Saray Gungguna na Itatakot ed Tuan Dios
“Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.”—ISAIAS 48:17.
1. Antoran kalamidad so naarawian komon diad panamegley na maridios a takot?
NO binayuboan komon nen Adan so maridios a takot, satan komon so angamper ed sikaton mankasalanan ya angipaarap ed dilin magnayon ya ipapatey to tan ed nilibon taon a panermen na kailalakan to. No say kadaanan a nasyon na Israel so tinmumbok komon ed simbawa nen Jehova a sikatoy takotan tan aroen, satan a nasyon so agkomon akautibo ed Babilonia, nisay intalirak da so Anak na Dios tan nankasalanan ed impamaagus ed dala to. No say mundo natan et takotan to so Dios, anggapo komon so inkabulok diad gobierno odino diad negosyo, anggapoy krimen, nisay bakal.—Uliran 3:7.
2. Anggaman ed saray kipapasen ed kaliberliber na mundo tayo, akin a nepeg tayon bayuboan so takot ed si Jehova?
2 Anggaman ontan, antokaman so gagawaen na mundo ed liber tayo, sikatayo bilang indibidual, bilang pamilya, tan bilang kongregasyon na ariripen nen Jehova so nagunggunaan diad pamayubo na takot ed tuan Dios. Saya so mitunosan ed panonot ya inter nen Moises ed nasyon na Israel: “Antoy arum a kaokolanen nen Jehova a Dios mo ed sika no ag say takotan mo si Jehova a Dios mo, manonton ka ed saray amin a daladalan to, tan say pangarom ed sikato, tan say panlinkor mo ed Jehova ed amin a pusom tan ed amin a kamarerwam, sumpal mo so saray gangan nen Jehova [pian] . . . onkana a kaabigan mo?” (Deuteronomio 10:12, 13) Anto so pigara’d saray nagunggunaan tayo sano takotan tayo si Jehova, say tuan Dios?
Kakabatan—Mas Mabli Nen Say Balitok
3. (a) Anto so manunan gungguna a naawat tayo? (b) Anto so kabaliksan na Salmo 111:10?
3 Say manunan gungguna et say tuan kakabatan. Iyaabawag na Salmo 111:10: “Say katatakot ed Jehova sikato so sengeg na kakabatan.” Anto so kabaliksan na satan? Say kakabatan et say abilidad a sitatalonan pangusar ed pikakabat pian resolbien iray problema, ipaliis ed kapeligroan, tan pakadampot na pigaran kalat. Lalanoren to so maabig a panaghusga. Say gapo, say unaan a kabiangan, say pundasyon na ontan a kakabatan, et say takot ed si Jehova. Akin? Lapud amin a palsa et gawa na lima to. Satan so mandedependi ed sikato. Inikdan to so katooan na kawayangan balet aliwan say abilidad a mangiwanwan ed dili ran kundang a sitatalona a sian ed panangiwanwan to. (Josue 24:15; Jeremias 10:23) Dia lambengat ed pangapresya tayo ed saramay manunan katuaan nipaakar ed bilay tan manbilay a mitunosan ed saratan a nawalaan tayo na magnayon ya itatalona. No say pikakabat tayo ed si Jehova so mangiiter ed sikatayo na agnagiing a kumbiksyon a say linawa na Dios so ontalona tan say sipan tan abilidad to a manumang ed inkatoor et segurado, diad ontan et say maridios a takot so mamayubo ed sikatayon sikakabat ya onkiwas.—Uliran 3:21-26; Hebreos 11:6.
4, 5. (a) Akin a say edukasyon ed unibersidad na sakey a tobonbalon laki so ag-angiter na tuan kakabatan ed sikato? (b) Panon a sayan laki tan say asawa to so akagamor na peteg a kakabatan ed saginonor, tan diad anton paraan ya amasimbalo iya ed saray bilay da?
4 Konsideraen pa so sakey ya alimbawa. Pigaran dekada la ed apalabas, sakey a kalangweran a laki so manaaral ed Unibersidad na Saskatchewan, ed Canada. Kaiba ed curriculum et say biolohiya, tan sikato so abangatan na ebulosyon. Kayari graduation, sikato so nan-espesyalista ed atomikon physics, ya akawat na iskolarsip pian ituloy iray aaralen to ed University of Toronto. Legan a sikato so manaaral, anengneng to so makapakelkelaw ya ebidensya ed uksoy tan desinyo ed atomiko iran inkagawa. Balet anggapo so niiter iran ebat ed tepetepet ya: Siopa so nandisensyo ed satan? Kapigan? Tan akin ya adesinyo itan? No anggaporay ebat, kasin posiblin nausar to so dunong to a sikakabat ed mundon natatalagnaw ed saman lapud bakal? Anto so mangiwanwan ed sikato? Kasin say nasyonalismo? Kasin say pilalek ed materyalistiko iran tumang? Peteg, kasin sikato so akagamor na tuan kakabatan?
5 Ag-abayag kapangraduar to, satan a laki tan say asawa to so ginmapon nanaral na Biblia ed saray Tasi nen Jehova. Manlapud dilin Salita na Dios, sikaray akala na ebaebat a pakakasaewan dan nagamoran nen saman. Naamtaan da so Manamalsa, si Jehova a Dios. Legan ya aaralen da so nipaakar ed si Moises diad Ambalangan Dayat, ontan met ed nipaakar ed si Daniel tan saray kakaiba to ed Babilonia, naaralan da so kaimportantian na itakot ed Dios ya aliwan diad too. (Exodo 14:10-31; Daniel 3:8-30) Say ontan a maridios a takot tekep na tuan aro ed sikato so amakiwas ed sikara. Ag-abayag et say interon kurang na kabibilay da so anguman. Naamtaan a siansia na sayan laki so Sakey a say kimey na lima To so inaral to ed biolohiya. Atalosan to so gagala na saman a Sakey a say kakabatan ya anengneng to so nipatnag ed panaaral to ed physics. Imbes ya usaren to so kakabatan to ed pamawala na saray instrumento a maneral ed kaparan totoo, sikato tan say asawa to so malabay ya ontulong ed arum a mangaro ed Dios tan ed kakaabay da. Sikara so nanpalista ed sigpot-panaon a serbisyo bilang manangiyabawag na Panarian na Dios. Saginonor, sikara so inmatendi ed Watchtower Bible School of Gilead tan nibaki bilang misioneros.
6. No walaan tayo na kakabatan a nilamot ed takot ed si Jehova, anton agmanbayag iran gegemtan so napaliisan tayo, tan anto so nepeg tayon gawaen komon?
6 Siempre, aliwan amin et makayarin magmaliw a misionero. Balet sikatayon amin so makapangayaga ed kakabatan a nilamot ed takot ed si Jehova. No bayuboan tayo itan a kakabatan, agtayo sigugunaet a paimluensyaan ed saray pilosopya na totoo a talagan mamapalbeng lambengat no anton talaga so kabaliksay bilay. Panggunaetan tayoy panaral na Biblia, a pinuyanan na Lapuan na bilay, si Jehova a Dios, say sakey a makapangiter ed sikatayo na maandon bilay. (Salmo 36:9; Colosas 2:8) Imbes ed pagmaliw ya ariripen na komersyal a sisteman nayeyegyeg a mismo ed tambib na kadederal, sikatayo so ontulok ed simbawa nen Jehova a magmaliw a kontento ed tagano tan kawesen, legan a gagawaen tayon manunaan ed bilay tayoy siglaotan tayo ed Dios. (1 Timoteo 6:8-12) Imbes ya onkiwas a singa say arapen tayo so mandedependi ed pangegemtan na minumundon karera tan pangusil na kayamanan ed sayan mundo, kaukolan a sisiaen tayo so Salita nen Jehova sano ibabaga to’d sikatayon say mundo et onlabas tan say penel to, balet say manggagawa ed linawa na Dios so mansiansia lawas.—1 Juan 2:17.
7. (a) Panon a say Uliran 16:16 so ontutulong ed sikatayon nawalaan na asimbang a panmoria? (b) Antoran tumang so niwala manlapud panggawa ed linawa na Dios a sentro na kabibilay tayo?
7 Ipapaseseg ed sikatayo na Uliran 16:16 diad simamatuan pangibabagan: “Agay la so lalo ya abig to so makarandan na kakabatan [say kakabatan a niwala diad itakot ed si Jehova] nen say balitok! On, say panandan ed pakatalos sikato so magmaong a pilien nen say pilak.” Say ontan a kakabatan tan pakatalos so mamakiwas ed sikatayon manggaway linaway Dios bilang sentro ed saray bilay tayo. Tan antoy kimey ya imamatalek na Dios ed Tastasi to parad sayan peryodo na awaray too? Say panangipulong nipaakar ed Panarian tan itulong ed saray matuan-impanpuso a magmaliw a tuan babangatan nen Jesu-Kristo. (Mateo 24:14; 28:19, 20) Saya so kimey a mamapawala na tumang na tuan inkapnek tan baleg a liket. Tekep na maabig a rason, sirin, ibabaga na Biblia: “Mapalar so too a makaromog na kakabatan.”—Uliran 3:13.
Manalwar Sumpad Gawan-Mauges
8. (a) Ibaga so komaduan gungguna diad itatakot ed Dios. (b) Anton kaugsan so pakakasalimbengan tayo? (c) Panon a say maridios a takot so nagmaliw a mabiskeg a manamakiwas a puersa?
8 Say komaduan gungguna manlapud itakot ed Dios et say pakasalimbengan tayo sumpad panggaway mauges. Saramay walaan na aralem a respeto ed Dios so agmandeside parad inkasikara no antoy maong tan no antoy mauges. Agda momoriaen a mauges no antoy ibabaga na Dios a maong, nisay ipapasen daray bengatlan ibabagay Dios a mauges a maong. (Salmo 37:1, 27; Isaias 5:20, 21) Niarum ni, say toon papakiwasen na maridios a takot so ag-ontunda ed basta pangamta no antoy ibabaga nen Jehova a maong tan antoy ibabaga ton mauges. Say ontan a too et aaroen to no antoy aaroen nen Jehova tan gugulaen to so gugulaen nen Jehova. Bilang resulta, sikatoy onkikiwas a mitunosan ed saray estandarti na Dios. Kanian, unong a nibalikas ed Uliran 16:6, “lapu ed takot ed Jehova saray totoo onarawi ra ed mauges.” Say ontan a maridios a takot so magmamaliw a mabiskeg a manamakiwas a puersa ed pakadampot ed agnayarian a gawaen na too ed dili ton biskeg.
9. Panon a say mabiskeg a pilalek ed agpamaermen ed Dios so angimpluensya ed desisyon na sakey a bii diad Mexico, tan antoy nansumpalan?
9 Anggaman say ontan a takot so onggagapo lambengat a natitibukel ed sakey a too, satan so mamabiskeg ed sikaton ompaliis ed panggawa na bengatlan pagbabawian to ed saginonor na bilay to. Alimbawa, sakey a biin malukon diad Mexico so tinmepet ed sakey a Tasi nipaakar ed panagpaekal. Say Tasi so angibasa na dakel a kasulatan ed bii tan insan inkatunongan to: “Diad Manamalsa, say bilay so importantin tuloy, anggan say bilay na saraman so agni niyanak.” (Exodo 21:22, 23; Salmo 139:13-16) Say klinikal ya eksaminasyon so mangibabagan say ugaw so nayarin abnormal. Balet natan, apakiwas ed anengneng to ed Salita na Dios, say bii so nandesiden mangiyanak ed ugaw. Say doktor to so agmalabay a sikatoy nengnengen lamet, tan papagyawen na asawa to a sikatoy taynanan, balet sikato so mapekder. Kaunoran, sikato so angiyanak ed sakey ya ugaw a bii—sakey a normal, maligsa, tan maganggana. Apakiwas tekep na pisasalamat, inanap to so Tastasi, tan ginmapon paiyaralan na Salita na Dios ed sikara. Diad loob na sakey taon, sikato tan say asawa to so nampabautismo. Pigaran taon ed saginonor, diad distriton kumbension, sikara so malikeliket ya akapiabet ed Tasin inmunan akapisalitaan to, tan inkabat to ed magangganan apat-taon ya anak da. Say manepeg a respeto ed Dios tan say mabiskeg a pilalek ed agpamaermen ed sikato, so peteg a makapangiter na mabiskeg iran impluensya ed bilay na sakey.
10. Say maridios a takot so mamabiskeg ed totoon nibulos manlapud antoran pormay gawan-mauges?
10 Say ontan a maridios a takot so mamabiskeg ed sikatayo sumpad malaknab a gawan mauges. (2 Corinto 7:1) Sano suston nabayuboan, satan so ontulong ed sakey a mangitunda ed iyaamot iran kasalanan, a sikato tan si Jehova lambengat so makapikabat. Satan so ontulong ed sikato pian nibulos manlapud panangaripen na panangabuso ed alkohol odino panangabuso ed druga. Onia so salaysay na sakey a datin nailuam ed druga ed Abalaten ya Aprika: “Legan a siak so mangaala na pikakabat ed Dios, abayuboan ko met so itakot ed pamasakit odino pamaermen ed sikato. Amtak a sikato so manbabantay, tan pirawrawat kon naabobonan ak ed imaton to. Satan so amakiwas ed siak a maneral ed saray druga a walad siak diad impangikalbo ed kasilyas.” Say maridios a takot so ontutulong ed nilibolibo ni ed mipadparan paraan.—Uliran 5:21, 15:23.
Proteksion Sumpad Igiwgiw ed Totoo
11. Sumpad anton kaslakan a patit a nasalimbengan itayo na takot ed si Jehova?
11 Say mabunigas a takot ed Dios so manasalimbeng met ed sikatayo sumpad takot ed too. Maslak a totoo so napapairap na takot ed too ed babaleg odino memelag a sukat. Anggan saray apostol nen Jesu-Kristo so angitalirak ed sikato tan tinmaynan sanen sikatoy inerel na saray sundalo ed tanamanan na Getsemani. Saginonor, diad sabanan na atagey a saserdote, lapud kakulangay inkasimbang tan gegemgemey takot, imburi nen Pedro a sikatoy sakey ed saray babangatan nen Jesus tan inkuan to ni ingen ya agto kabat. (Marcos 14:48-50, 66-72; Juan 18:15-27) Balet saray apostol so atulongan a makagamor-lamet ed espiritual ya inkasimbang da. Diad biek a dapag, diad saray agew nen Arin Jehoiakim, si Urias ya ilalak nen Shemi so atalonaan na takot ya intalirak toy serbisyo to bilang propeta nen Jehova tan tinaynan toy bansa, a naerel tan napapatey lanlamang.—Jeremias 26:20-23.
12. (a) Diad anton proteksion sumpad itatakot ed too so idadanet na Uliran 29:25? (b) Panon a say talek ed Dios so nababayuboan?
12 Anto so makatulong ed too pian ontalona ed takot ed too? Kayari pasakbay a “say takot na too mantarok na kalot,” iyaarum na Uliran 29:25: “Angan siopa ya ipasen to so ilalo to ed Jehova nilaban.” Say tombok et say panagmatalek ed si Jehova. Say ontan a talek so nibabased pikakabat tan eksperiensia. Diad panaral na Salita to, nanengneng tayo so ebidensya na saray matunong a dalan nen Jehova. Akabatan tayoray ebenton mangidedemostra na inkanapanmatalkan to, say inkaseguro na saray sipan to (pati say kioli), say aro tan makapanyarin-amin a pakayari to. Insan sano onkiwas tayo unong ed satan a pikakabat, a gawaen iray bengatlan iwawanwan nen Jehova tan mapekder ya ipulisay iray impasakbay to, nagapoan tayon naeksperiensian mismo so maaron panangasikaso tan inkanapanmatalkan to. Personal a napaneknekan tayo so ikukurang na pakayari to pian nasumpal so linawa to. Say talek tayo ed sikato so ombulaslas, tan lapud panagmatalek tayo ed Dios, say aro tayo parad sikato tan say masimoon a pilalek tayon onarawi’d pakapaermen ed sikato so ombaleg. Say ontan a talek so niletneg ed putel a pundasyon. Onkakana itan bilang samben sumpad takot ed too.
13. Panon a say maridios a takot so ontutulong ed sikatayo diad pantatrabahoan tayo, diad ayaman, tan diad eskuelaan?
13 Say panagmatalek tayo ed si Jehova, tekep na maridios a takot, so manggawa ed sikatayon mapekder ed no antoy maptek no pagyawen itayo na amo ed pakaandi trabaho lapud panangipulisay a mibiang ed agmatuan agagamil ed negosyo. (Ipareng so Miqueas 6:11, 12.) Say ontan a maridios a takot so mamakayari ed dakel a nilibon Kristiano a mantultuloy ed tuan panagdayew ed arap na isusumpa manlapud agmananisia iran membro na pamilya. Mangiiter met itan ed saray tobonbalon maneeskuela na talek pian ipakabat so inkasikaran Tastasi nen Jehova, tan mamabiskeg itan ed sikaran mideneng ed panamalaw manlapud saray kaklase ran manleleglemew ed saray estandarte na Biblia. Kanian, inkuan na sakey a tinedyer a Tasi: “Ag-importanti iisipen na saray minumundon tobonbalo. Say kaisipan nen Jehova so importanti.”
14. Panon a saray ariripen nen Jehova so manbiktorya anggan sano nasisigensigen iray bilay da?
14 Satan met lanlamang a kumbiksyon so mamapabiskeg ed tuan Kristianos a mamenben a malet ed saray dalan nen Jehova anggaman nasisigensigen iray bilay da. Kabat dan nepeg ya ilaloan so panamasegsegang manlapud mundo. Namomoria ra a saray apostol so siniplatan tan anggan si Jesu-Kristo a mismo so pinekpek tan pinatey na marelmeng a totoo. (Marcos 14:65; 15:15-39; Gawa 5:40; ipareng so Daniel 3:16-18.) Balet sigpot a walaay talek iray ariripen nen Jehova a napabiskeg toran mansungdo; a diad tulong na Dios et sikaray manbiktorya; ya andi-saew a tumangan nen Jehova iramay matoor—no kaukolan et anggan kioli ed bilay ed balon mundo to. Say aro ra ed Dios tekep na maridios a takot so mabisbiskeg a mamapakiwas ed sikaran onarawi ed panggawa na antokaman a mamaermen ed sikato.
15. Anto so amakayari ed Tastasi nen Jehova a mamasiansia ed integridad da diad saray panangipangawan a kampo na Nazi?
15 Sayan motibasyon so amakayari ed Tastasi nen Jehova a makatalindeg ed saray pakataktakotan ed panangipangawan iran kampo na Nazi legan na saray taon 1930 tan 1940. Ipapapuso ra so simbawa nen Jesus a naromog ed Lucas 12:4, 5: “Et kuan ko ed sikayo, kakaarok, Ag kayo antakot ed saray mamatey na laman, et kayari to angapo la so arum a nayarian da a gawaen. Ingen ipasakbay ko ed sikayo no siopa so takotan yo: Takotan yo man, so kayari pamatey to wala so pakayari to a mangipelag ed infierno [Gehenna, NW]; on kuan ko ed sikayo, Sikato so takotan yo.” Kanian, si Gustav Auschner, sakey a Tasin nipangaw ed Sachsenhausen, so angisulat ed saginonor: ‘Pinaltog na SS si August Dickmann tan pinagyaw a paltogen so arum ed sikami no agmi pirmaan so dokumenton pangitalirak ed pananisia mi. Anggapoy nanpirma ed sikami. Nagkalalo so takot mi ed pamaermen ed si Jehova nen say saray bala ra.’ Say takot ed too so mangipaarap ed pikompromiso, balet say takot ed Dios so manggawa ed sakey a mapekder ed no antoy maptek.
Say Kipreserbay Bilay
16. Anto so amakayari ed si Noe a mantultuloy ed maptek a kurang ed loob na saray dekada anggad Delap, tan anto so resulta parad sikato tan ed sankaabungan to?
16 Aliktaran nen Noe iray kaunoran ya agew na sakbay-delap a mundo. Diterminado si Jehova a deralen so marelmeng a mundo ed saman a panaon lapud inkauges na too. Anggaman ontan, kaleganan to et si Noe so walad mundon napno ed saman na karawalan, imoralidad, tan agpananginunang ed madibinon linawa. Anggaman ed panagpulong nen Noe na inkatunong, “ag-ira angimano anggad sinmabi delap tan angiyanor ed sikara.” (Mateo 24:39, NW) Ingen si Noe so ag-adismaya ed kimey ya inter na Dios ed sikato. Ginawa to “unong na amin ya ingangan na Dios ed sikato ontan so ginawa to.” (Genesis 6:22) Anto so amakayari ed si Noe a mansiansia ed dugan kurang ed ilalabas na taon anggad insabi Delap? Oneebat so Hebreos 11:7: “Lapu ed pananisia si Noe, sanen binilin na Dios nipaakar ed saray bengatla ya ag ni anengneng, nen saman aragdag ed mapagalang a takot.” Bilang nansumpalan, sikato tan say asawa to tan saray ilalak to tan ed kaasawaan da so niliktar manlapud Delap.
17. (a) Antokaman so gagawaen na arum, anto so nepeg tayon gawaen? (b) Akin a saramay ontatakot ed si Jehova so peteg a maliket a totoo?
17 Manbibilay itayo ed panaon a mipadpara ed dakel a pamaakaran ed agew nen Noe. (Lucas 17:26, 27) Wala lamet so pasakbay a nipapaknol. Ibabaga na Apocalipsis 14:6, 7 a sakey ya anghel a mantektekkiab ed pegley na tawen a mamapaseseg ed totoo ed amin a nasyon tan tribo tan pansasalita a “takotan yo so Dios, tan iter yo ed sikato so gloria.” Antokaman so gagawaen na mundo ed liber yo, tumboken iraman a salita, tan insan inatnat itan ya imbitasyon ed arum. Singa si Noe, onkiwas tekep na pananisia tan mangipanengneng na maridios a takot. Say panggawa’d satan so mangipaarap ed kipreserbay bilay yo tan saray bilay na arum ni. Legan ya uumamengen tayo iray gunggunan panggagayagaan na saramay walaay takot ed tuan Dios, makapipakna tayo lambengat ed apuyanan a salmistan nankanta: “Mapalar so too ya antakot to si Jehova, ya maliket a toloy ed saray gangan to.”—Salmo 112:1.
Panon Yon Ebatan?
◻ Antoray pigaran matalonggaring a gungguna manlapud itatakot ed tuan Dios?
◻ Panon a say kakabatan a nilamot ed maridios a takot so manasalimbeng ed sikatayo?
◻ Akin a say maridios a takot so manggawa’d sikatayon onarawi ed mauges?
◻ Panon a say maridios a takot so manasalimbeng ed sikatayo manlapud takot ed too?
◻ Anto so epekto na maridios a takot ed arapen ya iilaloan tayon bilay?
[Saray litrato ed pahina 16, 17]
“Mapalar so too ya antakot to si Jehova, ya maliket a toloy ed saray gangan to.”—Salmo 112:1