Liket Diad Panamegley na Mablin Siglaotan

“MAGMAONG so sakey ya ason mabilay nen say inatey a leon.” (Eclesiastes 9:4) Diad saratan a pigaran salita, si Arin Solomon nensaman so angibalikas na pundamenton katuaan a say bilay so mas lalon importante nen say antokaman iran kayarian a materyal odino anggan anton ambisyoson kalat a nayarin ilaloan tayon nagamoran. No anggapo so bilay, ag-itayo nagunggunaan ed anggan dinan ed sarayan bengatla. On, makana so bilay diad pangegemtan ed liket.

Bengatlan “Magmaong Nen Say Bilay”

Mabli a singa say bilay, anggaman kuan, wala so bengatlan mas magmaong ni. ‘Kasin satan so posibli?’ so nayarin isipen yo. ‘Anto so nayarin mas mabli nen say bilay?’

Si Arin David ed kadaanan ya Israel so mangiter ed sikatayo na ebat. Mansasalita ed Amalsa, si Jehovan Dios, inkuanto a tekep na aralem a panamabli: “Lapud say maaron-panangasim so magmaong nen say bilay, saray dilin bibil ko so mangidayew ed sika.” (Salmo 63:3) Saray impapuson salita nen David so mangipanengneng a say pakaawat ed maaron-panangasi na Dios, a nibase ed pakawalaan na maabig a siglaotan ed sikato, so lalon mas mabli nen say bilay a mismo. Akin ya ontan?

No Anto So Manggawa ed Bilay a Posibli

Ipasen a sikayo so naikdan na sakey a regalo, bengatlan peteg a labalabay yo. Siempre sikayo so maliket a tuloy a mangawat ed regalo tan panliketan yon tuloy ya usaren. Balet sikayo so malamang, peteg, no saray kaisipan yo so ag-onlampas ed regalo diad saman so angiter. Agta say personal a siglaotan yo tan say angiter so anagdag ed pangiter na regalo? No satan a siglaotan so anggapo, anggapo met so regalo tan anggapo so panliket ed satan.

Satan met so tua ed bilay. Mabmablin singa ontan, nepeg tayon nonoten no iner so nanlapuan na bilay tayo tan no panon so kasusustine to. Peteg ya agtayo pinalsa so inkasikatayo, nisay sarag tayon sustinien a bukor ya anggapo so amin day makapakelaw a tarya nen Jehova ed dalin. (Salmo 100:3; Gawa 14:17) Say mismon katuaan a walaan tayo na bilay, tan satan so andi-duaruwan panggagayagaan tayo ed arum a sukat, so sakey a balikas na maaron-panangasi ed biang na Baleg a Manamalsa, si Jehovan Dios. Agta nanengneng tayo no akin a si Arin David so akaliknan impapuso a say “maaron-panangasi [na Dios] so magmaong nen say bilay”?

Wala so sananey a rason no akin a say kiwawala na naabobonan a siglaotan ed Amalsa so lalon importante nen say bilay a mismo​—say arapen tayo so mandepende ed satan. Nengnengen tayo no panon ya ontan.

Agta sikayo so mipakna a say bilay so singa sengaw tan napno na panduaruwaan? Nayarin say sakey a too so mankimey na impasya ed dakel iran taon ta pian nagegemtan to so materyalistikon kalat ya impasen ton mabli. Ingen, say patey so manamsam ed amin a bengatlan agamoran to. Sikato so singa imbaga nen makabat ya Arin Solomon: “Anto so agamoran na sakey a too ed amin ya impasyan kimey to tan diad impanbanikel na puso to a pankikimeyan ton impasya ed silong na agew? Ta amin na saray agew to so ermen tan gonigon, ontan met a kaleganan na labi et say puso to so agmanpainawa. Saya met so kaapaan.”​—Eclesiastes 2:22, 23; ipareng so 2:3-11.

Anggaman ed saya, gagala na maaron Amalsa tayo ya amin na saraman so mangaro tan ontulok ed sikato so nibulos a manlapud kaermenan tan kaapaan a sasagmaken tayo natan. Papaseguroan itayo nen Jehova ed sayan makapakelaw a sipan: “Ag-ira manpaalagey tan sananey so manayam; ag-ira mantanem tan sananey so mangan. Ta singa saray agew na sakey a kiew so agew na baley ko; tan say kimey na saray lima na pinilik so nausar a nagnap.”​—Isaias 65:22.

Agta sayan balikas na maaron-panangasi na Dios so magmaong nen say peles a kakulangan tan panduaruwaan a bilay tayo? Pian mangawat ed maaron-panangasi, on, say pambilay ed satan a Balon Oksuy tan panggayaga ed bilay a napno na gagala tan kabaliksan so peteg a sankablian a kalat. Pian satan a maliket ya iilaloan so nagamoran, nepeg a gamoran na sakey natan so panangabobon nen Jehova tan pansiansiaen so maapit a siglaotan ed sikato tan ed saray totoo to.

Antikey ya Interes a Laban ed Andukey a Gungguna

Nisesengeg ed akaunaran punto, seguradon makisir a kaisipan tan aliwan makabat ed sikatayo so sigpot a pangukupa tayo ed inkasikatayo diad panangusil na dilin-interes, balanglan diad inkabantog, kayamanan, karera, akademikon gegemtan, personal a kasumpalan, odino antokaman a bengatlan impasen a mabli ed sayan sistema na bengabengatla. Manwarin sarayan kalat so nayarin aliwan makapuy ed inkasikaran dili, say pangusil ed anggan dinan ed saratan a bilang sankaimportantian a bengatla so nayarin manggawa ed sikatayon makapaulian ed saray responsabilidad tayo ed Amalsa. Sankamanunaan ni, nayarin nabalang tayo so panangabobon to tan onsaew a makagamor “ed peteg a bilay.”​—1 Timoteo 6:19; Lucas 9:24.

Say pangala na ontan a kurang so nayarin miulibay ed sakey a walad kalangweran ya ontunda lan maneskuela tan mantrabaho bilang sakey ya onsianon komikimey pian makagamor lambengat na kuartan gastosen. Nayarin liknaen to a sikato la so nablos ed saray panameget na eskuelaan tan walaan la na maabig a panaon. Balet agta isasakripisyo to so andukey a pankaabigan to nisesengeg ed bengatlan panduaruwaan ya antikey ya interes? Mipadpara, sirin, agta antikey ya impanisip so sakey a too sano paulianan toy relasyon to ed Amalsa lapud sikato so okupadon tuloy diad pangusil ed personal a kalat?

Okupado itayon amin, mabetbet a nagawaan tayo so pakaromog ed panaon tan biskeg a manggawa ed saray bengatlan ipapasen tayon peteg ya importante, agta ontan? Sirin, diad agnalingon pakatalos ed kipapasen na too, impabitar nen Jesus: “Ta no iner so kawalaan na kayamanan mo, diman met so kawalaan na pusom.”​—Mateo 6:21.

Sirin anton nengneng na “kayamanan” so angiteenan mo na pusom? Say kisyap tan sileng na mundo so nayarin makaingganyo. Balet tepetan mo so inkasika: Panon inkamagnayon so impasen a gunggunan nagamoran ed saratan a bengatla? Kasin sikara so mangitarok na tuan liket odino temporaryo lambengat a liket, a singa say druga, a mangitilak na agkalkaliktan odino makapautot ni ingen a pansumpalan?

Gawaen So Makabat a Pili

Wala so mablin leksion a naaralan a manlapud saray totoo ed agew nen Lot. “Sikara so mamangan, sikara so oniinum, sikara so mansasaliw, sikara so manlalako, sikara so mantatanem, sikara so manpapaalagey,” so inkuan nen Jesus. Diad arum a salita, sikara so okupadon manguusil ed impasen dan importante, ya ag-ira mangiiter na anggan anton imano ed linawa na Dios. Nansumpalan? “Diad agew na impaway nen Lot ed Sodoma inmuran na apuy tan asupre a nanlapud tawen tan dineral toran amin.” Sirin, para ed pankaabiganan tayo, inyarum nen Jesus: “Ontan met so nagawa ed satan ya agew sano say Anak na too so nipatnag.”​—Lucas 17:28-30.

Amin a pamatnagan so mangipanengneng a “satan ya agew” so wala la ed sikatayo. Diad pannonot ed andi-anggaan a pankaabigan tayo, ibubulos nen Jehovan Dios so naulit-ulit a tawag ed panamegley na Salita to tan diad organisadon katooan to ed amin a nasyones. Say imbitasyon et say ibeneg ed sinisiblet iran gegemtan tan mipulangan ed sikato. Tuan kakulangkulangan ed sikatayo so pangiyabuloy ed amin na saray personal ya interes tayo a mangukupa ed amin a panaon tayo tan biskeg, ta pian sikatayo so onsaew ya onkiwas ed sayan maaron tawag. Imbes, a singa impangibaga nen apostol Pablo, nepeg tayon bidbiren so pankaganatan na panaon: “Nia! Natan so nagkalautlan makapaliket a panaon. Nia! Natan so agew na kilalaban.”​—2 Corinto 5:20; 6:2.

Kasin sakey ka ed saraman so napapalar ed maliket ya ilalo diad pakaliktar ed anggaan na peles a marelmeng a sistema na bengabengatla pian onloob ed matunong a Balon Oksuy ed sipan na Dios? Satan so mandepende ed no anto so ipasen mon sankaimportantian ed bilay mo natan tan no anto so gawaen mo diad pakagamor na naabobonan a siglaotan ed Dios. Wala ed sika so pampili!

[Saray Litrato ed pahina 5]

No sika so misalsalamat ed angiter . . .

. . . kumusta ed sankabalgan a manangiter, si Jehovan Dios?