Say Sankabalgan a Toon Nambilay ed Kapiganman

Kapitulo 111

Tanda na Kaunoran Iran Agew

Natan et ngarem la na Martes. Legan ya akayurong si Jesus ed Palandey na saray Olibo, a mamabantag ed templo, sikatoy pribadon inasinggeran di Pedro, Andres, Santiago, tan Juan. Sikaray mapaga nipaakar ed templo, lapud kapkapangipasakbay nen Jesus ya anggapoy natilak a bato ed tapew na sakey a bato.

Balet mapatnag a dakel ni walad kanonotan da legan ya aasinggeran da si Jesus. Pigaran simba ed asasakbay, sikatoy anaglawi nipaakar ed “kiwawala” to, a legan na satan a panaon et “say Anak na too so niparungtal.” Tan diad asasakbay a pankanawnawa, imbaga to ed sikara so nipaakar ed “say kasampotan na sistema na bengabengatla.” Kanian saray apostol so maupapet a tuloy.

“Ibagam ed sikami,” kuanda, “no kapigan so kagawa na sarayan bengatla [a mansusumpal ed kadederal parad Jerusalem tan say templo to], tan anto so magmaliw a tanda na kiwawalam tan say kasampotan na sistema na bengabengatla?” Diad tua, say tepet da so nankatlon parte. Unona, labay dan amtaen so anggaan na Jerusalem tan say templo to, insan say nipaakar ed kiwawala nen Jesus ed Panarian tekep na pakayari, tan kaunoran et say nipaakar ed anggaan na interon sistema na bengabengatla.

Diad andukey ya ebat to, amin a taloran parte na tepet so inebatan nen Jesus. Sikatoy angitarok na tanda a mangipaamta sano say Judion sistema na bengabengatla so manampot; balet sikatoy mangitatarok na nagkalalo ni. Sikatoy angiter met na tanda a mamaliing ed arapen iran babangatan to pian naamtaan dan manbibilay ira legan na kiwawala to tan manasingger lay anggaan na interon sistema na bengabengatla.

Diad ilalabas na taon, naimatonan na saray apostol so kasumpalan na propesiya nen Jesus. On, say mismon bengabengatlan impasakbay to so onggapon nagawa ed agew da. Kanian, saray Kristianon nanbilay 37 taon ed saginonor, nen 70 K.P., so ag-asabiay kadederal na Judion sistema a pati say templo to ya anggapoy amta.

Anggaman ontan, say kiwawala nen Kristo tan say kasampotan na sistema na bengabengatla so agnagawa ed 70 K.P. Say kiwawala to ed Panarian tekep na pakayari so nagawa diad saginonor nin tuloy. Balet kapigan? Say panangunsidera’d propesiya nen Jesus so mangiparungtal ed saya.

Impasakbay nen Jesus a walay “bakabakal tan dalamurom na bakal.” “Ontalindeg so nasyon sumpa ed nasyon,” kuanto, tan walay kakisiran na tagano, yegyegyeg, tan saray salot. Nagula tan napatey iray babangatan to. Ontalindeg iray palson propeta tan mangibalang na dakel. Ompalaloy kaugsan, tan onkesay so aro na dakel. Ontan met, say maong a balita na Panariay Dios so nipulong bilang pantasi ed amin a nasyon.

Anggaman say propesiya nen Jesus so walaan na limitadon kasumpalan sakbay na kadederal na Jerusalem nen 70 K.P., say baleg a kasumpalan to so nagawa legan na kiwawala to tan say konklusyon na sistema na bengabengatla. Say maalwar a repaso ed saray ebento nanlapulad 1914 so mangipaparungtal a nanlapulad satan a taon et nasusumpal lay baleg a kasumpalan na sankaimportantian a propesiya nen Jesus.

Sananey nin kabiangan na tanda ya initer nen Jesus et say kiapireng na “say makapadimlan bengatla a pansengegay kapegpeg.” Nen 66 K.P., sayan makapadimlan bengatla so ompapatnag diad pormay “akakampamento iran armada” na Roma a nanliktob ed Jerusalem tan angigeba ed padir na templo. Onaalagey so “makapadimlan bengatla” ed agto kanepegan ya alageyan.

Diad baleg a kasumpalan na tanda, say makapadimlan bengatla et say Lega na Nasyones tan say kasalat to, say Nasyones Unidas. Sayan organisasyon parad sankamundoan a kareenan so ipapasen na Kakristianoan bilang kasandi Panariay Dios. Agaylan makadimdimla! Sirin, nasabi panaon et puliktaran na saray pakayarin pulitikal a kaalyado na UN so Kakristianoan (antitipikon Jerusalem) tan sikatoy deralen.

Kanian ipapasakbay nen Jesus: “Wala naani baleg a kairapan a singa agni agawa nanlapu ed gapo na mundo anggad natan, andi, nisay nagawa ni lamet.” Bangta say kadederal na Jerusalem nen 70 K.P. so peteg a baleg a kairapan, a walay masulok a sakey milyon a nireport ya atawtaw, satan so agbabaleg a kairapan nen say sankagloboan a Delap ed agew nen Noe. Kanian say baleg a kasumpalan na sayan kabiangan na propesiya nen Jesus so diad arapen ni.

Matalek Legan na Kaunoran Iran Agew

Legan a say Martes, Nisan 11, so manasingger, intuloy nen Jesus so pisisingbatan to ed saray apostol to nipaakar ed tanda na kiwawala to ed Panarian tekep na pakayari tan say anggaan na interon sistema na bengabengatla. Pinasakbayan to’ra nipaakar ed iderengel ed palso iran Kristo. Nagawa iray panalsali, inkuanto, “a palikdoen, no nayari, anggan saray pinili.” Balet, singa matudio’d pakanengneng iran agila, sarayan pinili so mantitipon ed pakaromogan na tuan espiritual a tagano, salanti, ed tuan Kristo diad agnanengneng a kiwawala to. Sikaray agnibalang tan agnitipon ed palson Kristo.

Say nagawaan lambengat na saray palson Kristo et manpanengneng. Diad pidumaan, say kiwawala nen Jesus so agnanengneng. Satan so nagawa legan na makapatalagnaw a panaon ed awaran na too, a singa ibabaga nen Jesus: “Say banwa so ombilunget, tan say bulan so agmangiter na liwawa to.” On, magmaliw iya a sankaudieman a panaon na kiwawalay too. Singa no abilungetan so banwa ed satan legay agew, tan singa no ag-angiter na liwaway bulan ed labi.

“Saray pakayari na katawenan so natenyeg,” intuloy nen Jesus. Diad ontan et impatnag ton nawalaay mapaniring a nengneng so pisikal a katawenan. Say katawenan so aglambengat pantekkiaban na saray manok, noagta napano met na pan-guerra iran eroplano, saray rocket, tan saray space probes. Say takot tan karawalan so labas ni nen antokaman a naeksperiensia’d apalabas ya awaray too.

Bilang resulta, inkuan nen Jesus, a wala so “irap na saray nasyon, ya ag-amta so dalan a papaway lapud ongol na dayat tan say agto pakareen, bangta napunaw so totoo nisesengeg ed takot tan panaalagar ed bengabengatlan onsasabi ed panaayaman a dalin.” On, sayan sankaudieman a panaon na kiwawala na too so mansumpal ed panaon sano, a singa ibabaga nen Jesus, “say tanda na Anak na too so onapireng ed tawen, tan insan amin a tribu ed dalin so mamaspas ed inkasikara ed pantagleey.”

Balet aliwan amin so mantagleey sano ‘say Anak na too so onsabi tekep na pakayari’ pian deralen iyan marelmeng a sistema na bengabengatla. “Saray pinili,” saray 144,000 a mibiang ed kinen Kristo ed mangatatawen a Panarian to, so agmantagleey, nisay saray kaiba ra, saramay diad asasakbay et tinawag nen Jesus ya “arum a karnero” to. Anggaman manbibilay legan na sankaudieman a panaon ed awaran na too, saraya so onkikiwas ed panamaseseg nen Jesus: “Sano sarayan bengatla so onggapon nagawa, talindeg kayoy maptek tan itangwa yo iray ulo yo, lapud say kililiktar yo so manasingger la.”

Pian nadetermina na saray babangatan ton manbibilay legan na kaunoran iran agew so kinaasingger na anggaan, itatarok nen Jesus iyan ilustrasyon: “Imanoen yo so kiew ya igos tan amin ya arum nin kiew: Sano sikara lay manbubulong, diad paniimano ed satan et amta yo ed inkasikayo a natan et say tiagew so asingger la. Diad onian dalan et sikayo met, sano nanengneng yo irayan bengatla a nagagawa, amtaen yo a say panarian na Dios so asingger la. Tua kuan ko ed sikayo, Sayan kailalakan so agbalot onandi anggad amin a bengabengatla so nagawa.”

Kanian, sano nanengneng na saray babangatan to so dakel a nanduruman nengneng na tanda a nasusumpal, nepeg dan moriaen a say anggaan na sistema na bengabengatla so asingger la tan say Panariay Dios so magano lan mamunas ed amin a karelmengan. Diad tua, say anggaan so nagawa’d bilay na totoo ya akanengneng na kasumpalan na amin a bengabengatlan impasakbay nen Jesus! Diad panisimbawa ed saramay babangatan a manbilay legan na sankaimportantian a kaunoran iran agew, kuan nen Jesus:

“Manalwar kayo ed inkasikayo a say kapusoan yo so agbalot nabelatan na alabas a panangan tan alabas a kakainom tan saray kapagaan ed bilay, tan biglabigla a satan ya agew so petepeteg ya onsabi ed sikayo a singa patit. Ta satan so onsabi ed amin da iramay manaayam ed tapew na dalin. Mansiansia kayon aliing, sirin, ed amin a panaon a manpipikasi a sikayoy makatalona ed kaliliktar ed amin na sarayan bengatla a nigetar a nagawa, tan ed itatalindeg ed arapan na Anak na too.”

Say Makabat tan Say Makulangkulang a Mamarikit

Eebatan nen Jesus ed saman so kerew na saray apostol to nipaakar ed sakey a tanda na kiwawala to ed Panarian tekep na pakayari. Natan et sikatoy mangitatarok na kaaruman iran nengneng na tanda ed taloran parabolo, odino saray ilustrasyon.

Say kasumpalan na kada ilustrasyon so naimatonan na saramay manbilay legan na kiwawala to. Ipaparungtal to so unona diad saray salitan: “Insan say panarian na katawenan so magmaliw a singa samploran mamarikit ya angala ed lampara ra tan pinmaway a mangabet ed nobyo. Limara ed sikara so makulangkulang, tan limara so makabat.”

Diad saray balikas a “say panarian na katawenan so magmaliw a singa samploran mamarikit,” aglabay ya ibaga nen Jesus a kapaldua ed saramay manawir na mangatatawen a Panarian so makulangkulang a totoo tan kapaldua so matudio! Andi, noagta labay ton ibaga a nipaakar ed Panarian na katawenan, wala so nengneng a singa saya odino singa saman, odino saray pamaakaran nipaakar ed Panarian so magmaliw a singa ontan tan ontan a bengatla.

Isisimbolo na samploran mamarikit so amin a Kristianon akalinya odino mankuan ya akalinya parad mangatatawen a Panarian. Saman so diad Pentecostes 33 K.P. a say Kristianon kongregasyon so insipan ed kasal ed apaoli, inglorian Nobyo, si Jesu-Kristo. Balet say kasal so nagawa ed tawen diad agnibagan panaon ed arapen.

Diad ilustrasyon, ompapaway so samploran mamarikit tekep na gagalan mangabrasa ed nobyo tan ed pibiang ed prosisyon na kasal. Sano sikatoy onsabi, silewan day dalaney prosisyon diad panamegley na saray panagsilewan da, diad ontan et sikatoy papagalangan legan ya aawiten toy nobya to ed abung a niprepara parad sikato. Anggaman ontan, ipapaliwawa nen Jesus: “Saray makulangkulang so angala ed saray lampara ra balet ta ag-ira angawit na larak ed sikara, bangta saray makabat so angawit na larak ed saray pananginan da tekep na saray lampara ra. Legan a say nobyo so manbabayag, sikaran amin so akatemeg tan naugip.”

Say abayag ya impakabaya na nobyo so mangipapatnag a say kiwawala nen Kristo bilang manuley ya Ari et diad arawin arapen ni. Diad kaunoran et sikatoy sinmabi ed trono to ed taon 1914. Legan na andukey a labi sakbay na satan, amin da a mamarikit so akaugip. Balet ag-ira kinondena nisesengeg ed saya. Say impangondena ed makulangkulang a mamarikit et aliwan diad agda impakawalaan na larak parad saray pananginan da. Ipapaliwawa nen Jesus no panon ya abangon so mamarikit sakbay na isabi nobyo: “Dia mismo ed pegley na labi et wala so linmesan kelyaw, ‘Nia la so nobyo! Paway kayo pian sikatoy abeten.’ Insan amin da iramay marikit so tinmalindeg tan angiyuksoy ed saray lampara ra. Inkuan na saray makulangkulang ed saray makabat, ‘Ikdan yo kami daiset a larak yo, ta say lampara mi so ngalngali la naerep.’ Inmebat iray makabat diad saray salitan, ‘Anganko ta nayarin ag-onggenap ed sikami tan sikayo. Imbes, onla kayo ed saraman so manlalako ed satan tan mangaliw kayo parad sikayo.’”

Say larak so mangisisimbolo ed samay mamapasiansia’d tuan Kristianos a mansinag bilang silesilew. Saya so apuyanan a Salita na Dios, a diad satan et ompepeket a maong iray Kristiano, pati say masanton espiritu, ya ontutulong ed sikaran mantalos ed satan a Salita. Say espiritual a larak so mamapakayari ed makabat a mamarikit a mangiwandag na liwawa ed panangabrasa ed nobyo legan na prosisyon ed piesta na kasal. Balet say makulangkulang a marikit a klase so andian ed inkasikara, ed pananginan da, na nakakaukolan ya espiritual a larak. Kanian dedeskribien nen Jesus so agawa:

“Legan na itataynan [na saray makulangkulang a marikit] pian mangaliw [na larak], say nobyo so sinmabi, tan saray marikit ya akaparaan so linmoob a kaiba to ed piesta na kasal; tan say puerta so intalak. Kayari to et say arum ed mamarikit so sinmabi met, a mangibabaga, ‘Katawan, katawan, lukasan mo kami!’ Bilang ebat et inkuanto, ‘Ikuan ko ed sikayo so tua, agtakayo kabat.’”

Kayari insabi nen Kristo ed mangatatawen a Panarian to, say makabat a marikit a klase na tuan alanaan a Kristianos so aliing ed pribilihyo ran mangiwandag na silew ed sayan abilungetan a mundo diad pamagalang ed pinmawil a nobyo. Balet saramay ililitrato na makulangkulang a mamarikit so ag-akaparaan pian mangitarok na sayan manangabrasan panangidayew. Kanian sano onsabi panaon, si Kristo so agmangilukas ed sikara na puerta ed piesta na kasal ed tawen. Taynanan to’ra ed paway ed kabilungetan na sankaaraleman a labi na mundo, pian natawtaw a kaiba iray arum a managgaway kaugsan. “Mansiansia kayon manbantay, sirin,” sinampotan nen Jesus, “ta agyo amta so agew nisay oras.”

Say Ilustrasyon na Saray Talento

Intuloy nen Jesus so pisisingbatan to ed saray apostol to ed Palandey na saray Olibo diad pangisasalaysay na sananey nin ilustrasyon, say komadua ed mantutumbokan a talora. Pigaran agew ed asasakbay, legan a sikatoy walad Jerico, inter to so ilustrasyon na saray mina pian ipanengneng a say Panarian so arawi ni ed arapen. Say ilustrasyon ya isasalaysay to natan, bangta walaan na pigaran mipadpara iran nengneng, so manideskribe kasumpalan a kimkimey to legan na kiwawala nen Kristo ed Panarian tekep na pakayari. Iyiilustra na satan a saray babangatan to so nepeg a mankimey legan a walad dalin ni pian padaaken so “kaykayarian to.”

Inggapo nen Jesus: “Ta satan [salanti, saray kipapasen a nisisiglaot ed Panarian] et singa too, ya ombubuat ya onla’d biek-taew, ya anawag ed ariripen to tan angimatalek ed sikara na kaykayarian to.” Si Jesus iman so toon, sakbay a nambaroy ed taew ed tawen, angimatalek ed saray ariripen to​—saray babangatan ya akadasig parad mangatatawen a Panarian—​na kaykayarian to. Sarayan kaykayarian so aliwan pisikal iran kagawaan, noagta irerepresenta ra so sakey ya abayuboan a lawak ya iilaloan ton panlapuan na dakel nin babangatan.

Inmatalek nen Jesus so kaykayarian to ed ariripen to ag-abayag sakbay na intokotok to ed tawen. Panon so panggawa to’d satan? Diad pamibilin ed sikara a mansiansian mankimey ed abayuboan a lawak diad pangipulong na mensahe Panarian ed sankaarawian iran parte dalin. A singa ibabaga nen Jesus: “Diad sakey et angiter na limaran talento, diad sananey et duara, diad sananey ni et sakey, diad kada sakey unong ed dilin nayarian to, tan sikato so linma ed taew.”

Say waloran talento​—say kaykayarian nen Kristo—​so imbunog sirin unong ed saray abilidad, odino espiritual iran pakasarag, na ariripen. Saray aripen so mangirerepresenta ed saray klase na saray babangatan. Diad inmunan siglo, say klase ya angawat na limaran talento so mapatnag a mangilalaktip ed saray apostol. Intuloy ya insalaysay nen Jesus a saray aripen ya angawat na limara tan say duaran talento so parehon akadoble ed saratan diad panangipulong da na Panarian tan panaggawa na saray babangatan. Anggaman ontan, say aripen ya angawat na sakey a talento so angikotkot ed satan.

“Kayari andukey a panaon,” intuloy nen Jesus, “say katawan na saraman ya aripen so sinmabi tan akipalinewan ed sikara.” Aliwan anggad koma-20 siglo, nayarin 1,900 a taon ed saginonor, a pinmawil si Kristo pian mipalinewan, kanian sirin, talagan “kayari andukey a panaon.” Insan impaliwawa nen Jesus:

“Samay sakey ya akaawat na limaran talento so inmasingger tan angawit na limaran kaaruman a talento, a mangibabaga, ‘Katawan, sika so angimatalek na limaran talento ed siak; nia, akapangarum ak na limara nin talento.’ Inkuan na katawan to ed sikato, ‘Maabig, maong tan matoor ya aripen! Sika so matoor ed daiset a bengatla. Panasikasoen taka ed dakel a bengatla. Loob ka ed gayaga na katawan mo.’” Say aripen ya angawat na duaran talento so akadoble met ed saray talento to, tan sikatoy angawat na parehon komendasyon tan tumang.

Anggaman ontan, panon a linmoob irayan matoor ya ariripen ed gayaga na Katawan da? Bueno, say gayaga na Katawan da, si Jesu-Kristo, et samay pangawat na kagawaan na Panarian sanen sikatoy nambaroy ed taew ed kinen Ama to ed tawen. Dia balet ed saray matoor ya ariripen ed moderno iran panaon, sikara so walaan na baleg a liket ed pagmamaliw na nimatalekan na kaaruman iran responsabilidad ed Panarian, tan legan a susumpalen day mangaraldalin a kurang da, sikara so nawalaan na sankapantokan a gayaga na pagmaliw a napaoli ed mangatatawen a Panarian. Balet komusta so komatlon aripen?

“Katawan, kabat kon sakey ka a toon mapeget,” so reklamo na sayan aripen. “Kanian tinmakot ak tan linma tan inkotkot ko so talentom. Nia ipawil ko ed sika so gawam.” Say aripen so sigagagalan angipulisay a mankimey ed abayuboan a lawak diad panamegley na panagpulong tan panaggawa na saray babangatan. Kanian sikatoy tatawagen na katawan a “mauges tan mangiras” tan angiyabawag na panangukom: “Ala yo so talento ed sikato . . . Tan ibantak yo so anggapoy-kakanaan ya aripen ed kabilungetan na paway. Diman so kawalaan na pannangis tan panngayet na ngipen to.” Saramay walad limog na mauges ya aripen a klase, a nibasileng ed paway, so sinibletan na antokaman ya espiritual a gayaga.

Saya so mangileletneg na seryoson leksion parad amin a mankuan a patumbok nen Kristo. No sikara so mangayaga ed komendasyon tan tumang to, tan naarawian so kibasileng ed kabilungetan ed paway tan ultimon kadederal, sikara so kaukolan a mankimey parad pamadaak na kaykayarian na mangatatawen a Katawan da diad sigpot a pibiang ed panagpulong a kimey. Kasin sika so maseet ed sayan pamaakaran?

Sano Onsabi Kristo ed Panarian Tekep na Pakayari

Kaiba nin siansia nen Jesus iray babangatan to ed Palandey na saray Olibo. Bilang ebat ed kerew da parad sakey a tanda na kiwawala to tan say kasampotan na sistema na bengabengatla, sikato natan so angisalaysay ed unor ed saray mantutumbokan a taloran ilustrasyon. “Sano onsabi Anak na too ed gloria to, tan kaiba to so amin ya anghel,” inggapo nen Jesus, “insan sikatoy onyurong ed maglorian trono to.”

Agnanengneng na totoo iray anghel ed mangatatawen a gloria ra. Kanian say isasabi Anak na too, si Jesu-Kristo, a kaiba iray anghel so agnanengneng na kamataan na too. Say isasabi so agawa nen taon 1914. Balet diad anton gagala? Ipapaliwawa nen Jesus: “Amin a nasyon so natipon ed arapan to, tan panbibiiganen to so totoo, a singa panbibiiganen na pumapastol iray karnero manlapud saray kanding. Tan ipasen to iray karnero ed nikawanan to, balet saray kanding ed nikawigi to.”

Diad panedeskribe’d nagawa ed saramay imbiig ed apaboran a dapag, ibabaga nen Jesus: “Insan ibaga na ari ed saramay walad nikawanan to, ‘Galidia, sikayo ya abendisyonan nen Amak, tawiren yo so panarian ya imparaan parad sikayo manlapud inkiletneg na mundo.’” Saray karnero ed sayan ilustrasyon so agmiuley a kaiba nen Kristo ed tawen balet ta manawir ed Panarian ed paraan a magmaliw a mangaraldalin ya uuleyan to. Say “inkiletneg na mundo” so agawa sanen si Adan tan Eva so ginmapon awalaan na ananak a nagunggunaan manlapud probisyon na Dios a dondonen so katooan.

Balet akin a saray karnero so ibibiig ed apaboran a nikawanan a dapag na Ari? “Ta narasan ak nensaman,” ebat na ari, “tan siak so inikdan yo na naakan; siak so napgaan nensaman tan inikdan yo ak na nainom. Sakey ak a sankaili nensaman tan siak so maparawes yon inawat; lakseb, tan siak so kinawesan yo. Mansasakit tan siak so inasikaso yo. Siak so nipangaw tan binisita yo ak.”

Lapud saray karnero so wala ed dalin, labay dan amtaen no panon dan agawaan so ontan a maabig a kimkimey parad mangatatawen ya Ari ra. “Katawan, kapigan mi kan anengneng a narasan tan sikay pinakan mi,” tepet da, “odino napgaan, tan inikdan na nainom? Kapigan mi kan anengneng a sankaili tan maparawes ya inawat, odino lakseb, tan sikay kinawesan mi? Kapigan mi kan anengneng a mansasakit odino walad pangawan tan sikay binisita mi?”

“Tua kuan ko ed sikayo,” ebat na Ari, “bangta sikatoy ginawa yo ed sakey ed sankamelagan ed sarayan agik, ginawa yo ed siak.” Saray agagi nen Kristo et saray nakekeraan ed dalin na 144,000 a manuley a kaiba to ed tawen. Tan say panggawa na maong ed sikara, ibabaga nen Jesus, so singa panggaway maong met ed sikato.

Sinmublay, tinukoy na Ari iray kanding. “Arawi kayo ed siak, sikayo ya inayew, onla kayo ed andi-anggaan ya apuy ya imparaan ed Diablo tan ed saray anghel to. Ta narasan ak nensaman, et agyo ak inikdan na naakan, siak so napgaan nensaman, et agyo ak inikdan na nainom. Sakey ak a sankaili nensaman, et agyo ak maparawes ya inawat; lakseb, balet ta agyo ak kinawesan; mansasakit tan walad pangawan, et agyo ak inasikaso.”

Anggaman ontan, nanreklamo iray kanding: “Katawan, kapigan mi kan anengneng a narasan odino napgaan odino sakey a sankaili odino lakseb odino mansasakit odino walad pangawan tan agnanministro ed sika?” Parehoy angukoman​—saray kanding et mauges ya inkaukom, bangta saray karnero et paborabli. “Bangta sikatoy agyo ginawa ed sakey ed sarayan sankamelagan [ed agagik],” iyeebat nen Jesus, “agyo ginawa ed siak.”

Kanian say kiwawala nen Kristo ed Panarian tekep na pakayari, sakbay a tuloy na anggaan na sayan marelmeng a sistema na bengabengatla ed baleg a kairapan, so magmaliw a panaon na panangukom. Saray kanding “so onla ed andi-anggaan a katawtaw, balet saray matunong [saray karnero] ed andi-anggaan a bilay.” Mateo 24:2–25:46; 13:40, 49; Marcos 13:3-37; Lucas 21:7-36; 19:43, 44; 17:20-30; 2 Timoteo 3:1-5; Juan 10:16; Apocalipsis 14:1-3.—NW.

▪ Anto so anagyat ed tepet na saray apostol, balet anto ni mapatnag a walad kanonotan da?

▪ Anton kabiangan na propesiya nen Jesus so asumpal nen 70 K.P., balet anto so ag-agawa ed saman?

▪ Kapigan ya awalaan na unaan a kasumpalan so propesiya nen Jesus, balet kapigan a walaan itan na baleg a kasumpalan?

▪ Anto so makapadimlan bengatla ed ununa tan pinal a kasumpalan to?

▪ Akin a say baleg a kairapan so ag-awalaan na pinal a kasumpalan ed kadederal na Jerusalem?

▪ Antoran kipapasey mundo so mananda ed kiwawala nen Kristo?

▪ Kapigan ya ‘amin a tribu ed dalin et mamaspas ed inkasikara ed pantagleey,’ balet anto so gawaen na saray patumbok nen Kristo?

▪ Anton ilustrasyon so intarok nen Jesus pian tulongan iray arapen a babangatan ton natebek sano asingger lay anggaan?

▪ Anton simbawa so intarok nen Jesus parad saramay kabiangay babangatan to a manbilay legan na kaunoran iran agew?

▪ Anto so isisimbolo na samploran mamarikit?

▪ Kapigan a say Kristianon kongregasyon so insipan ya ipakasal ed nobyo, balet kapigan so isabi na nobyo pian alaen so nobya to ed piesta na kasal?

▪ Anto so irerepresenta na larak, tan anto so nagawaan na makabat a mamarikit ed pakawalaan na satan?

▪ Iner so pakagawaan na piesta na kasal?

▪ Anton engranden tumang so asaew na makulangkulang a mamarikit, tan anto so pansumpalan da?

▪ Anton leksion so ibabangat na ilustrasyon na saray talento?

▪ Siopa iray ariripen, tan anto so kaykayarian ya inmatalek ed sikara?

▪ Kapigan a linma so Katawan pian mipalinewan, tan anto so aromog to?

▪ Anto so gayaga a nilooban na matoor ya ariripen, tan anto so agawa ed komatlon aripen, say marelmeng?

▪ Akin a say kiwawala nen Kristo so agnanengneng, tan anton kimey so kinimeyan to ed saman?

▪ Diad anton pantalos a manatawir na Panarian iray karnero?

▪ Kapigan so inkagawa na “inkiletneg na mundo”?

▪ Diad anton basiyan a nauukom so totoo balanglan karnero odino kanding?