Ileta Ọreva ra ya Vwe Itu i Kọrint
3 Ame na rharhumu jiri oma ame rẹn are ọgbọrọrọ? Gbinẹ ame ina ya ileta ujiri vwe are yanghene gwọlọ ileta ujiri mie are jerẹ oborẹ ihworho ezẹko e ruẹ? 2 Are yẹ ileta ame ra ya rhẹ uvuẹn ọmudu ame, ihworho ephian i rhe kpahiẹn, aye e ji seyi. 3 Fọkime o fiotọre taghene are yẹ ileta i Kristi rẹ ame ri rhiẹ idibo i yare, rhẹ inki ya ha ya ye-e. Ukpomaran, a yariẹ nyoma ẹhẹn Osolobrugwẹ ro nyerẹn na. A ya ye rhẹ atita ephophẹghẹ-ẹ, ọrẹn a yariẹ rhẹ uhwen, nọyẹ ọmudu are.
4 Ame i vwo aruẹ imwẹro ọnana kpahen Osolobrugwẹ nyoma i Kristi. 5 Ame i sabu hobọ fiudu taghene ame i dabu mwuovwan emru owuorowu-u, ọrẹn Osolobrugwẹ yọ dabu lẹrhẹ ame mwuovwan. 6 Ọye yọ ghini lẹrhẹ ame mwuovwan rẹ ame ine rhiẹ idibo ọrẹ ọphọ ọkpokpọ na, rhẹ ọrẹ urhi ra ya rhotọre-e, ọrẹn ọrẹ ẹhẹn na. Fọkime urhi ra ya rhotọre na o brorhiẹn uhwu kpe ohworho, ọrẹn ọrẹ ẹhẹn na, ọ lẹrhẹ ohworho vwo arhọ.
7 Vwana, urhi rọ suẹ uhwu ra ya rhẹ itita na ọ rhere rhẹ odidi, te erhirhiẹ emọ Izrẹl i vwa sabu ni ughwaro i Mosis fọkiẹ odidi ughwaro ọnẹyen. Ọke oru, odidi ọrana no ji notọre. 8 Omarana, o fo nẹ ewian erẹ ẹhẹn na i vwo odidi rọ ghwẹ omaran? 9 Orhianẹ urhi ro brorhiẹn kpe ohworho o vwo odidi, nọyẹ ewian ra lẹrhẹ ohworho rhiẹ ọvwata ine ghini vwo odidi rode! 10 Itiọrurhomẹmro, oborẹ ọ tobọ vwo odidi vẹrhẹ bi, e tiẹ odidi nẹ omayen ne fọkiẹ odidi rọ ghwẹ riẹ. 11 Orhianẹ oborẹ ene ti notọre ọ rhere rhẹ odidi, nọyẹ ọro no rhirhiẹ ye ono vwo odidi rode!
12 Ra mẹriẹn taghene ọwan i vwo aruẹ ifiẹrorhọ ọnana, ọwan na tẹmro rhẹ ugbomọphẹ rode. 13 Ọwan i vwe ruẹ oborẹ i Mosis o ruru ọke rọ ha onẹrhon rhurhu ughwaruiẹ-ẹ, neneyo emọ Izrẹl i ja rha tẹnrovi oba oborẹ ene ti notọre. 14 Ọrẹn, aye a sabu vwẹruọ ye-e. Me te inyenana, onẹrhon owu ọvo na o ji rhurhu ọmudu aye kọke kọke re se ọphọ ahwanren na, fọkime nyoma i Kristi ọvo ya na sabu tie nie. 15 Itiọrurhomẹmro, me te inyenana kọke kọke re se urhi Mosis, onẹrhon no rhurhu ọmudu aye. 16 Ọrẹn, ohworho ọrhọ ghwẹriẹ bru i Jehova,* ne tiẹ onẹrhon na nie. 17 Vwana, Jehova* yẹ Ẹhẹn na, ekete ẹhẹn i Jehova* ọ havwọ, ugbomọphẹ ọ ha avwaye. 18 Harẹn ọwan ephian ri vwa ha onẹrhon rhurhu ughwaro, ọwan ne lo odidi Jehova* phia jerẹ ujegbe, na họhọ Osolobrugwẹ ji lo odidie phia kọke kọke,* jerẹ oborẹ i Jehova* ro rhiẹ Ẹhẹn* na o ruie.