Pananalona ed si Satanas tan Saray Kimey To
“Ontolok kayo sirin ed Dios; balet onsumpa kayo ed diablo, et sikato so onarawi ed sikayo.”—SANTIAGO 4:7.
1. Panon a mangaapekto natan ed katooan so “lima na marelmeng”?
DUGARUGA so impangibalikas nen Job: “Say dalin niiter ed lima na marelmeng.” (Job 9:24) Tan nidudunget itayo natan ed sankairapan a panaon ed amin ya awaran na too. Akin? Lapud saraya so “kaunoran iran agew” na demonikon pananguley nen Satanas ed dalin. Agpankelawan a, diad silong na panangimpluensya nen Satanas, “saray totoo a mauges tan saray managsaol onuges lara’n onuges, a managsaol ira, tan nasaol ira met a dili.” (2 Timoteo 3:1, 13) Niarum ni, saray panamasegsegang, ag-inkahustisya, inkaruksa, krimen, kairapan ed ekonomya, graben saki-sakit, kairapan ed inkatatken, emosyonal iran kagogonigon—saraya tan dakel ni so talagan sengegay sakit na linawa tayo.
2. Panon tayon natalonaan iray panangataki nen Satanas natan?
2 Say baleg a kabusol, si Satanas a Diablo, so mangiyaapasakey na panangataki to’d katooan tan nagkalautla ed saray tuan managdayew na Dios. Say kalat to et say pangipabeneg ed amin a posiblin manamenben-katooran ya onsumpad Dios tan nitarok ira’d kadederal a kaiba to tan saray demonyon anghel to. Anggaman ontan, makapanseguro itayo a no makapansungdo itayon manmatoor, say Diablo so onarawi ed sikatayo. Singa si Jesus, ‘naaral tayo so katutulok’ diad saray bengatlan nasagmak tayo, tan diad agkanepegan a panangasi To, nadampot tayo so andi-anggaan a bilay.—Hebreos 5:7, 8; Santiago 4:7; 1 Pedro 5:8-10.
3, 4. (a) Antoran akinpaway a subok so kaukolan a talonaan nen Pablo? (b) Anto so kapagaan nen Pablo bilang Kristianon matatken?
3 Si apostol Pablo met so asubok ed dakel a paraan. Diad pangisasalaysay to na kredensyal to bilang ministro nen Kristo, insulat to: “Siak so lalo ni; dia ed saray kimey lalo ni a daakan, dia ed saray pangawan lalo ni’n daakan, dia ed saray lewet linmabas ed sukat, dia ed saray patey mabetbet. Dia ed saray Judios aminlima ya inawat ko so apataplo’n lewet likod so sakey. Amitlo ya alewet ak na saray yarang, aminsan abato ak, amitlo ak a nakneb, sanlabi tan sanagew a nanayam ak ed kaaralman na dayat; dia ed saray panagakar a mebetbet, dia ed saray kaatapan ed saray ilog, dia ed saray kaatapan a manlapu ed saray kabaleyan ko, ed saray kaatapan a manlapu ed saray Gentil, ed saray kaatapan ed ciudad, ed saray kaatapan ed lawak, ed saray kaatapan ed dayat, ed saray kaatapan ed saray pakalala ya agagi; ed kimey tan sagpot, ed saray puyat a mabetbet, ed eras tan kaapgaan, ed saray panagayunal a mabetbet, ed betel tan kalabosan kalakseban.”
4 “Niarum so saraman a bengatla ya wala ed paway, wala so mangelat ed siak ya agew-agew, say pampirawat lapu ed saray amin ya iglesias. Siopa so makapuy, tan agak makapuy? Siopa so nagapol, tan agak ondalang?” (2 Corinto 11:23-29) Kanian, nansiansia si Pablo ed katooran sanen nidunget ed saray panamasegsegang tan subok manlapud paway, tan bilang sakey a Kristianon matatken, sikato so mapagan tuloy ed panamabiskeg ed maletey ya agagin lalaki tan bibii ed loob na kongregasyon, a tulongan iran mansiansian manmatoor. Agaylan maabig ya alimbawa parad Kristianon mamatatken natan!
Katooran ed Silong na Panamasegsegang
5. Anto so ebat ed direktan panamasegsegang?
5 Antoray paraan ya uusaren nen Satanas pian buyaken so katooran? Singa nipanengneng ed tagey, sakey ed sankaruksaan a pakana nen Satanas et say direktan panamasegsegang, balet wala so sakey ya ebat. Sisimbawaen itayo na Efeso 6:10, 11: “Onbiskeg kayo komon ed Katawan, tan dia ed biskeg na pakayari to. Isolong yo so sankabokel a kinlong na Dios, pian nayarian yo so ontalindeg ya onsumpa ed saray pangalot [odino, “masilib iran gawa,’ paimanod-leksab, NW] na diablo.”
6. Panon a nipanengneng a saray Tasi nen Jehova so ompapaway a ‘mananalo’?
6 Mabetbet legan na sarayan kaunoran ya agew, saray Tasi nen Jehova so kaukolan ya onarap ed saray subok. Kanian, nibaga tayo a kaibay Pablo: “Dia ed saraya’n amin a bengatla sikatayo so lalo ni nen saray mananalo ed panamegley na saman so angaro ed sikatayo.” (Roma 8:37) Saya so pinaneknekay rekord na katooran na Tastasi nen Jehova diad saray panangipangawan a kampo ed Alemanya, Austria, Polandya, tan Yugoslavia legan na panaon na Nazi ed baetan na 1933 tan 1945, diad silong na panamairap na Komunista ed Mamabukig ya Europa ed baetan na 1945 tan 1989, tan legan na saray panamasegsegang ya amairap ed saray parti na Aprika tan Latin Amerika ed agano niran tuloy a panaon.
7. Antoran makapasagyat ya alimbawa na katooran so nirereport manlapud Etiopia?
7 Saray Tasi nen Jehova diad Etiopa so angitarok na manamakiwas ya alimbawa na katooran ed baetan na 1974 tan 1991. Sakey a mapulitikon manag-erel so angibaga ed sakey a nipisok ya agin laki: “Magmaong ni so pangibulos ed saray leon manlapud zoo nen say pangibulos ed sikayon totoo lamet!” Sarayan maruksan managpasegsegang so amairap ed ariripen nen Jehova, tan kayari pigaran taon et sakey ya apelon korte so angiganggan na panamatey. Say bangkay na sakey ya agin laki so imparungtal ed publiko bilang pasakbay ya alimbawa. Arum niran agagi ya inmapelo ed dusan ipapatey so nibulos na mas makatalos a korte, tan pigara ed sarayan matoor a ‘mananalo’ so walaan na betang a paliwawa odino eksperiensia ed programa na “Madibinon Panangibangat” a Distriton Kumbension ed Addis Ababa ed asasakbay na 1994.a—Juan 16:33; ipareng so 1 Corinto 4:9.
8. Panon a nanggunaetan ya anamoten nen Satanas so “panamagit ed rasan minoridad”?
8 Sinmaew si Satanas a mamuyak ed katooran na saratan a matoor ya agagin lalaki tan bibii diad direkta tan arap-arapan a panangataki. Kanian, anto niray masilib a paraan ya aagamilen to? Onia so inkuan na Apocalipsis 12:12 nipaakar ed sarayan kaunoran ya agew: “Kasi lara so dalin tan dayat: ta say diablo inmakseb ed sikayo, ya wala ed baleg a sanok to, ya amta to a daiset la so panaon to.” Lapud sinmaew a mamunas ed matoor a totoo na Dios diad panamegley na saray panamasegsegang, diad getman paneral ed totoo nen Jehova tekep na amin a populasyon. Kanian say tatawagen a panamagit ed rasan minoridad so ginawa ed saray parti na datin Yugoslavia, tan say malaknab a panamatey so sinali diad Liberia, Burundi, tan Rwanda.
9. Akin a mabetbet ya onsasaew iray pakana nen Satanas? Mangiter na saray alimbawa.
9 Anggaman ontan, saray taktika nen Satanas so ompupuktal ed sikato, ta say satanikon panamairap so mamapaliing ed matuan-impanpuson totoo a namorian say mogmon ilalo ra et nibabase’d Panarian na Dios, a siseseseg ya iyaabawag na Tastasi nen Jehova. (Mateo 12:21) Peteg, saray iteresado so ontitipon ed Panarian! Alimbawa, diad guguloen-na-bakal a Bosnia tan Herzegovina, 1,307 so inmatendi ed selebrasyon na Memoryal ed impatey nen Jesus nen Marso 26, 1994, mas masulok na 291 nen katantaon. Saray pantok ya inmatendi so nireport diad Sarajevo (414), Zenica (223), Tuzla (339), Banja Luka (255), tan arum niran baley. Diad kabangibang a Croatia et walaay balon pantok ya inmatendin 8,326. Say karawalan a nagagawa ed liber da so ag-angamper ed Tastasi nen Jehova ed saraman a dalin a manumpal ed ganggan a “[mantultuloy ya] ipakabat so inpatey na Katawan anga ed isabi to.”—1 Corinto 11:26.
Diad Guguloen-na-Bakal a Rwanda
10, 11. (a) Anto so nagagawa ed tatawagen a Kristianon Rwanda? (b) Panon ya imbalikas na saray matoor a misionero so inkasikara?
10 Nen 1993, diad Rwanda, a walaay 2,080 a manangipalapag na Panarian, 4,075 so inmatendi ed “Madibinon Panangibangat” a Distriton Kumbension, tan 230 so abautismoan. Diad saraya, 142 so tampol a nampalistan auxiliary pioneer. Saray nikokonduktan panangiyaral na Biblia so dinmaak anggad 7,655 nen 1994—mabitar ya agkaliktan nen Satanas iyan indaak! Anggaman say karaklan na populasyon so mankuan a Kristiano, say panpapateyan na Hutu tan Tutsi so nigapo. Inaksobi na L’Osservatore Romano na Vatican: “Saya so palanit a panagpatey, ta makapaermen ya anggan saray Katoliko et responsabli.” Sakey a kalkulan kapalduay milyon a lalaki, bibii, tan ugugaw so inatey, tan ngalngali duaran milyon so naandiay ayaman odino pinaskar ya ontaynan. Diad pamapasiansia na agmarawal a Kristianon neutralidad da, saray Tasi nen Jehova so nansiansian nankakasakey. Nilasus ed saray agagi tayon lalaki tan bibii so pinatey. Balet diad sakey a kongregasyon a walaan na 56 a manangipalapag na Panarian, a walay 13 pinatey, say onaatindi ed miting so dinmaak anggad 170 nen Agosto 1993. Saray tulong a nanlapud Tastasi ed arum a daldalin so pigara ed sankaunaan a sinmabi. Manpipikasi tayo ed biang na saramay akaliktar.—Roma 12:12; 2 Tesalonica 3:1, 2; Hebreos 10:23-25.
11 Diad utel na amin ya agaylan karuksaan, taloran misionero ed Rwanda so akatakas. Insulat da: “Amoria min saray agagi tayo ed interon mundo so kaukolan ya onarap ed onian pareho iran situasyon odino mas mauges ni ingen, tan kabat min kabiangan iya lambengat na tanda na kaunoran iran agew na sayan marelmeng a sistema. Siansia, sano say sakey so personal a nalalanor, saya so mangipapaamtan tuloy ed kapetegan na saray bengatla tan mangagawa’d sakey a mangapresya ed no kaunongay kablian na bilay. Saray pigaran kasulatan so walaan na balon kaimportantian parad sikami, tan magunaet kamin manilalo ed panaon sano saray datin bengatla so agla nanonotan. Kaleganan to et labay mi mantultuloy ya okupado ed serbisyo ed si Jehova.”
Saray Tobonbalon Manamenben na Katooran
12, 13. (a) Anton manamenben-katooran a kurang so inala na sakey a katayatdang? (b) Iner so nayarin pakaromogan na panamaseseg na saray tobonbalo tayo natan?
12 Sinalambit nen Jesus a saramay intalirak na saray membro na pamilya nisesengeg ed katuaan so natumangan a “maminlasus.” (Marcos 10:29, 30) Saya so tua ed si Entellia, sakey a samploy taon a bii ed mamaamianen ya Aprika, a pinabpabli toy ngaran na Dios—Jehova—diad bektan impakadngel to ed satan. Sikato so akiaral ed saray Tasi nen Jehova tan nanakar na 90 minuto a paarap tan papawil ed saray miting, anggan mabetbet a sikatoy sasaraduan na sumpan pamilya to diad isempet to. Diad edad a 13, ginapoan to so manpulong ed kabkaabungan, tan pinmalalo so isusumpa na pamilya to. Sakey ya agew, tinaker na kakanayon iray sali tan lima to tan imparokol da ed mansasnit a petang na agew ed loob na pitoran oras, a tunggal paminsan dan sisibuan na marutak a danum. Siruruksa ran siniplatan, a sengegay impakadiperensyay sakey a mata to, tan diad kaunoran et pinataynan. Anggaman ontan, akapantrabaho ed sakey ya ospital tan diad kaunoran et nagmaliw a sakey a nars. Diad edad a 20 et sikato so abautismoan tan nanpalistan tampol bilang auxiliary pioneer. Asagyat lapud katooran to, sikatoy pinapawil na pamilya to ed ayaman da, tan siamera ed sikara natan so papaiyaralan na Biblia.
13 Agamoran nen Entellia so nagkalalon panamaseseg manlapud Salmo 116, nagkalautla ed saray bersikulo 1-4, ya aminpiga ton binasa: “Aroen ko si Jehova, nisengeg ed dengelen to so voces ko tan saray ey-ey ko. Nisengeg ed inkiling to so layag to ed siak, kanian ontatawag ak ed sikato ed legan na panbilay ko. Saray lubilubir na ipapatey niliktob da ak, tan saray ot-ot na Sheol tinekmelan daak, nalmok so gonigon tan ermen. Dia ed satan tinmawag ak ed ngaran nen Jehova; O Jehova, eyeyey ko ed sika, ya iliktar mo so kamarerwak.” Eebatan nen Jehova iratan a pikakasi!
14. Panon ya angipanengneng na matalonggaring a katooran iray Tasin taga Polandya?
14 Singa ed agew nen Jesus, mabetbet ya uusaren nen Satanas so relihyoson inkapanatiko ta pian parngaten so panamasegsegang—balet ta sinmaew. Matalongaring so alimbawa na agagi tayo ed Polandya, a singa adeskribi ed 1994 Yearbook of Jehovah’s Witnesses. Anggan saray kalangweran so kinaukolan a paneknekan day inkasikaran dilin manamenben katooran. Nen 1946 sakey ed saraya et say mantaon a 15 bii a binagaan: “Imarim lambengat so Katolikon krus. Tano andi sakey a bala so manaalagar ed sika!” Diad pamasiansia na katooran, sikatoy kinalagkar ed katakelan, siruruksan pinairap, tan pinaltog.—Ipareng so Mateo 4:9, 10.
Arum Niran Masilib a Paraan nen Satanas
15, 16. (a) Anto so demonikon pananontonan nen Satanas, tan panon tayon naresistian? (b) Akin ya agkaukolan a natiror iray kalangweran tayo?
15 Say demonikon pananontonan nen Satanas so talagan “manuley odino maneral”! Dakel so maruruksan ayura to ed simpenan to. Agpankelawan, sirin, ya ipapasakbay nen apostol Pablo: “Ta ag itayo mitolot ed laman tan dala, no ag ingen onsumpa itayo ed saray manonaan, onsumpa ed saray pakayari, onsumpa ed saray manuley ed mundo na sayan kabilungtan, sumpa ed saray mauges ya espiritu ed pasen a mangatatawen. Kanian alaen yo so sankabokel a kinlong na Dios, pian nayarian yo so mitalindegan ed mauges ya agew, tan, sano agawa yo la yan amin, wala kayo a sitatalindeg.” (Efeso 6:12, 13) Saray pilalek ed materyal, nipaabeban panligliwaan tan propaganda, satanikon musika, desdes ed saray kaulop ed eskuelaan, panangabuso ed druga, tan panagbuanges—dinanman ed saraya so maneral ed bilay tayo. Kanian, intuloy na apostol so pananimbawa to: “Nagkalalo et eegnaan yo so kinlong na pananisia, a sikato so nayarin pangerep yo naani ed saray amin a mandarlang a gayang na mauges.”—Efeso 6:16.
16 Ompatnag a saya so nagkalautlan kapilitan natan nisesengeg ed nikaduman musikan ginawan kasmak nen Satanas ed sayan mundo. Diad arum a kaso et walay direktan pikonektaan ed Satanismo. Onia so kuan na report manlapud opisinay serip ed San Diego County (E.U.A.): “Agawa diad lugar mi sakey a konserto a ditan et kaibay banda so 15,000 a kalangweran a say itatareren et ‘Natas’—salanti, Satan [odino Satanas] no ispelingen a pabeneg.” Say Satanismo so nadedeskrebi bilang sakey ya abot a pakatitiroran na saray katayatdang “lapud sikaray manyayatawyataw a desperado, onsasanok tan manbokbokor.” Sikayoran kalangweran ed Kristianon kongregasyon, agkayo kaukolan a natiror! Tatarokan kayo nen Jehova na espiritual a kinlong ya agbalot natanek na saray gayang nen Satanas.—Salmo 16:8, 9.
17. Panon a natalonaan so emosyonal a depresyon?
17 Saray maapuy a gayang nen Satanas so adesinyon panggalawan iray emosyon. Diad panamegley na saray desdes ed panagbilay, a singa say pisikal a sakit odino sakey a kipapasen na agaylan depresyon, nagawa na kabusol tayo a saray pigara et nawalaan na liknaan na inkaandi-kakanaan. Ompan say sakey et nadismaya lapud anggapoy tanton dakel ya oras to’d serbisyo ed Dios odino lapud agpakakaatendi ed pigaran miting ed kongregasyon. Say maaron panangasikaso na mamatatken tan arum niran mapangasin-impanpuson agagi so makatulong pian natalonaan iray mairap a kagogonigonan. Lawas tandaan ya inaro nen Jehova iray matoor ya ariripen to. (1 Juan 4:16, 19) Kuan na Salmo 55:22: “Paawit mo ed Jehova so awit mo, et sikato benbenan to ka: ag ton balot paulian so matunong a natenyeg.”
18. Diad antoran satanikon pakana so kaukolan a pipuligesgesan na arum?
18 Saray masilib a “pakana” nen Satanas so pinmatnag ed agano ni ed sananey nin porma. Diad arum a daldalin, dakel a wala la’d suston-edad so makakaeksperiensia na manudugirog ed kanonotan a mangipapatnag na matalonan panangipatnag a nen sikaray ugugaw et sikaray sadistikon inabuso na saray satanikon kulto. Iner so panlalapuan na saratan ya ideya? Anggaman ed malaknab a panagsukimat, siansian nanduruman tuloy so opinyon na minumundon espisyalista. Momoriaen na arum iratan a kanonotan bilang aktual iran memorya, saray arum et bilang pantasya—anganko et sinagyat na kuestionablen therapy—tan diad arum et bilang nengneng na kugkugip a pinawala na pigaran kagogonigonan ed inka-ugaw.
19. (a) Antoran kanonotan so kaukolan a talonaan nen Job? (b) Panon a nayarin tumboken na mamatatken so alimbawa nen Elihu?
19 Makapainteres a kaukolan ya arapen na aripen na Dios a si Job iray “nonnonot” ya impatnag nen Satanas diad panamegley nen Eliphaz tan si Zophar. (Job 4:13-18; 20:2, 3) Talagan nanirap si Job na “pakaalipanesan” a nansumpal ed “pabigla-biglan salita” nipaakar ed “saray pakataktakotan” a mamapairap ed nonot to. (Job 6:2-4, NW; 30:15, 16) Mareereen a tinmalineng si Elihu ed si Job tan sisimoon ton tinulongan a nanengneng so makabat a panmoria nen Jehova ed saray pamaakaran. Ontan met natan, ipapatnag na makatalos a mamatatken a sikaray mangimamalasakit ed saray naiirapan diad agpangaarum na kaaruman niran ‘pabelat’ ed sikara. Imbes, singa si Elihu, siaanos dan tatalinengen ira tan insan iyaaplika so larak na Salitay Dios. (Job 33:1-3, 7; Santiago 5:13-15) Kanian siopaman a say emosyon to so iisturboen na ampait iran eksperiensia, peteg man iya odino pantasya, odino “taktakoten . . . ed saray kogkugip, tan kebiewen na saray pasingawey,” a singa si Job, so makaromog na makarepreskon Makasulatan a ligliwa ed loob na kongregasyon.—Job 7:14; Santiago 4:7.
20. Panon a nayarin tulongan so nagogonigon iran Kristiano pian napansiansia so espiritual ya inkasimbang da?
20 Diad kaplesan et makaseguroy sakey a Kristiano a, diad antokaman a paraan, si Satanas so walad benegan na sarayan makapataktakot a kanonotan. No wala ed loob na kongregasyon so manasagmak na saya, sikaray makabat ed pakanengneng a saratan a makapataktakot ya impresyon ed kanonotan so direktan panalsali nen Satanas pian deralen so espiritual ya inkasimbang da. Sikaray mankakaukolan na anos tan makatalos a pananuporta unong ed Kasulatan. Diad sipipikasin panilalo ed si Jehova tan diad pakagunggunaan manlapud espiritual a panagpastol, saramay manasagmak na gonigon so makapanilalo na pakayari ed labas na gendat. (Isaias 32:2; 2 Corinto 4:7, 8) Diad ontan et sikaray matoor a makapansungdo tan agmangiyabuloy a makaapekto ed kareenan na kongregasyon iray mauges tan kadimdimlan kanonotan. (Santiago 3:17, 18) On, sikara so makayarin manumpa ed Diablo, a makapangipanengneng na parehon espiritun impanengneng nen Jesus sanen inkuanto: “Arawi ka dia Satanas!”—Mateo 4:10; Santiago 4:7.
21. Panon a mamapasakbay so Kasulatan ed saray masilib a paraan nen Satanas?
21 Amta tayo a say kalat nen Satanas et say paneral ed saray kanonotan tayo, a singa impasakbay nen apostol Pablo diad 2 Corinto 11:3: “Balet antakot ak, ompan lamang no, singa say uleg a tinilaan to si Eva ed kasiliban to, saray kanonotan yo naderal ira manlapu ed kalinewan tan kasimpitan ya mamapaarap ed Cristo.” Say peles a kadederal na amin a laman, odino atooan a sosyedad a sian manlapud Dios, so mangipapanonot ed sikatayo ed inkabanday ya intarok na abulok tan marawal a mestison “saray Feller” ed agew nen Noe. (Genesis 6:4, 12, 13, paimanod leksab NW; Lucas 17:26) Kanian, agpankelawan ya uusaren nen Satanas so masilib iran kiwas tan manguusar na masilib iran paraan pian ipangget so sanok to, nagkalautla ed totoo na Dios.—1 Pedro 5:8; Apocalipsis 12:17.
22. No agla mangiru-giru si Satanas ed sikatayo, antoran bendisyon so nailaloan tayo?
22 Si Satanas so ag-anggan asalambit ed pansara iran kapitulo na libro na Biblia a Job. Say marelmeng ya angat to a saray totoo so agmakapansiansian matoor ed Dios so apaneknekan a palso lapud katooran nen Job. Ontan met, diad asingger ya arapen sano “sakey a baleg ya olop” na manamenben-katooran a “pinmaway ed baleg ya irap,” nagawa so kibasileng nen Satanas ed kaaralman. Saray lalaki tan bibii a walaan na pananisia, pati ed kinen matoor a Job, so miulop ed satan a “baleg ya olop,” pian pangayagaan iray malaparaison bendisyon, a mas engrande nen saramay tumang nen Job!—Apocalipsis 7:9-17; 20:1-3, 11-13; Job 14:13.
[Saray paimano ed leksab]
a Nengnengen so 1992 Yearbook of Jehovah’s Witnesses, pahina 177.
Tepetepet ed Repaso
◻ Anton maabig iran alimbawa so inletneg nen Job, Jesus, tan Pablo?
◻ Panon ya aarapen na saray manamenben-katooran si Satanas?
◻ Panon a naresistian na saray tobonbalo iray masilib a pakana nen Satanas?
◻ Anto so nagawaan ta pian natalonaan iray satanikon pakana?
[Litrato ed pahina 7]
Diad Etiopia, si Meswat tan Yoalan so manlilingkor natan ed si Jehova bilang sigpot-panaon a singa ed alimbawa na ama ra, a pinapatey
[Litrato ed pahina 7]
Si Entellia, sakey a tobonbalon manamenben-katooran ed mamaamianen ya Aprika