Ileta i Jọn Ọrukaro
4 Imizu mi vwo ẹgwọlọ kpahen, rhẹ ẹmro ephian ra tare taghene i nẹ obẹ Osolobrugwẹ rhe,* yẹ are ine vwo imwẹro kpahe-en. Ọrẹn, are i damu aruẹ ẹmro erana* ni, sẹ aye i ghini nẹ obẹ Osolobrugwẹ rhe, fọkime emẹraro efian buebun i ruẹ uvuẹn akpọ na ne.
2 Omana yẹ are ine ru rhe ẹmro ro nẹ obẹ Osolobrugwẹ rhe: Kẹmro kẹmro ro kwerhọ ye taghene i Jesu Kristi ọ rhere rhẹ ugboma onyakpọ, o nẹ obẹ Osolobrugwẹ rhe. 3 Ọrẹn, kẹmro kẹmro ro vwo kwerhọ ye taghene i Jesu ọ rhere rhẹ ugboma onyakpọ, o nẹ obẹ Osolobrugwẹ rhe-e. Habaye, ọnana yẹ ẹmro ohworho rọ hasuẹ i Kristi na, rẹ are i rhonrin taghene ọ sa. Vwana, ọ ha uvuẹn akpọ na ne.
4 Emọ mẹ ekokamu, are i nẹ obẹ Osolobrugwẹ rhe, are i ji fiẹ aye kparobọ ne, fọkime ohworho ro vwo okugbe rhẹ are, ọ do ghwẹ ohworho ro vwo okugbe rhẹ akpọ na. 5 Aye i nẹ uvuẹn akpọ na rhe, ọnana yọ soriẹ aye a tẹmro ri nẹ uvuẹn akpọ na rhe, akpọ na nọ ji kerhọ aye. 6 Ọwan i nẹ obẹ Osolobrugwẹ rhe. Kohworho kohworho ro rhe Osolobrugwẹ ọ kerhọ ọwan. Kohworho kohworho ro vwo nẹ obẹ Osolobrugwẹ rhe, ọ vwọ kerhọ ọwa-an. Nyoma ọnana ye ne rhe ovẹnẹ rọ ha uvwre ẹmro urhomẹmro ro nẹ obẹ Osolobrugwẹ rhe ọrhẹ ẹmro efian.
7 Imizu mi vwo ẹgwọlọ kpahen, jene rhe vwo ẹgwọlọ kpahen owuowọnwan, fọkime ẹgwọlọ o nẹ obẹ Osolobrugwẹ rhe. Kohworho kohworho ro vwo ẹgwọlọ, ọmọ Osolobrugwẹ, o ji rhe Osolobrugwẹ. 8 Kohworho kohworho ro vwo vwo ẹgwọlọ, o rhe Osolobrugwẹ-ẹ, fọkime Osolobrugwẹ yẹ ẹgwọlọ. 9 Nyoma ọnana yẹ ọwan e rhe taghene Osolobrugwẹ o vwo ẹgwọlọ kpahen ọwan, Osolobrugwẹ o dje Ọmọyen ọghoghanren owu ọvo rhiẹ akpọ na, neneyo a sabu nyoma yen vwo arhọ. 10 Omana ye dje ẹgwọlọ na rẹn ọwan lele: Rhẹ ọwan yi vwo ẹgwọlọ kpahen Osolobrugwẹ-ẹ. Ukpomaran, ọye yo vwo ẹgwọlọ kpahen ọwan ji dje Ọmọyen no mo ze izobo ẹkwaphiẹrhọ* fọkiẹ edandan ọwan.
11 Imizu mi vwo ẹgwọlọ kpahen, orhianẹ omana yẹ Osolobrugwẹ o vwo ẹgwọlọ kpahen ọwan, nọyẹ ohwan o rhenrhen vi ọwan re ne ji vwo ẹgwọlọ kpahen owuowọnwan. 12 Ohworho owuorowu ọ ji mẹrẹn Osolobrugwẹ dẹ-ẹ. Erhe vwo ẹgwọlọ kpahen owuowọnwan ọke ephian, Osolobrugwẹ no no rho lele ọwan rhirhiẹ ye, ẹgwọlọ ọnẹyen nọ nọ ji gba uvuẹn oma ọwan. 13 Nyoma ọnana ye ne rhe taghene e vwo okugbe rhẹ Osolobrugwẹ, ọye o ji vwo okugbe rhẹ ọwan, fọkime o tiobọnẹ ẹhẹn ọfuanfon ọnẹyen rẹn ọwan ne. 14 Habaye, ọwan i mẹrenriẹn, ne ji se oseri kpahiẹn taghene Ọsẹ na, o dje Ọmọyen no mo rhiẹ Osimi ọrẹ akpọ na. 15 Kohworho kohworho ro kwerhọ ye taghene i Jesu Ọmọ Osolobrugwẹ, Osolobrugwẹ ono vwo okugbe rhẹ ọravwọ, ọravwọ no no ji vwo okugbe rhẹ Osolobrugwẹ. 16 Ọwan i me rhe kpahen ẹgwọlọ rẹ Osolobrugwẹ o vwo kpahen ọwan ne, e ji vwo imwẹro kpahiẹn.
Osolobrugwẹ yẹ ẹgwọlọ. Ohworho ro dje ẹgwọlọ phia, ono rho vwo okugbe rhẹ Osolobrugwẹ, Osolobrugwẹ no no ji vwo okugbe rhẹ ọravwọ. 17 Nyoma ọnana ye ruẹ ẹgwọlọ gba uvuẹn oma ọwan, neneyo e vwo ugbomọphẹ ẹmro ẹta* uvuẹn ẹdẹ ẹzenguon na, fọkime jerẹ oborẹ i Jesu ọ havwọ, omaran ọwan i ji havwọ uvuẹn akpọ ọnana. 18 Ẹgwọlọ ọ vwọ zofẹ-ẹn, ọrẹn ẹgwọlọ rọ gbare, o le ofẹn, fọkime ofẹn o tiẹ ọwan rierhumu. Itiọrurhomẹmro, orhianẹ ohworho ọ zofẹn, nọyẹ e ji ruẹ ẹgwọlọ gba uvuẹn omaye-en. 19 Ọwan e dje ẹgwọlọ phia, fọkime ọye yo kiki vwo ẹgwọlọ kpahen ọwan.
20 Ohworho ọrhọ ta taghene “Mi vwo ẹgwọlọ kpahen Osolobrugwẹ,” ọrẹn o vwo utuoma kpahen omizie, ọravwọ ọmọronfian. Fọkime ohworho ro vwo vwo ẹgwọlọ kpahen omizie rọ mẹrẹn, ọ sabu vwo ẹgwọlọ kpahen Osolobrugwẹ rọ vwọ mẹrẹ-ẹn. 21 Habaye, o je akama ọnana rẹn ọwan taghene kohworho kohworho ro vwo ẹgwọlọ kpahen Osolobrugwẹ, ono vi vwo ẹgwọlọ kpahen omizie.