Ileta Ọreva ra ya Vwe Itu i Kọrint
4 Omarana, ra mẹriẹn taghene ame i vwo iruo Uvie ọnana fọkiẹ arodọmẹ re dje rẹn ame na, ame i vwe fiobọrhotọre-e. 2 Ọrẹn, ame a tiẹn ekwakwa re ruẹ uvuẹn odjahen ra suẹ ofa. Ame i vwe ruẹ irueruo ọphiẹrhọ yanghene ghwa ẹmro Osolobrugwẹ-ẹ. Ọrẹn, ame erhe ghwoghwo urhomẹmro na, ame ne rhiẹ omamọ udje rẹn ihworho ephian* uvuẹn obaro Osolobrugwẹ. 3 Itiọrurhomẹmro, orhianẹ e rhurhu iyẹnrẹn esiri rẹ ame e ghwoghwo na, nọyẹ e rhurhurie uvwre ihworho ri na ghwọghọ. 4 Usuẹn aye yẹ ihworho ri vwe rhiẹ idibo i Kristi rẹ osolobrugwẹ enyerakpọ ọnana,* o tuẹ ukẹro ọmudu aye ne, neneyo ukpẹ ọrẹ obọdẹn iyẹnrẹn esiri ro sekpahen i Kristi na ro rhiẹ ohọhọme Osolobrugwẹ, o jo rho lo mwu aye. 5 Fọkime ame i vwe ghwoghwo kpahen oma ame-e. Ukpomaran, ame e ghwoghwo kpahen i Jesu Kristi taghene ọye yẹ Ọrovwori, ọrhẹ oborẹ ame i ru rhiẹ evrẹn are fọkiẹ i Jesu. 6 Fọkime Osolobrugwẹ yọ tariẹ: “Jenẹ ukpẹ o lo nẹ uvuẹn okuku rhe.” Omarana, no lo ukpẹ mwu ọmudu ame, neneyo ọmudu ame ọ sabu lo obọdẹn irherhe Osolobrugwẹ phia nyoma ughwaro i Kristi.
7 Ọrẹn, ame i vwo efe ọnana uvuẹn eriẹ, neneyo omẹgbanhon rọ vrẹn ovwan o nẹ obẹ Osolobrugwẹ rhe, ukperẹ ono rhiẹ obẹ ame. 8 Ame i dẹrughwaroghwu ọhiẹn ọgbogbanhon ọrẹ kizede kizede, ọrẹn ọnana ọ gba ame rhotọre-e. Ofu o zeri ame, ọrẹn izede o ji rhiefirhọ rẹn ame.* 9 A kparehaso ame, ọrẹn a sẹrerhumuji ame-e, e fomirin ame se, ọrẹn ame e hwu-u. 10 Ọke ephian yẹ ame e diẹn erhirhiẹ imwofẹn uhwu jerẹ i Jesu, neneyo a sabu mẹrẹn aruẹ akpọ i Jesu uvuẹn ugboma ame. 11 Fọkime ame re nyerẹn a dẹrughwaroghwu uhwu fọkiẹ i Jesu, neneyo a mẹrẹn akpọ i Jesu uvuẹn ugboma ame ro hwuẹ na. 12 Omarana, uhwu ọ wian uvuẹn oma ame, ọrẹn arhọ ọ ha uvuẹn oma are.
13 Vwana, fọkime ame i vwo aruẹ esegburhomẹmro ra ya kpahen taghene: “Mi dje esegburhomẹmro phia, omarana ni mi tẹmro,” ame na tẹmro fọkime ame i ji dje esegburhomẹmro phia. 14 Fọkime ame i rheri taghene Ohworho rọ rhọmọ i Jesu nuhwu na, ọnọ ji rhọmọ ame nuhwu bru i Jesu, nọ nọ ha ame ọrhẹ are bru i Jesu. 15 E ruẹ ekwakwa enana ephian fọkiẹ are, neneyo ẹghẹlẹ esiri rode na orho buẹnrhọ buẹnrhọ, fọkime ihworho buebun a kpẹmẹ Osolobrugwẹ fọkiẹ odidi ọnẹyen.
16 Omarana, ame i vwe fiobọrhotọre-e, ọrhọ tobọ rhianẹ ohworho ame i havwọ uvuẹn otafe ọ ghwọghọ fughwẹ, ohworho ame i havwọ uvuien ọ kpokpọ rhọ kẹdẹkẹdẹ. 17 Dedevwo ukpokpogho* na ọrẹ ibiọke, ọ ji pharhe, ọ lẹrhẹ ame vwo odidi rọ doro omamọ,* ro no ji rhirhiẹ ye bẹmẹdẹ. 18 Ame na tẹnrovi ekwakwa ra vwa mẹrẹn, ukperẹ ono rhiẹ ekwakwa ra mẹrẹn. Fọkime ekwakwa ra mẹrẹn erẹ ibiọke, ọrẹn ekwakwa ra vwa mẹrẹn ine rhirhiẹ ye bẹmẹdẹ.