Ileta Ọreva ra ya Vwe Itu i Kọrint
11 Manẹ o rhomu orhianẹ are ina sabu vwo edirin kpahen mẹ, fọkiẹ ibiẹ ughẹnghẹn mẹ. Itiọrurhomẹmro, are e ghini vwo edirin kpahen mẹ! 2 Aruẹ omẹriọ Osolobrugwẹ* o vwo kpahen are yi mi ji vwo kpahen are, fọkime mẹmẹ yi sanrẹn are rhotọre rẹn ọhworhare owu ro rhiẹ i Kristi na, neneyo mi ha are riẹn jerẹ ọgbọtọ rọ fonron ro vwo ji chiọghọ. 3 Ọrẹn, ofẹn o mwu mẹ taghene jerẹ oborẹ obodirin na ọ ha izede ona phiẹ Ivi rhọ, ana ji sabu biomu ẹhẹn are nẹ urhomẹmro ọrhẹ ẹfuọn ro fori na harẹn i Kristi na. 4 Fọkime ohworho orho bru are rhe ji ghwoghwo kpahen i Jesu ọrọrọ, rọ vẹnẹ ọrẹ ame i ghwoghwori na, yanghene arha yẹ are ẹhẹn rọ vẹnẹ ọrẹ e tiobọnu rẹn are bi na, yanghene erhe ghwoghwo iyẹnrẹn esiri rọ vẹnẹ ọrẹ are i rhiabọ dede bi na, are ne kwerhọ ye ogege. 5 Fọkime o vwo oborẹ o djerie phia taghene inyikọ are re ruẹ kamẹriẹn aye yi mai rhomu na, i rhomu ghwẹ mẹ uvuẹn erhirhiẹ owuorowu-u. 6 Ọrhọ tobọ rhianẹ mia tẹn ona ẹmro ẹta-a, ọrẹn mi vwo irherhe. Itiọrurhomẹmro, ame i djerie fiotọre rẹn are ne ọrẹ kizede kizede ọrhẹ uvuẹn i kemru kemru.
7 Ọke mia homariotọre neneyo a sabu kpare are rierun, ri mie ji ghwoghwo iyẹnrẹn esiri Osolobrugwẹ rẹn are ọphẹ rhẹ aghọghọ, mi hariẹ ruẹ ọdandan? 8 Mi lẹrhẹ ikoko erọrọ dẹrughwaroghwu erhirhiẹ ọkanronmẹ,* nyoma mie rhiabọ dede userhumu mie aye neneyo mi sabu gbodibo rẹn are. 9 Ọrẹn, ọke mie bru are rhe ji dẹrughwaroghwu erhirhiẹ ọkanronmẹ, mie rhiẹ ohwan rẹn ohworho owuorowu-u, fọkime imizu ri nẹ i Masidonia rhe, i dabu hẹrote edamẹ mẹ. Ee, uvuẹn kizede kizede, mi damoma mi ne je rhiẹ ohwan rẹn are, mi ji rhiẹ ohwan rẹn are obaro na-a. 10 Ra mẹriẹn taghene urhomẹmro i Kristi na ọ ha uvuẹn oma mẹ, mi na rha yenyan kpahen ọnana uvuẹn uvwrotọre Akeya. 11 Mesoriẹ? Fọkime mie vwo ẹgwọlọ kpahen are-e? Osolobrugwẹ o rheri taghene mi vwo ẹgwọlọ kpahen are.
12 Ọrẹn, mi ne rhe ruẹ oborẹ mie ruẹ bi, neneyo mi fiobarhọ uruemru omeru ihworho ri gwọlọre nẹ ame ọrhẹ aye i rhiẹ ẹdẹre uvuẹn ekwakwa* aye a ha yenyan. 13 Fọkime aruẹ ehworhare erana inyikọ efian, era phiẹ awan rhọ re ji ruẹ kamẹriẹn aye inyikọ i Kristi. 14 A vwa rha ta, fọkime Echu dede o ruẹ omayen kamẹriẹn ọye ọmakashe ude. 15 Omarana, o vwo rho gbe ọwan unu ọke idibo yi, e ruẹ kamẹriẹn aye idibo re ruẹ oborẹ ọgbare-e. Ọrẹn obẹtaye, ana kwosa rẹn aye lele ewian aye.
16 Mia rharhumu ta ye: Ohworho owuorowu o vwo roro taghene mẹmẹ ọvwidjigbo-o. Are i rha tobọ roro omaran, are i gbe rhiabọ dedi mẹ jerẹ ọvwidjigbo neneyo mi sabu yenyan ibiesuọn. 17 Vwana, mi vwa tẹmro jerẹ ohworho rọ nyalele udje Ọrovwori na-a, ọrẹn mia tẹmro jerẹ ọvwidjigbo rọ yenyan rọ ji hẹroso omayen. 18 Ra mẹriẹn taghene ihworho buebun a ha ekwakwa akpọ na yenyan na, mi na ji yenyan. 19 Ra mẹriẹn taghene are i vwo “ọhọ” omamọ na, are ne rhiabọ dede ivwidjigbo na rhẹ omamerhomẹ. 20 Itiọrurhomẹmro, are e vwo edirin kpahen kohworho kohworho rọ hare are ruẹ evrẹn, kohworho kohworho rọ kpare ekwakwa are ha, kohworho kohworho rọ mọren oborẹ are i vwori, kohworho kohworho rọ ha omayen ruẹ onini rẹn are, ọrhẹ kohworho kohworho rọ ghwiẹ ughwaro are.
21 Emru ofa rẹn ame rẹ ame a tẹmro enana, fọkime ihworho ezẹko e ni ame jerẹ evwiẹlẹ.
Ọrẹn, orhianẹ ihworho ezẹko e fiudugbere yenyan, mi ne ji fiudugbere yenyan, arha tobọ ni mẹ jerẹ ọvwidjigbo dede. 22 Aye itu i Hibru? Mẹmẹ jẹ onyẹ i Hibru. Aye emọ Izrẹl? Mẹmẹ ọmọ Izrẹl. Aye emọ* Ebraham? Mẹmẹ jẹ ọmọ Ebraham. 23 Aye idibo i Kristi? Ni mia kpahanrhọ jerẹ ọrhuẹ, fọkime mi tobọ rhiẹ odibo i Kristi ghwẹ aye: Mi wian ewian buebun, e firi mẹ rhẹ ekanron ọgbọ buebun, e kperi mẹ ọgbọ buebun ra na ja sabu kele, mi ji joma hwu ọgbọ buebun. 24 Ọgbọ isionrin yẹ itu i Ju na i ha ephianphian fa mẹ ọgbọ 39. 25 Ọgbesa yẹ aye i ha ekpọ kpe mẹ, e firi mẹ ọgbọ owu, ọgbesa yẹ ọkuna mi ruoro o rhueri, mi ji ghwọghọ ason owu ọrhẹ ẹdẹ owu rhẹ uvuẹn erhẹrhẹ urhie ọduado. 26 Mi nya ugbonya ọgbọ buebun, mi dẹrughwaroghwu imwofẹn uvuẹn urhie, imwofẹn nẹ abọ ihi, imwofẹn nẹ abọ ihworho mẹ, imwofẹn nẹ abọ egbamwa na, imwofẹn uvuẹn emwa na, imwofẹn uvuẹn ato, imwofẹn uvuẹn urhie ọduado, imwofẹn uvwre imizu ra mọrenfian. 27 Mi wian ewian egbogbanhon udabọ ukpokpoma, ọgbọ buebun mi vwa merhẹn uvuẹn aso-on, mi zinrin orhọmo, uhrun ame ọ ji ka mẹ, ọgbọ buebun mi vwa mẹrẹn emaren ria-a, erinrin ọ kpare mẹ, ewun ọ ji kanren mẹ.*
28 Gbobọhiẹn ekwakwa erana mi dẹrughwaroghwu na, o ji vwo oborẹ o kpokpo ẹhẹn mẹ kẹdẹkẹdẹ: nọyẹ ọfiamu kpahen ikoko na ephian. 29 Ọrọmo yọ vwiẹlẹre, ọrẹn mia vwiẹlẹ-ẹ? Ọrọmo yo seri rẹ ephan o vwo biomi mẹ?
30 Orhianẹ mi na vi yenyan, mi na ha ekwakwa re dje ovwiẹlẹme mẹ phia yenyan. 31 Osolobrugwẹ ọrhẹ Ọsẹ Ọrovwori Jesu, ro rhiẹ Osolobrugwẹ ro fori na ha ujiri riẹn bẹmẹdẹ, o rheri taghene mi vwa mọrenfia-an. 32 Uvuẹn i Damaskọs, igọvunọ rọ ha otọre usun Orodje Aritas, nọ dẹrẹ anurẹsẹ amwa i Damaskọs neneyo o mwu mẹ. 33 Ọrẹn, ne firi mẹ rhẹ okalokpọ ji kpare mẹ ruotọre nyoma ivakpo owu rọ ha ugbomoghwa amwa na, ni mi zẹ vabọ ye.