Ileta Ọreva ra ya Vwe Itu i Kọrint
12 Mi na vi yenyan. Ọ vwọ rhua erere sa-a, ọrẹn mi na ta kpahen emena arudo ọrhẹ oghwolophia erẹ Ọrovwori na. 2 Mi rhe ọhworhare owu ro vwo okugbe rhẹ i Kristi na, ra kpare riẹ odjuwu ọresa ẹgbukpe 14 ri vrẹnren na. Sẹ a kpareriẹ rhẹ ugboma yen yanghene a kpariẹ rhẹ ugboma ye-en, mie rhe-e, Osolobrugwẹ yo rheri. 3 Ee, mi rhe aruẹ ọhworhare ọrana. Sẹ a kpareriẹ rhẹ ugboma yen yanghene a kpariẹ rhẹ ugboma ye-en, mie rhe-e, Osolobrugwẹ yo rheri. 4 A kpare ọhworhare ọrana riẹ i paradais, no rhon ẹmro ra na ja sabu ta, ọrhẹ ẹmro ro vwo fo nẹ onyakpọ ọ ta. 5 Mi na yenyan kpahen aruẹ ọhworhare ọrana, ọrẹn mi yenyan kpahen oma mẹ-ẹ, jokpanẹ ovwiẹlẹme mẹ ọvo. 6 Mi rha tobọ gwọlọ yenyan, mi ruie jerẹ ọvwidjigbo-o, fọkime mi na ta urhomẹmro na. Ọrẹn mi yenya-an, neneyo ohworho owuorowu o jo rho jiri mẹ vrẹn ovwan fọkiẹ oborẹ ọ mẹrẹnren uvuẹn oma mẹ yanghene oborẹ o rhon mie mẹ, 7 fọkiẹ oghwolophia oghẹnrensan ra yẹre mẹ.
Ni mi ja rha kparoma phan, na ha uvwẹn dumu uhwen mẹ, nọyẹ ọmakashe Echu, nọ rhọ ghwiẹ mẹ ọke ephian ni mi ja rha kparoma phan. 8 Ọgbesa yi mi rẹ Ọrovwori na kpahen ọnana, taghene o tiẹ uvwẹn na nẹ oma mẹ. 9 Ọrẹn, nọ ta mẹ: “Ẹghẹlẹ esiri rode mẹ o te ha wẹn, fọkime uvuẹn erhirhiẹ ovwiẹlẹme yi mia dabu dje omẹgbanhon mẹ phia.” Omarana, mi na yenyan kpahen ovwiẹlẹme mẹ rhẹ aghọghọ, neneyo omẹgbanhon i Kristi na o rhurhu mẹ jerẹ ibọkpọ. 10 Omarana fọkiẹ i Kristi na, oma nọ merhen mẹ uvuẹn erhirhiẹ ovwiẹlẹme, erhe hinmaro kpahen mẹ, uvuẹn ọke ọkanronmẹ, uvuẹn ọke ẹkparehaso ọrhẹ ọke ebẹnbẹn. Fọkime ọke mia vwiẹlẹ yi mie vwo omẹgbanhon.
11 Mi rhiẹ ọvwidjigbo ne. Are yi soriẹ, fọkime o fori nẹ are i jiri mẹ bi. Orhianẹ mie fiemru dede-e, o vwo oborẹ o djerie phia taghene inyikọ are re ruẹ kamẹriẹn aye yi mai rhomu na, i rhomu ghwẹ mẹ uvuẹn erhirhiẹ owuorowu-u. 12 Itiọrurhomẹmro, are i mẹrẹn eka ri djerie phia taghene mẹmẹ ọnyikọ nyoma mie vwo edirin omamọ uvwre are, mi ji ruẹ eka ọrhẹ igbevwunu kugbe ewian eduado. 13 Izede ọgo yi mie dje uruemru esiri rẹn ikoko ri hẹrhẹre na ghwẹ are? Emru owu ọvo mi ruru, yẹ ọrẹ mi vwe rhiẹ ohwan rẹn are. Mi rha ha ọrana ruẹ are sọ, biko are i harhomi mẹ.
14 Nughe! Ọnana yẹ ọgbọresa mie mwuegbe mi ne bru are rhe, mi ji rhiẹ ohwan rẹn are-e. Fọkime are yi mi vwo ọdamẹ kpahen, rhẹ enyerẹn are-e. Fọkime rhẹ emọ yi fori ni koko enyerẹn rẹn eri vwiẹre aye-e, ọrẹn emiemọ ye koko enyerẹn rẹn emọ aye. 15 Harẹn omẹmẹ, mi mwuegbe mi ne tiobọnu kemru kemru mi vwori ji ha arhọ mẹ kpahontọre fọkiẹ are. Mi rhe vwo ẹgwọlọ kpahen are omana, orho fo nẹ are i ji vwo ẹgwọlọ kpahen mẹ? 16 Udabọ ọrana, mie rhiẹ ohwan rẹn are-e. Ọrẹn, are na ta taghene mie “kporo ona,” mia ji “phiẹ are rhọ.” 17 Mi ghwarẹ are re nyoma ihworho mi dje vwe are? 18 Mẹmẹ yi dje i Taitọs ọrhẹ omizu ọreva ye na bru are rhe. Taitọs ọ ghwarẹ are re? Ame i vwo aruẹ ẹhẹn owu, rhomaran? Uruemru owu ọvo yo gberirẹ ame, rhomaran?
19 Are e roro avwẹdẹrhe taghene ame a chochọn oma ame rẹn are? Ame ri vwo okugbe rhẹ i Kristi, a tẹmro obaro Osolobrugwẹ. Ọrẹn imizu mi vwo ẹgwọlọ kpahen, ame e ruẹ ekwakwa enana ephian neneyo ame i sabu bọn are gbanhon. 20 Ofẹn o mwu mẹ taghene mi rhe bru are rhe, are i rhiẹ ihworho mie fiẹrorhọ-ọ, mi ji rhiẹ ohworho rẹ are e fiẹrorhọ-ọ. Ukpomaran, ẹghwọ ọnọ sabu rhirhiẹ uvwre are, omẹriọ, ekwẹre ọgbogbanhon, oghalẹ, erharhere ẹmro ra ta kpahen awọrọ, igueguon, omẹkpare ọrhẹ ọyanghan. 21 Ọkezẹko, mi rha ghwẹrioma rhe, Osolobrugwẹ mẹ ọnọ sabu phọphe mẹ obaro are. Ọkezẹko, mi ne ji mwuomarhọ fọkiẹ ihworho buebun ri ruẹ ọdandan ri vwe kwe ghwẹriẹ nẹ irueruo ijẹfuọn aye ọrhẹ irueruo ọfanrhiẹn* kugbe uruemru aghwa* rẹ aye i vwobọrhọ.