Anto So Gagala na Propesiya?
SARAMAY mangibabagan saray nanduruman porma na panagdayew da so puyan a nanlapud mabiskeg-nen-toon lapuwan so mamidbir met a wala so maong tan mauges ed saray mabibiskeg a pakapanyari. Sayan panamidbir so mamalesa ed sarayan tepet: Kasin balang sakey ed sarayan porma na panagdayew so niparungtal a nanlapud maong a sengegan? Odino kasin sikara so walaan na mauges a lapuwan? Dinan so pinuyanan na tuan Dios?
Say Inmunan Relihyon
Say katooan so binidbir a bilang sakey a pamilya, tan saya so mipakna ed awaran na Biblia diad sakey ya orihinal a toon paris, si Adan tan Eva. Si Jehova, a Manamalsa, so angipakabat na inkasikato ed sikara. Imparungtal to ed si Adan tan Eva so betang da diad gagala to tan say tuan relasyon da ed sikato. Ginawa na Dios si Adan ya inmunan propeta to, responsablen mangipasa na madibinon puyan diad asawa to tan ed kaunoran diad saray ilalak to, salanti, amin a katooan.—Genesis 1:27-30; 2:15-17.
Saman lambengat so relihyon, say sakey a porma na panagdayew ya impuyan nen Jehova a Dios. Saman so nibalikas diad katutulok ed linawa na Dios. Anggaporay ritual, bagbagat, kapkapilya, odino orakulo a kinaukolan.
Pinmatnag So Palson Relihyon
Say inmunan sinmumpan “puyan” so nanlapud sakey ya anghel a nankaliktan a dayewen. Inyopresi to so kasandi ed tuan relihyon tan sinagyat to si Adan tan Eva a mikasakey ed sikato diad panagrebelde ed Amalsa ra. Saya so nanggawa ed sikato a Satanas, say sumusumpa ed si Jehova. Say “propesiya” to so nankunwarin mangiyopresi na dilin-determinasyon tan independensya a manlapud Dios. Imbes, saman so nansumpal diad panangaripen nen Satanas tan diad kasalanan, ya angitarok na ipapatey.—Genesis 3:1-19; Mateo 4:8-10; Roma 5:12.
Kabekta et si Satanas so akiulopan na arum iran rebelyoson angheles, odino dedemonyo. Andi-duaruwan saya so angipusnak na saray palson relihyoson kaisipan a tinmulong diad inkaderal na katooan. Diad saray agew nen Enos ya apo nen Adan, “agawa so inggapo na itawag ed ngaran nen Jehova.” Unong ed Targum of Palestine, saya so agawa a panagmodmora a kabiangan na panagtalintaon panagdayew ed saman a panaon.—Genesis 4:26; 6:1-8; 1 Pedro 3:19, 20; 2 Pedro 2:1-4.
Apunas so palson relihyon ed samay Delap ed agew nen Noe, ya atilak lambengat so tuan porma na panagdayew ya inagamil na propeta nen Jehova, si Noe. (Genesis 1:5-9, 13; 7:23; 2 Pedro 2:5) Saray dedemonyo so nansiansia, anggaman kuan, tan imparungtal da lamet so tilatilan propesiya tan saray relihyoson kaisipan. Saray kapolian nen Noe so dinagdag dan mamasanok ed si Jehova diad impangipaalagey ed syudad na Babel a bilang sentro na palson panagdayew. Balet ginutgut na Dios so lenguahe ra tan “intaytayak tora a manlapud’man diad amin a tapew na dalin.”—Genesis 11:1-9.
Anto so ibaga na amin na saya ed sikatayo? Sikatayon amin so kapolian nen Noe tan Adan. Sirin amin a kultura so walaan na parehon lapuwan tan impansiansia ra so arum iran kaisipan ed Dios a bilang biskeg na pikakabat ya akaliktar a nanlapud agew nen Noe. Balet sayan manunan kaisipan so dineral na saray palson relihyoson ideya ya atawir a nanlapud saraman so atateng ya ataytayak a nanlapud Babel (nipawil ed saginonor a Babilonia) ed amin a pasen na dalin. Saya so anengneng ed saray manpaparan ananito nipaakar ed saray espiritu na inaatey, diad panagdayew ed inatey laran atateng, tan diad panag-agamil na astrolohya, dibinasyon, tan panagsalamangka.—Daniel 2:1, 2.
Say Gagala na Propesiya
Kasin kabaliksan na saya a saray kaplesan-agew a relihyon so nibase lambengat ed saray kaisipan a tinawir ed kadaanan a panaon? Andi. Si Satanas tan saray dedemonyo so siansian mangipupuyan na palson propesiya diad pamalikdo tan pangapag ed katooan, pangutgut ed saray tuan puyan nipaakar ed Dios, tan pangiletneg na palson kaisipan tan relihyon. (1 Timoteo 4:1; 1 Juan 4:1-3; Apocalipsis 16:13-16) Ibabaga na Biblia: “Wala ra met so palson propeta ed limog na totoo, unong a wala ra so palson managbangat ed limog yo. Sarayan mismo so mareereen a mangitarok na makaderal iran sekta.”—2 Pedro 2:1.
Diad biek a dapag, impreserba nen Jehova so tuan relihyon a niiter ed Eden. Sikato so angarum na impormasyon a mamabiskeg na pikakabat tayo ed sikato tan say responsabilidad tayo diad kasusumpal na gagala to. Sirin saray tuan propesiya so mangipakabat ed katuaan nipaakar ed Dios, linawa to, tan diad saray estandarte to ed moral. Sikara so mamalinew ed relasyon na too ed sikato ta pian itarok to so katooan ya ompawil a mitukoyan ed gagala to, mangitonton ed sigpot a kasumpalan to.—Isaias 1:18-20; 2:1-5; 55:8-11.
Diad gapo na impanrebelde na too, sinalita nen Jehova so sakey a propesiyan angiter na ilalo ed saray ilalak nen Adan tan Eva. Imparungtal to a wala so sakey a manangiliktar, sakey a “bini,” a maneral ed si Satanas tan saray ilalak to. (Genesis 3:15) Saray saginonor a propesiya so ontulong a mangipabidbir ed sayan nisipan a “bini,” odino “nilanaan a sakey” na Dios, tan imparungtal to a sikato so onkiwas ed manunan betang diad kasumpalan na saray gagala na Dios.—Salmo 2:2; 45:7; Isaias 61:1.
Sirin say manunan getma na propesiya et say pangipakabat ed saray gagala na Dios tan say “nilanaan a sakey,” odino “Kristo,” a diad panamegley to et sikara so nasumpal. Lapud sayan sakey a pinili so apaneknekan a si Jesus, imbaga na anghel nen Jehova: “Dayewen so Dios; diad pangitarok na pantasi ed si Jesus so mamuyan [odino, so espiritu na] ed panagpropesiya.” (Apocalipsis 19:10) Duaran katuaan so ginawan malinew na sayan deklarasyon. Ununa, anggapo so ahente na tuan propesiya a mankerew na kadayew lapud say tuan panagdayew so kayarian lambengat nen Jehova a Dios. (Mateo 4:4; Juan 4:23, 24) Komadua, say ultimon getma na amin a tuan propesiya et say pangiparungtal ed saray nagawgawa tan katuaan a misiglaotan ed si Jesus. Saya so mamibidbir ed manunan betang ya impabtang nen Jehova ed sikato diad kasumpalan na gagala To ed panamasantos ed ngaran To tan say pangipawil ed dalin diad manepeg a pasen to ed oksuyan To ed saray bengabengatla.—Juan 14:6; Colosas 1:19, 20.
Nisengeg ed sayan rason, saray apuyanan a mensahen nanlapud Dios so mangituturon manuna ed si Jesus. Say interon espiritu, odino getma tan gagala, na ontan a tuan propesiya et say pangitarok na pantasi ed sikato. Nagkalalo ni, say pakasumpalan na saray propesiya ed si Jesus so mananda ed saratan ya amin a tua. Saya no akin ya ibabaga na Biblia a “say katuaan so sinmabi ed panamegley nen Jesu-Kristo.” “Ta anggaman panon karakel iray sipasipan na Dios, sikara so nagmaliw ya On diad panamegley to.”—Juan 1:17; 2 Corinto 1:20; Gawa 10:43; 28:23.
Akin a diad Saray Israelitas?
Inggapo nen Jehova so “pantasi [to] ed si Jesus” diad panamegley na propesiya to nipaakar ed nisipan a “bini.” Saginonor et imparungtal na Dios so mangaraldalin a linya na kapolian na “bini” a bilang diad panamegley nen Noe, Sem, Abraham, Isaac (aliwan Ismael), tan Jacob. Sarayan lalaki so nansiansian matoor ed tuan relihyon, a pinaneknekan da so inkasikaran matoor a propeta nen Jehova legan ya amin na saray nasyones so dineral na panagdayew ed saray palson dirios. (Genesis 6:9; 22:15-18; Hebreos 11:8-10, 16) Say linya na kapolian so nantultuloy ed panamegley na saray ilalak na sarayan lalaki—say nasyon na Israel tan nagkalautla ed pamilya nen David, say sankaprominentian ya ari ed Israel.—2 Samuel 7:12-16.
Diad impangipanengneng no akin a pinili to so Israel, inkuan nen Jehova: “Aliwan lapud sika so sankarakelan ed amin a totoo . . . [balet] lapud pananumpal mo ed nibalikas a sipan . . . diad saray atateng mo,” si Abraham, Isaac, tan Jacob. (Deuteronomio 7:6-8; 29:13) Mapatnag, sakey lambengat a nasyon so makapawala ed linya na kapolian a para ed nisipan a “bini.” Anggaman kuan, say tuan relihyon so agnigeter ed saray ed saray Israelitas. Manwarin say puyan ed katuaan so agniiter ed arum iran nasyones, saray sinansakey a nanlapud limog da so nayarin makapiulop ed Israel diad panagdayew, tan arum ed saraya so angisakup ni ingen ed linya na kapolian na “bini.” (Numeros 9:14; Ruth 4:10-22; Mateo 1:5, 6) Saray nambibiigan a puyan a niiter a dingan na saray linya na nasyonal odino rasa so mamasengeg lambengat na babaleg iran relihyoson kaapag-apag, bangta linawa nen Jehova so pamakasakey ed katooan diad tuan panagdayew.—Genesis 22:18; Efeso 1:8-10; 2:11-16.
Saray nakakaukolan na Dios so pareho ed amin a rasa. Lapud sikato so agmanguman ed saray estandarte to ed moral tan gagala, saray impideneng to ed Israel so mangipanengneng no panon so pideneng to ed saray mipadparan kipapasen ed anggan anton panaon. (Malaquias 3:6) Sirin say Israel so nanserbin sakey a modelo ed amin a nasyones. Diad panamegley to et imparungtal na Dios iray gungguna na tuan panagdayew tan say kakulangkulangan na saray palson okulto. Legan a saray Israelitas so nansiansian matoor ed sikato, sikara so sinalimbengan tan benindisyonan to. Sanen sikara so inmarap ed saray palson dirios na arum a nasyones, sikara so naplag ed leksab na panamairap na saraman a nasyones, unong a singa impasakbay nen Jehova ed sikara.—Deuteronomio 30:15-20; Daniel 9:2-14.
Say Israel so nanserbi met a bilang sakey a mapropetikon modelo, tan si David so nagmaliw a mapropetikon pigura nen Jesus, ya anawir na sipanan na Dios ed Panarian diad si David. (1 Awaran 17:11, 14; Lucas 1:32) Say Ganggan a niiter ed Israel, a tekep na saray bagbagat tan inkasaserdote to, so angiyanino ed bagat nen Jesus tan angituro ed mangatatawen a Panarian tan inkasaserdote to. Say Ganggan sirin so nagmaliw a “managbangat a mangitonton ed si Kristo.”—Galacia 3:19, 24; Gawa 2:25-36; Hebreos 10:1-10; Apocalipsis 20:4-6.
Say Libro na Tuan Propesiya
Sayan makanan impormasyon so agnipreserban susto diad panamegley na insangin tradisyon odino diad nibiig iran puyan ed nanduruman nasyones. Say sankaabigan a paraan na kipreserba tan kipasabi ed amin a nasyones et say insulat a kuritan. Tan say Biblia so mamano ed sayan betang. Sikato lambengat so nankarga ed saray apuyanan a puyan na Dios tan ipipreserba to so historiko tan mapropetikon awaran na saray impideneng to ed totoo. Satan lambengat so mangituturo ed si Jesu-Kristo a bilang Ahente na Dios a para ed kilalaban tan kinarga to so unor iran propesiya nipaakar ed arapen a gawaen na Mesianicon kimey to. Saya sirin so kumpleton apuyanan a nisulat a Salita na Dios.—Roma 15:4; 1 Corinto 10:11; 2 Pedro 1:20, 21.
Nanlapulad inkakumpleto na Biblia, sirin saray angiparungtal ed balon “propesiya,” relihyon, tan sektas so ag-impuyan na Dios. Saray tuan propesiya so agniiter diad pangiparungtal ed saray balon relihyon. Impansiansia ra so sakey a tuan relihyon a peles tan impaamta ra so arapen a kasumpalan na gagala nen Jehova. Say kasumpalan da so mangiter na prueba na nikadkaduman inka-Dios to tan pakayari to, a mangipapanengneng a sikato lambengat so makayarin mangipasakbay ed saray nagawa diad dakel iran siglos ed sakbay to tan andi-lingon sikara so nagawa.—Isaias 41:21-26; 46:9-11.
Sirin amin a manpirawat a mikabisado ed tuan propesiya tan mangagamil na tuan relihyon so nakaukolan ya onarap ed Biblia. Sikato lambengat so libro na propesiya na Dios—say kumpleton mensahe to ed katooan.—2 Timoteo 3:16, 17.
[Saray Litrato ed pahina 7]
Linya na kapolian na insipan a “bini”
Noe
Sem
Abraham
Isaac
Jacob
David
Jesus