Say Manamenben-Katooran a Nasyon
“Lukasan iray wangalan . . . pian say matunong a nasyon a mantultuloy ed matoor a kondukta so makaloob.”—ISAIAS 26:2, NW.
1. Akin a makapakelaw so balikas nen Isaias nipaakar ed sakey a “matunong a nasyon”?
NATAN, walaray dakel a klase na nasyon. Say arum so demokrasya, say arum et uuleyan na saray diktador. Arum et mayaman, say arum et duka. Walay sakey a bengatlan panparparehoan da: Amin so kabiangan na mundon say dios to et si Satanas. (2 Corinto 4:4) Nisesengeg ed saya, saray salita nen Isaias so nayarin makapakelaw ed pigara sanen kuanton: “Lukasan iray wangalan, sikayo’ran totoo, pian say matunong a nasyon a mantultuloy ed matoor a kondukta so makaloob.” (Isaias 26:2, NW) Sakey a matunong a nasyon? On, talagan wala so sakey a matunong a nasyon, ta idadanet na propesiya so kiwawala na satan ed agew tayo. Panon a nabidbiran iyan aggendagendat a nasyon?
2. Anto so “matunong a nasyon”? Panoy pikabat tayo?
2 Diad patalos na New World Translation ed Isaias 26:2, nikuan a say nasyon et “mantultuloy ed matoor a kondukta.” Say (margin) na King James Version so mangipapatalos ed bersikulo, “say matunong a nasyon so mamapasiansia ed saray katuaan.” Parehon matukoy iratan a deskripsyon. Diad tua, say matunong a nasyon so mainomay a nabidbir lapud satan lambengat so nasyon ed dalin a pauleyan ed Kriston Ari, sirin et agkabiangan na mundo nen Satanas. (Juan 17:16) Kanian, saray membro to so kabkabat a ‘masimpit komon so tongtongan da ed utel na saray bugkalot.’ Tutumboken da so istiloy kabibilay a mangigogloria ed Dios. (1 Pedro 2:12) Niarum ni, inerman so kawalaan da ed mundo, sikaray kabiangan na “[kongregasyon, NW] na Dios a mabilay, a lusek tan sakorong na katuaan.” (1 Timoteo 3:15) Diad panusuportay katuaan, ipupulisay daray paganon pilosopya ya ibabangat na Kakristianoan, tan idadalangirang da so “ag-arutakan a gatas a matukoy ed salita”—Salitay Dios, say Biblia. (1 Pedro 2:2, NW) Niarum ni, siseseseg dan ipupulong so maong a balita na Panarian “ed amin a pinalsa ed leksab na tawen.” (Colosas 1:23) Kasin panduaruwaan a sayan nasyon so titibukelen na saray nakdaan na “Israel na Dios,” say kongregasyon na alanaan a Kristianos? Maseguron andi!—Galacia 6:16.
Niyanak so Nasyon
3. Deskrebien no panon a niyanak so matunong a nasyon?
3 Kapigan a niyanak so “matunong a nasyon”? Say gapoan to so nipropesiya ed libro na Isaias. Onia so nabasa tayo ed Isaias 66:7, 8: “[Sakbay] na panpasakit to [Sion], sikato so nananak; [sakbay] na isasabi na irap to, sikato so angianak na sakey ya anak a laki. . . . say Sion tampol ed inpanpasakit to, sikato inianak to so saray anak to.” Nikadkaduman tuloy, say Sion, a mangatatawen ya organisasyon na Dios, so mangiyanak na “sakey ya anak a laki” sakbay a makaliknay panpasakit. Nen 1914 say Mesianikon Panarian so nianak ed katawenan. (Apocalipsis 12:5) Kayari inkiyanak to, say inmunan guerra mundial so angilanor ed dakel niran nasyon ed bakal, tan saray alanaan a Kristiano so anagmak na mapalalon gonigon tan panamasegsegang. Kaunoran, nen taon 1919, say espiritual a nasyon, say “anak a laki,” so nianak ed dalin. Kanian say Sion so ‘angianak ed saray anak to’—say alanaan iran membro na balon “matunong a nasyon”—tan saraya so naorganisa parad lawas-onlalaknab a panagtasin kimey.—Mateo 24:3, 7, 8, 14; 1 Pedro 2:9.
4. Akin a say matunong a nasyon na Dios so kaukolan a mipuligesgesan pian mansiansian matoor?
4 Nanlapulad inggapo to, nipaarap la iyan nasyon ed mapalalo iran subok na katooran to. Akin? Sanen say mangatatawen a Panarian so niyanak, si Satanas tan saray demonyo to so nibasileng diad dalin manlapud tawen. Inyabawag na sakey a baleg a boses: “Natan sinmabi la so kilalaban, tan say pakayari tan say nanarian na Dios tayo, tan say pakauley nen Cristo to: ta say manangidalem na saray agagi tayo nibantak la, a sikato so manangidalem ed sikara ed arap na Dios tayo ed agew tan labi. Et sikato so tinalo ra lapu ed dala na Cordero, tan lapu ed salita na impantasi ra; tan ag da inaro so saray bilay da anga ed patey.” Binmawi si Satanas ed sayan pananguman na saray sirkumstansya tekep na baleg a sanok “tan nila to a binakal so saray nakdaan [a] kailalakan to, a sikara so mangoonor ed gangan na Dios, tan wala ed sikara so impantasi nen Jesus.” Nidunget ed mapalalon panangataki nen Satanas, tinmalindeg a malet iray alanaan a Kristiano. Anggad natan, saray maseseg a membro na matunong a nasyon na Dios so mangaagamil na pananisia ed dondon bagat nen Jesus tan mantutultuloy a mangiiter ed si Jehova na ebat ed baleg a manamalikdo diad panamegley na pansiasiansian matoor “anga ed patey.”—Apocalipsis 12:1, 5, 9-12, 17; Uliran 27:11.
5. Anton maabig ya awawey na modernon-agew a Tastasi so ontutulong ed sikara pian mansiansian matoor?
5 Nen 1919, sanen ginmapo so modernon-agew a panagtasi ed Panarian na Dios, saray estudyante na Biblia, a singa tawag ed saray Tasi nen Jehova nen saman, so dagdaiset ed bilang balet ta mabiskeg ed pananisia. Sikaray nagmaliw a membron pundasyon na ‘mabiskeg a ciudad, tekep na panangilaban nipaakar ed saray bakor tan panagtalayapan.’ Say panagmatalek da et wala “dia ed [Jah] Jehova, si Jehova lanlamang sikato so ando lan ando a baton dampay.” (Isaias 26:1, 3, 4) Singa si Moises ed inmuna, inyabawag da: “Ta iwakawak ko naani ngaran nen Jehova. Igalot yo so kinabaleg na Dios tayo. Say Dampay, ayadyari so gawa to; Ta kaptekan so saray amin a dalan to. Sakey a Dios napanmatalkan tan angapo so kaugsan, Sikato so matonong tan maptek.”—Deuteronomio 32:3, 4.
6. Diad anton paraan a bebendisyonan nen Jehova so totoo to ed sarayan kaunoran ya agew?
6 Nanlapulad saman, say wangalan na oksuyan na Panarian na Dios so nansiansian lukas, inmuna et tinipon so nakdaan na 144,000 ya alanaan a Kristiano tan natan et say baleg ya ulop na “arum a carnero” so miuulop ed panangiyabawag ed saray gagala na Panarian nen Jehova. (Juan 10:16) Kanian, sigagayagan niyabawag: “Pinabaleg mo so nacion, O Jehova, pinabaleg mo so nacion, O Jehova, pinabaleg mo so nacion, naraydayew ka; pinaawang mo so saray amin a ketegan na dalin.” (Isaias 26:15) Legan ya uusisaen tayo so lawak na mundo natan, naimano tayon agaylan tua irayan salita! Diad panamegley na masanton espiritu, say panagtasi ed onsasabin Panarian nen Kristo so niiter ed “anga ed kasampotan na dalin.” (Gawa 1:8) Say laknab na pananginatnat so nasukat manlapud 1994 Serbisyon Taon a Report na Saray Tasi nen Jehova ed Sankamundoan, a nanengneng ed pahina 12 ya anggad 15.
Sakey a Balon Pantok na Saray Manangipalapag
7, 8. (a) Antoy walan ebidensyan saray totoo na Dios et ‘mamaparukey ed lubir na kobongkobong da’? (b) Diad inengneng ed 1994 Serbisyon Taon a Report, antoray lugar a nanengneng yon matalonggaring ya ‘onaawang iray ketegan da’?
7 Kunsideraen paray pigaran nipapabitar ed sayan report. Say pantok na saray manangipalapag na Panarian ed lawak so akasabi’d 4,914,094! Agaylan makapasagyat so pakaimano ed mantutultuloy a panitipon ed “baleg ya olop . . . a nanlapu ed balang nacion tan amin na saray kailalakan, tan binaleybaley, tan salita, ya manalalagey irad arap na trono, tan ed arap na Cordero, a nankawes ira na kawekawes ya ampoti”! On, saraya met so napapaneknekan a magmamaliw a manamenben-katooran. “Inorasan da so kawekawes da, tan sikara so pinapoti ra ed dala na Cordero,” ya ipapasen a matunong lapud pananisia ed dondon bagat nen Jesus.—Apocalipsis 7:9, 14.
8 Nagkalautla nanlapulad 1919, say ganggan so nipasabi ed organisasyon nen Jehova: “Pabalegen mo so pasen na kobongkobong mo, tan pabuskag mo ed sikara so saray sakbong na saray panayaman mo; agka mangikera. Padukeyen mo so saray lubir mo, tan pasekderen mo so saray palitek mo.” (Isaias 54:2) Bilang ebat, say panagpulong a kimey so nantultuloy a mapuersa, anggan diad mayelon Yukon, ya onketeg ed Alaska, a ditan et saray makayarin pioneer so nansungdo ed saray temperaturan onleleksab no maminsan anggad -45 odino 50 degrees celcius ed loob na pigaran simba. Diad agano niran taon et lalon ondarakel so totoon mititipon ed manamenben-katooran a nasyon nen Jehova. Saray wangalan so lalon alukasan pian abrasaen irayan nanlapud daldalin na Asia ed paway na Kakristianoan, manlapud datin Komunista, manlapud dakel a daldalin ed Aprika, tan manlapud sakop na Katoliko, a singa say Italya, Espanya, Portugal, tan Abaleten ya Amerika. Saray nitaytayak a totoo so angilukas na sananey a lawak. Alimbawa, diad Inglatera, aasikasoen na Tastasi iray pankaukolan na 13-sankailin-lenguahe na saray rasan minoridad.
“Gawa Yo so Saya”
9. (a) Anto so ipapanengneng na bilang na inmatendi ed Memoryal nen 1994? (b) Dinan iran bansa so walaan na nikadkaduman atagey a bilang na inmatendi ed Memoryal?
9 Sananey nin pabitar ed tinaon a report et say inmatendi ed Memoryal. Kayarin tuloy na impatey to, si Jesus so angiletneg na Memoryal ed pakanodnonotan na impatey to tan imbaga to ed saray patumbok to: “Gawa yo so saya kapag no inuman yo, a pannodnonotan yo ed siak.” (1 Corinto 11:24) Makapaliket nen 1994 so pakanengneng na 12,288,917—masulok nin tuloy na mamiduan danay nen say bilang na aktibon manangipalapag—so mankakasakey ya ontulok ed satan a ganggan, balanglan bilang mibibiang odino bilang manangimaton. Diad arum a daldalin, say resyo na saray inmatendi ed Memoryal ed manangipalapag so mas atagey ni. Say 4,049 a manangipalapag ed Estonia, Latvia, tan Lithuania so aliketan ya awalaan na 12,876 ya inmatendi ed Memoryal, a masulok ya amitlon danay nen say bilang na manangipalapag. Tan diad Benin, say 16,786 ya inmatendi ed Memoryal so angilaman na ngalngali limaran danay nen say bilang na saray manangipalapag. Sakey a kongregasyon na 45 manangipalapag so awalaan na 831 inmatendi!
10. (a) Anton responsabilidad so ipapasakbat ed sikatayo na atagey a bilang na inmatendi ed Memoryal? (b) Deskribien no antoy nagawa sano say sakey ya inmatendi ed Memoryal et makaawat na kaaruman a tulong?
10 Maliket iray Tasi nen Jehova ya ontanlan kinarakel na interesadon totoo so miuulop ed sikara ed satan a paborablin atekepay sipan ya okasyon. Natan et labay da met a tulongan iraya ya onaligwas ni ed pakatalos tan aro ra ed katuaan. Arum so nayarin onkiwas ed paraan a ginawa nen Alla diad Rusya. Si Alla so iyaaralan na sakey ya special-pioneer ya agin bii balet ta agtanton inmaligwas, kanian tinmunday panagaral. Anggaman kuan, inawat nen Alla so imbitasyon ya onatendi ed Memoryal. Saman a miting, ya importantin tuloy, so akatenyeg ed sikato. Kasempet to et imbantak ton amin iray imahen to tan nampikasi ed si Jehova a patulongan. Duay agew ed saginonor say agin biin pioneer so dinmalaw ed si Alla pian amtaen no sikatoy aliketan ed Memoryal. Nansumpal iya ed mabungan tongtongan. Nigapo lamet so panagaral nen Alla. Ag-abayag et sikatoy akibiang ed panagtasin kimey. Ipapanengneng na sayan eksperiensia so kablian na idadalaw ed saramay inmatendi ed Memoryal. Dakel so maseguron onkiwas a singa ed ginawa nen Alla.
“Ag Tayo Paulian so Saray Panmomoyong Tayo”
11-13. (a) Anto so betang na matoor a kondukta ed matunong a nasyon? (b) Akin a kaukolan ya onatendi ed saray miting iray tuan Kristiano?
11 Say Memoryal so sankaimportantian a miting ed kalendaryo na Tastasi nen Jehova, balet maseguron aliwan saya lambengat. Sinimba et saray Tasi nen Jehova so mankakasakey a mandaragup bilang katutulok ed saray salita nen apostol Pablo: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya ag tayo paulian so saray panmomoyong tayo, singa ugali na saray arum, no ag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Sikaray mililimog ed matunong a nasyon nen Jehova a nabidbir ed matoor a kondukta to. Lalaktipen na matoor a kondukta so regular ya iyaatendi ed saray miting.
12 Malinew a natalosan a tuloy iya ed Pilipinas, a ditan et say promedyo na interon bansa ed saray onaatendi ed saray miting ed Simba et 125 porsiento ed bilang na saray manangipalapag. Ontan met, natalosan met iyan tuloy na sakey a grupo na Tastasi tan interesado ed Argentina. Sikaray manaayam a ngalngali 20 kilometro manlapud Kingdom Hall. Anggaman kuan, nanreport so manangasikaso na sirkito a nilikud a walay sakit, anggapoy anggan sakey ed sikara so makakasaew ed saray miting. Sikaray manbabaroy na apatiran oras ed kalesa odino akalugan ed kabayo, tan diad panaoy betel sikaray onsesempet ed kabilungetan na labi.
13 Legan a manansingger iyan sistema ed anggaan, lalon oniirap so panagbilay, ondarakel iray problema, tan say regular ya iyaatendi ed saray miting so magmaliw a lalon mairap. Balet diad silong na saratan a sirkumstansya, nagkalalon kaukolan tayo nen kapiganman so espiritual a tagano tan ampetang a pililimog a naromog lambengat ed saratan a pandaragup.
“Manseet Ka”
14. Akin ya walay liknaan na inkaganatan na Saray Tasi nen Jehova ed ministeryo ra, tan antoy resulta na saya?
14 Nen katantaon, tinukoy na Iglesia Katolika diad Italya so kimey na Tastasi nen Jehova a bilang “maruksan panangumberti.” Anggaman kuan, say katuaan to et talagan anggapoy karuksaan ed gagawaen na Tastasi. Imbes, say ministeryo ra so panangibalikas na aralem ya aro parad kakaabay da. Satan met so ebidensya na katutulok ed saray salita nen Pablo: “Ipulong mo so salita; manseet ka no panaon to; tan ag to panaon.” (2 Timoteo 4:2) Say liknaan na inkaganatan so mamapakiwas ed Tastasi nen Jehova a magmaliw a maseseg ed ministeryo ra, a singa nanengneng ed impangusar da na dagup a 1,096,065,354 ya oras ed 1994 a manpupulong ed kakaabay da, panaggaway panagpawil, tan pangikokondukta na 4,701,357 a panangiyaral ed Biblia. Dakel so akibiang ed saray pioneer a serbisyo, a mangipapanengneng a say espiritu na panagpayunir so mabilay tan aktibo. Say promedyo na 636,202 pioneer ed sankamundoan so mamapaneknek ed saya.
15, 16. (a) Panon a mangidedemostra na espirituy panagpayunir so namparan kalangweran tan maedad la? (b) No nengnengen so balang bansa ed 1994 Serbisyon Taon a Report, iner iray pakanengnengan na matalonggaring a bilang na saray payunir?
15 Diad limog na saratan a pioneer et dakel iray tinedyer. Arum ed Estados Unidos so manlilingkor natan bilang regular pioneer legan ya haiskul, a saray kaklase ra so manunan teritorya ra. Aromog na sarayan tobonbalo a say panagpayunir so sankaabigan a paraan ed pakasalimbengan da manlapud saray druga, imoralidad, tan karawalan a kasmak ed dakel ya eskuelaan ed satan a dalin. Dakel niran kalangweran so walaay kalat a manpayunir sano nasumpal day haiskul. Diad Ukraine, si Irina a nan-auxiliary pioneer ed interon impan-haiskul to ta pian niparaan toy inkasikato ed panagpayunir kayarin mangraduar. Sanen asumpal toy haiskul, inopresian na pamilya ton mitulongan ed pinansyal a pankaukolan to pian sikatoy mangilaman ed pamilya diad panregular pioneer. No nipaakar ed kuarta, saray pamaakaran so agmainomay diad Ukraine. Balet kuan nen Irina: “Kabat kon say gagawaen ko et kabaliksan toy bilay aliwa lambengat parad siak noagta parad saramay napupulongan ko.” Talagan makapaliket so pakanengneng ed ontanlan kinarakel na kalangweran natan a walaay kaisipan a singa ed si Irina. Anto so walan magmaong a dalan parad sikara pian ‘nonoten so [Engranden] Manamalsa ed saray agew na inkaugaw da’?—Eclesiastes 12:1.
16 Sakey a baleg a bilang na saray pioneer so maedad la. Irereport na sakey a legan na komaduan guerra mundial et say ama tan agi to so inatey legan na pibabakal, tan say ina tan agi ton bii so pinaltog ed ghetto. Diad saginonor et inatey so anak ton laki. Natan, legan na itatatken to tan paniirap lapud kaleteyan, sikatoy inikdan nen Jehova, ed loob na Kristianon kongregasyon, na mas baleg a pamilya nen say abalang to. Tan aromog to so gayaga ed itulong ed arum bilang sakey a regular pioneer.
17, 18. Panon a balang sakey ed sikatayo, balanglan payunir odino andi et makapangipanengneng na espirituy panagpayunir?
17 Siempre, aliwan amin so makapanpayunir. Naliliketan si Jehova a mangawat ed amin a kakaplo tayo, say sankaabigan a niyapay tayo, antokaman iya ed partikular a kipapasen tayo. (Malaquias 3:10, paimanod-leksab) On, nayarin nabayuboan tayon amin so espiritu na sarayan maseseg a pioneer tan gawaen so antokaman a nayarin iyabuloy na sirkumstansya tayo pian napalaknab so panagpulong na maong a balita.
18 Alimbawa, diad Australia, say Abril 16 so nigetar bilang espesyal ya agew parad panagtasi ed lansangan. Satan so suportadon maong na saray manangipalapag tan ontan met ed saray pioneer, a singa papaneknekan na balon pantok na manangipalapag a 58,780 ed satan a bulan. Niarum ni, masulok nin 90,000 a magasin so nibunog nen say nen katantaon ed parehon bulan. Legan na espesyal ya agew, sakey ya agin bii so akapangipalima na saray magasin ed sakey a laki, tan legan na pangisusulat to ed ngaran tan address na laki pian nabayuboay interes, nalmoan ton sikara manayay sankanayon! Sikara manayay sankapinsan ya agni akapannengnengan ed loob na 30 taon. Maseguron tuloy ya angilukas na saray pankanawnawa parad maliket a panagpawil!
Pansiansiaen so Katooran Anggad Anggaan
19. Akin ya inkaganatan a say matunong a nasyon nen Jehova so mansiansian matoor anggad angaan?
19 Inkaganatan ya amin a walad matunong a nasyon na Dios et mansiansian matoor legan a say mundo nen Satanas so mamapaarap ed pinal iran kipapasen to. Agmabayag, say masanton nasyon nen Jehova so makadngel ed tawag: “Gala, baley ko, onloob ka ed saray silir mo, tan ikapot mo so saray silir mo, tan ikapot mo so saray pintom ed liberliber mo. Yamot mo so inkasika ed daiset a panaon anga ed say kasanokan onlabas.” Sayan makasalanan-ed-dala a mundo so maseguron nipaarap ed madibinon panangukom. “Ta, nia, si Jehova ompaway a manlapu ed pasen to pian dusaen to so saray manaayam ed dalin lapu ed inkauges da: say dalin met lakseban to so dala to, tan angan kapigan agto la sakbongan so saray inatey to.” (Isaias 26:20, 21) Komon ta balang sakey ed sikatayo so ontalindeg a malet bilang sakey a manamenben-katooran a Kristianon mililimog ed matunong a nasyon nen Jehova. Insan diad ontan et pangayagaan tayo so pakadampot ed andi-anggaan a bilay ed mangaraldalin odino mangatatawen a pasen na Panarian nen Kristo.
Kasin Natandaan Yo?
◻ Kapigan a niyanak so “matunong a nasyon”?
◻ Akin a kaukolan na totoo na Dios so mansungdo ed sarayan kaunoran ya agew?
◻ Anto so ipapanengneng na atagey a bilang na manangipalapag tan say oras ya inusar ed ministeryo a nanengneng ed 1994 Serbisyon Taon a Report?
◻ Akin ya ontanlan importanti so iyaatendi ed saray miting legan a manasingger iyan mundo ed anggaan to?
◻ Akin a nepeg a mansiansian matoor so amin a mililimog ed matunong a nasyon na Dios?
[Tsart ed pahina 12-15]
1994 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Litrato ed pahina 18]
Saray manamenben-katooran diad matunong a nasyon nen Jehova so makarateng ed andi-angaan a bilay diad inkayadyari