Satọde, April 18
Ọrẹn, ohworho orho ruẹ ọdandan dede, ọwan i vwo userhumu.—1 John 2:1.
Orhienbro rọ mai ghanran rẹ onyakpọ ọnọ sabu bru, yẹ ọrẹ ọnọ homakpahontọre rẹn i Jehova ji rhiẹ usuẹn ekrun Ọnẹyen ra ga ye uvuẹn ọsoso akpọ na. Jehova ọ gwọlọre nẹ ọwan ephian i ru te omaran. Mesoriẹ? Ọ gwọlọre nẹ aye i rhiẹ igbehian yen ji nyerẹn bẹmẹdẹ. (Deut. 30:19, 20; Gal. 6:7, 8) Ọrẹn, Jehova ọ vwọ gba ohworho ga ye-e. Ọ ha uphẹn rẹn owuowọnwan nẹ aye i brorhiẹn oborẹ aye ine ruo. Ọrẹn, me yọ nọ phia orhianẹ Olele Kristi ro bromarhame ne, o gbe urhi Osolobrugwẹ ghwu ji ruẹ ọdandan ọghwaghwa? Ọrhọ ghwẹriẹ-ẹ, ene vi tie nẹ ukoko na. (1 Cor. 5:13) Arha tobọ tie nie ne, Jehova o ji fiẹrorhọ taghene oruọdandan na ọnọ rharhumu bruie rhe. Itiọrurhomẹmro, ọnana yọ soriẹ i Jehova o tiobọnẹ izobo otan na rẹn ọwan—na sabu harhomu edandan ihworho ri ghwẹriẹre. Osolobrugwẹ ẹgwọlọ ọwan, ọ ha use rẹn iruedandan ephian nẹ aye i ghwẹriẹ.—Zech. 1:3; Rom. 2:4; Jas. 4:8. w24.08 14 ¶1-2
Sọnde, April 19
Wu rhe vwo ẹghwanren, ọmudu mẹ nọ nọ ghọghọ.—Prov. 23:15.
Ọke i John ọ ya ileta ọresa ye, ihworho ezẹko e kerabọ uyono efian ji suẹ oghalẹ uvuẹn ukoko na. Ọrẹn, awọrọ e ji “ruẹ riaro uvuẹn urhomẹmro na.” Aye a huphele i Jehova ji “nyalele ekama enẹyen.” (2 John 4, 6) Itiọrurhomẹmro, Ilele Kristi enana i lẹrhẹ oma merhen i John, omaran ji te i Jehova. (Prov. 27:11) Me yẹ ọnana o yonirin ọwan? Arha fuephan kpahen i Jehova, ne vwo aghọghọ. (1 John 5:3) Jerẹ udje, oma ọ merhen ọwan taghene a lẹrhẹ oma merhen i Jehova. Oma ọ merhen i Jehova ọke ọrhọ mẹrẹn ọwan ra tiẹn edamuni akpọ na, ji rhiabọ dede urhomẹmro na. Awọrọ obẹ odjuwu a ji ghọghọ. (Luke 15:10) Oma ọ ji merhen ọwan ọke arha mẹrẹn imizu ọwan ra fuephan ga i Jehova. (2 Thess. 1:4) Akpọ Echu ọrhọ nyavrẹn ne, oma ọnọ merhan ọwan taghene a fuephan kpahen i Jehova. w24.11 12 ¶17-18
Mọnde, April 20
E jenẹ owuowọnwan ọrhọ gwọlọ erhumu ọreva ye, ukperẹ ono rhiẹ ọnẹyen ọvo.—1 Cor. 10:24.
Marhẹ wu ne ni ohworho na jiri te bọmọke wu na ki ta riẹn taghene wu vwo ẹgwọlọ kpahiẹn? Wu rhe brokpakpa ta riẹn, ọnọ họhọ taghene wu vwe roro vwẹre we ki brorhiẹ-ẹn. (Prov. 29:20) Ọrẹn, wu rhe kpọke phan, nọ nọ họhọ taghene we rhe oborẹ e brorhiẹ-ẹn, maido ọravwọ orho rhe taghene wu vwo ẹgwọlọ kpahiẹn. (Eccl. 11:4) Karorhọ, wu na sabu ta rẹn ohworho kpahen oborẹ we roro, ọrhọ tobọ rhianẹ o ji mwuo ẹro sẹ wu na rọnmiẹ-ẹ. Ọrẹn, jenẹ o mwuo ẹro taghene wu mwuegbe orọnmo ne, habaye ji vwo yi rhẹ ẹhẹn taghene ọravwọ ọnọ sabu rhiẹ ọro serhọ wẹn. Me wu ne ruo wu rha djokarhọ taghene ohworho o vwo ẹgwọlọ kpahuọn? We rhe vwo ẹgwọlọ kpahiẹ-ẹn, gbe djeyi phia nyoma uruemru ọnọ. Ono rhiẹ oborẹ ọsọre, ne wu lẹrhẹ ọravwọ roro taghene wu vwo ẹgwọlọ kpahiẹn, ọrẹn orhiomaran yọ havwọ-ọ.—Eph. 4:25. w24.05 22-23 ¶9-10