Kapitulo 6
Say Salisalan ya Arapen na Amin a Pinalsa
1. (a) Anton salisalan so pinatalindeg nen Satanas ed Eden? (b) Panon a satan a salisalan so atukoy diad imbaga to?
SANEN binmetag so rebelyon ed Eden tinmalindeg so sakey a seryoson salisalan ya angapekta ed amin a pinalsa. Inmasingger ed si Eva, imbaga nen Satanas a sikato tan si Adan ya asawa to so seryoson asibletan. Intepet to: “Kasin tua ya imbaga na Dios ed sikayo ya agkayo mamangan ed amin a kiew ed tanamanan?” Inmebat si Eva a nipapaakar lambengat ed sakey a kiew ya imbaga na Dios: “Agyo nepeg so mangan ed satan, andi, agyo nepeg a diwiten tano andi et sikayo so ompatey.” Diad satan et direktan pinakasalanan nen Satanas si Jehova na panagtila, a kuanton nisay bilay nen Eva nisay si Adan so depende diad katutulok ed Dios. Imbaga to ya isisiblet na Dios ed saray pinalsa to so bengatlan maabig—say pakayarin mangigeter ed saray dili ran estandarte ed bilay. “Sikayo so peteg ya ag-ompatey,” so inkuan nen Satanas. “Lapud kabat na Dios a diad mismon agew a pangan yo ed satan et saray mata yo so nalukasan tan sikayo so magmaliw a singa Dios, a kabat yo so maong tan mauges.” (Genesis 3:1-5) Impaarap nen Satanas si Eva a manisian mas magmaong so panggawa to ed saray dilin desisyon to. Diad saman, inangatan to so kanepegan na Dios a manguley tan say dalan na pananguley To. Say salisalan a tinmalindeg so diad tua et nanlanor ed sankatalbaan ya inkasoberano.
2. Anto komon so analimbeng ed inmunan sankaparis a too?
2 Say aro ed si Jehova so analimbeng komon ed si Eva. Say panagrespeto ed inkaulo na asawa to so anebel komon ed sikato diad panggawa to na mauges. Ingen ta inisip to lambengat so nipaakar ed saman so singa pinmatnag a tampol a pankaabigan. Samay insebel so nagmaliw a kalikaliktan na mata to. Sigpot a pinalikdo na panagrason nen Satanas, sinumlang nen Eva so ganggan na Dios. Insan nilanor to si Adan. Anggaman ag-apalikdo ed katilaan nen Satanas, si Adan, met, so angipanengneng na baleg a kakulangan na apresasyon ed aro na Dios. Nileglemew to so inkaulo nen Jehova tan pinili to so minunong ed rebelyoson asawa to.—Genesis 3:6; 1 Timoteo 2:13, 14.
3. (a) Anton malaknab a salisalan so maapit a nisiglaot ed panangataki nen Satanas ed inkasoberano nen Jehova? (b) Siopa so inapekta na satan?
3 Say panangataki nen Satanas ed inkasoberano nen Jehova so agtinmunda ed samay inkagawa ed Eden. Say singa intalona tod’man so tinumbokan na impanuppiat to na katooran ed si Jehova diad biang na arum. Saya, sirin, so nagmaliw a segundaryon salisalan. Say angat to so ninmatnat ya angisakup ed saray ilalak nen Adan tan amin na saray espiritun ananak na Dios, ya anggan say pinabpablin inararon panguloan ya Anak nen Jehova. Diad saray agew nen Job, inkuan nen Satanas a saraman so manlilingkor ed si Jehova so manggagawa na ontan, aliwan lapud inaro ra so Dios tan say dalan na pananguley to, noagta nisengeg ed sinisiblet a rason. Insangsang to a, sano nisilong ed kairapan, et sikaran amin so onarap ed sinisiblet a pilalek. Kasin sikato so duga?—Job 1:6-12; 2:1-6; Apocalipsis 12:10.
No Panon So Inkiwas Da ed Salisalan
4. Akin a dakel a totoo so ag-angitandoro ed inkasoberano nen Jehova?
4 Ag-impulisay nen Jehova so posibilidad ya arum so miulop ed si Satanas diad iyaalsa. Diad tua, sanen indapo to so panangukom ed Eden, tinukoy na Dios iraman so manibukel na ‘bini na uleg.’ (Genesis 3:15) Saray Pariseos ya angigetma ed ipapatey nen Jesus tan si Judas Escariote, ya angitapat ed si Kristo, so kaiba na saratan. Ag-ira labat akapanggawa na mauges a kundang sakbay a sikara so sikakabat ed satan. Kabat da no anto so susto, ingen ta ginagala ran inala so talindeg ya onsumpa ed si Jehova tan saray ariripen to. Anggaman kuan, saray agnabilang ya arum ya ag-akitukoyan ed saray nakakaukolan nen Jehova so kinmiwas ed agpikakabat.—Gawa 17:29, 30.
5. (a) Aliwan singa si Eva, panon so impanmoria na saraman so nansiansian matoor ed si Jehova diad salita to? (b) Panon so impamaneknek nen Noe na katooran to, tan panon so kagunggunaan tayo a manlapud ehemplo to?
5 Miduma ed amin na saraya et saray lalaki tan bibii na pananisia a sikakabat nipaakar ed Manamalsa ra tan pinaneknekan da so katooran da ed sikato bilang Soberano. Anisia ra ed Dios. Kabat da a saray bilay da so mandepende diad italineng ed sikato tan itulok ed sikato. Si Noe so sakey a toon ontan. Sirin, sanen inkuan na Dios ed si Noe, “say anggaan na amin a laman so sinmabi ed arap ko . . . Manggawa ka na sakey a biong,” sinmuko si Noe ed panangiwanwan nen Jehova. Arum a totoo ed saman ya agew, anggaman ed inkapasakbayan da, so nankurang ed normal a kurang na bilay a singano anggapo so nikadkaduman nagawa. Balet si Noe so angipaalagey na abalbaleg a biong tan okupado diad panagpulong ed arum nipaakar ed saray matunong a dalan nen Jehova. A singa ibabaga na kuritan, “si Noe so nantultuloy a nanggawa na unong ed amin ya ingganggan na Dios ed sikato. Ontan so ginawa to.”—Genesis 6:13-22; nengnengen met so Hebreos 11:7 tan 2 Pedro 2:5.
6. (a) Anto ni so niyugali ed saray manamemben na katooran? (b) Panon so impangipatnag nen Sara ed sarayan kalidad, tan diad anton dalan so pakagunggunaan tayo a manlapud ehemplo to?
6 Say atagey a panangigalang ed prinsipyo na inkaulo, a tekep na personal ya aro ed si Jehova, so matalona met ed limog na saray manamemben na katooran. Sikara so agnagmaliw a singa Eva ya inunaan to so asawa to. Nisay singa ra si Adan, ya angipulisay ed ganggan nen Jehova. Si Sara, ya asawa nen Abraham, so angipatnag ed sarayan maabig a kalidad. Aliwa lambengat ed panagsalita to noagta ontan met ed puso to a si Abraham so “katawan” to. Nagkalalo ni, personal ya inaro to si Jehova tan sikato so sakey a bii na pananisia. Kaiba to si Abraham, sikato so “manaalagar ed syudad [Panarian na Dios] a walaan na saray peteg a letnegan, say managpaalagey tan managgawa na satan a syudad et say Dios.”—1 Pedro 3:5, 6; Hebreos 11:10-16.
7. (a) Diad leksab na antoran sirkumstansya so impangitandoro nen Moises ed inkasoberano nen Jehova? (b) Panon so nayarin pangungguna na ehemplo to ed sikatayo?
7 Ngalngalin 430 taon kayari na intaynan nen Abraham ed dalin to, intandoro nen Moises so inkasoberano nen Jehova diad arap-arapan ya impiarap ed si Paraon na Ehipto. Aliwan lapud si Moises so matalek ed inkasikaton dili. Diad kasuniyan, nanduaruwaan to so abilidad ton makapansalitan maong. Balet tinulok to si Jehova. Diad panamabiskeg nen Jehova tan diad tulong nen Aaron ya agi to, inulit-ulit nen Moises ya impasabi so salita nen Jehova ed si Paraon. Si Paraon so nampaawet. Anggan arum ed saray anak na Israel so sipapasang a kritiko ed si Moises. Balet sitotoor a ginawa nen Moises so amin a bengatlan ingganggan nen Jehova ed sikato, tan diad panamegley to et say Israel so niliktar ed Ehipto.—Exodo 7:6; 12:50, 51.
8. (a) Anto so mangipanengneng a say katooran ed si Jehova et lalanoren to so mas lalo nen say panggawa ed espesipikon sinalambit na Dios ed insulat? (b) Panon a nayarin say apresasyon ed sayan nengneng na katooran so ontulong ed sikatayon mangiyaplika ed 1 Juan 2:15?
8 Saramay matoor ed si Jehova so agnankatunongan a say mogmon nakaukolan et say pitunosan ed sulat na ganggan, say pangunor lambengat ed impaisulat na Dios. Sanen sinali na asawa nen Potifar a tuksoen si Jose a mikalugoran ed sikato, anggapo so nisulat a ganggan a nanlapud Dios ya espesipikon mangisesebel ed pikakalugoran. Balet diad letnegan na kabat nen Jose nipaakar ed areglo na panangasawan inletneg nen Jehova ed Eden, sikato so sikakabat a say pirelasyonan ed sekso ed sananey ya asawa na laki so agmakapaliket ed Dios. Si Jose so aliwan interesado diad panubok ed saray geter ya inyabuloy na Dios ed sikato a singa saray Ehipsio. Intandoro toray dalan nen Jehova diad impandalepdep ed saray impideneng na Dios ed katooan tan insan sigugunaet ya angiyaplika ed atebek ton linawa na Dios.—Genesis 39:7-12; ipareng so Salmo 77:11, 12.
9. Panon a say Diablo so naulit-ulit ya apaneknekan a matila diad panamakasalanan a pinatalindeg to ed agew nen Job?
9 Anggamano mabiskeg a niiyan ed subok, saraman so tuan mikabat ed si Jehova so ag-ombeneg ed sikato. Impakasalanan nen Satanas a no si Job so makabalang ed saray kayamanan to odino nasakitan ed pisikal, anggan sayan sakey a pinabli nen Jehova so mangikaindan ed Dios. Balet ta pinaneknekan nen Job a say Diablo so matila, tan satan so ginawa to anggaman agto kabat so makasengeg ed amin a desyang ya ondadapo ed sikato. (Job 2:3, 9, 10) Siansian sasalien ton paneknekan so punto to, diad saginonor et sinugsugan nen Satanas so sinmanok ya ari ed Babilonia a mamagyaw ed taloran walad kalangweran a Hebreos diad ipapatey ed manliob a palbaan no ag-ira ondakmomon mandayew ed imahen ya impaalagey na ari. Apaskar a manpili ed baetan na ganggan na ari tan ganggan nen Jehova a sumpad panagtalintao, mapekder ya impaamta ra a sikara so manlingkor ed si Jehova tan sikato so Supremon Soberano ra. Lalon mabli ed sikara nen say bilay et say katooran ed Dios.—Daniel 3:14-18.
10. Panon a posibli ed sikatayon ag-ayadyarin totoo a paneknekan a sikatayo so tuan matoor ed si Jehova?
10 Kasin ibaga tayo a say katooran ed si Jehova et nakaukolan a say sakey a too so ayadyari, a say sakey a nalingo et sigpot lan sinmaew? Andin balot! Espesipikon ibabaga na Biblia ed sikatayo so nipaakar ed saray panaon sanen si Moises so kinmulang. Si Jehova so ag-apaliket, balet ta agto impulisay si Moises. Saray apostoles, anggaman sikara so maabig ya ehemplo ed dakel a pamaakaran, so walaan na saray kakapuyan. Say katooran et kakaukolan to so mantultuloy a katutulok a manlapud puso. Balet, nisesengeg ed atawir tayon ag-inkayadyari, napaliket si Jehova no agtayo gagalaen ya ipulisay so linawa to ed anggan anton pamaakaran. No, lapud kakapuyan et sikatayo so akagawa na makapuy, importante a sikatayo so masimoon a magbabawi tan sirin satan so aggawaen ya ugali. Sirin ipapanengneng tayo a tuan inaro tayo so ibabaga nen Jehova a maong tan gulaen so ipapanengneng ton mauges. Diad letnegan na pananisia tayo ed mananakbong-kasalanan a bili na bagat nen Jesus, napanggayagaan tayo so malinis a talindeg ed arap na Dios.—Amos 5:15; Gawa 3:19; Hebreos 9:14.
11. (a) Siopa ed limog na totoo so amemben na ayadyarin maridios a debosyon tan anto so paneknekan na saya? (b) Panon so inkatulongan tayo diad ginawa to?
11 Anggaman kuan, kasin say ayadyarin maridios a debosyon so basta aliwan posibli ed katooan? Diad ngalngalin 4,000 taon say ebat ed saya et sakey a “sagradon sekreto.” (1 Timoteo 3:16) Si Adan, anggaman apalsan ayadyari, so ag-angiletneg na ayadyarin ehemplo na maridios a debosyon. Siopa so makayari? Peteg ya anggapo ed saray makasalanan ya ilalak to. Si Jesu-Kristo so alenleneg a toon makapanggawa na satan. Say ginawa nen Jesus so mamaneknek a si Adan, a walaan na mas lalon maapabor a sirkumstansya, so akabemben komon na ayadyarin katooran no kinaliktan to. Say kasalanan so aliwan diad panamalsan kimey na Dios. Si Jesus sirin so ehemplo ya labay tayon aligen diad pangipatnag na aliwa lambengat a katutulok ed madibinon ganggan noagta ontan met ed personal a debosyon ed si Jehova, say Sankatalbaan a Soberano.
Anto So Personal ya Ebat Tayo?
12. Akin a nepeg tayo so mantultuloy ya alerto diad awawey tayo ed inkasoberano nen Jehova?
12 Balang sakey ed sikatayo natan so nakaukolan ya onarap ed sankatalbaan a salisalan. Satan so agtayo napaliisan. No butaktak ya imbaga tayon sikatayo so walad dapag nen Jehova, sikatayo so gawaen nen Satanas a puntirya. Idapo to so panamairap ed amin a naisip a paraan tan itultuloy ton gawaen so ontan ya angga ed pangangga na marelmeng a sistema na bengabengatla. Agtayo nepeg a lukakan so panagbantay tayo. (1 Pedro 5:8) Say kondukta tayo so mangipanengneng no iner so talindeg tayo no nipaakar ed supremon salisalan.
13. (a) Anto so wadtan nipaakar ed gapowan na panagtila tan panagtakew a manggawa ed sikatayon onarawi ed saratan? (b) Ebatan iray tepet ed sampot na sayan parapo, sansakey, nipaakar ed saray kipapasen a panisipan na arum a totoo ed ontan iran gawan-mauges.
13 Agtayo nitepet ya ipasen so aliwan matoor a kondukta a singa aliwan importante lapu lambengat ta satan so kaslakan ed mundo. Say pamasiansia na katooran so mankaukolan na pangiyaplika tayo ed saray matunong a dalan nen Jehova ed amin a pamaakaran na bilay. Diad pangiyilustra, usisaen so onggendan:
(1) Inusar nen Satanas so sakey a tila ta pian nitonton to so inmunan atateng tayo ed kasalanan. Sikato so nagmaliw a “say ama na tila.” (Juan 8:44)
Diad silong na antoran sirkumstansya a saray walad kalangweran a totoo so no maminsan et onsaew a simamatua ed atateng da? Akin ya importante ed saray Kristianon tobonbalo so ipaliis ed saya? (Uliran 6:16-19)
Antoran ugali ed negosyo so mangidapag ed sakey a too “ed ama na tila” imbes a diad Dios na katuaan? (Miqueas 6:11, 12)
No ibaga tayoray bengatlan mangiter na magmaong-nen-say-katuaan ya impresyon ed sikatayo, kasin satan so lingo no agto sakitan so anggan siopa? (Salmo 119:163; ipareng so Gawa 5:1-11.)
No say sakey so alanor ed seryoson gawan-mauges, akin ya importante so agpanalin panakbong ed satan diad iyarap ed panagtila? (Uliran 28:13)
(2) Sanen si Eva tan insan si Adan so kinmiwas diad pananugsog nen Satanas a manggawa ed saray dilin desisyon da ed no anto so maong tan mauges, say ununan bengatlan ginawa ra et say impangala na bengatlan agda kayarian. Nagmaliw iran matakew.
Kasin napatunong so panagtakew no say sakey a too so walad pankaukolan odino no say tinakewan so walaan na daakan? (Uliran 6:30, 31; 1 Pedro 4:15)
Kasin aliwan tanton mauges no sikato so kaslakan ya ugali ed panaayaman tayo odino no say tinakew et melag? (Roma 12:2; Efeso 4:28; Lucas 16:10)
14, 15. (a) Diad sampot na Sanlibon Taon ya Uley nen Kristo anton subok so onsabi ed amin a katooan? (b) Panon a say gawaen tayo natan so mangapekta ed pansumpalan tayo ed satan?
14 Legan na Sanlibon Taon ya Uley nen Kristo, si Satanas tan saray demonyos to so walad kaaralman, agmakayarin mangimpluensya ed katooan. Agaylan satan so pakainawaan! Balet kayari na sanlibon taon, sikara so nibulos ed antikey a panaon. Si Satanas tan saraman so manutumbok ed sikato so mamairap ed saray “sasantos,” saraman so nipawil a katooan a mamebemben na katooran da. Sikato so onatakin mibakal a sumpad “inararon syudad,” say mangatatawen a Balon Jerusalem, diad panalin pamunas na inkatunong a niletneg ed dalin.—Apocalipsis 20:7-10.
15 Nayarin nagawa, a singa diad apalabas, usaren nen Satanas so kapalikdoan, a dingan na saray makapasagyat ed kasibletan tan kakinonan, diad panagyat ed totoon onkiwas ya agmatoor ed si Jehova. No pribilehyo tayo so pambilay ed satan, panon so personal ya ikiwas tayo? Iner so kawalaan na kapusoan tayo nipaakar ed sankatalbaan a salisalan? Lapud amin a katooan so ayadyari la ed satan, anggan anton kiwas na agkatooran so ginagala la tan mansumpal ed maandon kadederal. Ta pian sikatayo so napaneknekan a matoor ed satan, agaylan makana so pamayubo tayo natan ed ugalin ikiwas a sipaparaan tan positibo ed antokaman a panangidirihe nen Jehova ed sikatayo, balanglan diad panamegley na Salita to odino diad panamegley na organisasyon to! Diad panggawa na ontan, ipapanengneng tayo so puron debosyon ed sikato bilang Sankatalbaan a Soberano.
Repason Diskusyon
● Anto so baleg a salisalan ya aarapen na amin a pinalsa? Panon so inkalanor tayo?
● Anto so matalona nipaakar ed saray dalan ya amaneknekan nen Noe, Sara, Moises, Jose tan Job na katooran da ed si Jehova?
● Akin a makana a sikatayo so maalwar a kada agew diad pangidayew ed si Jehova ed panamegley na kondukta tayo?