Apocalipsis​​​—Asingger la so Engranden Kapantokan To!

Katuloyan na Kapitulo 38

Say Bansal na Kordero Asingger La!

11, 12. (a) Panon a tinukoy na kadaanan a Jerusalem so kadaanan a Babilonia, a mangiletneg na anton padron nipaakar ed Balon Jerusalem tan Babilonia a Baleg? (b) Diad impakatalo sumpad Babilonia a Baleg, anto so kantaen tan iyabawag na mangatatawen ya ulop?

¹¹ “Sika bii a kabusol ko”! Ontan so ginawan panukoy na Jerusalem, say pasen na templo na tuan panagdayew ed si Jehova, so impanawag ed mikakaluguran a Babilonia. (Miqueas 7:8) Ontan met, “say masanton syudad, Balon Jerusalem,” a tugyopen na nobya a 144,000 a membro, so walaan na katunongan a manawag ed Babilonia a Baleg a bilang kabusol to. (Apocalipsis 21:2) Balet diad kasampotan say baleg a balangkantis so anagmak na kairapan, kalamidad, tan inkaderal. Saray espiritistikon ag-agamil to tan saray astrologo so ag-akayarin mangisalba ed sikato. (Ipareng so Isaias 47:1, 11-13.) On, sakey a baleg a pananalo, para’d tuan panagdayew!

¹² Natan ta naandi la so makapadimlan balangkantis, say Babilonia a Baleg, nipaarap so imano ed dalisay-a-birhen a nobya na Kordero! Kanian, say mangatatawen ya ulop so magaygayagan mankanta na dayew ed si Jehova: “Mangayaga itayo tan manliket itayo na mapalalo, tan iter tayo ed sikato so panangigalang, ta sinmabi la so bansal na Kordero tan nantarya la so asawa to. On, niiter ed sikato so pankawes na masnag, malinis, pino a lienso, ta say pino a lienso so mangiretrato ed matunong iran kiwas na sasantos.”​—Apocalipsis 19:7, 8.

13. Diad inlabas na saray siglo, anton panagparaan so nagagawa para’d kasal na Kordero?

¹³ Diad ilabas na saray siglo, nanggawa na maaron panagparaan si Jesus para’d sayan mangatatawen a kasal. (Mateo 28:20; 2 Corinto 11:2) Nilinisan to so 144,000 na espiritual ya Israel pian “sikato so mangiparungtal ed kongregasyon ed inkasikato ed nagnap a katalunggaringan na saya, ya andian na mantsa odino komanet o antokaman ya ontan iran bengatla, balet salanti nepeg a masanto tan andian na tilol.” (Efeso 5:25-27) Lapud panadampot ed “regalo na mangatatawen a tawag na Dios,” balang alanaan a Kristiano so nanlakseb na daan a personalidad a tekep na saray agamil to, ikawes so balon Kristianon personalidad, tan mangagamil na saray matunong a kimey na “sigpot-kamarerwa ed si Jehova.”​—Filipos 3:8, 13, 14; Colosas 3:9, 10, 23.

14. Panon a nanggunaetan nen Satanas a dutakan iray prospektibon membro na asawa na Kordero?

¹⁴ Manlapud Pentecostes 33 K.P. a manpatuloy, inusar nen Satanas so Babilonia a Baleg a bilang say kagawaan ed panggugunaet a dutakan iray prospektibon membro na asawa na Kordero. Diad kasampotan na inmunan siglo, sikato so angitanem na saray bini na Binababilonian relihyon ed kongregasyon. (1 Corinto 15:12; 2 Timoteo 2:18; Apocalipsis 2:6, 14, 20) Dedeskribeen nen apostol Pablo iramay onsuawi ed pananisia ed sarayan balikas: “Ta saratan a totoo so matitilan apostoles, mapalikdon kumikimey, a mankuankuanan ya apostoles nen Kristo. Tan aliwan makapakelaw, ta si Satanas et magmaliw a singa anghel na liwawa.” (2 Corinto 11:13, 14) Diad ontumbok iran siglo, say apostatan Kakristianoan, a singa ed arum a kabiangan na Babilonia a Baleg, a kinawasan to so inkasikato na saray kawes na kayamanan tan pribilihyon, “kolor-ube tan eskarlatan, . . . balitok tan ankablin bato tan saray perlas.” (Apocalipsis 17:4) Say klero tan saray papa to so akikaluguran ed napgaan-dala iran emperador to, a singa si Constantino tan Carlomagno. Sikatoy agbalot akawesan na “matunong iran kimey na saray sasantos.” Bilang sakey a palson nobya, sikato so peteg a sakey ya obra-maestra na satanikon panamalikdo. Diad kasampotan, sikatoy naandi la ed ando lan ando!

Say Asawa na Kordero so Akaparaan la

15. Panon a nagagawa so panagtatak, tan anto so nakaukolan ed sakey ya alanaan a Kristiano?

¹⁵ Kanian natan, kayari na ngalngali 2,000 a taon, amin a 144,000 na nobyan klase so akaparaan la so inkasikara. Balet diad anton peryodo na panaon a nayarin nibaga a ‘say asawa na Kordero so akaparaan la’? Diad maaligwas a paraan, manlapulad Pentekostes na 33 K.P. a nanpatuloy, saray mananisian alanaan so “tinatakan na nisipan a masanton espiritu,” saya ed panmoria na onsasabin “agew na panangibulos diad panamegley na dondon.” Unong ya imbalikas nen apostol Pablo itan, a say Dios so “angyan met na tatak to ed sikatayo tan initdan to itayo na tanda nipaakar ed onsabi, salanti, say espiritu, ed saray puso tayo.” (Efeso 1:13; 4:30; 2 Corinto 1:22) Balang sakey ya alanaan a Kristiano so “atawag tan apili,” tan pinaneknekan to so inkasikato a “matoor.”​—Apocalipsis 17:14.

16. (a) Kapigan ya akompleto so inkatatakan nen apostol Pablo, tan panon tayon amta? (b) Kapigan a sigpot ya “akaparaan ed inkasikato” so asawa na Kordero?

¹⁶ Kayari na dakel a taon na panagsubok, inyabawag a mismo nen Pablo: “Akibakal ak ed maabig a pibabakal, asumpal ko so binatik ko, inonor ko so pananisia. Manlapu ed natan angga ed arapen a niparaan ed siak so balanget na kaptekan, a say Katawan, say maptek ya ukom, a mangiter ed siak na palangkap ed saman ya agew, tan aliwa labat ed siak, noag dia met ed saray amin a mangaro ed payawar to.” (2 Timoteo 4:7, 8) Say pakatatakan na apostol so ompatnag a nakokompleto, anggaman sikato so siansian silalaman tan ingen onarap ed inkamartir. Mipadpara, nepeg ya onsabi so panaon sano amin a nakdaan ed dalin na 144,000 so natatakan a sinansakey a bilang kayaryan nen Jehova. (2 Timoteo 2:19) Saya so nagawa sano say asawa na Kordero so sigpot ya akaparaan na inkasikato​—say baleg a karaklan na 144,000 ya akaawat la na mangatatawen a langkap da tan saraman so wadia ni ed dalin a naabobonan ed kasampotan tan atatakan bilang matoor.

17. Kapigan a nagawa so kasal na Kordero?

¹⁷ Diad sayan panaon ed orasan nen Jehova, sano nakompleto so katatakan na 144,000 et bulosan na saray anghel so apatiran dagem na baleg a kairapan. (Apocalipsis 7:1-3) Ununa, nagawa so pangukom ed singa-balangkantis a Babilonia a Baleg. Kasumpal na saya tamtampol ya onkiwas so mananalon Kristo ed Armagedon pian deralen so nakekeraan a kabiangan na organisasyon nen Satanas ed dalin tan, kaunoran, ibantak ed kaaralman si Satanas tan saray demonyo to. (Apocalipis 19:11–​20:3) Anggapoy panduwaruwa, saray akaliktar ya alanaan ed dalin so makaloob ed mangatatawen a palangkap ed saginonor pian miulop ed kaparan membro na nobyan klase. Insan, diad utel na sakey ya eksena na sankatalbaan a kareenan, say kasal na kordero so nagawa!

18. Panon a pepekderan na Salmo 45 so uksoyan na saray ebento nipaakar ed kasal na Kordero?

¹⁸ Sayan uksoyan so pepekderan na mapropetikon paneskribe na saray ebento ed Salmo 45. Ununa onkiwas so nitronon Ari ed paneral na saray kabusol to. (Bersikulo 1-7) Insan nagawa so kasal, legan a say mangatatawen a nobya so aasikasoen na saray kaiba ton birhen, say baleg ya ulop. (Bersikulo 8-15) Kayari to say kasalan so magmaliw a mabunga, tekep na apaolin katooan ya apaoli ed inkayadyari ed silong na pangasikaso na “saray prinsipe ed amin a dalin.” (Bersikulo 16, 17) Agaylan maglorian panamendisyon so apiulopan na kasal na Kordero!

Maliket Iramay Naimbitaan

19. Anto so komapat ed saray pitoran likeliket ed Apocalipsis, tan siopa so minabang ed sayan nagkalautlan liket?

¹⁹ Ikurit natan nen Juan so komapat ed saray pitoran likeliket ed Apocalipsis: “Tan ibabaga to [say anghel a mangipaparungtal na saray bengatla ed si Juan] ed siak: ‘Isulat mo: Mapalar iramay natawag ed pangdem ed bansal na Kordero.’ Ontan met, ibabaga to ed siak: “Saraya so matuan balikas na Dios.’” (Apocalipsis 19:9)a Saramay naimbitaan ed “pangdem ed bansal na Kordero” so membro na nobyan klase. (Ipareng so Mateo 22:1-14.) Amin a kaiban alanaan a nobya so minabang ed liket ed impangawat na sayan imbitasyon. Kaslakan ed saray naimbitaan so walala ed tawen, say pasen na panggawaan na bansal. Saramay wadia ni ed dalin so maliket met, ta walaan ira na imbitasyon. Say betang da ed pangdem na bansal so maseguro. (Juan 14:1-3; 1 Pedro 1:3-9) Sano sikaray napaoli ed tawen, insan say interon, nankakasakey a nobya so manpatuloy a minabang ed Kordero ed satan a supremon maliket a kasal.

20. (a) Anto so labay ya ibaga na saray salitan: “Saraya so matua a balikas na Dios”? (b) Panon a naapekta si Juan ed saray salita na anghel, ingen anto so inyebat na anghel?

²⁰ Iyarum na anghel a “saraya so matuan balikas na Dios.” Sayan salitan “matua” so nipatalos ed Griego ya a·le·thi·nosʹ tan mankabaliksan na “puro” odino “napandependian.” Lapud sarayan balikas so peteg a nanlapud si Jehova, sikaray matoor tan napanmatalkan. (Ipareng so 1 Juan 4:1-3; Apocalipsis 21:5; 22:6.) Bilang sakey ed saray naimbitaan ed satan a bansal, peteg a si Juan so napno na gayaga ed pakadngel ed saya tan ed paniilalo ed saray gungguna ed arapen para’d nobyan klase. Sikato so ontanlan asagyat, diad tua say anghel so angiter ed sikato na simbawa, unong ya isalaysay nen Juan: “Diad saya dinmakmomo ak ed saray sali to pian sikato so dayewen ko. Balet inkuanto ed siak: ‘Manalwar ka! Agmo gagawaen itan! Siak so kaparam ya aripen tan kapara na saray agagim a walaan na kimey na pantasi ed si Jesus. Idayew mo so Dios.’”​—Apocalipsis 19:10a.

21. (a) Anto so iparungtal na Apocalipsis no nipaakar ed saray anghel? (b) Anto so nepeg ya awawey na saray Kristianos no nipaakar ed saray anghel?

²¹ Diad interon Apocalipsis sakey a makatantandan pantasi so niiter ed katooran tan inkagunaet na saray anghel. Sikaray nalalanor ed paralanan na niparungtal a katuaan. (Apocalipsis 1:1) Sikaray mikikimey ed katooan ed panpupulong na maong a balita tan pangikalbo na simboliko iran bakbak. (Apocalipsis 14:6, 7; 16:1) Mibabakal ira ed dapag nen Jesus diad pangibasileng ed si Satanas tan saray anghel to a manlapud tawen, tan mibakal lamet ira a kaiba to ed Armagedon. (Apocalipsis 12:7; 19:11-14) On, sikaray makaasinger ed mismon persona nen Jehova. (Mateo 18:10; Apocalipsis 15:6) Anggaman ontan, sikaray mapaabeban ariripen na Dios. Anggapo so pasen na puron panagdayew para’d pandayew ed saray anghel odino anggan relatibon panagdayew, a mangitonton ed pandayew ed Dios ed panamegley na dakel a “santo” odino anghel. (Colosas 2:18) Saray Kristiano so mandayew lambengat ed si Jehova, tan ipapasabi so kerew da ed sikato diad ngaran nen Jesus.​—Juan 14:12, 13.

Say Betang nen Jesus ed Propesiya

22. Anto so inkuan na anghel ed si Juan, tan anto so kabaliksan na saray salita?

²² Insan inkuan na say anghel: “Ta say pantasi ed si Jesus sikato so mangipuyan na propesiya.” (Apocalipsis 19:10b) Panon ya ontan? Kabaliksan na saya ya amin ya inpuyan a propesiya so nibabalikas lapud si Jesus tan ed betang to ed saray gagala nen Jehova. Say unaan a propesiya ed Biblia so mangisipan ed isabi na sakey a bini. (Genesis 3:15) Si Jesus so nagmaliw a satan a Bini. Saray ontumbok iran pangiparungtal ed panggawa na ankabaleg a katuaan odino pantasi na propetikon katuaan ed basiyan na sayan manunan sipan. Imbaga nen apostol Pedro ed mananisian Hentil a Cornelio: “Diad sikato [si Jesus] ya amin iran propeta so mantasi.” (Gawa 10:43) Ngalngalin 20 a taon ed saginonor, inkuan nen apostol Pablo: “Anggan panon karakel iray sipasipan na Dios, nagmaliw iran On diad panamegley to [Jesus].” (2 Corinto 1:20) Kayari na sananey a 43 a taon, ipapanonot ed sikatayon mismo nen Juan: “Sinmabi so katuaan ed panamegley nen Jesu-Kristo.”​—Juan 1:17.

23. Akin a say atagey a pasen tan pakauley nen Jesus so agmamawas ed iter tayon dayew ed si Jehova?

²³ Makabawas kasi iya ed antokaman a dalan ed pandayew tayo ed si Jehova? Andi. Nonoten a say simbawa na anghel nipaakar ed panalwar: “Idayew so Dios.” Agbalot sinali nen Jesus a mipara ed si Jehova. (Filipos 2:6) Tua, imbaga ed saray anghel a “manggawa na galang ed [Jesus],” tan amin a palsa so nepeg a mamidbir ed atagey a pasen to pian “diad ngaran nen Jesus amin so mantalimokor.” Balet imanoen, saya so “diad pangigloria ed Dios ya Ama” tan diad panamegley na uksoyan to. (Hebreos 1:6; Filipos 2:9-11) Inter nen Jehova so atagey ya autoridad to ed si Jesus, tan diad pamidbir ed satan a pakauley, mangiter tayo na gloria ed Dios. No ipulisay tayo a pauleyan ed uley nen Jesus, satan so mipadparan pangipulisay ed Jehova a Dios a mismo.​—Salmo 2:11, 12.

24. Anton duaran matalonggaring iran ebento so alagaren tayo, tan anto iran salita so ipaknol tayo?

²⁴ Kanian, sirin, mankakasakey tayon mangikelyaw ed manangilukas iran salita na Salmo 146 ya anggad 150: “Idayew si Jah, sikayoran totoo!” Komon say Aleluya a koro so mangikarol ed panilalo ed pananalo nen Jehova ed Binababilonian imperyo na palson relihyon! Tan ontalona komon so gayaga unong a manasingger la so kasal na Kordero!

[Paimano ed leksab]