Kapitulo 20
Maliket a Pamilya na Too ed Leksab na Balon Inkaama
1. Akin a say tema na sakey a balon inkaama so maong a balita ed atooan a pamilya?
KAYARI na Armagedon, say komaduan inkaama so manatalaran ed amin a katooan. Peteg a satan so maong a balita! Say balon inkaama so manggawan posibli ed maandon bilay diad atooan ya inkadyadyari ed sankadalinan a paraiso, lapud say balon Ama na atooan a pamilya so sikaton mismo et ag-ompatey. Sikato so walaan na pakayarin mangipabtang na ayadyarin bilay ed amin na saraman so tagibien to a bilang ananak to ed dalin.
2. Akin a nakaukolan so sakey a balon inkaama?
2 Say balon inkaama so nakaukolan lapud abalang na katooan so orihinal ya inkaama to, say inkaama na Amalsa ed too. Say linya na kapolian a mankurang a manlapud si Jesus ya ompawil ed inmunan too, si Adan, so anampot diad impangiter ed sikatayo diad sayan listaan: “Si Cainan, anak nen Enos, anak nen Set, anak nen Adan, anak na Dios.”—Lucas 3:37, 38.
3. Panon a makapasinagem so inkabalang na inkaama nen Jehova a Dios ed amin a katooan?
3 Say inkabalang na inkaama nen Jehova a Dios so nansumpal a makapasinagem ed amin a katooan. Saray kapolian nen Adan so akatawir na kondenasyon na patey. Say pamaakaran so malinlinew a nibaga ed Roma 5:12: “Diad panamegley na sakey a too et say kasalanan so linmoob ed mundo tan say patey lapud kasalanan, tan sirin say patey so linmaknab ed amin a totoo lapud sikaran amin so nankasalanan.” Satan a “sakey a too” et si Adan, tan diad sigagagalan kasalanan to, abalang to so inkaama na Amalsa to, si Jehova.
4. Diad leksab na siopa inkaama so sinabian nen Adan tan say katooan?
4 Diad leksab na siopa inkaama so sinabian sirin nen Adan? Diad siopa inkaama so angitarokan to ed mundo na katooan? Sikato so inkaama na sakey ya analona ed sikato ya ompaway ed pamilya na amin a matulok iran ananak na Dios ed tawen tan ed dalin. Saman so inkaama na sakey ya angibaga na inmunan tila, si Satanas a Diablo. Panon so impangitarok na satan a sumusumpa ed si Jehova ed saya?
5. (a) Anton ahensya so inusar nen Satanas a Diablo diad pamalikdo ed asawa nen Adan ya ontunganga ed Dios? (b) Akin tan panon a si Adan so sinmabi ed leksab na sigpot a responsabilidad diad kurang na kiwas to?
5 Diad 2 Corinto 11:3 et imparungtal nen apostol Pablo so pamaakaran, ya insulat to: “Tinilaan na uleg si Eva diad kasiliban to.” Sisisilib, inusar nen Satanas so sakey ya uleg ed Eden a mangibaga na inmunan tila diad tingawtingaw ya Eva, a sititilan pinakasalanan to si Jehova na panagtila. (Genesis 3:1-7; Juan 8:44) Agkinorihe nen Adan so asawa to. Agto impulisay so pangan a kaiba to tan agto insalba so kipapasen. Say ginagalan mauges a ginawa to so kinmurang ed saray lima na Uleg. Impasen to so tetel ed kanepegan to, ibabaga na 1 Timoteo 2:14: “Si Adan so ag-apalikdo, noagta say bii so sigpot ya apalikdo tan akalukso.”
Say Sakey a Makana ed Inkaama
6, 7. Diad anton inkaama so impanengneng nen Jesus a nayarin nimatalek ed sikato, tan panon so impangipiho na propesiya na Biblia ed saya?
6 Diad agto panlabay a dayewen “so dios na sayan sistema,” pinaneknekan nen Jesus a sikato so Sakey a pangimatalkan na komaduan inkaama na atooan a pamilya. (2 Corinto 4:4; Mateo 4:1-11; Lucas 4:1-13) Manlapud atooan ya inkianak to nen 2 K.K.P., sikato so Sakey ya inaplikaan na propesiya ed Isaias 9:6:
7 “Wala so sakey ya ugaw a nianak ed sikatayo, wala so sakey ya anak a laki a niiter ed sikatayo; tan say maprinsipen uley so wala ed tapew na abala to. Tan say ngaran to so natawag na Makapakelaw a Mananimbawa, Makapanyari a Dios, Maandon Ama, Prinsipe na Kareenan.” Sirin say “Prinsipe na Kareenan” so walaan na sananey a makanan betang a kiwasan a para ed katooan—salanti say kipapasen ton “Maandon Ama.”
8. Akin a nayarian nen Jesus so onkiwas a magmaliw a “Maandon Ama” ed katooan, tan panon so impamekder nen apostol Pablo ed saya?
8 Say Anak na Dios so magmaliw a “Maandon Ama” ed sayan atooan a pamilya, ya angisaklangan to na ayadyarin atooan a bilay to ed bagat. Sikato so singa insulat nen apostol Pablo: “Ta no diad kasalanan na sakey a too et dakel so inatey, say agkanepegan a panangasi na Dios tan say andi-bayar a langkap to ed agkanepegan a panangasi ed panamegley na sakey a toon Jesu-Kristo so daakan a nagkalalo ed dakerakel. Kanian, sirin, a singa diad panamegley na sakey a kasalanan et nansumpal ed totoo ed amin a nengneng so kadusa, ontan met a diad panamegley na sakey a gawa na panamatunong et mansumpal ed totoo ed amin a nengneng so kiyabawag da a matunong diad bilay.”—Roma 5:15, 18.
9. Panon a si Jesus so nagmaliw a komaduan Adan ed katooan, balet manlapud anton ayaman a sikato so onkiwas a bilang Ama na katooan?
9 Sirin, wala so ayadyarin inkasimbang na sarayan makanan pamaakaran. Say sakey a nanggawa na “sakey a kasalanan” et say inmunan too ed dalin, si Adan. Say “sakey a gawa na panamatunong” so ginawa na sananey lambengat ya ayadyarin too, si Jesus. Saya so angiyabuloy ed sikaton magmaliw a “Maandon Ama” na saray kapolian nen akasumlang ya Adan. Diad onia et sikato so nagmaliw a komaduan Adan ed atooan a pamilya. Say bagat na ayadyarin atooan a bilay to tan say impangipresenta to ed satan ya atooan a kanepegan-ed-bilay ed Baleg ya Ukom ed tawen so nanggawan posibli ed sikato a manlingkor ed dalin a bilang maandon ama na katooan. Sanen sikato so apaoli a nanlapud inaatey, sikato so pinmawil ed espiritun ayaman tan nitandoro ed nikawanan na Manamaoli ed sikato. Sirin nibaga: “Walan nisulat: ‘Say inmunan toon Adan so nagmaliw a mabilay a kamarerwa.’ Say unor ya Adan so nagmaliw a manangiter-bilay ya espiritu.” (1 Corinto 15:45) Say balo, mananagibin Ama na katooan so mangiter ed satan na sankaabigan a gapo ed bilay.
Saray Ununan Totoon Pinalsa a Nailalak
10. Siopa ra so ununan totoon pinalsa ya ilalaken na sayan mananagibin Ama?
10 Say “Maandon Ama,” si Jesu-Kristo ya Ari, so mangipanengneng no siopa ra so ununa ya ilalaken to. Panon? Diad pangipreserba to “ed baleg a kairapan” diad saray dedikadon bilay na nilaksalaksan manbibilay natan. Sikara so “baleg ya ulop” na “arum a karnero.”—Apocalipsis 7:9, 14.
11. Anton mangaraldalin a pankanawnawa so manatalaran ed saray malakarneron niliktar ed “baleg a kairapan”?
11 Agnaparaan so mangaraldalin a pankanawnawan nitarya ed arap na “baleg ya ulop” diad kayari “na baleg a kairapan.” Adeskribe a bilang kabiangan “na tanda” na sayan “konklusyon na sistema na bengabengatla,” saray piguratibon kanding ed parabolo nen Jesus so napegpeg ed bilay diad sayan dalin, a kabaliksan to so andi-anggaan a kaderal da. Balet aliwan ontan ed “baleg ya ulop” na malakarneron totoo a maaro tan matoor a manggagawa na maabig ed nakdaan na saray espiritual ya “agagi” nen Kristo a wala ni ed dalin. (Mateo 25:31-46) Say kipreserba na saratan a “karnero” a makarateng ed biek “na baleg a kairapan” tan onloob ed Milenyon Uley na nipasakbay a “Prinsipe na Kareenan” so manggawan posibli ed sarayan makaliktar ya onloob ed saray bendisyon na uley na Panarian. Sikara so magmaliw a mangaraldalin ya uuleyan na “Prinsipe na Kareenan.”
12. Antoran salita nen Jesus nipaakar ed kioli so mangipanengneng a say agmanganggan bilay so niparaan ed saraman so onloob ed mangaraldalin a nasasakupan na Panarian?
12 Diad satan a panaon et saray salitan sinalita nen Jesus sakbay na impamaoli to ed si Lazaro a manlapud saray inaatey so nasumpal ed saraman so onloob ed mangaraldalin a nasasakupan na Panarian. Inkuanto: “Siak so kiolian tan say bilay. Siopaman a mangagamil na pananisia ed siak, anggaman sikato so ompatey, sikato so manbilay; tan siopaman a manbibilay tan mangagamil na pananisia ed siak so agbalot ompatey.” (Juan 11:25, 26) Nisengeg ed katutulok da ed sikato, nagegemtan da so ayadyarin atooan a bilay diad mangaraldalin a nasasakupan na Ari. Anggan say manangabagey a managgaway-mauges ya inatey a kaampar nen Jesus ed Kalbaryo so napalaboan na pankanawnawa diad pakaloob ed Paraiso. (Lucas 23:43) Si Jesus so manbilay a tuloy ed amin a tukoyen na ngaran to a “Maandon Ama.”
Say Maliket ya Ilalo na Inaatey
13. Say kioli na atooan ya inaatey so manggawan posibli ed anton bantog a totoo ed kadaanan iran panaon a nanengneng diad mangaraldalin a nasasakupan na Panarian?
13 Si Jesus, say sankamatalonaan a kapolian nen Abraham, so angibaga a sayan ateng, say ilalak ton si Isaac, tan say apo ton Jacob so makanengneng ed mangaraldalin a nasasakupan na Panarian na Dios. (Mateo 22:31, 32) Saya so nagawan posibli diad kioli. A singa imbaga nen Jesus, amin a totoon inaatey ed pakanodnonotan a lubok so makadngel ed boses na Anak na Dios tan ombangon ira. Say arapen da ed kayari to so mandepende ed kurang na kiwas a gawaen da.—Juan 5:28, 29; Apocalipsis 20:12-15.
14. Anto so nagawan masakbay nisesengeg ed saraman so walad linya na mangaraldalin a kioli, tan siopa ra so mibiang ya ununa ed sarayan panagparaan?
14 Say abalbaleg iran panagparaan so nagawa ed saray katooan a napaolin manlapud lubok diad bilay ed dalin ed leksab na Panarian na “Maandon Ama.” Sarayan panagparaan so ununan gawaen na saray niliktar “ed bakal na baleg ya agew na Dios a Makapanyarin-amin” ed Armagedon. (Apocalipsis 16:14, 16) No panon karakel so bilang na “baleg ya ulop” na “arum a karnero” na “Prinsipe na Kareenan” ed satan a panaon so agtayo amta natan, ingen ta wala so magenap a kimey a gawaen.
15. Dakel so manserbi ed anton nikaduman kapasidad ed leksab na mananagibin Ama na katooan?
15 Say Salmo 45 so nipaarap ed sayan “Prinsipe na Kareenan” a bilang Ari, tan lapud sikato so magmaliw a “Maandon Ama” na katooan, sayan salmo so mangibabaga ed sikato: “Diad pasen saray atateng mo et sikara so magmaliw ya ananak mo, a turoen mo a bilang piprinsipe ed amin a dalin.” (Salmo 45:16) Balet anggan diad sakbay na kioli na saratan a matoor ya “atateng,” saray lalakin membro na “baleg ya ulop” na niliktar ed Armagedon so naturo ed ontan a maprinsipen betang. Nilibulibo ed sarayan prospektibo a makaliktar ed Armagedon so manseserbi la a bilang mamatatken ed masulok a 54,000 a kongregasyon na saray Tasi nen Jehova, a mangaasikaso ed saray espiritual ya intereses na saray kongregasyon da.
16. (a) Diad leksab na maprinsipen panangasikaso, saray niliktar ed Armagedon so manserbi ed anton kapasidad? (b) Antoran tepet so onlesa nipaakar ed oksuyan a kapaolian na inaatey?
16 Diad leksab na maprinsipen panangasikaso, saray niliktar ed Armagedon so manserbin tekep na magunaet a pitutulongan. Ed no antoran bilibilin so awaten na “saray piprinsipe ed amin a dalin” a manlapud mangatatawen a “Prinsipe na Kareenan” so alagden ni, a mangiter na makapasagyat ya eksperiensia ed amin a kaiba ran niliktar ed Armagedon. Isipen pa so amin a kawes ya iparaan a pangawes ed saray ompawil ya inaatey diad matukoy a kawes! Isipen pa so amin ya abaston tagano ya itarya odino iparaan! Saray pasen na siruman so nakaukolan met ya iparaan. Agaylan makapasagyat itan a panaon ed amin na saraman so mibiang ed sayan kimey na panagparaan! Siopa so ompawil ya ununa? Kasin sikara so ompawil ed baliktar ya oksuyan a manlapud inkiyakar da ed saray pakanodnonotan a lubok? Kasin say martir ya Abel tan Enoc, ya inala na Dios, tan ontan met ed si Noe, Abraham, Isaac, Jacob, tan amin na saray matoor a propetas, so nikabiig a natumangan na kiolin ununa?
17. Siopa so manitermina ed oksuyan a kapaolian na inaatey diad bilay ed dalin, tan anton titulon nipasakbay nipaakar ed sikato so mangipanengneng ed abilidad ton manumpal ed saray responsabilidad to?
17 Say “Prinsipe na Kareenan” so mikabat tan manitermina ed saya. Tan sikato so sigpot a makayari ed saray responsabilidad to a bilang balon Ama na arondon a katooan. Sananey ed nipasakbay a titulo to et “Makapanyari a Dios.” Satan so mangituturo a sikato so sakey a makapanyari, Sakey a mabiskeg. Say panangipatnag ed inkadios to so makapanyari unong ta paolien to so amin ya arondon ya inaatey, a nanonotan toray sinansakey a kangaranan da tan saray personalidad da. (Juan 5:28, 29; Gawa 10:42) Sikato so ayadyarin makayarin mangapiger ed amin a deral a ginawa nen Satanas a Diablo kaleganan na apalabas ya 6,000 taon ed kiwawala na too.
18. (a) Panon a say pankaukolan ed si Adan a magmaliw ya ama nen Jesu-Kristo so naamper? (b) Panon a nayarian nen Jesus so magmaliw a komaduan ama ed saray ilalak nen Adan?
18 Say inmunan Adan so angipatawir na kondenasyon a patey ed amin ya ilalak to. Kasin si Adan so nagmaliw ya ateng na toon Jesu-Kristo? Andi, si Jesus so sakey ya andian na toon ama noagta sikato so inyanak na sakey a birhen a nanlukon diad puersa-na-bilay to ya inyalis na Dios a manlapud espiritun ayaman. Sirin say makasalanan ya Adan so agnagmaliw ya ateng na satan a mangaraldalin ya Anak na Dios. Say komaduan Adan, anggaman kuan, so nagmaliw a manangiter-bilay ya espiritu. Diad sayan kapasidad et nayarian ton sumpalen so propesiya nen Isaias tan magmaliw a “Maandon Ama” ed inmunan ilalak nen Adan, a sinaliw to tan tinagibi to diad gagala na pangiter to na ayadyarin atooan a bilay ed sakey a paraiso ed dalin.
19. Diad anton balon relasyon ed atooan a rasa so pagmaliwan nen Jehova a Dios, tan anton getma nen Satanas a Diablo so sirin naamper?
19 Diad ontan a dalan et say mangatatawen ya Ama nen Jesu-Kristo so magmaliw a mangatatawen a Laki na nipawil ya atooan a pamilya. Nisengeg ed sayan rason et say atooan a pamilya so onloob ed sakey a balon siglaotan ed Amalsa na tawen tan dalin. Anggapo lan balot so anggan melag a posibilidad ya onsaew si Jehova ed orihinal a gagala to. Sirin si Jehova so angamper ed masebeg, andi-dios a getma nen Satanas a Diablo. Amin ya arondon a pamilya na too so nitarok ed pikakabat ed sayan katuaan. Agaylan makapakelaw ya agew itan sano si Jesu-Kristo so onsalta ed inkaama na atooan a pamilya ta pian kumponien to so katooan ed Paraiso a nipawil ed dalin!