Report na Saray Manangiyabawag na Panarian
“Say Ngaran nen Jehova Sikato so Mabiskeg ya Ilang”
MANBIBILAY tayo ed saray agmaligen a panaon. Say singano maligen a panagbilay tayo so nayarin manguman ed sanlabi, ya andiay antokaman a pasakbay et aromog na arum a sikaray nipaarap ed baleg a kapeligroan sakbay a namoria da itan. Say kapeligroan so nayarin lapud mapulitikan gulo, sakey a maruksan kriminal, sakey a natural a desyang, odino graben sakit. Antokaman itan, iner so nepeg a saralan na sakey a Kristiano sano say bilay to so walad kapeligroan?
Si David, sakey a misioneron manaayam ed sakey ed saray sanga na Watch Tower Society, so akaaral ed ebat na satan a tepet manlapud makapataktakot ya eksperiensia. Say trabaho to bilang sakey a drayber, masaksakbay ya onaalis manlapud sanga pian samaren so pigaran commuter Bethelite (saray boluntaryon manaayam ed paway na sanga). Mansirunget ni ed saman. Nilugan tola si Rosalía tan ondadalan ira ed sakey ya estasyon na pulisya sanen nadngel da so inmunan putok.
Kayari to et maples so inkagawa na bengabengatla. Akadngel na ingal a singa sakey a baleg a paputok tan amoria ton say dagem so onsesengaw nanlapud sakey ed saray dalig. Biglan anengneng to so sakey a sundalo ya akalagey ed pegley na dalan ya akapatuyong ed sikatoy paltog. Taloran bengatla so agawan ngalngali nanbabansag: Nantutumbokan a putok so pinauran ed gilig na Jeep a nanmisimisi ed saray bintana; di David tan Rosalía so kinmebkeb; pinaputukan na sundalo so salming ed arap.
Kaleganay panpapaputok ed Jeep, si David so nanpreno ya inyopot toy nagawaan to legan ya aka-osdong. Say ilalo di David tan Rosalía et ompatey ira. Sikaray nampikasin maksil ed si Jehova, a kekerewen da’d sikato a salimbengan tora. Diad saginonor et imbaga nen Rosalía a diad saraman a panaon et nanumameng no panoy ikiwas na pamilya to no naamtaan day nipaakar ed impatey to!
Siansian Mabilay!
Diad kaunoran et tinmunda so putok tan panmisimisi na salming, tan inimanon tampol nen David si Rosalía. Sanen anengneng to so sakey a melag, palimpek a mantsa na dala ed beneg to, sikatoy akebbiew a tuloy. Balet ta melag a piraso na tinmekkiab a salming, aliwan sakey a bala, so linmereg diman. Mandala iray pueg to lapud amisimisin salming ya anugat ed sikato, balet nilikud ed satan et nengneng toy maabig.
Sinmingger ed Jeep iray lalakin akauniporme na militar tan walaan iray amputin gasa ya akabaliber ed braso ra tan inganggan ed sikaran onepas ya akatagey iray lima ra. Say sakey a singano walaan na atagey a ranggo, so linmingaw ed sakey a sundalo a kuanto: “Imbagak la’d sika ya agka mamapaltog ed saray sibilyan.” Ikakatunongan na sundalo so ginawa to, a kuanton akadngel na saray putok tan abaloan ton saraman so nanlapud Jeep.
Sanen impabidbir nen David a sikara di Rosalía so Tastasi nen Jehova, saray reaksion so paborable. Insalaysay to no anto so gagawaen to, bangbalet labay ni na saray sundalon ag-ira paalisen. Say singano agawa ed palbangon et sakey a grupo na militar so nan coup d’etat, tan sarayan sundalo so akton mangala na istasyon na pulisya sanen si David tan Rosalía so dinmalan ya akalugan ed Jeep.
Mapagan tuloy si Rosalía, balet sipapakpel a nansiansian kalmado legan a kekerewen nen David a sikaray ibulos. Diad kaunoran et sikaray inabuloyan ya onsempet—ya ag-awit so Jeep. Sikaray kaukolan a manakar ed asingger a lansangan pian makalugan ed sakey a bus a mamaarap ed sanga, a ditan tinambal si Rosalía ed infirmary.
Say Pakayari na Pikakasi
Naaralan nen David so sakey a bengatla manlapud satan ya eksperiensia—agbalot leleglemewen so pakayari na masimoon a pikakasi, tan agbalot lilingwanan a say sipapakpel a pangipabidbir na inkasika bilang sakey ed saray Tasi nen Jehova so mabetbet a salimbeng. Nayarin literal a tua a “say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.”—Uliran 15:29; 18:10; Filipos 4:6.
[Picture Credit Line ed pahina 19]
Fotografía de Publicaciones Capriles, Caracas, Venezuela