Ileta Ọreva ra ya Vwe Itu i Kọrint
5 Ame i rheri taghene arha ghwọghọ oghwa ame rọ ha otọrakpọ na, nọyẹ ibọkpọ ọnana, Osolobrugwẹ ono tiobọnu oghwa ọrọrọ harẹn ame, nọyẹ oghwa ra vwa ha obọ bọn ro no rhirhiẹ ye bẹmẹdẹ obẹ idjuwu. 2 Fọkime ame a guan uvuẹn oghwa ọnana, ame i vwo omwemẹ ọgbogbanhon ame ine kwuẹ ọro nẹ obẹ odjuwu* rhe na rhọ. 3 Neneyo ame i rhe kuie rhọ, ame i rha banfirhọ-ọ. 4 Itiọrurhomẹmro, ame ri ha uvuẹn ibọkpọ ọnana a guan, ẹhẹn ame o ji seriotọre. Fọkime ame a gwọlọ kuẹ ọnana nu-u, ọrẹn ame i gwọlọ kuẹ ọreva ye na rhọ, neneyo arhọ ọ sabu mwu oborẹ o hwuẹ na rọ. 5 Osolobrugwẹ yo mwuegbe ame hẹrhẹ aruẹ akpọ ọnana, nọ ji yẹ ame ẹhẹn ọfuanfon na no rhiẹ oka imwẹro kpahen* oborẹ ọ sa na.
6 Omarana, ame i vwo imwẹro ọke ephian ji rhe taghene uvwrọke ame e vwo oghwa ame uvuẹn ugboma ọnana, ame i serabọ rẹn Ọrovwori na. 7 Fọkime ame a nya rhẹ esegburhomẹmro, rhi nyoma oborẹ a mẹrẹ-ẹn. 8 Ọrẹn, ame i vwo imwẹro ọgbogbanhon, oma ọnọ ji merhen ame orhianẹ ame i nyajẹ ugboma ọnana vwo, ye lele Ọrovwori na rhirhiẹ. 9 Omarana, sẹ ame e lelie rhirhiẹ yanghene ame i serabọ riẹn, ame na damoma neneyo ame i vwo ekwerhọ ọnẹyen. 10 Fọkime ọwan ephian ine mevi* obaro aga ẹzenguon i Kristi na, neneyo a kwosa rẹn owuowọnwan lele oborẹ o ruru ọke ro ji nyerẹn uvuẹn ugboma na, sẹ orhorhomu yanghene obiobiomu.*
11 Omarana, fọkime ame i rhe oborẹ ofẹnzẹ Ọrovwori na o mevirhọ, ame na damoma wene ọmudu ihworho, ọrẹn Osolobrugwẹ ọ dabu rhe ame. Habaye, mie ji fiẹrorhọ taghene ẹhẹn obrorhiẹn are ọ ji dabu rhe ame. 12 Ame i vwa rharhumu jiri oma ame rẹn are-e, ukpomaran ame a yẹ are oborẹ ọnọ lẹrhẹ are ha ame kparoma. Neneyo are i sabu kpahenrhọ rẹn ihworho ra yenyan kpahen oborẹ ohworho ọ havwọ uvuẹn otafe, ukperẹ ono rhiẹ oborẹ ọ havwọ uvuẹn ọmuduie. 13 Orhianẹ urhomu ame ọ gba-a, ọ ha omaran fọkiẹ Osolobrugwẹ. Orhianẹ urhomu ame ọgbare, ọ ha omaran fọkiẹ are. 14 Ẹgwọlọ i Kristi na o vwori yo mwu ame, fọkime ọnana yẹ oborẹ ame i vwẹruọ ye ne taghene ọhworhare owu, o hwu rẹn ihworho ephian. Omarana, ihworho ephian i hwu ne. 15 O hwu rẹn ihworho ephian, neneyo ihworho re nyerẹn i je rhe nyerẹn rẹn oma aye. Ukpomaran, aye ni ne nyerẹn rẹn ohworho ro hwu rẹn aye, ra ji rhọmọ nuhwu.
16 Omarana, nẹ ọke ọnana nyarhẹn, ame i vwa rha ha ukẹro ituakpọ ni ohworho owuorowu-u. Orhianẹ ame i tobọ ha ukẹro onyakpọ ni Kristi na bi, ame i vwa rha ha aruẹ ukẹro ọrana nie ghwomara-an. 17 Omarana, ohworho orho vwo okugbe rhẹ i Kristi na, nọyẹ ọravwọ emama ọkpokpọ. Ekwakwa ahwanren na i nyavrẹn ne, nughe! ekwakwa ekpokpọ i rhe ne. 18 Ọrẹn, ekwakwa ephian i nẹ obẹ Osolobrugwẹ rhe, ro leliri ọwan kwaphiẹrhọ nyoma i Kristi na, nọ ji yẹ ọwan iruo Uvie ọrẹ ẹkwaphiẹrhọ na. 19 Nọyẹ, Osolobrugwẹ ọ nyoma i Kristi na lele akpọ na kwaphiẹrhọ, ọrhọ mọrọn orusọ aye ba aye obọ-ọ. Habaye, nọ ji yẹ ọwan owian re ne ghwoghwo urhomedje ẹkwaphiẹrhọ na.
20 Omarana, ọwan nẹ idibo re meviẹ rẹn i Kristi na, kamẹriẹn Osolobrugwẹ ọ nyoma ọwan rẹ ihworho. Re rhiẹ ihworho re meviẹ rẹn i Kristi na, ọwan na rẹ: “Are i mo leli Osolobrugwẹ kwaphiẹrhọ.” 21 Dedevwo i Kristi na o ruẹ ọdanda-an, Osolobrugwẹ nọ hariẹ ze izobo fọkiẹ edandan ọwan, neneyo a sabu rhiẹ evwata uvuẹn obaro Osolobrugwẹ nyoma yen.