Report na Saray Manangiyabawag na Panarian
Say Panagtasi so Manbubunga ed Ayaman tan Diad Eskuelaan
LALANOREN na bilay na Kristiano so panggawa na maong ed arum, lalo la ed panangipanabang ed sikara na maong a balita na Panarian na Dios. Kuan na Uliran 3:27: “Agmo isisiblet so maong ed saramay mankakaukolan, sano walad pakayari na limam a gawaen itan.” Diad Argentina, sakey balolakin Tasi a walad komatlon taon to ed haiskul so malabay a mangipanabang na maong a balita na Panarian ed kaaron kaeskuela. Say impanggawa to ed ontan so awalaan na dakel a resulta.
Sakey ya agew et sinaglawi na balolakin Tasi ed kaaro to ya aliwan amin a relihyon et maong. Sanen inyebat na balolakin anggapo met so mauges a gagawaen to, inkuan na Tasi: “Anggapo met so gagawaen mon antokaman parad Dios.” Saya so nansengegan na panisip na tobonbalo. Diad saginonor et insalaysay na Tasi a saraya la so kaunoran ya agew tan pian abobonan na Dios, say sakey so nepeg a mangala na suston pikakabat ed Biblia tan iyaplika itan. Inmabobon so kaaron kaeskuela to. Balet kasin sikatoy abuloyan na pamilya ton manaral na Biblia? Pian panisipey kaaro to, kinerew ed sikato na Tasi a basaen so libron Makapambilay Kayo na Ando lan Ando ed Paraiso diad Dalin.
Linmabas so panaon, tan say kaaro so tinmundan maneskuela. Anggapoy balita nipaakar ed sikato ed loob na ngalngali sakey taon. Anggad sakey ya agew et say Tasi so asurpresa sanen sikatoy tinelepono na kaaro to pian ipaamtan nanenengneng to lan talagan nasusumpal iray propesiya ed Biblia. Tampol ya inyarunsa na Tasi so pangiyaral ed sikato na Biblia.
Sanen dinalaw to ed ayaman so datin kaaro ton kaeskuela, naimano ton saray ateng na kaaro to so napapagaan a tuloy nipaakar ed pandadarakay panaon na anak da. Anggan say yugtan ya agi ton laki so nanisip a sikatoy naaambagel la. Kanian impila na atateng so yugtan ed ontumbok a panagaral. Kayari to, tekep na saray lua ed mata to, sayan balolaki so angibalita ed atateng to a say kuya to so agnaaambagel, a sengegay impangikelyaw na ina to, “Imbes a saksakey so problemak, natan et duara la!”
Kanian, diad tinmumbok a panagaral et sikaton mismo so wadman tan inmabobon a saray anak to so agnaaambagel. Diad saginonor niyarunsa so sakey a panagaral ed sikaran sanasawa. Ag-abayag et say interon pamilya so ginmapon onatendi ed saray miting ed kongregasyon ed Kingdom Hall. Diad kaunoran, say laki tan bai so ginmapo met a manaral na Biblia tan onatendi ed saray miting. Nanlapulad saman, say inmunan balolaki so nampabautismo. Sikatoy angasawa, tan sikaran sanasawa so maseseg a manangipalapag.
Nagkalalo ni, diad panamegley na impormal a panagtasi ed eskuelaan et atulongan na kalangweran a Tasi so duara nin kaeskuela ontan met ed nanay tan agin bii na sakey ed sikara pian manaral na Biblia. Ami-amin et 11 a totoo so akaaral ed katuaan na Biblia lapud say kalangweran a Tasi so agtinmundan nanggawa na maong ed saray kaeskuela to. Agaylan makapaliket a nansumpalan! Peteg, “Maliket iray totoon say Dios da et si Jehova!”—Salmo 144:15.