Say Sankabalgan a Toon Nambilay ed Kapiganman

Kapitulo 87

Mangitarya Parad Arapen Tekep na Praktikal a Kakabatan

Kapkapangisalaysay nen Jesus lambengat na istorya nipaakar ed managdarak ya anak ed ulop a mangilalaktip ed saray babangatan to, agmatua iran managsingil na buwis tan arum niran kabat a managkasalanan, tan saray eskriba tan Pariseos. Natan, diad pangipapaimano ed saray babangatan to, sikato so angisalaysay na sakey ya ilustrasyon nipaakar ed sakey a mayaman a too ya akaawat na agmaabig a report nipaakar ed manangipakurang na abung to, odino mayordomo.

Unong ed si Jesus, tinawag na mayaman a too so mayordomo to tan inkuan to’d sikaton pataynanen to. “Anto’y gawaen ko, ta say katawan ko so mangekal ed siak na inkamayordomok?” so ninonot na mayordomo. “Anggapo so biskeg ko a mankotkot, siak so ambaing a mipayabol. Ah! amtak lay gawaen ko, pian, sano naekal ak ed inkamayordomo, saray totoo so mangawat ed siak diad saray ayaman da.”

Antoy plano na mayordomo? Tinawag to iramay walaan na utang ed katawan to. “Pigaray utang mo?” tepet to.

Inyebat na unaan, ‘2,200 litro a larak na olibo.’

‘Alam so kasulatan mo tan tampol ya isulat mo so 1,000,’ inkuanto’d sikato.

Tinepetan to so sakey ni: ‘Natan sika met, pigara so utang mo?’

Inkuanto, ‘22,000 litro na trigo.’

‘Alam so kasulatan mo tan tampol ya isulat mo so 18,000.’

Say mayordomo so walaan na kanepegan a mamawas na saray babayaran ya inutang ed katawan to, lapud sikato ni so mangaasikaso’d pinansyal a panangipakurang na katawan to. Diad pamabawas na saray kantidad, sikato so mikakaaro ed saramay makapangipawil na saray pabor ed sikato sano naandi la’d anapan to.

Sanen akabatan na katawan no anto so agawa, sikato so mandinayew. Diad tua, “indayew to so aripen, lapud anggaman agmatunong, sikato so kinmiwas tekep na praktikal a kakabatan.” On, inyarum nen Jesus: “Saray ilalak na sayan sistema na bengabengatla so mas makabat ed praktikal a paraan nipaakar ed dili ran kailalakan nen saray ilalak na liwawa.”

Natan, diad pangipapaimano na leksion parad saray babangatan to, impaseseg nen Jesus: “Mikaaro kayo ed inkasikayon dili diad panamegley na agmatunong iran kayamanan, pian, sano onsaew, sikara so mangawat ed sikayo diad andi-anggaan a panayaman iran paspasen.”

Agkokomendaan nen Jesus so mayordomo ed agto inkatunong noagta ed matudio, praktikal a kakabatan to. Mabetbet a “saray ilalak na sayan sistema na bengabengatla” so makabat a manguusar na kuwarta odino posisyon da pian mikaaro ed saramay makapangipawil na saray pabor ed sikara. Kanian saray ariripen na Dios, “saray ilalak na liwawa,” so nakakaukolan met a mangusar ed materyal a kaykayarian da, saray “agmatunong iran kayamanan” da, ed makabat a paraan pian sikaray nagunggunaan.

Balet singa imbaga nen Jesus, nepeg day mikaaro diad panamegley na sarayan kayamanan ed saramay makapangawat ed sikara “diad andi-anggaan a panayaman iran paspasen.” Parad saray membro na melag a pulok, sarayan paspasen et diad tawen; parad “arum a karnero,” saratan so diad Paraison dalin. Lapud si Jehova a Dios tan say Anak to lambengat so makapangawat ed totoo diad sarayan pasen, kaukolan tayo so manseet a mamayubo na pikakaaro ed sikara diad pangusar na antokaman ya “agmatunong iran kayamanan” a nayarin walad sikatayo diad panuporta na intereses na Panarian. Insan, sano onsaew odino naandi iray materyal a kayamanan, a maseguron pagmaliwan da, say andi-anggaan ya arapen tayo so napaseguroan.

Intuloy nen Jesus ya inkuan a saray totoon matoor ed panangasikaso ed anggan sarayan materyal, odino sankamelagan, iran bengatla so magmaliw met a matoor ed panangasikaso ed saray pamaakaran a walaan na babaleg a kaimportantian. “Kanian,” intuloy to, “no agyo pinaneknekan so inkasikayon matunong nipaakar ed agmatunong iran kayamanan, siopa so mangimatalek ed sikayo na peteg [salanti, espiritual, odino Panarian, ya intereses]? Tan no agyo pinaneknekan so inkasikayon matunong nipaakar ed kien na arum [say intereses na Panarian ya inmatalek na Dios ed ariripen to], siopa so mangiter ed sikayo no anto so parad sikayo [say tumang a bilay ed andi-anggaan a panayaman iran paspasen]?”

Sikatayo so agbasta makapagmaliw a tuan ariripen na Dios tan ontan met et makapagmaliw ya ariripen na agmatunong iran kayamanan, materyal a kaykayamanan, a singa imbaga nen Jesus: “Anggapoy aripen ed abung a nayarin makapanpaaripen ed duaran katawan; ta, balanglan busolen to so sakey tan aroen to imay sananey, odino sikato so mansiansia’d sakey tan balawen imay sananey. Agkayo makapanpaaripen ed Dios tan ed saray kayamanan.” Lucas 15:1, 2; 16:1-13; Juan 10:16, NW.

▪ Panon a say mayordomo ed ilustrasyon nen Jesus so mikakaaro ed saramay makatulong ed sikato diad saginonor?

▪ Anto so “agmatunong iran kayamanan,” tan panon a sikatayoy makapikaaro diad panamegley da?

▪ Siopa so makapangawat ed sikatayo diad “andi-anggaan a panayaman iran paspasen,” tan anton paspasen iraya?