Kapitulo 8
‘Pitutulot a Sumpad Marelmeng Iran Espiritun Puersa’
1. Akin a say kimey na saray marelmeng ya espiritu so nagkalautlan makapainteres ed sikatayo?
SARAY totoon materyalistikon impanisip so nayarin manludlurey ed ideya na marelmeng iran espiritu. Balet satan so aliwan eelekan. Balanglan sikara so manisia odino andi, saray gawa na demonyo so manedesdes ed balang sakey. Saray managdayew ed si Jehova so agnilikud. Diad tua, sikara so manunan puntirya. Sikatayo so pinaliing nen apostol Pablo ed sayan pibabakal, a kuanto: “Walaan itayo na pitutulot, aliwan sumpad dala tan laman, noagta sumpad saray gobierno [ya andi ed ayaman na dala tan laman], sumpad saray pakauley, sumpad saray manuley na sayan mundo na kabilungetan, sumpad saray marelmeng ya espiritun puersa ed mangatatawen iran pasen.” (Efeso 6:12) Diad agew tayo say gonigon so lalon sankabiskegan lapud si Satanas so nibantak a nanlapud tawen tan sisasanok, lapud kabat ton antiktikey la so panaon to.—Apocalipsis 12:12.
2. Akin a posibli ed sikatayo so pitulot a matalona a sumpad mabiskeg-nen-too iran espiritu?
2 Panon ya anggan siopa ed sikatayo so nayarin ontalona diad pitutulot a sumpad saray mabiskeg-nen-toon espiritun puersa? Dia lambengat ed sigpot a panagmatalek ed si Jehova. Nepeg tayo so ontalineng ed sikato tan mangunor ed Salita to. Diad panggawa na ontan, sikatayo so niliktar ed kaderal na pisikal, moral, emosyonal tan kanonotan a sasagmaken na saraman so walad panangontrol nen Satanas.—Efeso 6:11; Santiago 4:7.
Saray Manuley na Mundo ed Mangatatawen a Pasen
3. Diad anto tan siopa so masebeg a susumpaen nen Satanas?
3 Malinlinew a dedeskribien nen Jehova ed sikatayo so kipapasen na mundo unong a nanengneng ton manlapud atagey a pasen to ed katawenan. Inter to ed si apostol Juan so sakey a pasingawey a si Satanas so niretraton singa “baleg a kolor-apuy a dragon” a manggetman manabsab, no nayari, ed Mesianicon Panarian na Dios diad bektan kianak to ed tawen nen 1914 K.P. Diad insaew to ed satan, si Satanas so akibakal ed nanengneng iran manangilaman ed satan a Panarian, say segundaryon kabiangan na bini na “biin-pinagkaasawa” na Dios, ed delap na masebeg ya isusumpa.—Apocalipsis 12:3, 4, 13, 17.
4. (a) Diad anton katuaan nipaakar ed sengegan na pakayari na atooan iran gobierno so pamapasakbayan na Biblia ed sikatayo? (b) Diad anto so katitipon natan na amin a mapulitikon manuley, tan diad panamegley na siopa?
4 Say sengegan na pakayari tan pakauley na atooan iran gobierno so niparungtal ed satan a puyan ed si Juan. Nipanengneng ed sikato so mananugyop ya atap ya ayep, a walaan na 7 ulo tan 10 saklor, sakey ya ayep a walaan na pakauley “ed amin a tribu tan totoo tan pansasalita tan nasyon.” Saya so mangirepresenta, aliwan diad sakey lambengat a gobierno, noagta ed sankagloboan a mapulitikan sistema. Apakabatan si Juan a “say dragon [si Satanas a Diablo] so angiter ed ayep na pakayari to tan trono to tan baleg a pakauley.” (Apocalipsis 13:1, 2, 7; ipareng so Lucas 4:5, 6.) Anggan anton relihyoson propesyon ed biang na saray pulitikon manuley, anggapo ed saray membron nasyones na “ayep” so onsuko ed inkasoberano nen Jehova tan ed tinuro ton Ari, si Jesu-Kristo. Amin da so mipupuligesgesan a mangitandoro ed dili ran inkasoberano. Natan, a singa ipapanengneng na Apocalipsis, “saray balikas a pinuyanan na saray demonyo” so manitipon ed sikaran amin ed “bakal na baleg ya agew na Dios a Makapanyarin-amin” diad Har-Magedon. (Apocalipsis 16:13, 14, 16) Peteg, a singa insulat nen apostol Pablo, “saray manuley na mundo” so aliwan basta totoo noagta “marelmeng iran espiritun puersa ed mangatatawen iran pasen.” (Efeso 6:12) Amin a mamaneknek na inkasikaran tuan managdayew ed si Jehova so nakaukolan a makatebek ed sigpot a kabaliksan na satan.
5. Akin a say alwar so nakaukolan ta pian napaliisan so katalikebkeban diad panuporta ed satanicon sistema?
5 Inagew-agew a saray bilay tayo so lalanoren na saray gutgutan a mamubuyak ed pamilya na too. Maslak ed totoo so mangala na dapag, insangi odino andi, diad nasyon, tribu, lenguahen grupo odino sosyal a klase a sikara so kabiangan. Anggaman sano say partikular a pasen da ed sosyedad so aliwan direktan nalalanor ed kaplesan a gutgutan, nayarin naromog da so inkasikaran pabor ed sakey nen say sananey. Balet anggaman anto so kaermenan, anggan siopan too odino sengegan ya iyalibansa to, anton talaga so susuportaan da? Malinlinew ya ibabaga na Biblia a say “sankamundoan so mandukdukol ed pakayari na sakey a marelmeng.” (1 Juan 5:19) Panon, sirin, so pakapaliis na sakey a too ed kapalikdon kaiba na amin a katooan? Dia lambengat ed pangiter to na sigpot a suporta ed Panarian na Dios tan say pamemben to ed nagnap a neutralidad no nipaakar ed balingaan na saray mansisiblangan a mundo.—Juan 17:15, 16.
Masilib Iran Patit na Marelmeng
6. Anto so nisakup ed limog na sarap paraan ya usaren nen Satanas diad pamabeneg ed totoo a manlapud tuan panagdayew?
6 Diad amin a peryodo na awaran inusar nen Satanas so insabi tan pisikal a panamasegsegang pian pabenegen toray sinansakey a manlapud tuan panagdayew. Ingen ta inusar to met so mas lalon masilib a paraan—panamalido ran gawa tan patipatit.
7. Panon a say kasiliban nen Satanas so nipanengneng diad impangusar to ed palson relihyon?
7 Sikato so sisisilib ya angipuger ed baleg ya ulop na totoo ed kabilungetan diad panamegley na palson relihyon, ya abuloyan toran manisip, no ontan so pilalek da, a sikara so manseserbi ed Dios. Kulang na puron aro ed katuaan, nayarin sikara so nasagyat ed saray mistiko tan emosyonal iran relihyoson serbisyo odino naingganyo ed saray mabibiskeg a gawa. (2 Tesalonica 2:9, 10) Balet ta sikatayo so apasakbayan, ya anggan manlapud limog na saraman so akibiang ed tuan panagdayew, “arum so ombeneg . . . a mangiimano ed saray manamalikdon apuyanan a balikas tan bangabangat na demonyo.” (1 Timoteo 4:1) Panon so nayarin kagawa na satan?
8. Panon ya atangguyor nen Satanas ed palson relihyon so anggan arum ed saraman so datin managdayew ed si Jehova?
8 Sisisilib a say Diablo so onaapelo ed kaleteyan na sakey a too. Kasin say takot ed too so siansia nin manatalona ed sikato? No ontan, nayarin sikato so onsuko ed saray pananeldet a manlapud kakanayon odino kakaabay a mibiang ed saray agagamil a nanlapud palson relihyon. Kasin say sakey so makinon? Sirin nayarin sikato so onsanok sano nasimbawa odino sano saray arum so agmangawat ed ideyan iyalibansa to. (Uliran 29:25; 15:10; 1 Timoteo 6:3, 4) Anto no say pibibiang to ed lawak na ministeryo so agpinakiwas na aro? Imbes ya iyarunsa to so punto de bista to a mitukoyan ed ehemplo nen Kristo, nayarin onkiling ed saraman so ‘mangagatel na layag to’ diad pangikuan a say basta pambasa ed Biblia tan pambilay na “maabig a panagbilay” so magenap la. (2 Timoteo 4:3) Balanglan sikato so aktual a mikasakey ed sananey a relihyoson grupo odino basta itandoro to so dilin ngaran na relihyon to so aliwan importante ed si Satanas, basta agto dayewen si Jehova diad dalan a pangiwawanwan na Dios ed panamegley na Salita to tan organisasyon to.
9. Panon a si Satanas so sisisilib ya angusar ed sekso a manumpal ed gagala to?
9 Si Satanas met so sisisilib a manasagyat ed totoon mamenek ed normal a pilalek da diad mauges a dalan. Saya so ginawa to diad pilalek ed seksual iran kagletan. Diad pangipulisay ed moralidad na Biblia, dakel ed mundo so manmoria ed seksual a relasyon na totoon aliwan sanasawa so lehitimon liket odino sakey a dalan na pamaneknek a sikara so matatken. Tan anto so nipaakar ed totoon walaan na asawa? Aliwan nikadkaduma ed minumundon totoo so makasagmak na problema ed panamaley diad pandiborsyo tan pangasawa lamet odino say basta pangisian tan pangamong ed sananey ya asawa. No sayan dalan na bilay so imanoen tayo, kasin nalikna tayo a nasasaew tayo so bengatla, a say Kristianon dalan so mapeget a tuloy? Say masilib a paraan nen Satanas et say panggawa to ed sakey a toon manisip a si Jehova so mangisisiblet na bengatlan maabig. Dagdagen to itayon manisip ed liket a nayarin onwala ed sikatayo natan—aliwa diad andukey-dampoten ya epekto ed inkasikatayo tan diad arum, tan peteg ya aliwan say relasyon tayo ed si Jehova tan ed Anak.—Galacia 6:7, 8; 1 Corinto 6:9, 10.
10. Diad panamegley na anton paraan so sasalien nen Satanas diad paneral ed awawey tayo a mamaarap ed karawalan?
10 Sananey a natural a pilalek et say nipaakar ed panligliwaan. Sano mabunigas, nayarin satan so makarepresko ed pisikal, kanonotan tan emosyon. Balet anto so reaksion tayo sano sisisilib ya usaren nen Satanas iray okasyon na panligliwaan a panalin pangiyarawi ed panagnonot tayo ed saman so kanonotan na Dios. Kabat tayo, alimbawa, a gulaen nen Jehova iraman so mangaaro ed karawalan. (Salmo 11:5) Balet sano saray sine ed telebisyon odino diad teatro so mangipanengneng ed satan, kasin basta sikatayo labat so onyurong tan imatonan tayon amin? Odino sano nipresenta ed ngaran na galaw, kasin satan so awaten tayo tan angangko et sikatayo ni so oneyag na pamaseseg ed saray mibibiang?—Ipareng so Genesis 6:13.
11. Diad antoran dalan a nayarin anggan say sakey a toon mikabat ed katuaan nipaakar ed espiritismo so napatitan no sikato so aliwan sililiing?
11 Sikatayo met so sikakabat a saraman so mibabali ed anggan anton porma na espiritismo—panagagamil na dibinasyon, panagsalamangka odino panalin pitongtong ed inaatey—so “bengatlan makapadimla ed si Jehova.” Agtayo isipen so ipanon ed saray espiritun medyum tan peteg ya agtayora abrasaen ed abung tayo pian agamilen iray denidemonyon agamil. Balet kasin sikatayo so ontalineng ed sikara tan onnengneng ed pankelkelaw no sikara so ompatnag ed saray tilon na telebisyon tayo? Anggaman agtayon balot labay ya awaten so panambal na sakey a managsalamangka, kasin mangibariber tayo na lubir ed ngalungalowan na melag ya anak tayo diad panisip a nayarin satan so manalimbeng ed ugaw diad kasakitan? Odino, diad pikabat a kokondenaen na Biblia so ‘pangulam ed arum,’ kasin abuloyan tayo so hipnotistan mangontrol na kaisipan tayo, anggan temporaryo labat?—Deuteronomio 18:10-12; Galacia 5:19-21.
12. (a) Panon a say musika so managyat ed sikatayon mangabrasa ed saray ideya a kabat tayon mauges? (b) Panon a say panangawes na sakey a too, estilo-na-buek odino nengneng na panagsalita so mangipanengneng na panangidayew ed saramay say estilo-na-bilay da et ag-aabobonan nen Jehova? (c) Anto so nakaukolan ed biang tayo pian napaliisan tayo so kabiktima na masilib iran patit nen Satanas?
12 Abasa tayo ed Kasulatan a say ‘pilalawanan tan karutakan ed amin a nengneng so agnepeg, tekep na agnepeg a motibo, ya anggan nasalambit ed limog tayo.’ (Efeso 5:3-5) Balet anto no saray ontan a tema so sisisilib ya inantabay na musikan walaan na makapasagyat a melodya, makatenyeg a tuno odino yameg? Kasin sikatayo so ag-anggan sikakabat a mangulit ed saray liriko a mangigloria ed sekso a walad paway na panamaley, panag-usar na druga ed panliket tan mas ni? Odino, legan a kabat tayo ya agtayo aligen so dalan na bilay na totoon nigalet ed ontan iran bengatla, kasin getmaen tayon idapag so inkasikatayo ed sikara diad nengneng na panagkawes da, estilo na buek da odino nengneng na panagsalita ra? Agaylan masilib si Satanas! Agaylan makapalikdo iray metodon uusaren ton panagyat ed totoon mitunosan ed dili ran mauges a kanonotan! (2 Corinto 4:3, 4) Pian sikatayo so agnabiktima ed masilib iran patit to, nepeg tayon paliisan so kiyanor ed mundo. Nakaukolan tayon pansiansiaen ed kanonotan no sioparay “manuley na mundo ed sayan kabilungetan” tan sigugunaet a mitulot a sumpad impluensya ra.—Efeso 6:12; 1 Pedro 5:8.
Akinlongan a Mananalo
13. Panon a posibli ed anggan siopa ed sikatayo, tekep na saray agtayo inkayadyari, so panalo ed mundo ya uuleyan nen Satanas?
13 Sakbay na impatey nen Jesus imbaga to ed saray apostoles to: “Manpakpel! Tinalok so mundo.” Sirin, met, sikara so magmaliw a mananalo; tan diad masulok a 60 taon ed saginonor et insulat nen apostol Juan: “Siopa so sakey a manalo ed mundo noagta saman so walaan na pananisia a si Jesus so Anak na Dios?” (Juan 16:33; 1 Juan 5:5) Say ontan a pananisia so nipanengneng diad katutulok ed ganggan nen Jesus tan panmatalek ed Salita na Dios, unong a singa ginawa to. Anto ni so nakaukolan? A sikatayo so mansiansian maapit ed kongregasyon a sikato so ulo. Sano sikatayo so onkulang, nepeg a sikatayo so sigugunaet a magbabawi tan kerewen so panamerdona na Dios diad letnegan na bagat nen Jesus. Diad onia, anggaman ed saray agtayo inkayadyari, sikatayo met so magmaliw a mananalo.
14. (a) Basaen so Efeso 6:13-18. (b) Usaren iray tepet tan kasulatan a nitarya a bilang letnegan diad paningbat ed saray gungguna a manlapud kada parte na espiritual ya ayura.
14 Pian ontalona, nakaukolan tayon isulong “so sigpot a kinlong na pibabakal a manlapud Dios,” ya agtayo paulianan so kabiangan to. Ipangasin lukasan yo so Biblia ed Efeso 6:13-18 tan basaen so salaysay na satan ya ayura. Insan, diad pangebat ed saray tepet ed leksab, imanoen no panon so kagunggunaan yo a manlapud pananalimbeng ya iter na kada ayura.
“Balkesan so banel diad katuaan”
Anggamano nayarin agtayo kabat so katuaan, panon a say maparanay a panagaral, panagdalepdep ed katuaan na Biblia tan say iyatendi ed miting so manalimbeng ed sikatayo? (Filipos 3:1; 4:8, 9; 1 Corinto 10:12, 13; 2 Corinto 13:5; 1 Pedro 1:13, Kingdom Interlinear)
“Kinlong na Inkatunong”
Siopan estandarte na inkatunong so saya? (Apocalipsis 15:3)
Iyilustra no panon a say katutunganga ed ganggan nen Jehova, lapud isaew a pamayubo na aro ed saray dalan to, so nayarin mangiparungtal ed sakey diad baleg a kasakitan ed espiritual. (Nengnengen so 1 Samuel 15:22, 23; Deuteronomio 7:3, 4.)
“Sali ya asapinan ed kinlong na maong a balita na kareenan”
Panon a salimbeng ed sikatayo so pamasiansia tayo ed saray sali tayon okupadon mangiyakar ed sikatayon mitongtong nipaakar ed saray probisyon na Dios ed kareenan? (Roma 10:15; Salmo 73:2, 3; 1 Timoteo 5:13)
“Baleg a kinlong na pananisia”
No walaan itayo na pananisian malet a niletneg, panon so ikiwas tayo ed arap na saray sagpot a nigetman managdag ed sikatayon manduaruwa odino ontakot? (Ipareng so 2 Timoteo 1:12; 2 Arari 6:15-17.)
“Pamulaw na kilalaban”
Panon a say ilalo ed kilalaban so ontulong ed sakey diad agpakapatitan ed alablabas a kapagaan ed materyal a kayarian? (1 Timoteo 6:7-10, 19)
“Kampilan na espiritu”
Diad anton naynay so nepeg tayon panmatalkan sano babakalen so sumpad espiritualidad tayo odino ed saraman so arum? (Salmo 119:98; Uliran 3:5, 6; ipareng so Mateo 4:3, 4.)
Mitukoyan ed satan, diad Efeso 6:18, 19, anto ni so nipanengneng a makana diad italona ed espiritual a pibabakal? Panon kabetbet so pangusar ed satan? Nisesengeg ed siopa?
15. (a) Kasin say basta personal ya espiritual a pibabakal so pibabakalan tayon amin? (b) Panon a nagawaan tayo so panangataki ed sayan pibabakal?
15 Bilang Kristianon sundalo sikatayo so kabiangan na baleg ya armadan mibibiang ed espiritual a pibabakal. No sikatayo so mansiansian aliing tan uusaren tayon maabig so nagnap a kinlong na pibabakal a nanlapud Dios, sikatayo so agnabiktima ed sayan bakal. Imbes, sikatayo so manamabiskeg a tulong ed saray kaparan ariripen na Dios. Sikatayo so akaparaan tan magunaet ya onataki, mangikayat na maong a balita na Mesianicon Panarian na Dios, satan a gobiernon maruksan sinumpa nen Satanas.
Repason Diskusyon
● Akin a saray managdayew ed si Jehova so manggunaet a mamasiansia ed nagnap a neutralidad no nipaakar ed saray gutgutan na saray elemento na mundo?
● Anto so arum ed saray masilib a patit nen Satanas pian nitarok toray Kristianos ed espiritual a kadesyang?
● Panon a say ayuran intarya na Dios so manalimbeng ed sikatayo diad saray dalan a makana ed sarayan espiritual a pibabakal?