Aro a Manangiliktar
ASASAKBAY nen imbeneg a Setyembre duaran bagyo so nambanggaan ed Korea. Pigaran oras lambengat, arum iran pasen so nalgep na masulok a duamplon pulgada (50 cm) na uran. Say nansumpalan so sankaugesan a delap a dinmalan ed bansa diad 40 taon. Masulok a 200,000 totoo so naandian na kaabungan, tan 181 so nibalitan inatey o nanaandi. Saray apirdin kayarian so mankantidad na minilmilyon iran dolyar, tan agla naisip so ontan lan inkaderal na saray tantanaman.
Say uran so ginmapo ed Biernes na labi tan nantultuloy ed interon sanagew na Sabado. Anemiran dam ed atagtagey a Ham River so linmippua, say ilog so tinmagey na masulok a sakey tan kapalduan pie (0.5 m) ed labas na maligen a sukat to. Asasakbay ed kabuasan na Simba, anggapo so anggan anton pasakbay, tinmakos so samben, tan mabanengbeng ya ilog so inmagus ed saray kabangibang a pasen. Diad panaon ya inyepas na danum ed saman a labi, 60,000 totoo so naandian na abung ed sayan pasen.
Amin a pasen ed bansa so adelap. Balet say kabiseran syudad na Seoul, a wala so 174 a kongregasyon na saray Tasi nen Jehova, so sankagrabian, ilautla ed saray duaran pasen a sinerbian na saray Kongregasyon ed Mangwondong tan Sungnaedong. Saratan a dua et wala so dagup na 130 pamilyan Tasi so akabalang na kaabungan da. Tampol, saray Tasi nen Jehova ed Korea so kinmiwas ed pankaukolan na saray kapara ran Kristiano.
Anggaman saray linya na telepono ed dakel iran pasen so apulpultot, saray balita so ginmapon sinmabi ed sangan opisina na Watch Tower Society. Duaran komite so tampol ya aporma diad pangorganisa na panulong ed saray Tasi ed duaran sankagrabian ya adesyang a pasen. Saray managbiahen manangasikaso na sirkito ed Seoul so niganggan a mitalosan ed saray agagi pian nengnengen da no antoray pankaukolan odino no anto so nayarin nagawaan diad panulong ed saraman so duaran sankagrabian so deral ton pasen.
Saray Tasi ed arum iran pasen so akaamta ed kalaknab na deral diad panamegley na saray balita ed TV. Ginmapo ran tinmawag ed sanga ya ontetepet no iner so pangipawitan da ed saray donasyon da a para ed saray agagi a walad kairapan. (Say sanga na Watch Tower ed Hapon so tinmawag met, ya inyopresi to so tulong.) Saray donasyon a kuarta so ginmapon sinmabi a nanlapud amin a pasen na bansa. Saray belas, pansit, tan arum niran kakanen, pati saray kawes tan ules so apawala met. Saraya so tampol ya imbunog na komite a wadman. Saray agagi so tinmulong a mabunbunlok ya agnambayag et say opisina ed Seoul so angipakabat ya agla nakaukolan so dakel nin kuarta a donasyon.
Tinmumbok et say baleg a kimey na panaglinis. Talonlasus a Tastasi so nanboluntaryo ed sayan kimey. Sikara so nibakin sanderua ed kada abung ya ontulong a manlinis tan ontulong a mangipawil ed saray bengatla ed datin kipapasen a tampol no nayari. Naimatonan na sakey a boluntaryo: “Diad panamegley na inkipasal ed organisasyon na asamblea tan kumbension tayo, amta mi no panon so pikoopera tan pakagawa ed saray bengatla.” Dakel ed komunidad so agonigon sanen anengneng da so arum a totoon mangaanamot ed saray biktima. Diad biek a dapag, sikara so nikelawan a makanengneng ed kalmada, magayaga, tan mabunlok a pananulong na Tastasi, anggan diad ontan lan mairap a kipapasen.
“Aminsan lamet a nipanengneng,” so inkuan na sakey a Tasi ed saman a pasen, “a say desyang so mamaandi ed materyal a kayarian tayo a tampol, balet agto napaandi so pananisia tayo.” Tekep na saray lua na gayaga, inkuan na sakey a Tasin bii: “Anggaman abalang mi so amin a bengatla, sikami so aliwan pakaskasi. Say ampetang a panangaro na agagi mi so angiter na biskeg ed sikami.”
Tua, makapakelaw so pakanengneng na aro ya onkikiwas. Say bulos-linawan kiwas na saray Tastasi ed saman a pasen tan say tampol ya inkiwas na saraman so ‘misiglaotan ed pananisia’ so matalona. (Galacia 6:10) Saray agagi ed Korea so pinaseseg a tuloy na sayan eksperiensia. Sikara so kinumbinse na organisadon-tuloy a maaron pananulong a wala lambengat so sakey a paliwawa—say aro so sinmabin mangiliktar!