Ileta i Jọn Ọrukaro
3 Are i gbe ni aruẹ ẹgwọlọ rẹ Ọsẹ na o dje rẹn ọwan, nyoma ro kwe ne se ọwan emọ Osolobrugwẹ! Itiọrurhomẹmro, ọwan ghini emọyen. Ọnana yọ soriẹ akpọ na o vwo rhe ọwan, fọkime o ji rhe Osolobrugwẹ-ẹ. 2 Imizu mi vwo ẹgwọlọ kpahen, ọwan i me rhiẹ emọ Osolobrugwẹ ne, ọrẹn e ji dje rẹn ọwan oborẹ ene rhirhiẹ-ẹ. Ọwan i rheri taghene ọrhọ homaphia ne, ọwan ni na họhiẹ, fọkime ana mẹrẹn oborẹ ọ vi havwọ dẹn. 3 Kohworho kohworho ro vwo ifiẹrorhọ ọnana kpahiẹn, o ruẹ omayen fuan, jerẹ oborẹ ohworho ọrana ọ ji fon.
4 Kohworho kohworho ro vwobọrhọ ọdandan, o gbe urhi ghwẹ. Habaye, ọdandan yẹ urhi egbeghwu. 5 Are i rheri taghene ọye ọ homaphia nọ sabu tiẹ edandan ọwan notọre. Habaye, ọdandan ọ ha uvuẹn omaye-en. 6 Kohworho kohworho ro vwo okugbe rhẹ ọye, o vwo vwobọrhọ ọdanda-an. Ohworho ro vwobọrhọ ọdandan, ọ ji mẹriẹn dẹ-ẹ, o ji rhe yi-i. 7 Emọ mẹ ekokamu, are i vwe jenẹ ohworho owuorowu o sun are vru-u. Ohworho ro vwobọrhọ irueruo ọsoso, ọvwata, jerẹ oborẹ ohworho ọrana o rhiẹ ọvwata. 8 Ohworho ro vwobọrhọ ọdandan, o nẹ obẹ i Dẹbolo rhe, fọkime nẹ ọtonrhọ rhe* yi Dẹbolo o ruẹ ọdandan. Fọkiẹ ọnana yẹ Ọmọ Osolobrugwẹ ọ homaphia, neneyo ọ ghwọghọ ewian i Dẹbolo.
9 Kohworho kohworho ro rhiẹ ọmọ Osolobrugwẹ, o vwo vwobọrhọ ọdanda-an, fọkime ukeri* Osolobrugwẹ ọ ha uvuẹn oma ohworho ọrana. Ọravwọ ọ sabu vwobọrhọ ọdanda-an, fọkime ọye ọmọ Osolobrugwẹ. 10 Nyoma ọnana ye rhe ovẹnẹ rọ ha uvwre emọ Osolobrugwẹ ọrhẹ emọ i Dẹbolo: Kohworho kohworho ro vwo vwobọrhọ irueruo ọvwata, o nẹ obẹ Osolobrugwẹ rhe-e. Omaran ji te ohworho ro vwo vwo ẹgwọlọ kpahen omizie. 11 Fọkime ọnana yẹ akama rẹ are i rhon nẹ ọtonrhọ rhe, taghene ọwan i vwo ẹgwọlọ kpahen owuowọnwan. 12 A vwa họhọ i Ken ro nẹ obẹ ọvwọkon na rhe ro ji kpe omizie-e. Mesoriẹ o kpe omizie hwu? Fọkime ewian enẹyen ibiobiomu, ọrẹn ewian omizie erẹ ọvwata.
13 Imizu, are i vwe je no gbe are unu taghene akpọ na o vwo utuoma kpahen are-e. 14 Ọwan i rheri taghene a zẹ vabọ uhwu me vwo arhọ ne, fọkime e vwo ẹgwọlọ kpahen imizu na. Ohworho ro vwo vwo ẹgwọlọ, ọ ha erhirhiẹ uhwu. 15 Kohworho kohworho ro vwo utuoma kpahen omizie, ozighẹ.* Are i rheri taghene o vwo ohworho owuorowu ro dozighẹ ro no vwo arhọ i bẹmẹdẹ-ẹ. 16 Ọwan i me rhe oborẹ ẹgwọlọ o mevirhọ ne, fọkime i Jesu ọ ha arhọ ye kpahontọre fọkiẹ ọwan. Omarana, ohwan o rhenrhen vi ọwan ra na ha arhọ ọwan kpahontọre fọkiẹ imizu ọwan. 17 Orhianẹ ohworho o vwo ekwakwa erẹ akpọ ọnana, nọ mẹrẹn omizie rọ ha erhirhiẹ ọkanronmẹ, ọrẹn o kwe gbe arodọmẹ riẹ-ẹn, marhẹ ene ru sabu ta taghene ọravwọ o vwo ẹgwọlọ kpahen Osolobrugwẹ? 18 Emọ mẹ ekokamu, e vwe jenẹ ẹgwọlọ ọwan o rhiẹ ọrẹ ẹmro yanghene ọrẹ ẹrẹnmo ọvo-o, ọrẹn e djeyi phia nyoma irueruo ọrhẹ urhomẹmro.
19 Nyoma ọnana yẹ ọwan ine rhe taghene ọwan i ha obọrẹ urhomẹmro na, ne ne ji vwo imwẹro uvuẹn ọmudu ọwan obaruiẹ, 20 ọrhọ tobọ rhianẹ ọmudu ọwan o brorhiẹn kpe ọwan, fọkime Osolobrugwẹ ọ do ghwẹ ọmudu ọwan, o ji rhe ekwakwa ephian. 21 Imizu mi vwo ẹgwọlọ kpahen, orhianẹ ọmudu ọwan o vwo brorhiẹn kpe ọwa-an, nọyẹ e vwo ugbomọphẹ ẹmro ẹta uvuẹn obaro Osolobrugwẹ. 22 Habaye, kemru kemru ra nekpẹn yen mie Osolobrugwẹ, o tiobọnie rẹn ọwan fọkime a nyalele ekama yen, ji ruẹ oborẹ oserhọ uvuẹn ikẹruiẹ. 23 Itiọrurhomẹmro, ọnana yẹ akama yen taghene ọwan i vwo esegburhomẹmro kpahen odẹ Ọmọyen ro rhiẹ i Jesu Kristi, ji vwo ẹgwọlọ kpahen owuowọnwan jerẹ oborẹ o je akama rẹn ọwan. 24 Habaye, ohworho rọ nyalele ekama enẹyen, o vwo okugbe rhẹ ọye, ọye o ji vwo okugbe rhẹ ọravwọ. Ọwan i rheri taghene ọye o vwo okugbe rhẹ ọwan, fọkiẹ ẹhẹn ọfuanfon na ro tiobọnu rẹn ọwan.