Anggapoy Panretiro ed Sikami!
“ANGGAPOY PANRETIRO ED SIKAMI” so mensahen naimanom sano ombisita ka’d sakey a nikaduman ayaman ed Tokyo, Hapon. Ditan manaayam so sakey a pamilyan titibukelen na 22 lalaki tan bibii, a say edad da et manpromedyoy 70 taon. Sikaray pinankasakey, aliwan lapud pamilyan siglaotan, noagta say kaslakan ya interes—say misioneron serbisyo. Sikaray nantultuloy diad sigpot-panaon a panagpulong a kimey diad dagup na 1,026 taon! Say taloran sankatatkenan a membro so inyanak nen 1910. Pitora ed sikara so ginmapo ed sigpot-panaon a serbisyo ra sanen sikaray tin-edyer ni. Siamera ed sikara so akanengneng ed inyaligwas na kimey a panagpulong-na-Panarian diad Hapon nanlapulad nen saya so nigapo kayari Guerra Mundial II.—Isaias 60:22.
Anggaman ontan, sayan anemiran-grado a datin paalagey na sanga na Watch Tower so pasen na panamaseseg, nagkalautla lapud espiritu, matalonan walna, na saray misioneron manaayam ditan. Anggaman maslak ed sikara so makapuy la lapud inkatatken tan kapuy na bunigas, anggapoy anggan sakey ed sarayan espiritual a mibabakal so akaparaan ya ontunda. Sigpot ya inapiger na saray Tasin Hapon so paalagey parad sikara, ya angitarok ira na sakey a Kingdom Hall ed silongan tan sakey a luluganan ya elebetor.
No Antoy Manggagawa’d Sikaran Maliket
Lapud sikaray nansiansia ed asainmin da ed loob la na dakel a taon, nalilikna na sarayan misionero a saya so ayaman da. “Sanen pinmawil ak ed Australia parad distriton kumbension ed apalabas a tiagew,” kuan na sakey a sankatatkenan a membro na pamilya, “laba-labay ko lay onsempet kayari duaran simba!” Inaro daray totoon lilingkoran da tan abayuboan day aralem a panangaro ed sikara. Papablien na amin a misionero iray sulat tan saray tawag ed telepono a mangipapanonot ed aktibidades diad apalabas iran panaon.
Satan so resulta na maseet a ministeryo. Lapud apakiwas na aro parad si Jehova, maganat ya ipupulong na saray misionero so Salitay Dios ed nanduruman sirkumstansya. (Ipareng so 2 Timoteo 4:2.) “Impasal mi inkasikami a magmaliw a magayaga lapud manlilingkor kami ed si Jehova,” kuan nen Vera MacKay, a manlilingkor ed Hapon ed loob lay 37 taon. “Anggan anggapoy mangilukas na puerta, wadman kami pian mantasi nipaakar ed si Jehova.”
Labindua ed sarayan misionero so agbalot linmoob ed panamaley, balet maliket iran makapanlingkor ed Katawan ya anggapoy makasigen. (1 Corinto 7:35) Sakey ed sikara et si Gladys Gregory, a nanlingkor bilang misionera ed loob na 43 taon. Inkuanto: “Pian nawalaan na babaleg a kawayangan parad serbisyo ed si Jehova, nanpayunir ak, kayari to et diad Gilead [Watchtower Bible School of Gilead], tan insan diad misioneron kimey. Anggan agnansamba nipaakar ed saya, siak so nansiansian marikit, agkon balot nagbabawian iya.”
Mabulos a Mibagay
Anggaman arum a totoo so magmaliw a bangar legan ya ontatatken, saray misionero so akaparaan a mibagay. Sikara di Lois Dyer, Molly Heron, tan si Lena tan Margrit Winteler so walad melmelag ya ayaman a panmisionero ed sakey a purok ed Tokyo. Nanayam ira diman ed loob na masulok a 20 taon tan apaapit ed totoo ed saman a lugar. Diad saray teritorya ra, 40 totoo so rota ed magasin na sanagin Winteler, tan 74 met ed di Molly tan Lois. Insan kinerew na Sosyedad a sikaray onalis ed say anemiran-gradon ayaman a panmisionero ed sentro na Tokyo. “Diad inmuna et siak so adismaya tan naermenan,” so binidbir nen Lena. Balet singa say lawas la, akibagay ira ed balon asainmin da. Anto so nalilikna ra natan? “Malikeliket,” ebat nen Lena. “Natan et duaran agagi ed Bethel so wadia pian ilutoan tan ilinisan da kami. Sikami naaasikason maong.” Amin da so onabobon ed si Lois, a nankuan: “Say maaron panangasikaso ya itatarok ed sikami na organisasyon nen Jehova so mangiiter ed sikami na tulong pian makapantultuloy.”
Akibagay met si Norrine Thompson ed balo iran sirkumstansya. “Diad loob na 15 taon,” kuanto, “apribilihyoan ak a miulop ed asawak [datin taga New Zealand] ed pandistriton kimey sanen say interon Hapon et saksakey ni distrito to.” Anggaman ontan, kinmapuy so bunigas na asawa to, tan kaukolan a sikatoy mipuligesgesan ed sankabalgan a subok ed bilay to—say impatey to et 18 taon lay apalabas. “Diad saman a panaon,” kuanto, “say nanggawa’d siak a makapantultuloy ed misioneran kimey et say aron impanengneng na agagi ed interon Hapon, tekep na pikakasi tan panamasiansian okupado ed serbisyo.”
Pan-anos ed Saray Problema ed Bunigas
“Maslak et walaan na problema ed bunigas, balet sikaray masayaksak, tan say pilalek dan manlingkor et sakey a matalonggaring a kualidad,” kuan nen Albert Pastor, say manangasikaso ed ayaman a panmisionero. Pian naasikaso iray misionero, sakey a doktor tan say asawa to, a sakey a nars, so niasain ed ayaman.
Sakey ya agew ngalngali taloy taon lay apalabas, biglan agmakanengneng so kawigin mata nen Elsie Tanigawa, a nangraduar ed koma-11 a klase na Gilead School. Kayari apatiran bulan, naapektoan met so kawanan a mata to. “No maminsan et naandian ak na ilalo lapud agak makapanlingkor a singa say dati. Balet lapud mapangasin probisyon na Sosyedad tan say maaron panangasisti na kaparehak tan arum ni, nantultuloy ak a nangayaga’d serbisyo ed si Jehova,” kuan nen Elsie.
Sikara di Shinichi Tohara tan say asawa to, si Masako, a kaklase nen Elsie ed Gilead, so akasagmak na dakel a subsubok nipaakar ed bunigas da ed apalapas a pigaran taon. Parad si Shinichi, a sakey a makayarin espiker, sakey a baleg a problema so agpakabasa ed saray nota lapud ombuburagas a pakanengneng to. Anggaman dinmalan la ed sakey a baleg tan melag iran operasyon ed apalabas iran taon, saray mata to so masnag sano tongtongen toy nipaakar ed 90 años ya iyaaralan to na Biblia natan.
Anggaman walaan na “sabit ed laman,” ipapasen na sarayan misionero iray kakapuyan da a singa ed impangipasen nen Pablo, a nankuan: “Ta sano siak so makapuy, dia ed satan mabiskeg ak.” (2 Corinto 12:7-10) Tan peteg a makapanyari ira! Akaparaan ira parad kabuasan a panagdayew ya inagew-agew kada ala-siete. Kayari almusal, saramay makasarag ni so ompaway ed lawak a ministeryo ed kabuasan.
Kaiba ira di Richard tan Myrtle Shiroma ed saray regular ya ompapaway ed lawak. Nen 1978 et asagmak nen Myrtle so stroke nisesengeg ed inggapo na arteriosclerosis ed utek, balet inulop to nin siansia so masiken to ed panagbaroy a kimey anggad Nobyembre 1987. Natan si Richard, a 70 años la, so ontutulong ed si Myrtle ed amin a bengatla. Ombangon ed ala 5:00 n.k., ibabangon to, aamesen, kakawesan, iikday make-up, tan susuboay tagano. Insan sikatoy ilugan ed wheelchair parad lawak a serbisyo kada kabuasan, a mankakabkaabungan ed loob na ngalngali sakey oras tan kayari to et mantatasi ed totoo diad istasyon na bus. Agla makapansalita si Myrtle, balet say kaunoran iran salitan imbalikas to et Dendo, dendo, say lenguahen Hapon parad “Panpulong, panpulong.”
Say anak dan bii, si Sandra Sumida, so inmalis ed ayaman a panmisionero pian ontulong ed sikara. Agano ni et naandian si Sandra na inad-aro ton masiken lapud atake ed puso. Aapresyaen to so mapangasin oksuyan na Sosyedad na Watch Tower ya ipawil ed Hapon manlapud asainmin to ed Guam, a ditan nanlingkor bilang misionera a kaibay asawa to. “Lawas kon nalilikna ya agak akatulong ed saray ateng ko lapud wala ak ed Guam,” kuanto. “Say agik, si Joanne, so nanasikaso ed sikara ed sayan ayaman. Kanian sanen sinmabi so pankanawnawa, alay liket ko. Say liknaan a nakakaukolan ak dia so nagmaliw a sakey a therapy parad siak nanlapu lad biglan impatey na masiken ko.”
Siansian Manaasikaso
Anggaman nalilikna na saray misionero iray epekto na itatatken, agda nin siansia labay ya italirak so espiritu na panagmisionero. (Salmo 90:10; Roma 5:12) Sikara di Jerry tan Yoshi Toma, a kabiangan na inmunan nangraduar ed Gilead a sinmabi’d Hapon, so siansian oonlad saray lugar na negosyo ed downtown na Shibuya. “Sanen sinmabi kami ed duaran-gradon paalagey a wadia nen 1949, lalaen miray dugout. Natan say Tokyo so sakey ed manunaan a syudad. Matatken kami la tan agla makapanggawa na singa say dati. Balet sano ompawil kami manlapud panagpulong, sikami so talagan narerepreskoan,” kuan nen Yoshi.
Si Lillian Samson so sakey a misionera ed Hapon ed loob la na 40 taon tan naliliketan a tuloy ed ministeryo to. “Tutulongan ko natan so sakey ya 80 años a biin akiaral ed kaparehak, si Adeline Nako, a pinmawil ed Hawaii pian asikasoen so mansasakit ya ina to. Ag-abayag et nagmaliw a manangipalapag na Panarian iyan bii kayari impanalona to ed probleman nipaakar ed panagdayew ed saray inmunan atateng. Sikatoy linma ed templo tan imbaga ed asawa na pari, ‘Akumberte ak la ed Inkakristiano!’” Tekep na saratan a gayaga ed bilay to, agbalot nambabawian nen Lillian so agew sanen, diad taon a 19 et inmalis ed sekular a trabaho pian onggapon manpayunir.
Sikara di Ruth Ulrich tan Martha Hess, a mankaparehan misionera ed loob na masulok a 45 taon, so nankimey manlapud sayan ayaman a panmisionero ed loob na 35 taon. Kabkabat iran maong ed teritorya ra. Aminsan et kekerewen ed si Martha na sakey a manangasikasoy sirkito: “Bayesen ko pa so lupam ed iyakar a manpulong?” Kabat la na totoo si Martha tan tampol a gagawaten iray magasin, bangta naiirapay manangasikasoy sirkiton mangigapo na tongtongan.”
Sakey ed saray rota na magasin nen Ruth et sakey a biin agmakabasa lapud problema ed bunigas. Siansia ni, tuloy so pangaawat na bii na saray magasin tan angawat ni ingey libron masekder-apis a Mankind’s Search for God. Inumameng nen Ruth no kasin ituloy to ni pangitulor na saray magasin lapud singa anggapoy manbabasa ed saray literatura. Insan sakey ya agew et inmasingger ed si Ruth so asawa na bii ya awit-awit so libron Search, a kuanto: “Agaylay abig na sayan libro! Amidduak a binasa iyan libro.” Nigapo nen Ruth so panagaral na Biblia ed sayan sanasawa.
Sayan mismon ayaman a panmisionero so makapasagyat ed interesadon totoo. Sakey a labi, linma’d man so sakey a balolaki tan nankuan: “Amtak a no siak so onla’d dia et natulongan ak a manaral ed Biblia.” Nigapo so panangiyaral na Biblia ed sikato. Bilang sakey a kusinero ed sakey a restawran na Intsik, katrabahoan toy sakey a biin adespilosip ed loob na dakel a taon. Saray magasin a nipalima na sakey a manangipalapag a binmisita’d restawran so akasabi dima’d kusina. Agustoan na kalangweran a kusinero iraya tan ginapoan ton tinepetan so datin Tasi. Lapud agnaebatan iray tepet, inkuan na bii ed sikato ya onlad ayaman a panmisionero. Sikato la natan so manlilingkor bilang sakey a ministeryal ya aripen tan payunir. Ag-abayag, akapawil met la so adespilosip a bii, tan diad kaunoran et sikato met so nagmaliw a regular pioneer.
Maapresyan amin iray misionero ed ayaman nipaakar ed gagawaen nen Jehova parad sikara. Sikaray nanlapu ed Australia, Canada, Hawaii, Switzerland, tan diad Estados Unidos, tan 11 so nanlapud koma-11 a klase odino diad mas akauna iran klase na panmisioneron eskuelaan na Gilead. Anengneng da so iyaaligwas na kimey na Panarian ed Hapon tan nalilikna so singa liknaan nen Arin David, a nankuan: “Tobonbalo ak nensaman, et natan masiken ak la: agko nin balot anengneng a say matunong et apulian, nisay saray bini to mipabpayabol na nakan.” (Salmo 37:25) Bilang apresasyon ed maaron panangasikaso na Dios, sarayan misionero so determinadon agmanretiro noagta mantultuloy a manlingkor ed si Jehova.