Kasin Walaray Anghel ed Limog Tayo?

Maples so inkagawa. Legan ya araldalem so iisipen tan agnaiimano so kaliberliber to, manaakar si Marilynn ed riles na tren. Bigbigla, nadngel to so maksil ya ungol. Tinmangay, pian nanengneng labat a sikatoy akaalagey ed dalanan a mismo na onsasabin tren! Abigla si Marilynn, ya agmakagalaw lapud takot. Asingsingger lan maong so tren a nanengneng toray asul a kamataan tan manputin busalog na konduktor. Agbalot nalingwanan nen Marilynn so tinmumbok ya agawa. “Singano walay sakey ya alan ya angitulak manlapud benegan,” kuanto. “Nibantak ak ed saray nanpopoolan ed abay na riles.” Agargar, inmalagey si Marilynn pian pisalamatan so angiliktar ed sikato​—pero anggapoy wadman a too! Say konklusyon to? “Inliktar ak na anghel de la guardiak,” so inkuan nen Marilynn. “Siopa ni iman?”

SAY agmananisian mundo so singano biglan nauumalit ed saray anghel. Diad agano niran taon, saray mangatatawen a palsa so nagmaliw a tema ed saray palabas ed telebisyon, pelikula, tan ontan met ed sakey a drama ed Broadway. Manunaan ed listaan na sankasaliwan iran relihyoson libro et say nipaakar ed angheles. Walaray ulopan, seminar, tan ankekelag a dyaryon nipaakar ed angheles. Walaray pinorman engrupon panagaral pian ontulong ed sika​—a singa ed impangibalikas na sakey ya artikulo—​pian “makalay anghelikon pananuporta.”

Aanamoten na saray oportunistan negosyante so maka-anghel a pakurang diad panlalako na dakel a produkto. “Antokaman a walaan na tatak ya anghel so matubon ilalako,” kuan na sakey a kamuyong na tindaan ed Estados Unidos. Nilikud ni ed pakakalako na dakel a libro, itetekep to ed listaan “iray estatua, alpiler, manika, T-shirt, poster tan saray kard a pabano ed saray anghel”​—amin et panasamel ed tatawagen na sakey a peryodistan “mangatatawen iran tubo.”

Balet ipipilit na saray maka-anghel ya aliwa lambengat ya uso iya. Pian nasuportaay ibabaga ra, ipapaarap daray nantutumbokan a paneknek​—saray “tua-ed-bilay” ya eksperiensia nipaakar ed angheles. Kuan na arum ya akanengneng ira na anghel ed porman too. Say arum met so akanengneng na sakey a liwawa, akadngel na boses, akalikas na payawar to, odino sakey a puersa, ya abaloan na arum a sakey ya anghel. Dakel, singa si Marilynn, so mangibabagan insalba ira na sakey ya anghel.

Anto so nagagawa? “Diad padesir ko et linmigsa lamet so espiritualidad,” kuan nen Joan Wester Anderson, ya angisulat na duaran libro nipaakar ed “mamilagro” iran eksperiensia. Nagkalalo ni ed saya so imbaga nen Alma Daniel, a tinmulong ed impansulat na sakey nin libro. Inkuanto a “binilin [iray anghel] a natan et manpanengneng la pian dakel a too so nasabi. Say rason no akin a naynay tayoran nanenengneng et lapud onman so labay da. Gagawaen da itan.”

Kasin peteg iya? Odino wala ni walad benegan na kaplesan ya inkaingganyo ed angheles? Pian naamtaan, nepeg tayon usisaen so Salita na Dios. Lugan na Biblia so katuaan nipaakar ed saray anghel, a singa nengnengen tayo.

[Picture Credit Line ed pahina 2]

Pahina 3 tan 4: The New Testament: A Pictorial Archive from Nineteenth-Century Sources, nen Don Rice/​Dover Publications, Inc.