Kapitulo 15

Panangapag ed Totoo Diad Salisalan ed Panarian

1. Akin a say panangapag diad salisalan ed Panarian so maatap a pamaakaran diad balang sakey ed sikatayo?

¹ Balang sakey ed sikatayo so nidunget ed sankakanaan a desisyon. Say walad salisalan et say awawey tayo ed Mesianicon Panarian nen Jehova diad saray lima nen Jesu-Kristo. Diad sayan salisalan et nagagawa so kakaapag na totoo ed amin a nasyones. Diad letnegan na kada kurang na kiwas na sakey a too et sikato so niniiyan diad sakey ed saray duaran grupo. Sakey lambengat ed sarayan grupo so makaliktar ed onsasabin sankamundoan a kadederal.​—Mateo 24:40, 41.

2. (a) Panon a sayan Mesianicon Panarian so nisiglaot ed salisalan diad inkasoberano nen Jehova? (b) Anto so magano lan pagmaliwan na Panarian, tan sirin anto so seryoson nonoten tayo?

² Introno la nen Jehova so alanaan ya Anak to, say Mesias to, diad katawenan. Diad impanampot na “aturon panaon na nasyones” nen 1914, inter na Dios ed si Jesu-Kristo iray nasyones a bilang tawir to​—amin a dalin a bilang kayarian to. (Salmo 2:6, 8) Say Mesianicon gobierno, tekep na nilanaan nen Jehova ya ari a wala ed trono, so paraan na Dios diad pangisumpal to ed dilin makabat tan maaron gagala to nipaakar ed dalin. Say awawey yo ed Panarian, sirin, so mangipatnag no panon so liknaan yo nipaakar ed sankatalbaan ya inkasoberano nen Jehova. Agla mabayag et satan a Mesianicon Panarian so “manmekmek tan mangitarok ed anggaan” ed interon mapulitikan sistema a manodomina natan ed saray kurang na too tan magmaliw a sakey a gobierno ed sankadalinan. (Daniel 2:44; Apocalipsis 19:11-21) Sano gawaen ton pasimbaloen so dalin ed sakey a Paraiso, iner so kawalaan mo? Kasin sakey ka ed saraman so inwanwan to diad panggayaga ed ayadyarin bilay? Imbaga nen Jesus so letnegan a nayarin pibiangan na saray totoon manbibilay natan ed ontan ya iilaloan.

Say Ari tan “Saray Agagi” To

3. Diad Mateo 25:31-33, anto so dedeskribien nen Jesus?

³ Sanen ibabaga to’d saray apostoles to so nipaakar “ed konklusyon na sistema na bengabengatla,” inusar nen Jesus so pigaran parabolo, odino ilustrasyon. Diad unor et inkuanto: “Sano say Anak na too so onsabi ed gloria to, tan amin na saray angheles so kaiba to, saman la sikato so onyurong ed maglorian trono to. Tan amin na saray nasyones so natipon ed arap to, tan pambibiiganen toray totoo ed balang sinansakey, unong a say pastol et ibiig to so karnero ed saray kanding. Tan ipasen to so karnero ed nikawanan to, balet saray kanding diad nikawigi to.”​—Mateo 24:3; 25:31-33.

4. (a) Panon a sayan parabolo so nisalaysay ed Daniel 7:13, 14? (b) Antoran tepet so nayarin makagunggunan itepet tayo ed inkasikatayo?

⁴ Imanoen a sasalitaen nen Jesus dia so inkasikato a bilang “say Anak na too,” a singa naulit-ulit ya imbaga ton asasakbay ed sayan propesiya. (Mateo 24:27, 30, 37, 39, 44) Say impangusar to ed sayan balikas so sakey a panonot ed mapropetikon pasingawey a niiter ed si Daniel ed ngalngalin anemiran siglos ed asasakbay, a nipaakar ed satan et insulat na propeta: “Nantultuloy ya anengneng ko ed saray pasingawey ed labi, tan nia! diad saray lurem na katawenan et wala so sakey a singa anak na too [si Jesu-Kristo] ya onsasabi; tan diad Kadaanan na saray Agew [si Jehova] so sinmabi, tan sikato so inyasingger da ed arap na satan a Sakey. Tan diad sikato et niiter so pananguley tan karlangan tan panarian, pian saray totoo, nasyones tan pansasalita so manlingkor ya amin ed sikato. Say pananguley to so magnayon ya agnapaso, tan say panarian to so sakey ya agnitarok ed kadederal.” (Daniel 7:13, 14; Hebreos 2:5-8) Satan a pananguley ya autoridad so niiter la ed si Jesu-Kristo. Nanlapulad 1914 et sikato so manuuley a manlapud mangatatawen a trono to. Panon so inkiwas mon personal ed pananguley to? Kasin say dalan na bilay mo so mangiter na ebidensya ed manepeg a panamagalang ed sayan Sakey a ginawa na Dios a mismo a Manuley ed sankadalinan?

5. Panon nen Kristo a determinaen so inkapuro na pangibabaga na sakey na debosyon to ed sikato bilang Ari?

⁵ Saray salita lambengat so aliwan magenap. Mainomay ed sakey a too so pangibaga a sikato so manisia ed Panarian na Dios tan inaro to si Jesu-Kristo. Balet diad parabolo to ed karnero tan kanding et impanengneng nen Jesus a, lapud sikato so agnanengneng ed katawenan, say manunan sengegan ya imanoen to diad panitermina ed inkapuro na pangibabaga na sakey a too et say tratamento ed saraman so mangirerepresenta ed si Kristo diad dalin, “saray agagi” to.​—Mateo 25:40, 45.

6. Siopa irayan “agagi” nen Kristo?

⁶ Siopa iraya? Saramay pinili na Dios a manlapud limog na katooan a kaiban mananawir nen Kristo ed mangatatawen a Panarian. Saraya so walaan na bilang a 144,000, a wala lambengat so nakdaan ni a wadia ed dalin. (Apocalipsis 14:1, 4) Lapud sikara so “nianak lamet” ed panamegley na inkiwas na espiritu na Dios, sikara so ananak na Dios, tan nisengeg ed satan a rason et sikara so asalita ed Kasulatan a bilang “agagi” nen Jesu-Kristo. (Juan 3:3; Hebreos 2:10, 11) Ibibilang nen Jesus no anto so gagawaen na totoo et sarayan “agagi,” anggan “say kamelagan” ed sikara, a singa nagagawa ed sikato.

7. Akin a saray “agagi” nen Kristo so aliwan membro na saray iglesia na Kakristianoan?

⁷ Iner so kawalaan na sarayan “agagi” nen Kristo ed agew tayo? Kasin sikara so naromog mo diad limog na saray mimimisa ed Kakristianoan? Bueno, anto so imbaga nen Jesus nipaakar ed saray tuan patumbok to? “Sikara so aliwan kabiangan na mundo, a singa unong a siak so aliwan kabiangan na mundo.” (Juan 17:16) Kasin satan so peteg a nibaga ed saray iglesia na Kakristianoan tan saray membro ra? Diad malaknab a sukat, saray awawey da tan kondukta so mangisisindag lambengat ed saraman so kaslakan ed kabiangan na mundo a pakaromogan ed sikara. Say pibibiang na saray iglesia ed pulitika so bantog. Sanen titibukelen so United Nations Charter nen 1945, saray delegasyon na Protestante, Katoliko tan Judio so wadman a bilang panagkonsultaan. Diad agano niran taon, saray papa na Roma so angidayew ed Nasyones Unidas a bilang “say unor ya ilalo ed pankakasakey tan kareenan” tan “say supremon entablado na kareenan tan inkahustisya.” Say Sankamundoan a Konsilyo na saray Iglesia, ya akimembroan na 300 a relihyoson grupo, so angiter ni ingen na saray pundon usaren diad pangipakurang ed saray mapulitikan rebolusyon. Ingen, si Jesu-Kristo so angibaga ed Romanon gobernador a si Pilato: “Say panarian ko so aliwan kabiangan na sayan mundo.”​—Juan 18:36.

8. (a) Anton so tinmmulong ed sika a makabidbir ed saray “agagi” nen Kristo? (b) Panon kaimportante ed sikara so kimey na panangipulong ed Panarian?

⁸ Ipanengneng na katuaan a sakey lambengat a grupo so angala na mabiskeg a talindeg diad dapag na Panarian, ya idedeboto ra so mabiskeg a sagpot da diad panangiyabawag ed satan diad sankamundoan, legan a papaliisan day pibiang ed anggan anton nengneng na mapulitikan kurang na mundo. Sayan grupo et saray Tasi nen Jehova. Diad limog da et naromog so nakekeraan ed saray “agagi” nen Kristo. Diad pangalig ed Katawan da tan ed saray apostoles to, indeboto ra so inkasikara diad iyaakar ed saray syudad tan diad kabkaabungan, ya ipapaliwawa ed totoo so maong a balita na Panarian na Dios. (Lucas 8:1; Gawa 8:12; 19:8; 20:20, 25) Nen 1919, ed sakey a kumbension na saray Tasi nen Jehova (a kabat nensaman ya International Bible Students) diad Cedar Point, Ohio, saray kumbensionistas so apanonotan a say “kimey [da] et say panangiyabawag ed onsasabin maglorian panarian na Mesias.” Diad sakey a mipadparan kumbension nen 1922 et saya lamet so nidanet, tan sikara so apaseseg: “Iyabawag, iyabawag, iyabawag, so Ari tan say panarian to.” Diad pangusar ed amin a paraan, et sikara so nantultuloy a manggagawa ed satan diad sankamundoan ya anggad sayan agew tayo. (Mateo 24:14) Nisengeg ed kimey da, say salisalan ed Panarian so nipresenta ed sika. Anto so gagawaen mo ed satan?

‘Satan So Ginawa Yo ed Sakey ed Saray Agagik’

9. (a) Panoy kisiglaot na saray sirkumstansya ya adeskribe ed Mateo 25:35-40 diad ministeryo ed Panarian? (b) Diad anton subok so nidungetan sirin na saray totoo ed amin a pasen?

⁹ Say alanaan-na-espiritun “agagi” nen Kristo so dinmalan ed mabiskeg iran subok lapud makpel a panangipulong ed Panarian na Dios, legan a pansiasiansiaen da so inkibiig da a manlapud mundo. (Juan 15:19, 21) Arum so akasagmak na eras, inkapegaan tan kakulangan na kawes. Dakel so anaynan ed saray kaabungan da a nanlingkor ed saray pasen a diman et sikara so sankaili. Legan a susumpalen da so ministeryo ra, sikara so anagmak na sakit tan inkipangawpangaw, anggan patey ni ingen ed lima na saray managpasegsegang. Sarayan eksperiensia na “agagi” nen Kristo so nanggawa ed totoo na amin a nasyones a nidunget ed sakey a subok. Kasin say aro ed Dios tan si Kristo so anagdag ed sikaran ontulong ed sarayan embahador na mangatatawen a Panarian? (Mateo 25:35-40; ipareng so 2 Corinto 5:20.) Aliwan manunan atooan ya inkamapangasi noagta tulong a niiter lapud sikara so kayarian nen Kristo so imbilang na Ari a singa ginawa ed sikato a personal.​—Marcos 9:41; Mateo 10:42.

10. (a) Akin a say protestan impatalindeg na saray “kanding” so aliwan makana? (b) Diad piduma, anton talindeg so inala na saray “karnero”?

¹⁰ Saramay mangisasaklang na ontan a tulong so impareng nen Jesus ed karnero. Saray totoon onsaew a mangiter na tulong ed saray “agagi” to so atukoy ed parabolo nen Jesus a bilang kanding. Saray “kanding” so nayarin manprotesta ya agda anengneng si Jesu-Kristo. Balet sikato so angibaki ed saray ariripen to ed sikara, tan saraya so malinlinew ya angikabat na inkasikara. Amin na saray “kanding” so nayarin mamasegsegang ed saray “agagi” nen Kristo, balet sikara so agpinakiwas na aro ed mangatatawen ya Ari pian ontulong ed saray representante to. (Mateo 25:41-45) Sikara so pinmeket ed mundo a si Satanas a Diablo so agnanengneng a manuley to. Saray “karnero” so ag-akanengneng met a literal ed si Kristo. Balet, diad piduma ed saray “kanding,” saraya so amaneknek a sikara so ag-antakot ya angipabidbir na inkasikara ed saray “agagi” nen Kristo, a sarayan manangiyabawag na Panarian na Dios so sinuportaan da. Saray “karnero” so mikabat ed gagawaen da, tan sikara so nanggawa na positibon impanpili diad pabor na Panarian na Dios ed panamegley nen Jesu-Kristo. Sikato no akin a say kiwas da et magalgalang diad pakanengneng na Ari.

11. (a) Lapud dakel a totoo so agbalot akaabet ed sakey ed saray “agagi” nen Kristo, panon so kaukom da diad letnegan ya adeskribe dia? (b) Anto so mamaseguro ed italona na sayan kimey?

¹¹ Panon, anggaman kuan, a posibli ed totoo ed amin a nasyones so kaukom ed sayan letnegan? Agta imbaga nen Jesus a saray “agagi” to, a pangiteran na Ama ed mangatatawen a Panarian, et “melag a pulok” lambengat? (Lucas 12:32) Dakel a totoo so agbalot personal ya akapiabet diad sakey ed sikara. Tua, balet saray “agagi” nen Kristo so manibukel na pugnel na internasyonal a muyongan na saray Tasi nen Jehova. Diad panamegley na sayan organisadon totoo, say makanan salisalan ed Panarian so nipipresenta ed totoo diad amin a pasen. Amin na saya so ididirihe nen Kristo a mismo a manlapud mangatatawen a trono to tan diad tulong na saray angheles. Diad 200 a daldalin tan pulpulo ed interon globo​—anggan diad saray pasen a sinebelan na gobierno so panangipulong ed Panarian​—say panangapag a kimey so agnaamper ya onaabante, tan sakey a baleg ya ulop na totoo so mangaala na talindeg da diad dapag na Panarian na Dios.

12. (a) Panon so pangipalinew na saray “karnero” ed talindeg ya inala ra? (b) Akin a satan so gawaen da?

¹² Panon so pangipapanengneng da ed saya? Diad pikikimey da ed saray alanaan, maseseg a mangiyaabawag a say Panarian so manuuley la tan agla mabayag et itarok to la ed anggaan so minumundon sistema. Sirin maparungtal ya inkabat da so inkasikara ya inala ra so talindeg diad dapag na Mesianicon Panarian nen Jehova tan sikara so simamaaron mamapaseseg ed arum a manggawa met na ontan. Mas nen say pilalek ed kililiktar so amakiwas ed sayan maptek-impanpuson totoo. Peteg ya inaro ra si Jehova tan saray dalan to. Say probisyon na Panarian to a dingan nen Kristo a bilang Ari so amano ed kapusoan da na pisasalamat, tan kaliktan da so arum a mangungguna ed satan. Kanian sikara so mibibiang ed sankalaknaban a nayarian da diad panangiter na pantasi ed Panarian. A singa imbilin nen Jesus ed saray babangatan to, ‘aanapen da ya ununa so panarian,’ ya agda abuloyan so kapagaan ed materyal a nakakaukolan a mangitulak ed satan diad komaduan pasen. Diad onia et sikara so nidasig ed engranden bendisyon.​—Mateo 6:31-33.

Kasin “Tawiren [Yo] So Panarian”?

13. (a) Nanlapulad kapigan a walad kanonotan nen Jehova so sakey a tumang a para ed sarayan malakarneron totoo? (b) Anto so kabaliksan to ed sikara na “panawir ed panarian”?

¹³ Say nitarya ed saramay mamaneknek a sikara so “karnero” ed parabolo nen Jesus so peteg a makapakelaw. Manlapud mangatatawen a trono to, ibabaga to ed sikara: “Galidia, sikayon benindito nen Amak, tawiren yo so panarian ya imparaan ed sikayo a nanlapud inkiletneg na mundo.” (Mateo 25:34) Nanlapulad “inkiletneg na mundo,” diad panaon sanen si Adan tan Eva so inmunan amawala na saray anak a makayarin mangungguna ed probisyon na Dios a manondon ed katooan, unong ed Genesis 3:15, 16, walad kaisipan nen Jehova so sakey a tumang a para ed sarayan “karnero.” (Ipareng so Lucas 11:50, 51.) Wala ed sikara so pankanawnawan manggayaga ed nipawil a Paraiso diad inkayadyari ed atooan a bilay ya abalang nen Adan. Say ‘panawir da ed panarian’ so agmankabaliksan a sikara so onla ed tawen, lapud ipapanengneng na parabolo a saray “karnero” so aliwan pareho ed saraman so “agagi” nen Ari, a mananawir ed mangatatawen a Panarian. Kanian saray “karnero” et saray mangaraldalin ya uuleyan na satan a mangatatawen a gobierno. Ibabaga na Liddel and Scott’s Greek-English Lexicon a say Griegon termino a basileiʹa, a nipatalos dia a “panarian,” so natalosan ed pantebek a passive, a kabaliksan to so “kauleyan na [sakey] ya ari.” Sikatoyan pantalos so mapatnag ya onaaplika dia.

14. Panoy piduma na panangukom a nidapo ed saray “kanding” diad tawir na saray “karnero”?

¹⁴ Sano saray “kanding” so nibantak ed “andi-anggaan a kapegpeg,” diad kadederal a nagnap a singano diad apuy, saray “karnero” so salimbengan na Mesianicon Ari. (Mateo 25:41, 46; ipareng so Apocalipsis 21:8.) Anggapo la so pankaukolan ya ipatey, sikara so nipreserba ed baleg a kairapan ya onloob ed maglorian “balon dalin” a bulos a manlapud mauges ya impluensya nen Satanas tan say marelmeng a sistema na bengabengatla to. Satan a bendisyon so kayarian da lapud sikara so manggagawa na dugan desisyon diad salisalan ed Panarian natan.

15. (a) Panoy pikabat tayo a sayan parabolo so onaplika natan? (b) Sirin, anton kimey so sankaimportantian?

¹⁵ Seryoson lingo so pangikatunongan a, lapud say kadederal na saray “kanding” so andi-anggaan, say parabolo so ag-onaplika ya anggan diad saginonor, angangko diad kaleganan na Milenyon Uley nen Kristo. Diad kasuniyan, sayan parabolo so inter nen Jesus a bilang kabiangan na tanda “ed konklusyon na sistema na bengabengatla.” (Mateo 24:3) Say dedeskribien to so nagawa kayari na inkitrono to noagta ontan met a legan a saray “agagi” to so wala ni ed laman tan makakasagmak na kairapan a binitla to. Sikatayo so manbibilay ed satan a panaon, tan satan so maples lan nanaupot. Agaylan makana, sirin, so aglabatla pangiteen na nagnap a talek ed Panarian noagta tulongan so arum a makanengneng ed kaimportantian na panggawa na ontan natan.