Say Katuaan Nipaakar ed Angheles

Genda-gendat a lalaktipen na pikabat ed sakey a too so pangamta nipaakar ed pamilya to. Ontan met no nipaakar ed pangamta ed si Jehova a Dios. Nagkalalo ni so nalalanor nen say basta pangamta ed ngaran to. Nepeg met a naamtaan tayo so nipaakar ed “pamilya” to diad tawen. (Ipareng so Efeso 3:14, 15.) Tatawagen na Biblia iray anghel ya “ananak” na Dios. (Job 1:6) Diad pangonsidera ed makatantandan betang da ed Biblia, kaliktan tayon amtaen so nagkalalo ni nipaakar ed sikara pian natalosan so pasen da ed gagala na Dios.

SAKEY a balon sanga na kultura so onaaligwas. Aliwa lambengat a mas dakel a totoo so mangibabagan sikaray manisia ed saray anghel; ondarakel lan ondarakel so mangibabagan sikaray naaapektoan da ed pigaran paraan. Sanen intepet ed 500 ya Amerikano, “Wala ta lay anghel a nampalikas ed sika?” ngalngali kakatlo so inmebat na on. Makapakelaw met so bilang na saray tobonbalo a manisia ed angheles​—unong ed sakey a surbey diad Estados Unidos, sakey a kompleton 76 porsiento! Mapatpatnag, interesadoy totoo ed saray anghel. Balet panon a say peles a kaisipan nipaakar ed saray anghel so makakadampot ed katuaan na Biblia?

Iyaamot so Betang nen Satanas

Sano pantotongtongan iray anghel, kaukolan ya agtayo ibaliwala iray marelmeng ya anghel, mangatatawen iran pinalsa ya unong ed ibabagay Biblia et nanrebelde ed Dios. Manuna ed saraya et si Satanas. Sakey a popular a libron tatawagen ya Ask Your Angels so mangisusuheri a si Satanas so sakey labat a “kabiangan na Dios” ya ontutulong ed totoon pabiskegen “iray espiritual a masel” da diad panamegley na lawas pananukso. Inkuan na autor ya anggaman ed “maaro iran intensyon” nen Satanas, diad loob na saray siglo et sikato so sililingon nipapaamta bilang mauges. Inkuan da ni a si Satanas tan si Jesus, “anggaman aliwan eksakton mankapanoan ed sakey tan sakey, et anggan panon met et walad saksakey a dapag, importanti iran kabiangan na sakey a persona.” Saraya so makapabiglan balikas, balet anto ta so ibabaga na Biblia?

Ipapalinew na Biblia a si Satanas so aliwan “kabiangan na Dios” noagta kabusol na Dios. (Lucas 10:18, 19; Roma 16:20) Ipupulisay to so inkasoberano nen Jehova, tan talagan aliwan “maaro” iray intensyon to ed totoo. Andiay puson ipapangget toy sanok to ed ariripen na Dios ed dalin. Aakusaen tora ed imaton na Dios ed agew tan labi!a (Apocalipsis 12:10, 12, 15-17) Desidido si Satanas a paugesen ira, antokaman iray pansumpalan. Say andiay-panangasin impamasegsegang to ed si matunong a Job so angiwalwal ed akalyoan ya awawey to ed paniirap na too.​—Job 1:13-19; 2:7, 8.

Arawin tuloy ed pagmamaliw a “walad saksakey a dapag,” si Satanas tan si Jesus so mansumpaan a tuloy ed sakey tan sakey. Ona ta, anggapoy duaruwan si Satanas so anagyat ed si Herodes a mangipakseb na palanit a panamatey ed saray kapanyanak​—amin lapud gunaet a pateyen so ugaw a Jesus! (Mateo 2:16-18) Tan nantultuloy so masebeg a panangataki nen Satanas anggad impatey nen Jesus. (Lucas 4:1-13; Juan 13:27) Kanian, imbes a magmaliw ya “importanti iran kabiangan na sakey a persona,” si Jesus tan si Satanas so sigpot a mandumaan. Ipapanengneng na propesiya na Biblia a say gulaan da et agnapaliisan. (Genesis 3:15) Matukotukoy, say pinaolin Jesus so maneral ed si Satanas ed nigeter a panaon na Dios.​—Apocalipsis 1:18; 20:1, 10.

Saray Pikakasi ed Siopa?

Irerekomenda na pigaran maka-anghel a pakurang so panagdalepdep tan arum niran teknik pian mitalosan ed saray anghel. “Say sakey a masimoon a kerew a nakatongtong so siopaman a membro na mangatatawen a pamilya so agnibaliwala,” kuan na sakey a libro. “Onkerew tan sika so naebatan.” Sikara di Miguel, Gabriel, Uriel, tan Rafael so kabiangan na saray anghel ya irerekomenda na libron konsultaen.b

Balet ta, imbangat nen Jesus iray patumbok to a manpikasi ed Dios, aliwan diad saray anghel. (Mateo 6:9, 10) Mipadpara, nansulat si Pablo: “Diad amin a bengatla diad panamegley na pikakasi tan ey-ey tekep na pisasalamat ya ipaamta iray kerew yo ed Dios.” (Filipos 4:6) Kanian, diad saray pikakasi ra, saray Kristiano so ag-onsisingger ed siopaman nilikud ed si Jehova, tan gagawaen da itan diad ngaran nen Jesu-Kristo.c​—Juan 14:6, 13, 14.

Anggapo ta so Denominasyon na Angheles?

Unong ed si Eileen Elias Freeman, a mangidadaulo ed AngelWatch Network, “palumbasan na saray anghel so antokaman a relihyon, antokaman a pilosopiya, antokaman a kredo. Diad tua, saray anghel so anggapoy relihyon a singa ed pakaamta tayo ed satan.”

Anggaman ontan, ipapalinew na Biblia a walaay relihyon iray matoor ya angheles; dadayewen da so tuan Dios, si Jehova, ya agmangiyaabuloy na pilalaslasan ed arum nin dirios. (Deuteronomio 5:6, 7; Apocalipsis 7:11) Kanian, inlitrato na ontan ya anghel so inkasikato ed si apostol Juan bilang “kaparan aripen” na saramay ontutulok ed saray ganggan na Dios. (Apocalipsis 19:10) Anggapoy nabasa tayo ed Biblia a saray matoor ya anghel so manusuporta na antokaman nin porma na panagdayew. Sikaray mangiiter ed si Jehova na nikabkabiig a debosyon.​—Exodo 20:4, 5.

“Say Ama na Tila”

Dakel ya inkuan ya asagmak nipaakar ed saray anghel so mangilalanor na pitatalosan ed saray inatey. “Aliknak ya aromog na pangamaen ko so paraan pian nakatongtong toak tan naipaamta ed siak a diad kaunoran et sikato so maliket,” kuan na sakey a biin manngaran na Elise kayari impakaawat na abaloan ton sakey a pasingawey. Ontan met so nanonotan nen Terri ed pinablin kaaro ya inatey. “Sakey simba kayari ponpon,” kuanto, “nampanengneng ed siak ed sakey a singano kugkugip. Imbaga to’d siak ya agko pannangisay intaynan to, ta sikatoy maliket tan walad kareenan.”

Balet ibabaga na Biblia a saray inatey “so andian na liknaan ed antokaman.” (Eclesiastes 9:5) Kuanto met a sano inatey so sakey a too, “diad saman met lanlamang ya agew et natawtaw so panag-isip to.” (Salmo 146:4) Anggaman ontan, si Satanas so “say ama na tila.” (Juan 8:44) Sikato imay nanlapuan na tilan ag-ompatey so atooan a kamarerwa. (Ipareng so Ezequiel 18:4.) Dakel a totoo natan so manisia ed saya, ya onkikiling ed gagala nen Satanas, lapud paaandien toy belat na pankaukolan na pananisia ed kioli​—ya importantin doktrinay Inkakristiano. (Juan 5:28, 29) No ontan, say pitatalosan ed saray inatey odino ompapatnag a panangawat na saray mensahe manlapud sikara so sakey nin aspekto na maka-anghel a pakurang ya ag-aabobonan na Dios.

Kasin Iyaasingger ed Angheles Odino ed Dedemonyo?

Maslak ed kabiangan na peles a maka-anghel a pakurang et nipaakar ed okulto. Konsideraen pay eksperiensia nen Marcia. “Manlapud Setyembre anggad Disyembre 1986,” kuanto, “siak so angawat na saray mensahe manlapud ‘mamilagron pasen.’ Akanengneng ak na saray payawar tan awalaan na nikadkaduma iran kugip nipaakar ed ‘apalabas a bilay.’ Akatongtong koray kaaro ya inatey la tan awalaan na dakel niran eksperiensia ed kanonotan a diman et walay amtak nipaakar ed totoo ya apinengnengan ko labat ed saman. Atumangan ak met na automatikon panagsulat tan angipasabi na saray mensahe manlapud saray espiritu. Say pigara, ya agkon balot akabkabat legay bilay da ed dalin, so mangipasabi na saray mensahe ed arum diad panamegley ko.”

Kaslakan so panangusar na dibinasyon bilang paraan pian “mitalosan” ed angheles. Sakey a palapagan so direktan mamapaseseg ed saray managbasa to a mangusar na saray galing, tarot card, sinsilyon I Ching, panagpalar, tan astrolohiya. “Abuloyan moy akindalem mon itonton to ka ed suston orakulo,” so insulat na saray autor, “tan manmatalek a makaromog ka diman na anghel.”

Anggaman ontan, unong ed Biblia antokaman ‘a naromog mo diman’ so maseguron aliwan sakey ed saray anghel na Dios. Akin? Lapud say dibinasyon so direktan sumlang ed Dios, tan saray tuan managdayew​—diad tawen tan ed dalin—​so nepeg ya agnapilanlanor ed saya. Siempre, diad Israel et say dibinasyon so kasalanan a dudusaey ipapatey! “Amin a manggagawa na sarayan bengatla so sakey a bengatlan makapadimla ed si Jehova,” inkuan na Ganggan.​—Deuteronomio 13:1-5; 18:10-12.

“Sakey ya Anghel na Liwawa”

Agtayo nepeg a nasurpresa a nayarian a papawayen na Diablo a say dibinasyon et makagungguna, angheliko ni ingen. Kuan na Biblia a si Satanas so “naynay a mamapasimbalo ed inkasikato a sakey ya anghel na liwawa.” (2 Corinto 11:14) Nayarian to ni ingen a mamabrika na saray pasingawey tan pagmaliwen to iratan a tua, a papalikdoen iray makakanengneng pian isipen a sayan pasingawey et nanlapud Dios. (Ipareng so Mateo 7:21-23; 2 Tesalonica 2:9-12.) Balet amin a kimey nen Satanas​—kaunongan man kamaong odino kaunongan man kauges so kipatnag na saratan—​so onkakana ed sakey ed duaran gagala: pian sagyaten so totoon onsumpa ed si Jehova odino basta bulagey kanonotan da ta pian ‘say liwawa na maglorian maong a balita nipaakar ed Kristo so agmakasindag.’ (2 Corinto 4:3, 4) Sayan onsaginonor a paraan na panamalidko so mabetbet a sanka-epektiboan.

Konsideraen pay salaysay na Biblia nipaakar ed sakey ya aripen a bii ed inmunan siglo. Saray panagparles to so angitarok na dakel a gungguna ed saray amo to. Dakel ya agew a tinumtumbok toray babangatan, ya ibabagan: “Sarayan lalaki so aripen na Sankatagyan a Dios, a mangipaparungtal ed sikayo na dalan na kilalaban.” Tua met so inkuanto. Ingen, ibabaga na salaysay ed sikatayo a sikato so aselepan, na aliwan sakey ya anghel, noagta “sakey a demonyo na dibinasyon.” Diad kaunoran, si Pablo so “inmarap tan inkuan ed espiritu: ‘Iganggan ko ed sika diad ngaran nen Jesu-Kristo ya ompaway ka ed sikato.’ Tan pinmaway itan ed saman a mismon oras.”​—Gawa 16:16-18.

Akin a pinapaway nen Pablo iyan espiritu? Tutal, angitarok itan na baleg ya almo ed saray amo na biin sinelepay demonyo. Lapud walaay mamilagron pakayari, nayarin imbaga na biin aripen ed saray dumaralos no kapigan mantanem, ed mamarikit no kapigan miasawa, tan ed saray minero no iner so pananapay balitok. Ona ta, sayan espiritu so amakiwas ni ingen ed biin mansalita na pigaran katuaan, a sipupublikon idadayew iray babangatan!

Anggaman kuan, satan so “sakey a demonyo na dibinasyon.” Lapud ontan, anggapoy kanepegan ton mangiproklama nipaakar ed si Jehova tan ed probisyon to nipaakar ed kilalaban. Say makomplementon panagsalita na satan, anganko imbalikas pian napanisiaan iray panagparles na biin aripen, so angiyarawi ed imano na saray manbabantay manlapud tuan papatumbok nen Kristo. Tekep na maong a rason, impasakbay nen Pablo ed saray taga Corinto. “Agkayo nayarin mibiang ed ‘dulang nen Jehova’ tan ed dulang na saray demonyo.” (1 Corinto 10:21) Agpankelawan, a dineral na saray inmunan-siglon Kristiano so amin a libro ra a nisiglaot ed dibinasyon.​—Gawa 19:19.

Sakey ya “Anghel a Mantektekkiab ed Pegley na Tawen”

Singa naimano tayo la, iwawalwal na Biblia so maslak a kabiangan na peles a maka-anghel a pakurang bilang maapit a nisisiglaot ed Kabusol na Dios, si Satanas a Diablo. Kabaliksan ta na saya a saray masanton anghel so agmibabali ed saray kurang na too? Diad biek a dapag, sikara la natan so manggagawa na makapanyarin kimey ed dalin. Anto itan? Pian naebatan, nepeg tayon nengnengen so libro na Apocalipsis ed Biblia. Saray anghel so nasasalambit a mas dakel nin danay ed sayan libro nen say arum nin libro ed Biblia.

Diad Apocalipsis 14:6, 7, nabasa tayo ditan so rekord nen apostol Juan nipaakar ed mapropetikon pasingawey ya anengneng to: “Anengneng ko so sakey nin anghel a mantektekkiab ed pegley na tawen tan sikato so walaan na andi-anggaan a maong a balita pian iparungtal bilang maliket a pabalita ed saramay manaayam ed dalin, tan ed amin a nasyon tan tribu tan pansasalita tan totoo, a mankuan ed maksil a boses: ‘Takotan so Dios tan igloria, lapud say oras na panangukom to so sinmabi la, kanian idayew yo imay Sakey a nanggawa ed tawen tan dalin tan dayat tan saray subol na danudanum.’”

Ipapabitar na sayan kasulatan so manunan kimey na angheles natan. Sikaray nalalanor ed importantin tuloy ya asainmin​—satan et say panangiyabawag na maong a balita na Panarian na Dios. Nipaakar ed sayan kimey no akin ya insipan nen Jesus ed papatumbok to: “Siak so kaiba yo ed amin ya agew angga ed konklusyon na sistema na bengabengatla.” (Mateo 28:18-20) Panon a si Jesus so kaiba na saray patumbok to? Say sakey a paraan et diad panamegley na panangitarok ed sikara na anghelikon tulong pian nasumpal iyan baleg a kimey.

Masulok a sakey bilyon ya oras so uusaren na Tastasi nen Jehova a tinaon ed panangipulong na maong a balita na Panarian na Dios. Legan a gagawaen itan a kimey, nanenengneng da so ebidensya na panangiwanwan na saray anghel. Diad panagkabkaabungan a ministeryo ra, mabetbet a nagagawa so pitongtong da ed totoon kaykayari ran manpikasi pian patulongan a natalosan iray gagala na Dios. Say panangiwanwan na saray anghel, tekep na dilin inkabunek na Tastasi, so nansumpal ed nilasus libon onkakamang ed pikakabat ed si Jehova ed kada taon!

Tatalinengen mo ta so anghel a mantektekkiab ed pegley na tawen? Sano ombisita iray Tastasi nen Jehova, akin ya agmitongtong a maong ed sikara ed sayan anghelikon mensahe?

[Saray paimano ed leksab]

[Kahon ed pahina 8]

SIOPARAY ANGHEL?

MISUNIAN ed sisiaen na dakel, saray anghel so aliwan saramay sinmian a kamarerwa na totoon inaatey la. Malinlinew ya ibabaga na Biblia a saray inatey so “anggapoy liknaan ed antokaman.” (Eclesiastes 9:5) Iner sirin so nanlapuan na saray anghel? Ipapanengneng na Biblia a sikara so sansasakey a pinalsa na Dios sakbay na inkiletneg na dalin. (Job 38:4-7) Say kabaleg na mangatatawen a pamilya na Dios so nayarin titibukelen na nilasus minilyon, ompan binilyon odino dakel ni ingen! Arum ya angheles so akiulop ed si Satanas ed impanrebelde to.​—Daniel 7:10; Apocalipsis 5:11; 12:7-9.

Lapud si Jehova so sakey a Dios na uksoy, agpankelawan a say baleg a pamilya ton angheles et organisado.​—1 Corinto 14:33.

• Say manunan anghel, a namparan diad pakayari tan ed autoridad, et say arkanghel, si Jesu-Kristo, a tatawagen met a Miguel. (1 Tesalonica 4:16; Judas 9) Nisilong ed autoridad toray serapin, kerubin, tan anghel.

• Saray serapin so ayudante ed trono na Dios. Mapatpatnag a say asainmin da et sasaglawien toy panangiyabawag ed kasantosan na Dios tan panamasiansian malinis ed totoo to.​—Isaias 6:1-3, 6, 7.

• Saray kerubin so nanengneng met ed arapan nen Jehova. Bilang manangipasabi odino bantay ed trono na Dios, iyaatagey da so karlangan nen Jehova.​—Salmo 80:1; 99:1; Ezequiel 10:1, 2.

• Saray anghel (say kabaliksan to et “mensaheros”) so ahente tan pinabtangan nen Jehova. Sumpalen da so madibinon linawa, balanglan sasaglawien toy kililiktar na totoo na Dios odino kadederal na saray marelmeng.​—Genesis 19:1-26.

[Saray litrato ed pahina 7]

Tatalinengen mo ta so anghel a mantektekkiab ed pegley na tawen?