Ileta Ọreva ra ya Vwe Itu i Kọrint
2 Fọkime mi brorhiẹn ne taghene mi rha rharhumu bru are rhe, mi lẹrhẹ are mwuomarhọ-ọ. 2 Mi rha lẹrhẹ are mwuomarhọ, ọrọmo yọ nọ lẹrhẹ oma merhen mẹ? Rhẹ are ri mi suẹ omemwurhọ riẹn na? 3 Mi ya ileta vwe are neneyo mi rhe bru are rhe, ni mi je rhe mwuomarhọ fọkiẹ ihworho ri fori ni yẹ mẹ aghọghọ. Mi vwo imwẹro na taghene oborẹ ọ yẹ mẹ aghọghọ yọ ji yẹ are ephian aghọghọ. 4 Mi ya ileta vwe are uvuẹn ọke ukpokpogho ọrhẹ omiamiamo ọmudu kugbe amioviẹ buebun. Mia ya ye nẹ are i mwuomarhọ-ọ, ọrẹn nẹ are i rhe taghene mi vwo ẹgwọlọ okokodo kpahen are.
5 Vwana, orhianẹ ohworho ọ lẹrherẹ are mwuomarhọ, rhẹ omẹmẹ yọ lẹrhẹ mwuomarhọ-ọ, ukpomaran are ephian yọ suẹ omemwurhọ riẹn te erhirhiẹ ezẹko, mia gwọlọ tẹmro hwainhwai-in. 6 Ọghwọghwu ọnana rẹ ihworho buebun i tiobọnu na, o te harẹn aruẹ ọhworhare ọrana. 7 Vwana, o fori nẹ are i harhomie nẹ ẹhẹn rhe ji yẹ ye urhebro, neneyo o jo rho mwuomarhọ phan* te erhirhiẹ ro no fiobọrhotọre. 8 Omarana, mia ha urhebro rẹn are nẹ are i djeyi phia taghene are i vwo ẹgwọlọ kpahiẹn. 9 Ọnana yọ soriẹ mia ya ileta na vwe are: ni mi rhe sẹ are ina rha huphele uvuẹn ekwakwa ephian. 10 Are i rha harhomu ohworho owuorowu, mi ji harhomu ọravwọ ne. Itiọrurhomẹmro, kemru kemru mi harhomu ne, (orhianẹ mi tobọ harhomu emru owuorowu) mi rurie fọkiẹ are udaro i Kristi na, 11 neneyo Echu ọ jọ rhọ sabu fiẹ ọwan kparobọ, fọkime ọwan rhẹ igbori harẹn ena ye-en.*
12 Ọke mie riẹ i Troas ye ghwoghwo iyẹnrẹn esiri kpahen i Kristi na, uphẹn* no rhiefirhọ mẹ uvuẹn owian Ọrovwori na. 13 Ẹhẹn mẹ o totọre-e, fọkime mia mẹrẹn i Taitọs ro rhiẹ omizu mẹ-ẹ. Omarana, ni mi mroma imizu na ji riẹ i Masidonia.
14 Ọrẹn, ame a kpẹmẹ Osolobrugwẹ fọkime o sun ame ọrhẹ i Kristi na ludje efikparobọ ọke ephian, ọ ji nyoma ame kerabọ* omamọ ọrhen irherhe ọnẹyen lele ekete ephian! 15 Fọkime harẹn Osolobrugwẹ, ọwan omamọ ọrhen ọrẹ i Kristi na uvwre ihworho ri ne simirhọ ọrhẹ ihworho ri na ghwọghọ. 16 Harẹn eri na ghwọghọ na, ọwan ọrhen uhwu ro suẹn riẹ uhwu. Harẹn eri ne simirhọ, ọwan ọrhen arhọ ro suẹn riẹ arhọ. Nẹ ọrọmo yo ghini mwuovwan ekwakwa enana? 17 Ame yi mwuovwan yen, fọkime ame i vwa rhẹ ẹmro Osolobrugwẹ* jerẹ oborẹ ihworho buebun e ruẹ-ẹ. Ọrẹn, ame rẹ Osolobrugwẹ o dje rhe ri ji vwo okugbe rhẹ i Kristi na, a ta urhomẹmro, ee uvuẹn udaro Osolobrugwẹ.