Anto so Sankaimportantian ed Bilay Yo?

SIKATO so nibagan sankayamanan a too ed mundo. Say personal a kayamanan to so anayakup na binilbilyon iran dolyar. Sikato so dinaydayew na dakel a bilang akadampot ed pantok na aligwas. Ingen duaran taon sakbay na impatey to, inkuan nen J. Paul Getty: “Agnakaukolan a say kuarta so walaan na anggan anton siglaotan ed liket. Angangko ta dia ed kaermenan.”

Diad panangusil ed impasen na dakel a sankaimportantian ed bilay, say bantog a mayaman ed larak so peteg a maaligwas ed matalonan sukat. Balet kasin sikato so pinmatnag a singa sakey a toon akaromog na liket ed panamegley na samay nansagpotan ton maong a gamoran? Odino kasin sikato so pinmatnag a nagkalalo nen samay sakey ya akamoria ed kaunoran a say nansagpotan ton maong so aliwa met lamlamang ya importantin singa ontan?

Kugip tan Kapetegan

Anto so ipasen yon sankaimportantian ed bilay yo? Nayarin ikuan na arum a totoo a say kawayangan so pabpablien dan tuloy a kayamanan. Nayarin ikuan na arum a say aligwas so sankamakabaliksanan ed bilay da. Siansian saray arum so mangipasen ed personal a pakagegemtan a walad unaan nen say antokaman ni.

Anggamano satan so agda labay ya akuen, dakel a padron tan kiwakiwas ed bilay na totoo so mangibabagan say kuarta tan liket so peteg a sankaimportantian a bengatla ed bilay da. Sikara so determinadon tuloy ya onyaman odino manpirawat ed ‘panliket,’ ya agda la inenen so pakapaulian ed pamilya ra, bunigas da, tan espiritual a ligsa ra diad panggawa na ontan. Tan makapasagyat, impasakbay na Biblia a “diad kaunoran ya agew” et saray totoo so magmaliw a “maaro ed inkasikaran dili, maaro ed kuarta” tan “maaro ed likeliket imbes a maaro ed Dios.”​—2 Timoteo 3:1, 2, 4.

Bengatlan Lalon Importante

Si Jesu-Kristo, a manangiletneg ed Inkakristiano, so amalesa na manangusisay-nonot a tepet. “Kasin nagamoran na sakey a too so antokaman no nagungguna to so interon mundo balet nabalang to so bilay to?” so intepet to. (Marcos 8:36, Today’s English Version) Satan so isipen. Anto so nagawaan na sakey a too no anggapo so bilay? Anggapo!​—Eclesiastes 9:5, 10.

Nayarin sikayo ni so walad kalangweran tan sirin liknaan yon walaan kayo na daakan a panaon diad panggawa ed amin a bengatlan labay yon gawaen. Balet kasin sikayo so peteg ya ontan? Saray bakal, krimen, sakisakit, tan aksidente so mangakabil ed agnabilang a lalaki tan bibii a mabibiskeg​—bigla tan agnataltalaranan. Anto so agawa ed amin na saray plano tan kalakalat da?

Nayarin sikayo so walaan na pamilya odino nayarin matatken la. Sirin nayarin liknaen yo a nepeg yon isubsub so amin a panaon tan sagpot yo diad pangipaalagey na maligen ya arapen a para ed inkasikayo tan diad saray inararo yo sakbay a makapanisip kayo na antokaman ni. Ingen anto so ipapasen yon kaligenan? A singa kabat yo la, say implasyon, irap, tan kakaandian na anapan so angupot ed insimpen na dakel ed bilay, a tinaynanan da ran pobpobre tan andian na ayaman. Likud ni, diad saray kipapasen ed sankamundoan ya ontan lan tugingtuging, anto so garantiyan wadtan a saray bengatlan pansagpotan yon maong so agpaandien na arum iran agnailaloan ya ibuelta na saray nagawgawa?

Andi-duaruwan nanengneng yo, sirin, so kaimportantian na pangusisa ed saray personal a kalat yo. Sirin, anto so peteg ya ipapasen yon sankaimportantian ed bilay yo?