Pansiansiaen so Katooran tan Manbilay!
‘IKAINDAN mo so Dios, tan ompatey ka!’ Akaretrato ed apis na magasin tayo so asawa nen Job, ya angataki ed sikato diad saratan a salita. Ngalngali 3,600 a taon ed apalabas itan. Ingen ipapabitar na satan ya insalitan panangataki ed matoor ya aripen na Dios so sakey a salisalan a kidudungetan na katooan angga ni’d natan. Si matoor a Job so anagmak na mapalalon inkaperdi—say ayayep to, say ayaman to, say samploran ilalak to. Natan et say laman to so papairapey sakey a graben sakit, a manusubok ed sikato anggad kapantokan. Say rason? Say manunan kabusol na Dios tan too, si Satanas a Diablo, so mangiyaalibansa na sakey ya angat a say too so agmakapansiansian matoor ed Dios diad silong na alabas a subok.—Job 1:11, 12; 2:4, 5, 9, 10.
Natan, singa met ed agew nen Job, “say sankamundoan so mandokdokol ed kaugsan [mauges a sakey, NW],” si Satanas a Diablo. (1 Juan 5:19) On, satan so nagkalalon tua natan, ta natan et “say . . . manngaran na Diablo tan si Satanas, a sikato so mantila ed lapag na sankamundoan,” so imbasileng la manlapud katawenan dia ed sayan dalin. (Apocalipsis 12:9) Saya so sengegan na agaylan kairapan a mamapairap ed katooan ed panaon tayo. Say inmunan guerra mundial, a tinmerak nen 1914, so ananda ed “gapo na kairapan” a mantultuloy ya onuuges ed sayan koma-20 siglo.—Mateo 24:7, 8.
Diad sayan maruksa, mauges a mundo, kasin aliknam la a sinmabi’d kapantokan so panagsungdo na too? Kasin naumameng mo la, ‘Kasin walay gagala na bilay?’ Nayarin alikna itan nen Job, balet sikatoy agbalot naandian na pananisia ed Dios, anggaman akagawa na saray lingo. Imbalikas to so determinasyon to ed sarayan salita: “Anga ed ompatey ak agko ekalen so inkaskey [katooran, NW] ko a manlapu ed siak”! Sikato so matalek a ‘naamtaan [na Dios] so inkaskey [katooran, NW] to.’—Job 27:5; 31:6.
Si Jesu-Kristo, say dilin Anak na Dios, so kaukolan met a mansungdo ed saray subok legan a wadia’d dalin. Inataki nen Satanas si Jesus ed nanduruman paraan. Inanamot toray pisikal a pankaukolan nen Jesus tan sinubok toy panagmatalek nen Jesus ed Salita na Dios, a singa samay agawa dima’d palandey. (Mateo 4:1-11) Inataki to si Jesus diad impangimpluensya ed saray apostatan eskriba tan saray Pariseo tan ed saray apalikdo ra pian sikatoy pasegsegangen da, akusaan na panag-ayew, tan nannononong pian sikatoy napapatey. (Lucas 5:21; Juan 5:16-18; 10:36-39; 11:57) Alablabas ni so impantrato ra ed si Jesus nen say ginawa na taloran palson managligliwa ed si Job.—Job 16:2; 19:1, 2.
Diad tanamanan na Getsemani, legan a manasingger lay Jesus ed kapantokan na sayan subok, imbaga to ed saray babangatan to: “Say kamarerwak maermen a toloy anga ed ipapatey.” Insan, “indakmomo to’y lupa to, et nanpikasi, a kuan to, O Amak, no nayari, onlabas komon so saya’n copa ed siak: angaman ontan, aliwa’n unong ed kaliktan ko, ingen unong ed kaliktan mo.” Kaunoran, diad panamairapan a palitek, diad kasumpalan na mapropetikon salita na Salmo 22:1, inkelyaw nen Jesus: “Dios ko! Dios ko, akin et inkaindan mo ak?” Balet diad kaunoran et ag-inkaindan na Dios si Jesus lapud pinansiansia nen Jesus so ayadyarin katooran ed Sikato, ya angitarok na sakey a modelo parad amin a tuan Kristianos a tumboken. Tinumangan nen Jehova so panamenben na katooran nen Jesus diad impamaoli ed sikato tan diad impangitandoro ed sikato diad sankatagyan a katawenan. (Mateo 26:38, 39; 27:46; Gawa 2:32-36; 5:30; 1 Pedro 2:21) Tumangan na Dios so amin niran arum a mansiansia met a matoor ed sikato.
Aglambengat angiter na kumpleton ebat so katooran nen Jesus ed angat nen Satanas noagta say bagat ya ayadyarin atooan a bilay to so angitarok na dondon, a diad sayan basiyan et saray manamenben-katooran a totoo et makagamor na andi-anggaan a bilay. (Mateo 20:28) Ununa, tinipon nen Jesus so alanaan a “daiset a papastolan” a kaiba ton mananawir ed Panarian diad katawenan. (Lucas 12:32) Kayari na saya, “sakey a baleg ya olop” so natitipon pian makaliktar ed “[say] baleg ya irap,” ya ompapaway ed satan pian manawir ed andi-anggaan a bilay diad pasen na Panarian na Dios ed dalin.—Apocalipsis 7:9, 14-17.
Say manamenben-katooran a si Job so magmaliw a sakey ed binilyon ya inaatey a diad satan a panaon et paolien pian magmaliw a kabiangan na mareen a sosyedad na “balo a dalin.” (2 Pedro 3:18; Juan 5:28, 29) Singa niretrato’d apis ed beneg na magasin tayo, atumangan si Job lapud katooran to sanen “binendicionan [nen Jehova] so kaunoran a kasampotan nen Job a lalo nen say gapu to.” Agamoran to so espiritual a biskeg bilang sakey ya ‘ag nangawa na kasalanan ed saray bibil to.’ Pinadukey ni na Dios so bilay to na kaaruman a 140 a taon. No nipaakar ed materyal a bengatla, inikdan to’y Job na dobli na amin a wala ed sikato ed gapo, tan si Job so “walaan met nen saman na pitoran anak a lalaki tan taloran anak a bibii,” saray anak a bibii et ipapasen a sankagangganaan ed amin a dalin. (Job 2:10; 42:12-17) Balet amin na sayan aligwas so melag ya alimbawa na saray bendisyon a pangayagaan na saray manamenben-katooran diad Paraiso na “balo a dalin.” Sika met so makapinabang ed satan a gayaga, a singa isalaysay na ontumbok iran pahina!
[Litrato ed pahina 4]
Impanengneng nen Jesus so ayadyarin alimbawa bilang manamenben-katooran