelat a disiplina tan panameget na kongregasyon. Aliwan say pakawalaan to na posisyon na responsabilidad ed kongregasyon so importanti; noagta say ag-atilolan ya inkadalisay na kongregasyon.​—1 Corinto 5:6; 2 Pedro 3:14.

No say sakey a managgalgalaw na ugaw so masimoon a magbabawi, bidbiren to so kakabatan na panangiyaplika ed saray prinsipyo na Biblia. No talagan bubusolen toy mauges, dimlaen to so ginawa to tan mipuligesgesan pian napaliisan toy pakapangulit ed kasalanan to. (Uliran 8:13; Roma 12:9) Kaaruman ni, peteg a pisalamatan toy Jehova lapud kinabaleg na aro To, a bilang resulta et say sakey a magbabawin managkasalanan, a singa sikato, so siansian makapandayew ed masanto a Dios tayo tan makapanilalo a napibilang ed “saray maptek” a manayam diad dalin ed ando lan ando.​—Uliran 2:21.

[Paimano ed leksab]

[Blurb ed pahina 28]

Anggaman peperdonaen nen Jehova iray magbabawin managkasalanan, wala ra so nayarin pansumpalan na saray kiwas da ya agnapaliisan