Kasin Amin a Propesiya So Nanlapud Dios?

“SAY Dios . . . so nepeg ya isipen a bilang baleg a tuloy tan sankatalbaan a tuloy ya iyapasakey to so inkasikato ed sakey lambengat a relihyon, sakey a dalan odino, diad satan a pamaakaran, diad sakey a katooan lambengat.” Ontan so insulat na sakey a pilosopo ed The Guardian, sakey a peryodiko ed Nigeria. Ibabaga ton saray tradisyonal a relihyon na Africa so imparungtal na Dios a para ed situasyon diad Africa tan isusuhiri to ya arum iran angkabaleg a relihyon so inisip ya onnepeg ed lokal iran sirkumstansya.

Nanengneng na saray tradisyonalista so Inkakristiano a bilang relihyon ed Europa tan saray tradisyonal a managpasakbay a bilang puron ahente na propesiya. Sakey a sulat ed Nigerian Daily Times so angikuan: “Anggaman say Makapanyarin-amin a Dios so mangipatnag na inkasikato ed nanduruman panaon tan nanduruman totoo . . . Saray mangakabat a lalaki na mundo so mannguronguro a say Supremon Persona so peles a mangipapatnag na Inkasikato diad Africa.” Arum so maniilalo ni ed sakey ya Africanon propeta, a mipara ed si Jesus tan, ikuan na arum, Muhammad.

Sarayan panmoria so mamalesa ed saray tepet a singa saraya: Kasin amin a propesiya so nanlapud Dios? Kasin ipaparungtal to so nanduruman relihyoson panmorekdek a mangaapag ed mundo? Kasin sikato so walaan na nanduruman relihyoson kakaukolan a para ed nanduruman rasa? Odino kasin wala so tua tan palson propeta, tan tua tan palson relihyon? Anto a peteg so tuan propesiya, tan anto so gagala na satan?

Anto So Propesiya?

Sasalaysayen na Webster’s Ninth New Collegiate Dictionary so propesiya a bilang “say apuyanan a panangiyabawag na madibinon linawa tan gagala 2: sakey ya apuyanan a balikas na sakey a propeta 3: sakey a pasakbay ya bengatlan onsabi.” Saya so mangisusuhiri a wala so nanduruman lapuwan na saray propesiya.

Diad panangidepensa ed tradisyonal iran relihyon, sakey a propesor ed unibersidad na saray relihyoson aaralen, si E. Bolaji Idowu, so mansasalita “ed dakel-iran-dapag a panisip ed Dios diad Africa.” Say libro ton African Traditional Religion so mangipapaliwawa a saya so “mabetbet a mangiiter na danet tan panag-isip a manlapud sosyologon paalagey tan kipapasen.” Alimbawa, ibabaga to a “bangta diad kaslakan ed Africa, et say Dios so naisip ed inkalakin termino, walaray lokalidad [nagkalauta ed saray matriarkan komunidad] a ditan et sikato so impasen a bilang bii.” Kasin say ontan iran lokal tan mansusumlangan a kaisipan so impuyan na Dios? Binidbir nen Propesor Idowu ya “anggapo so makasbel . . . anggan dinan . . . a rasa ed Africa diad pamawala to ed dili ton kaisipan ed Dios.” Saya so mangisusuhiri a say ontan iran relihyoson kaisipan so nanlapud saray ideya na too tan obserbasyon tan imbes a nanlapud madibinon puyan.​—Ipareng so Roma 1:19-23.

Saray tradisyonal a managpasakbay tan orakulo so agmangipaparungtal ed tuan personalidad na Dios odino linawa tan gagala to. Sikara so manisingbat ed saray gawagawa tan ritual a kinaukolan na nanduruman “dirios” ed lokal. Saray pasakbay da so nibase ed mistikon pikakabat tan dibinasyon. Sirin saray ontan a propesiya so ag-apuyanan a deklarasyon na madibinon linawa. Say Makapanyarin-amin a Dios, a mamupuyan ed tuan propesiya, so agda nanlapuan.​—2 Pedro 1:20, 21; Deuteronomio 13:1-5; 18:20-22.

Anto, sirin, so sengegan na ontan iran pasakbay? Ipangasin basaen so onggendan ya artikulo diad ebat ed sayan tepet tan saray arum a linmesa ed akadkauna diad sayan diskusyon.