Ileta i Jọn Ọrukaro
5 Kohworho kohworho ro vwo imwẹro taghene Jesu yi Kristi na, ọravwọ ọmọ Osolobrugwẹ. Kohworho kohworho ro vwo ẹgwọlọ kpahen Ọsẹ na ro tiobọnẹ arhọ, o ji vwo ẹgwọlọ kpahen emọyen. 2 Nyoma ọnana yẹ ọwan ine rhe taghene e vwo ẹgwọlọ kpahen emọ Osolobrugwẹ, ọwan i rhe vwo ẹgwọlọ kpahen Osolobrugwẹ ji nyalele ekama yen. 3 Fọkime ọnana yẹ oborẹ o mevirhọ re ne vwo ẹgwọlọ kpahen Osolobrugwẹ, ọrẹ ọwan ina nyalele ekama enẹyen, ọrẹn ekama enẹyen e rhiẹ ehwan eghwaghwa-a. 4 Fọkime kohworho kohworho* ro rhiẹ ọmọ Osolobrugwẹ, o fiẹ akpọ na kparobọ ne. Habaye, esegburhomẹmro ọwan yẹ oborẹ ọ lẹrherẹ ọwan fiẹ akpọ na kparobọ.
5 Ọrọmo yọ nọ sabu fiẹ akpọ na kparobọ? Rhẹ ohworho ro vwo esegburhomẹmro taghene i Jesu yẹ Ọmọ Osolobrugwẹ? 6 Jesu Kristi ọnana yọ rhere nyoma ame ọrhẹ ọbara. Rhi nyoma ame ọvo-o, ọrẹn nyoma ame ọrhẹ ọbara. Ẹhẹn ọfuanfon na no se oseri kpahiẹn, fọkime ẹhẹn ọfuanfon na yẹ urhomẹmro na. 7 Iseri esa yi havwiẹ: 8 ẹhẹn ọfuanfon na, ọrhẹ ame na kugbe ọbara na, esa enana i vwo ekwerhọ owu.
9 Orhianẹ e kwerhọ iseri ituakpọ, nọyẹ o fori ne ji kwerhọ oseri Osolobrugwẹ rọ maido na. Fọkime oborẹ Osolobrugwẹ o se oseri kpahan yẹ Ọmọyen. 10 Ohworho ro vwo esegburhomẹmro kpahen Ọmọ Osolobrugwẹ, o vwo oseri na uvuẹn omayen. Ohworho ro vwo vwo esegburhomẹmro kpahen Osolobrugwẹ, o rurie rhiẹ ọmọrenfian ne. Fọkime ọravwọ o vwo esegburhomẹmro kpahen oseri Osolobrugwẹ o seri kpahen Ọmọye-en. 11 Ọnana yẹ oseri na taghene Osolobrugwẹ ọ yẹrẹ ọwan arhọ i bẹmẹdẹ, nyoma Ọmọyen yo tiobọnẹ arhọ ọnana. 12 Ohworho ro rhiabọ dede Ọmọ na o vwo arhọ ọnana, ohworho ro vwo rhiabọ dede Ọmọ Osolobrugwẹ, o vwo arhọ ọnana-a.
13 Mia ya ekwakwa enana vwe are, neneyo are i rhe taghene are ine vwo arhọ i bẹmẹdẹ, fọkime are i vwo esegburhomẹmro kpahen odẹ Ọmọ Osolobrugwẹ. 14 Ọnana yẹ imwẹro* rẹ ọwan i vwo kpahiẹn taghene kemru kemru ra nekpẹn mie yi lele ọhọriẹ, o rhon ọwan. 15 Erhe rhe taghene o rhon ọwan sekpahen i kemru kemru ra nekpẹn yen, ọwan ne rhe taghene ene vwo ekwakwa ra nekpẹn yen na, fọkime ọye yẹ ọwan i nekpẹn aye mie.
16 Ohworho ọrhọ mẹrẹn omizie ro ruẹ ọdandan ro vwo lele fiẹ uhwu, jenọ nẹrhomo vwe Osolobrugwẹ. Osolobrugwẹ nọ nọ yẹ omizie na arhọ, ee, ọnana o sekpahen ihworho ri vwe ruẹ ọdandan ro lele fiẹ uhwu. Ọrẹn, o vwo ọdandan ro lele fiẹ uhwu. Mi vwa ta rẹn ohworho ọrana nọ nẹrhomo kpahen aruẹ ọdandan ọrana-a. 17 Irueruo ibiobiomu ephian, ọdandan. Ọrẹn, o vwo ọdandan ro vwo lele fiẹ uhwu.
18 Ọwan i rheri taghene kohworho kohworho ro rhiẹ ọmọ Osolobrugwẹ, o vwo ruẹ ọdanda-an. Ọrẹn, Ọmọ Osolobrugwẹ* ọ sẹrorẹ ọravwọ, ọvwọkon na ọ ji sabu sanbọmwuie-e. 19 Ọwan i rheri taghene e nẹ obẹ Osolobrugwẹ rhe, ọrẹn ọsoso akpọ na ọ ha uvuẹn obọ ọvwọkon na. 20 Ọwan i rheri taghene Ọmọ Osolobrugwẹ ọ rhere ji yẹ ọwan oniso,* neneyo a sabu vwo irherhe ọrẹ Ohworho urhomẹmro na. E vwo okugbe rhẹ Ohworho urhomẹmro na nyoma Ọmọyen ro rhiẹ i Jesu Kristi. Ọnana yẹ Osolobrugwẹ urhomẹmro na ro tiobọnẹ arhọ i bẹmẹdẹ. 21 Emọ mẹ ekokamu, are i kẹnoma rẹn emẹgọ.