Akin a Saewen Ira?

Legan a mipipilan akaalagey ed sakey a banko ed Syudad na Nueva York nen imbeneg a tiagew, sakey a biin manedad na kapegleyan so akaimano a say lakin walad unaan to so mamabasa ed magasin a Watchtower. Sikato so magunaet a tuloy a mamasa ed artikulo nipaakar ed pikakasi, kanian inlista to so paway a petsa.

Pigaran agew ed saginonor, dinmalaw iray Tasi nen Jehova ed sikato, tan intepet to: “Kasin walaan kayo na saray paway na Hulyo a The Watchtower?” Kayari na impakaamta no akin a sikato so interesado ed sakey a partikular a magasin, sakey ed saray Tasi so angikuan: “Say sankaabigan a dalan ed agpakasaew ed anggan dinan iran makapainteres a paway et say pansuskribe.”

“Agko amta a nayarian yo!” so inkelyaw na bii. Sanen nibaga a say sakey a suskripsion so $5, inmebat: “Maseguro kayo? $5 lambengat ed interon taon?” Sanen apaseguroan a talagan sikato ’tan, aliwa lambengat a say The Watchtower so labay to noagta ontan met ed kaiba ton magasin ya Awake! “Kasin maseguro kayo a naalak iratan a magasin diad $10 lambengat?” so intepet to lamet.

Say bii so aliketan ya isuskribian na Tasi. Sikayo met so nayarin nawalaan na magasin a Watchtower tan Awake! a nitulor ed abung yo. Mangipawit lambengat na ₱120, tan awaten yo irayan magasin (apatiran kopya ed sakey a bulan) diad sakey taon.

Ipangasin ipawit so sakey taon a suskripsion ed The Watchtower tan Awake! Ilaktip ko so ₱120. (Diad paway na Pilipinas, mansulat ed lokal a sanga na Watch Tower nipaakar ed impormasyon.)