Ileta Ọreva ra ya Vwe Itu i Kọrint
13 Ọnana yẹ ọgbọresa mie bru are sa. “Neneyo nyoma ẹmro* iseri awanva yanghene awansa, kẹmro kẹmro ọnọ sabu fiotọre.” 2 Dedevwo mẹmẹ ọrhẹ are a havwiẹ vwana-a, nọ họhọre taghene mẹmẹ ọrhẹ are i havwiẹ ọgbọreva ye. Ni mia ha orhetio rẹn ihworho ri ruẹ ọdandan bi ne, ọrhẹ eri hẹrhẹre na, taghene mi rha rharhumu ghwẹrioma rhe, mi nẹro rẹn aye-e. 3 Fọkime are a gwọlọ oborẹ ono djeyi phia taghene i Kristi na ọ ghini tẹmro nyoma mẹ. Kristi na rhẹ ọvwiẹlẹ uvwre are-e, ukpomaran o dje omẹgbanhon phia uvwre are. 4 Itiọrurhomẹmro, e kperie mwu orhan no hwu ọke rọ vwiẹlẹ, ọrẹn ọye o nyerẹn vwana fọkiẹ omẹgbanhon Osolobrugwẹ. Itiọrurhomẹmro, ame i ji vwiẹlẹ jerẹ oborẹ ọ havwọ bi, ọrẹn ame rhẹ ọye ine nyerẹn kugbe fọkiẹ omẹgbanhon Osolobrugwẹ rọ wian uvwre are.
5 Are i rha damu oma are nẹ sẹ are i ji ha uvuẹn esegburhomẹmro na, are i rhe dje aruẹ ohworho rẹ are i ghini havwọ phia. Gbinẹ are e rhe taghene i Jesu Kristi o vwo okugbe rhẹ are? Jokpanẹ a tenren are ne. 6 Oborẹ mi ghini gwọlọ yẹ ọrẹ are ina mẹriẹnvwrurhe taghene a tiẹn ame-e.
7 Vwana, ame a nẹrhomo vwe Osolobrugwẹ nẹ are i je rhe ruẹ oborẹ ọsọre. Ame i vwe ruẹ ọnana ne vwo ekwerhọ kpahen ame-e. Ọrẹn, ame i gwọlọre nẹ are i ruẹ oborẹ orhomurun, ọrhọ tobọ họhọ taghene a tenren ame ne. 8 Fọkime ame i sabu ruẹ emru owuorowu rọ haso urhomẹmro na-a, ọrẹn ame ina rha hobọtua urhomẹmro na. 9 Itiọrurhomẹmro, oma ọ merhen ame kọke kọke orhianẹ ame i vwiẹlẹre, ọrẹn are i vwo omẹgbanhon. Ọnana yẹ oborẹ ame a nẹrhomo kpahan, taghene are i rhe ruẹ ewene. 10 Ọnana yọ soriẹ mia ya ekwakwa enana vwe are ọke omẹmẹ ọrhẹ are i vwa havwiẹ. Neneyo mi rhe bru are rhe, mi je rhe sianron ha omẹgbanhon Ọrovwori na ọ yẹre mẹ ruiruo. Ukpomaran, ni mi na bọn are gbanhon, ukperẹ mi na lẹrhẹ ẹhẹn are seriotọre.
11 Ọrọkẹta imizu, are i rha ghọghọ, are i rhe ruẹ ewene, are i jene bru are urhe, are i rhe roro ọrẹ okugbe, are i rhe nyerẹn ọrẹ ufuoma. Ọke ọrana, Osolobrugwẹ ẹgwọlọ ọrhẹ ọrẹ ufuoma no no lele are rhirhiẹ ye. 12 Are i rha mroma owuowọnwan ghwologhwolo.* 13 Ihworho efuanfon na ephian i ha ẹmroma aye vwe are.
14 Jenẹ ẹghẹlẹ esiri rode Ọrovwori Jesu Kristi, ọrhẹ ẹgwọlọ Osolobrugwẹ, kugbe ẹhẹn ọfuanfon na re tiobọnu rẹn ọwan, o lele are ephian rhirhiẹ ye.