Apocalipsis—Asingger la so Engranden Kapantokan To!
Kapitulo 39
Say Mibabakal-Ari so Manatalonggaring ed Armagedon
Pasingawey 13—Apocalipsis 19:11-21
Tema: Si Jesus so angitonton ed saray armada ed tawen pian deralen so sistema na bengabengatla nen Satanas
Panaon na kasumpalan: Kayari na impaneral na Babilonia a Baleg
1. Anto so Armagedon, tan anto so mangitonton ed saya?
Armagedon—sakey a makapataktakot a salita ed dakel! Balet diad saray manangaro na inkatunong, mangipapanengneng iya na abayag-lan-aalageren ya agew sano gawaen nen Jehova so kasampotan a pangukom to ed saray nasyones. Satan so aliwan bakal na too noagta “say bakal na baleg ya agew na Makapanyarin-amin a Dios”—say manangibales ya agew to a sumpad saray manuley ed dalin. (Apocalipsis 16:14, 16; Ezequiel 25:17) Diad impakaderal na Babilonia a Baleg, say baleg a kairapan so ginmapo la. Insan, diad impanlagyat nen Satanas, say eskarlatan-kolor ya atap ya ayep tan saray samploran saklor to so mangiyapasakey na pangataki ra ed totoo nen Jehova. Say Diablo, a nagkalalon sinmanok ed kapiganman ed singa-biin organisasyon na Dios, so determinadon mangusar ed saray alagyat to a mibakal ed kasampotan a tekep na saray nakdaan na bini to. (Apocalipsis 12:17) Saya so kaunoran a pankanawnawa nen Satanas!
2. Siopa si Gog na Magog, tan panon a sikatoy imaneobra nen Jehova ed pangatake ed dilin totoo To?
2 Say maatap a pangatake na Diablo so mabitabitar ya adeskribe ed Ezequiel kapitulo 38. Diman, say nagban Satanas a tinawag a “Gog ed dalin na Magog.” Inikdan nen Jehova na saray simbolikon taga ed saray panga na Gog, pian sikatoy tangguyoren tan saray makapal a puersan militar to a mangatake. Panon ton gawaen iya? Diad pakanengneng nen Gog a saray tasi To a bilang andian-depensan totoo ya “atugyop ed saray nasyones, sakey a tugyop na kayamanan tan kayaryan, saramay manaayam ed sentro na dalin.” Saya so nanengneng ed sentro na entablado na dalin a bilang totoon mangipupulisay na pangidayew ed atap ya ayep tan say talintao to. Say espiritual a biskeg to tan inkaaligwas so mamasanok ed Gog. Kanian si Gog tan say makapal a militar a puersa to, a pati atap ya ayep a pinmaway ed dalin a tekep na samploran saklor to, so nankakasakey para’d pamatey. Aliwan singa say Babilonia a Baleg, anggaman ontan, say malinis a totoo na Dios so mangayaga ed madibinon salimbeng!—Ezequiel 38:1, 4, 11, 12, 15; Apocalipsis 13:1.
3. Panon ya kubkuben nen Jehova so militaristikon puersa nen Gog?
3 Panon a kubkuben nen Jehova so Gog tan amin ya ulop to? Ontalineng! “‘Tan tawagen ko so sakey a kampilan a sumpad sikato a manlapud amin a palpalandey ko,’ so kuan na Soberanon Katawan a Jehova. ‘Say kampilan na balang sakey a laki so onsumpad dilin agi to.’” Balet nisay nuklear nisay kombensional ya armas so andian na kakanaan, ta iyabawag nen Jehova: “Tan siak a mismo so mangukom ed sikato, diad panamegley na bakbak na dala; tan pauranen ko tan saray ulop to, tan dakel iran bansa a kaiba to, na mabibiskeg ya uran tan ankakabaleg a granizo, na apoy tan asupre. Tan peteg ya igalang ko so inkasiak tan pagalangen ko so inkasiak tan ikabkakbat ko so inkasiak ed pakanengneng na dakel a bansa; ta nepeg dan nakabatan a siak si Jehova.”—Ezequiel 38:21-23; 39:11; ipareng ed Josue 10:8-14; Uko-ukom 7:19-22; 2 Awaran 20:15, 22-24; Job 38:22, 23.
Say Sakey a Tinawag na “Matoor tan Matua”
4. Panon so impaneskribe nen Juan ed si Jesu-Kristo ya akawesan na pibabakal?
4 Si Jehova so anawag na sakey a kampilan. Siopa kasi so mamenben na sayan kampilan? No ompawil tayo lamet ed Apocalipsis, et naromog tayo so ebat ed sananey a makapasagyat a pasingawey. Diad arap na saray mata nen Juan say katawenan so alukasan a mangiparungtal na bengatlan petepeteg a makapakebbiew—si Jesu-Kristo ya akawesan na pibabakal! Ibabaga ed sikatayo nen Juan: “Tan anengnenng ko so tawen a silulukas, tan, nia! sakey a kabayon amputi. Tan say akayurong ed satan so natatawag na Matoor tan Matua, tan sikato so mangukom tan mibakal ed inkatunong. Saray mata to singa ra dalang na apuy, tan dia ed ulo to so dakel a diadema.”—Apocalipsis 19:11, 12a.
5, 6. Anto so isisimbolo na (a) say “kabayon amputi”? (b) say ngaran a “Matoor tan Matua”? (c) saray mata a singa “dalang na apuy”? (d) “dakel a diadema”?
5 Singa ed inmunan pasingawey na apatiran de-kabayoan, sayan “kabayon amputi” so matukotukoy a simbolo na matunong a bakal. (Apocalipsis 6:2) Tan siopa ed anak na Dios so nipasen a nagkalalon matunong nen say sikato a makapanyarin Mibabakal? Bilang “natatawag na Matoor tan Matua,” peteg a sikatoy “matoor tan matua a tasi,” si Jesu-Kristo. (Apocalipsis 3:14) Sikato so mibakal pian manggawa na matunong iran pangukom nen Jehova. Sirin, sikato so onakto ed kipapasen to a bilang aturon Ukom nen Jehova, say “Makapanyarin Dios.” (Isaias 9:6) Saray mata to so mankidyam, singa “dalang na apuy,” a mamaarap ed manasingger a maapoy a panusa ed kakabusol to.
6 Saray diadema so mamalanget ed ulo na sayan Mibabakal-Ari. Say atap ya ayep ya anengneng nen Juan ya onsasabi a manlapud dayat so walaan na samploran diadema, mangireretrato ed temporaryon uley ed mangaraldalin ya eksena. (Apocalipsis 13:1) Anggaman ontan, si Jesus, so walaan na “dakel a diadema.” Say maglorian uley to so agnaparaan, ta sikato so “Ari na saramay manuley a bilang arari tan Katawan na saramay manuley a bilang kakatawan.”—1 Timoteo 6:15.
7. Anton nisulat a ngaran so walad si Jesus?
7 Manpatuloy so paneskribe nen Juan: “Tan sikato so walaan na sakey a nisulat a ngaran ya anggapo so mikabat nilikud ed sikato lambengat.” (Apocalipsis 19:12b) Diad Biblia say Anak na Dios so tatawagen ed kangaranan a singa Jesus, Emanuel, tan Miguel. Balet say agbibitlaen a “ngaran” so ompatnag a mangilalaman ed kimey tan pribilihyo a pangagayagaen nen Jesus kaleganan na agew na Katawan. (Ipareng so Apocalipsis 2:17.) Diad panediskrebi ed si Jesus nanlapulad 1914, inkuan nen Isaias: “Say ngaran to so natawag a Makapakelaw a Mananimbawa, Makapanyarin Dios, Andi-anggaan ya Ama, Prinsipe na Kareenan.” (Isaias 9:6) Insiglaot nen apostol Pablo so ngaran nen Jesus nisengeg ed atagtagey iran pribilihyo To ed serbisyo sanen insulat to: “Sikato [si Jesus] so intandoro na Dios ed sakey ya atagey a kipapasen tan initdan to na sakey a ngaran a nagkalalon atagey nen dinan man ya arum a ngaran, pian say ngaran nen Jesus so dakmomoan na balang pueg.”—Filipos 2:9, 10.
8. Akin a si Jesus lambengat so makaamta ed ngaran a nisulat, tan diad siopa so pinabangan to na pigaran magalang iran pribilihyo to?
8 Saray pribilihyo nen Jesus so nikadkaduma. Nilikud ed si Jehova a mismo, si Jesus lambengat so makatalos no anto so kabaliksan na pamenben ed ontan ya atagey a talindeg. (Ipareng so Mateo 11:27.) Sirin, ed amin iran palsa na Dios, si Jesus lambengat so sigpot a makapabli ed sayan ngaran. Anggaman ontan, ilaktip nen Jesus so nobya to ed pigara ed sarayan pribilihyo. Kanian ginawa to irayan sipan: “Say manalo. . . isulat ko ed sikato . . . itan a balon ngaran a kayaryan ko.”—Apocalipsis 3:12.
9. Anto so ipanengneng na (a) si Jesus so “akawesan na sakey a kawes ya awalsikan na dala”? (b) say impanawag ed si Jesus “Say Verbo na Dios”?
9 Inyarum ni nen Juan: “Tan nankawes na sakey a kawes ya awalsikan na dala et say ngaran to atawag na Say Verbo na Dios.” (Apocalipsis 19:13) Siopa so akankayaryan na sayan “dala”? Nayarin saya so dala nen Jesus, a nipaagus nisengeg ed katooan. (Apocalipsis 1:5) Balet, diad sayan konteksto, satan so nayarin manutukoy ed dala na saray kabusol to a niyibong sanen ginawa nen Jehova so pangukom to ed sikara. Sikatayo so apanonotan ed asakbay a pansingawey a say ubasan na dalin so inani tan nigatingatin ed baleg a darapilan na sanok na Dios ya anggad nabot na saray dala so “mas atagey nen saray preno na saray kabayo”—a mangisisimbolo ed baleg a pananalo na Dios ed saray kabusol. (Apocalipsis 14:18-20) Ontan met, say dala a niwalsik ed akinpaway a kawes nen Jesus so mamepekder a say pananalo to so nagnap tan kompleto. (Ipareng so Isaias 63:1-6.) Natan mansalita lamet si Juan nipaakar ed si Jesus ya atawag ed panamegley na sakey a ngaran. Diad sayan bekta satan so sankatalbaan a bantog a ngaran—“Say Verbo na Dios”—a mangipabidbir a sayan Mibabakal-Ari a bilang Manunan Sangiyan nen Jehova tan Manangitandoro na katuaan.—Juan 1:1; Apocalipsis 1:1.
Kaiban Bumabakal nen Jesus
10, 11. (a) Panon ya impanengneng nen Juan a si Jesus so agmanbokbokor ed pibakal? (b) Anto so ipatnag na katuaan a saray kabayo so amputi tan saray kumakabayo so akawesan na “amputi, malinis, pino a lienzo”? (c) Siopa so manugyop ed mangatatawen ya “armada”?
10 Agbokbokor nen Jesus a milaban ed sayan bakal. Ibaga ed sikatayo nen Juan: “Ontan met, saray ehercitos a wala ed tawen so manutombok ed sikato a sikakabayo ra na amputi tan sikakawes na amputi, malinis, pino a lienzo.” (Apocalipsis 19:14) Say katuaan a saray kabayo so “amputi” so mangipanengneng a sakey a matunong a bakal. Say “pino a lienzo” so matukoy para’d saray de-kabayoan na Ari, tan say inkasinag to, say malinis ya inkaputi so mangiparungtal na maralos, matunong a talindeg ed arap nen Jehova. Siopa, sirin, so manugyop na sarayan “armada”? Agpanduwaruwaan, sikaray mangilaktip ed saray matunong ya angheles. Diad asasakbay ya agew na Katawan a si Miguel tan saray anghel to so angibasileng ed si Satanas tan demonyos to a manlapud tawen. (Apocalipsis 12:7-9) Niarum ni, “amin na saray anghel” natan so mangaasikaso ed si Jesus legan a sikatoy akayurong ed maglorian trono to tan mamaarap ed pangukom ed saray nasyon tan totoo ed dalin. (Mateo 25:31, 32) Maseguro, diad mananalon bakal, sano say pangukom na Dios so nagawa ed kasampotan, si Jesus lamet so ulopen na saray anghel to.
11 Arum met so nalanor. Sanen sikatoy angibaki na mensahe to ed kongregasyon na Tiatira, insipan nen Jesus: “Diad saman so manalo tan manumpal ed saray gawak angga ed kasumpalan mangiterak na pakauley ed saray nasyon, tan sikatoy mamastol ed totoo dingan na tayukor a balatyang et nabetag ira a singa bangabanga na pompalba a namisimisi, unong met ya inawat ko ed Amak.” (Apocalipsis 2:26, 27) Andian na panduwaruwa, sano nasabi so panaon, saramay agagi nen Kristo a wala la ed tawen so nawalaan na biang ed panagpastol na totoo tan nasyones a tekep na tayukor a balatyang.
12. (a) Kasin saray ariripen na Dios ed dalin so mibiang ed pibabakal ed Armagedon? (b) Panon a saray totoo nen Jehova et nalalanor ed Armagedon?
12 Anggaman ontan, anto met ed ariripen na Dios ed dalin? Say klasen Juan so andian na aktibon biang ed pibakal ed Armagedon; nisay saray matoor iran kakaiba to, saraman a totoo a manlapud amin a nasyones ya onloloob ed espiritual ya abung nen Jehova a panagdayewan. Sarayan mareen a totoo so amitpit la ed saray kampilan da ya impagmaliw a lukoy. (Isaias 2:2-4) Ingen, sikaray nalalanor a maong! A singa naimano tayo la, saray singa ompatnag ya andian a depensan totoo nen Jehova so masebeg ya aatakien nen Gog tan amin ya ulop to. Satan so sinyal para’d Mibabakal-Ari nen Jehova, ya asuportaan na armada to ed tawen, ya onggapon mibakal ed bakal na kaandi a sumpad saraman a nasyones. (Ezequiel 39:6, 7, 11; ipareng so Daniel 11:44–12:1.) Bilang manangimaton, saray totoo na Dios ed dalin so interesadon tuloy. Say Armagedon so kabaliksan na kilalaban da, tan sikaray manbilay ya andi-geter, a mantasi ed baleg a bakal na kialangonan nen Jehova.
13. Panon tayon amta a saray Tasi nen Jehova so agsumpad amin a gobierno?
13 Kabaliksan kasi na saya a saray Tasi nen Jehova et sumpad amin a gobierno? Arawi ed satan! Sikaray ontulok ed konseho nen Pablo: “Balang kamarerwa komon so pauleyan ed atagtagey a pakauley.” Naimano da a bektaman a wala so kaplesan a sistema, saraman ya “atagtagey a pakauley” so onkikiwas diad panangiyabuloy na Dios pian napansiansia so oksuy ed atooan a sosyedad. Sirin, saray Tasi nen Jehova so manbayar na buis da, ontulok ed saray ganggan, respetoen iray totontonen ed trapiko, ontumbok ed panagrehisto, tan arum nira. (Roma 13:1, 6, 7) Niarum ni, tomboken da so totontonen ed Biblia diad pagmaliw a matua tan maptek; say pangipanengneng na aro ed kaabay; mangipaalagey na mabiskeg, moral ya unit na pamilya; tan panangipasal ed ananak da a magmaliw ya alimbawan mibabaley. Diad sayan paraan sikaray manbayar aliwa lambengat ed “saray bengatlan kien nen Caesar, noagta saray bengatlan kien na Dios.” (Lucas 20:25; 1 Pedro 2:13-17) Lapud ipapanengneng na Salita na Dios a saray ginogobiernon pakayari na sayan mundo so temporaryo, mangipaparaan la natan iray Tasi nen Jehova ed mas nagnap a bilay, say peteg a bilay, ya asinger lan pangayagaan ed silong na uley na Panarian nen Kristo. (1 Timoteo 6:17-19) Anggaman andian ira na betang ed pangipulisay ed pakayari na sayan mundo, saray Tasi so makaeksperiensia na marespeton takot ed apuyanan a Salita na Dios, say Masanton Biblia, a mangibabaga na nipaakar ed panangukom nen Jehova a ngalngali lan gawaen ed Armagedon.—Isaias 26:20, 21; Hebreos 12:28, 29.
(Ituloy ed ontumbok a paway.)