Kapitulo 7
No Anto so Naaralan Tayo a Manlapud Panangiyabuloy na Dios ed Mauges
1. (a) No tampol a dinusa nen Jehova iray rebelde ed Eden, panon komon so impangapekta na ontan ed sikatayo? (b) Imbes, anton maaron probisyon so ginawa nen Jehova ed sikatayo?
ANGGAMAN ed saray kairapan a nayarin ondateng ed bilay tayo, say inkianak tayo so aliwan ag-inkahustisya ed biang na Dios. Impalangkap to ed inmunan totoo so inkayadyari tan inikdan tora na Paraison ayaman da. No sikara so dinusa ton tampol kayari na impanrebelde ra, anggapo komon so rasa na too a singa kabat tayo a tekep na saray sakit, irap tan krimen. Sipapangasi, anggaman kuan, inabuloyan nen Jehova si Adan tan Eva a mamawala na sakey a pamilya sakbay na impatey da, anggaman saraya so manawir na ag-inkayadyari. Diad panamegley nen Kristo intarya to ed saray kapolian nen Adan a mangaagamil na pananisia a nawalaan na samay imbalang nen Adan—maandon bilay diad leksab na kipapasen a manggawan posibli ed sankabalgan a panggayaga ed bilay.—Deuteronomio 32:4, 5; Juan 10:10.
2. Kasin amin na saya so agawa lambengat a para ed kilalaban tayo?
2 Saray gungguna na saya ed sikatayo a personal so agnasukat. Balet manlapud kuritan et naaralan tayo ya asaglawi so bengatlan mas lalon makabaliksan nen say personal a kilalaban.
Nisesengeg ed Baleg a Ngaran To
3. Anto so nipupusta nipaakar ed kasumpalan na gagala nen Jehova a para ed dalin tan katooan?
3 Say ngaran nen Jehova, say kagalangan to a bilang Sankatalbaan a Soberano tan say Dios na katuaan, so asaglawi diad kasumpalan na gagala to nipaakar ed dalin tan katooan. Lapud talindeg nen Jehova, say deen tan pankaabiganan na amin a talba so mankaukolan a say ngaran to so naikdan na sigpot a respeton kanepegan to tan amin a katooan so ontulok ed sikato.
4. Anto so eksakton insakup na satan a gagala?
4 Kayari na impamalsa to ed si Adan tan Eva, sikara so inikdan na kimey a sumpalen. Pinabitar to a say gagala to so aliwan pamatulok lambengat ed amin a dalin, pian inatnat iray ketegan na Paraiso, noagta pian kargaan to na too ed saray kapolian na inmunan laki tan bii, si Adan tan Eva. (Genesis 1:28) Kasin sayan gagala so onsaew lapud impankasalanan da, tekep na nansumpalan a pakabalawan ed ngaran na Dios?
5. (a) Unong ed Genesis 2:17, kapigan so impatey na siopaman a mangan ed kiew a pakaamtaan na maong tan mauges? (b) Panon so impanumpal nen Jehova ed satan, legan a rerespetoen to met so gagala to nipaakar ed kakargaan na dalin na too?
5 Pinasakbayan nen Jehova si Adan a no sikato so situtungangan mangan ed kiew a pakaamtaan na maong tan mauges et sikato so peteg ya ompatey “diad agew” a pangan to. (Genesis 2:17) Tua ed salita na Dios, diad mismon agew ya impankasalanan nen Adan et si Jehova so akipalinewan ed saray nankasalanan tan imbitla to so sentensyan patey. Say dusa so agnapaliisan. Tekep na inkaalas, manlapud punto de bista na Dios, si Adan tan Eva so inatey ed saman ya agew. (Ipareng so Lucas 20:37, 38.) Balet ta pian nitarok to so dilin imbalikas ton gagala nipaakar ed pamarakel na too ed dalin, sikara so inabuloyan nen Jehova a mamawala na sakey a pamilya sakbay a sikara so literal ya ompatey. Anggaman kuan, manlapud punto de bista na panmoria na Dios ed 1,000 taon a bilang sakey ya agew, sanen angangga so bilay nen Adan ed 930 taon, saman so diad loob na sakey ya “agew.” (Genesis 5:3-5; ipareng so Salmo 90:4; 2 Pedro 3:8.) Sirin say inkamatua nen Jehova so nitandoro no nipaakar ed panaon sano nidapo so dusa, tan say gagala ton pamano ed dalin na totoo ed saray ilalak nen Adan so agnaamper. Ingen kabaliksan to a, diad sakey a panaon, saray makasalanan a totoo so naabuloyan a manbilay.
6, 7. (a) Anto so ipanengneng na Exodo 9:15, 16 ed no akin ya inabuloyan nen Jehova so karelmengan a mantultuloy ed sakey a panaon? (b) Diad kipapasen nen Paraon, panon so inkipanengneng na pakayari nen Jehova tan panon so inkipaamta na ngaran to? (c) Sirin anto so pansumpalan diad panampot na marelmeng a sistema?
6 Say imbaga nen Jehova ed manuley na Ehipto ed saray agew nen Moises so malaknab a mangipanengneng no akin a say marelmeng so inabuloyan na Dios a mantultuloy ed sakey a panaon. Nen sinebelan nen Paraon so itaynan na saray anak na Israel a manlapud Ehipto, sikato so agtampol kinabil nen Jehova. Samploran bakbak so nibasig ed dalin, ya angipatnag na pakayari nen Jehova diad makapakelaw tan nanduruman dalan. Sanen ipapasakbay to so komapito, imbaga nen Jehova ed si Paraon a magmainomay to komon a pinunas si Paraon tan say katooan to a manlapud dalin. “Balet, diad tua,” kuan nen Jehova, “nisengeg ed saya et sika so impansiansiak, nisengeg ed pangipanengneng ko na pakayarik ed sika tan pian say ngaran ko so niyabawag ed amin a dalin.”—Exodo 9:15, 16.
7 Sanen inliktar nen Jehova so Israel, say ngaran to so peteg ya akabatan a malaknab. Natan, ngalngalin 3,500 taon ed saginonor, say ginawa to so ag-alingwanan. Aliwa lambengat a say personal a ngaran nen Jehova so niyabawag noagta ontan met ed katuaan nipaakar ed Sakey a mangaakbibit ed satan a ngaran. Sayan niletneg a kagalangan nen Jehova bilang sakey a Dios a manusumpal ed saray sipanan to tan onkikiwas nisesengeg ed ariripen to. Indemostra to a lapud makapanyarin-amin a pakayari to et anggapo so makaamper ed gagala to. Lalon makapasagyat et say manasingger a kadederal na interon marelmeng a sistema, nanengneng tan agnanengneng. Satan a panangipatnag na makapanyarin-amin a pakayari tan say glorian itarok to ed ngaran nen Jehova so agbalot nalingwanan ed sankatalbaan ya awaran. Saray gungguna to so agmangangga!—Ezequiel 38:23; Apocalipsis 19:1, 2.
‘O Agaylan Kaaralman na Kakabatan na Dios!’
8. Anto niran kaaruman a katuaan so impaseseg nen Pablo ed sikatayo ya imanoen?
8 Diad sulat to ed saray taga Roma, pinatalindeg nen apostol Pablo so tepet: “Kasin wala so ag-inkaalas ed Dios?” Tan insan inebatan to diad impangidanet to ed panangasi na Dios tan diad impanukoy to ed imbaga nen Jehova ed si Paraon. Impanonot to met so katuaan a sikatayon totoo so singa pitek ed lima na domadamili. Kasin say pitek so makapanreklamo nipaakar ed kausar? Inyarum nen Pablo: “No, natan, say Dios, so anggaman walaan na linawan mangipatnag na sanok to tan mangipaamta ed pakayari to, et inabuloyan to ed andukey-a-panangitepel iray baseha na sanok ya agawan manepeg ed kadederal, ta pian komon nakabatan so saray kayamanan na gloria to ed saray baseha na panangasi, ya imparaan ton akauna a para ed gloria, salanti, sikatayo, a tinawag to ya aliwan nanlapud limog na saray Judios labat noagta ontan met ed limog na nasyones, anto so nipaakar ed satan?”—Roma 9:14-24.
9. (a) Sioparay “baseha na sanok ya agawan manepeg ed kadederal”? (b) Akin ya impanengneng nen Jehova so baleg ya andukey-a-panangitepel diad arap na panagbusol da, tan panon a say pinal a pansumpalan so diad pankaabigan na saraman so mangaro ed sikato?
9 Nanlapulad mapropetikon balikas nen Jehova a nikurit ed Genesis 3:15, si Satanas tan say bini to so nagmaliw iran “baseha na sanok ya agawan manepeg ed kadederal.” Kaleganan na amin na satan a panaon et inagamil nen Jehova so andukey-a-panangitepel. Saray marelmeng so nanbalaw ed saray dalan to; pinasegsegang daray ariripen to, pinatey da ni ingen so Anak to. Balet ta impanengneng nen Jehova so baleg a panangitepel, diad maandon pankaabigan na ariripen to. Amin a pinalsa so walaan na pankanawnawan makanengneng ed makaderal a resulta na itutungangan sumpad Dios. Ontan met, say impatey so angitarya na paraan ed kiliktar na matulok a katooan tan diad ‘kaderal na saray kimey na Diablo.’—1 Juan 3:8; Hebreos 2:14, 15.
10. Akin ya intultuloy nen Jehova ya aabuloyan so marelmeng legan na apalabas a 1,900 tayo?
10 Kaleganan na masulok a 1,900 taon nanlapulad inkioli nen Jesus inabuloyan ni nen Jehova iray “baseha na sanok,” a nipaleen so kadederal da. Akin? Lapud ipaparaan to so segundaryon kabiangan na bini na bii, saraman so mikasakey ed si Jesu-Kristo ed mangatatawen a Panarian. (Galacia 3:29) Saraya, 144,000 ed bilang, so “baseha na panangasi” a sinalita nen apostol Pablo. Ununa, saray sinansakey a manlapud limog na saray Judios so naimbitaan a manibukel ed sayan klase. Insan saray agalsiman a Samaritano so niarum tan, diad kaunoran, et saray totoo na Gentil a nasyones. Diad ontan lan andukey-a-panangitepel et agawaan nen Jehova so gagala to, ya agto papaskaren so siopaman a manserbi ed sikato, noagta inter toray engranden bendisyon ed saraman so onkiwas a tekep na panamabli ed saray maaron probisyon to. Natan say panagparaan ed satan a mangatatawen a klase so magano lan nasumpal.
11. Anton arum a grupo so natan et mangugungguna ed andukey-a-panangitepel nen Jehova?
11 Balet anto so nipaakar ed saray manaayam ed dalin? Diad inggeter na Dios a panaon binilbilyon so napaoli a bilang mangaraldalin ya uuleyan na Panarian. Ontan met, nagkalautla a nanlapud 1935 K.P. a say andukey-a-panangitepel nen Jehova so nanggawan posibli ed katipon na “baleg ya ulop” a nanlapud amin a nasyones nisesengeg ed kilalaban da.—Apocalipsis 7:9, 10; Juan 10:16.
12. (a) Bilang nansumpalan, anto so naaralan tayo nipaakar ed si Jehova a mismo? (b) Panon so ikiwas yo ed no panon so pangiimaton nen Jehova ed sarayan pamaakaran?
12 Kasin wala so anggan anton ag-inkahustisya ed amin na saya? Peteg ya anggapo! No impaleen ni na Dios so kaderal na marelmeng, saray “baseha na sanok,” pian nipanengneng to so panangasi ed arum a mitukoyan ed gagala to, panon a wala so anggan siopan manepeg a makapanreklamo? Imbes, legan a nanaimatonan tayo so kipaparungtal na gagala to, malaem so naaralan tayo nipaakar ed si Jehova a mismo. Pankelawan tayoray nengneng na personalidad to a nipatnag—say inkahustisya to, panangasi to, andukey-a-panangitepel to, abalbaleg a kakabatan to. Say makabat a panangimaton nen Jehova ed salisalan so ando lan andon ontalindeg a bilang pantasi ed katuaan a say paraan na pananguley to so sankaabigan. Kaiba nen apostol Pablo ibaga tayo: “O agaylan kaaralman iray kayamanan na Dios tan kakabatan tan pikakabat! Agaylan agnatukor iray panangukom to tan agnausisa iray dalan to!”—Roma 11:33.
Pankanawnawan Pangipanengneng na Debosyon Tayo
13. (a) Anton pankanawnawa so nipresenta ed sikatayo sano sagmaken tayo so personal a panirap? (b) Anto so ontulong ed sikatayon onkiwas a sikakabat?
13 Walaray kipapasen a manasaglawi ed peteg a personal a paniirap lapud agni dineral na Dios so marelmeng tan agto ni intarok so nipaakar ed nipasakbay a katambal na katooan. Anto so kiwas tayo ed ontan? Kasin nanengneng tayo ed sikara iray pankanawnawan mibiang diad pamalinew ed ngaran nen Jehova a manlapud inkabalaw tan paneknekan so Diablo a matila? Sikatayo so napabiskeg a tuloy a manggawa na ontan diad pannonot ed simbawa: “Onkabat ka, anako, tan paliket mo so pusok, ta pian naebatan ko so mamabalaw ed siak.” (Uliran 27:11) Si Satanas, a mangakantyaw ed si Jehova, so mangibabagan no saray totoo so managmak na kaperdian ed materyal odino kapairap ed pisikal et tetelen da so Dios, odino ayewen da ni. (Job 1:9-11; 2:4, 5) Itarok tayo so gayaga ed puso nen Jehova sano, diad katooran tayo ed Dios ed arap na kairapan, ipatnag tayo a say ontan so aliwan tua ed kipapasen tayo. Walaan itayo na sigpot a talek a si Jehova so walaan na matamoy a panangaro ed saray ariripen to tan, a singa ed kipapasen nen Job, diad manepeg a panaon et sikatayo so tumangan nen Jehova a sibubunlok no mansiansia itayon matoor.—Santiago 5:11; Job 42:10-16.
14. No sikatayo so manmatalek ed si Jehova sano sagmaken tayoray subsubok, anto niran arum a pankaabigan so nayarin onsabi ed sikatayo?
14 No sikatayo so manmatalek ed si Jehova sano nasagmak tayoray makapaermen a subok, nabayuboan tayo so mabmabli ran kalidad. Bilang nansumpalan na saray bengatlan sinagmak nen Jesus, “inaral [to] so katutulok” ed pamaakaran ya agton balot naamtaan nensaman. Sikatayo, met, so makaaral—a mamayubo na andukey-a-panangitepel, panagsungdo tan aralem ya apresasyon ed saray matunong a dalan nen Jehova. Kasin sikatayo so siaanos a mangawat ed ontan a kipapasal?—Hebreos 5:8, 9; 12:11; Santiago 1:2-4.
15. Legan a sikatayo so siaanos a mangisungdo ed irap, panon so nayarin kagunggunaan na arum?
15 Imatonan na arum so gagawaen tayo. Lapud saray nasagmak tayo nisesengeg ed aro tayo ed inkatunong, arum ed sikara so diad saginonor et naapresya da no sioparay peteg ya “agagi” nen Kristo natan, tan diad pikasakey ed saray “agagi” to ed panagdayew et sikara so nabendisyonan na maandon bilay. (Mateo 25:34-36, 40, 46) Si Jehova tan say Anak to so malabay ed sikaran nawalaan na ontan a pankanawnawa. Kasin ontan itayo? Kasin sikatayo so sibubulos a mangitepel ed saray irap a manggawan posibli ed satan?
16. Panon a say panmoria ed ontan a personal a panirap so misiglaot ed pamaakaran na pankakasakey?
16 Agaylan maabig ya anggan saray mairap a kipapasen ed bilay et pankanawnawan pangipanengneng na debosyon tayo ed si Jehova tan ontan met ed pibiang tayo diad panumpal ed linawa to! Say panggawa tayo na ontan so mangiter na ebidensya a sikatayo so peteg a mamapaarap ed pikakasakey ed Dios tan ed si Kristo ya impikasi nen Jesus a nisesengeg ed amin a tuan Kristianos.—Juan 17:20, 21.
Repason Diskusyon
● Legan ya aabuloyan so mauges, panon so manepeg ya impangipanengneng nen Jehova na baleg a respeto ed dilin ngaran to?
● Panon a say impangiyabuloy na Dios ed saray “baseha na sanok” so nanggawa ed panangasi ton makadampot ya anggad sikatayo?
● Anto so nepeg tayon panggunaetan a nanengneng diad saray kipapasen a manasaglawi ed panirap a nasasagmak tayon personal?